BANTU batela Nicaragua amba kyalo kya bizhiba ne mitumba itubika. Mu kino kyalo mo muji kizhiba kikatampe mu Central America kitelwa’mba Nicaragua. Bangikazhi ba mu kino kyalo batela kino kizhiba’mba Cocibolca, kulumbulula’mba “Kalunga ka mema atobala.” Kino kizhiba kiji na makuji avula bingi kabiji kyo kizhiba kijitu na mema awama kabiji mutanwa ne masabi akatampe apusana pusana.

Mu kino kyalo kiji mu Central America mo muji mpunzha itelwa’mba Kitulu kya Mosquito. Ino Mpunzha yabaya makilomita 65 kufuma kitulu kya ku musela kuya na kufika ku kyalo kya Honduras. Bena Miskito (nembelo ikwabo ya kyamba kya Mosquito) bo bantu bamo bekala mu kyalo kya Nicaragua kabiji baishile mu kino kyalo kala bazungu saka bakyangye kwiyamo mu myaka kitota kya bu 16.

Bena Miskito bomvwañana bingi kabiji bisho byabo byapusanako na bya bakwabo. Mulaka wa Miskito kechi uji na byambo bya kwichilako banabakazhi ne banabalume ne. Mu mizhi banyike beta bakikulumpe kwingijisha kyambo kya kuba’mba nkambo, balongo babo  nangwa ne. Kisho kya kala kingijisha ba Miskito mwanamukazhi pa kwimuna balunda naji nangwa balongo banji, ukinka jibuta janji ku jibuta ja mukwabo. Apa bino, mwanamukazhi wakutendekelapo kwimuna mukwabo watwezha mwela wavula mu myona.