NANCHI mwaleka kuya mu bupopweshi bo mwayangamo nyi? Inge byo byo kiji kechi yenu bonka ne. Mu byalo byavula, bantu bamba’mba ‘kechi baji mu bupopweshi ne’ babena kuvujilakotu, kabiji kino kibena kumwesha’mba bupopweshi bubena kuya na kuzhiya. Byalo bimo byanembwa panshi po.

Kuji bintu byavula bingi bibena kulengela bantu kushikwa bupopweshi. Bimo bibena kulengela ke bukapondo ne bumbanzhi butundaikwa na bupopweshi, bulalelale bubena kuba bantangi ba bupopweshi, ne bintutu bikwabo byavula, byo bibena kulengela bantu bavula kufuma mu bupopweshi. Abino bintu byavwangamo bino byalondelapo:

• Bunonshi: Buku wa kuba’mba Global Index of Religion and Atheism washimuna’mba: “Muntu inge wanonka bingi kechi utako muchima ku bya bupopweshi ne.” Kino kishinka, mambo mu byalo byavula, bantu banonka bingi. Shayuka wa bya bunonshi aye John V. C. Nye waambile’mba mu mapunzha amo, bantu “bekala bwikalo bwawama bingi kya kuba inge myaka ya kala, mfumu wayile bingi nkuwa wakonsheshe kwibobila kichima.”

  BYAMBA BAIBOLO: Baibolo waambijile jimo amba mu “moba a kupelako,” bantu bakaleka kutemwa Lesa ne bakwabo, bino bakatemwako mali ne bya kisangajimbwe. (2 Timoti 3:1-5) Byo ayukile kizumba kiji mu kunonka, nembi wa Baibolo umo walombele kwi Yehoba Lesa amba: “Kange mumpe buyanji nangwa bunonshi ne.” Mambo ka o alombejile bino? Watwajijile kwamba’mba: “Kuchina’mba nakekuta ne kwimukana.”—Byambo bya Maana 30:8, 9.

• Bisho bya bupopweshi ne byubilo byatama: Bantu bavula, kikatakata banyike, bamona bupopweshi amba kutayatu kimye kabiji amba kafwako kyo bamwenamo ne. Bakwabo baleka kuketekela bupopweshi. Mukulumpe wa kipamo kya Humanist Society Scotland aye Tim Maguire waambile’mba: “Inge mwalanguluka pa byauba machechi pa myaka yavula, bantu baleka kuyamo mambo bamona’mba machechi kechi abena kukwasha bantu kwikala na byubilo byawama ne.”

  BYAMBA BAIBOLO: Yesu Kilishitu witujimwineko na mambo a bupopweshi bwa bubela amba: “Mukebayukila ku bipangwa byabo. . . . Kichi kyawama kipanga bipangwa byawama, pakuba kichi kyatama kipanga bipangwa byatama.” (Mateo 7:15-18) “Bipangwa byatama” byavwangamo kuvwangakanya bupopweshi na bya bumulwila ntanda ne kuswisha byubilo bifichisha Lesa ku muchima, nabiji banabalume kusongola banabalume bakwabo ne banabakazhi nabo byonkabyo. (Yoano 15:19; Loma 1:25-27) Kabiji byavwangamo kuleka kulondela mafunde awama aji mu Binembelo ne kutendeka kulondela bisho bya bantu byabula kufwainwa. (Mateo 15: 3, 9) Yesu waambile’mba: “Jiisha twana twami twa mikooko.” (Yoano 21:17) Pano bino, bantangi ba bupopweshi bavula lelo jino babena kulengela bantu kwikala na nzala ya kukeba byambo bya Lesa.

•   Bupopweshi ne mali: Kipamo kya mu America kitala pa kukeba keba bishinka (Pew Research Center) kyataana kuba’mba bantu bavula bingi balanguluka’mba bupopweshi bwatatu muchima pa mali. Kikwabo, bantangi ba bupopweshi bamo bekala bwikalo bwa kwitobwela, bino mikooko yabo na kumanama. Mu muzhi umo wa mu Germany muji bantu bavula baya mu machechi bapita mu makatazho pa kukeba bikebewa mu bwikalo, ntangi wabo babena kumupamo mambo a kwikala bwikalo bwa ntentente. Buno bwikalo bwazhingijisha Bakatolika bavula bingi bekala mu ino mpunzha. Kabiji pepala wa byambo wa GEO washimwine’mba mu kyalo kya Nigeria, “na mambo a kuba’mba muji bantu 100 milyonyi bayanda bingi, bwikalo bwa kwitobwela bwa bantangi ba bupopweshi bwatendeka kuleta makatazho.”

  BYAMBA BAIBOLO: Nembi wa Baibolo Paulo wanembele’mba: “Kechi tumwenamo nsubu mu byambo bya Lesa ne.” (2 Kolinda 2:17, tubyambo twa munshi) Nangwa kya kuba Paulo wajinga musapwishi wayile bingi nkuwa mu kipwilo kya bena Kilishitu batanshi, javula waingila mingilo yakosa bingi pakuba’mba abule kutwika bakwabo kisendwa kyanema. (Byubilo 20:34) Byubilo byanji byamwesheshe’mba wakookelanga mukambizho wa kwa Yesu wa kuba’mba: “Mwatambwiletu kyatu, ne anweba panaitu kyatu.”—Mateo 10:7, 8.

Na mambo a kulondela ano mafunde, Bakamonyi ba kwa Yehoba kechi balipilisha bantu pa kwibapa mabuku abo nangwa pa kwibafunjisha Baibolo ne. Kabiji kechi batambula mali ku bantu kimye kya kupwila ne. Mali o bengijisha afuma mu bupe bupana bantu bwa kwifuukwila bene.—Mateo 6:2, 3.

Myaka ya kunyuma, bantu kechi balangulukangapo’mba bupopweshi bukekala na makatazho avula ne. Pano bino, Lesa mwine wamwene kala kino kabiji wikilumbulwijile jimo mu Baibolo. Kwingijisha ñambilo ya kifwanyikizho, Lesa waesakenye bupopweshi bonse bwabula bukishinka ku mwanamukazhi pite utelwa’mba “Babilona Mukatampe.”—Lumwekesho 17:1, 5.

Ino ñambilo yayilamo mambo bupopweshi bwa bubela nangwa kya kuba bamba’mba ba kishinka kwi Lesa, bino bechina kala na bakalama ba pano pa ntanda pa kuba’mba bekale na bulume ne bunonshi. Lumwekesho 18:9 waamba’mba: “Bamfumu ba pa ntanda baubile nanji bulalelale.” Jizhina ja kuba’mba “Babilona” jafwainwa, mambo mafunjisho a bupopweshi bwa bubela, nabiji a kuba’mba mweo kechi ufwa ne, balesa basatu, ne bya manga, afuma mu Babilona wa kala, muzhi mwatendekejile bupopweshi bwa bubela ne bya bulozhi. * —Isaya 47:1, 8-11.

Muzhi Mukatampe wa Babilona waonawinwe kimye mema ajinga mu lufulwa mukatampe wafumyanga mema mu Mukola wa Ufelata kyo ‘aumine’ ne kulengela nzhita ya bena Media ne Pelisha kushinda muzhi. (Yelemiya 50:1, 2, 38) Kine, muzhi wa Babilona bamonawinetu bufuku bumo.—Danyela 5:7, 28, 30.

Ne Babilona Mukatampe naye waikala pa “mema avula.” Baibolo witubuula’mba ano mema emenako “mitundu ya bantu ne mabumba,” ko kuba’mba biumbi bya bantu bitundaika bupopweshi bwa bubela. (Lumwekesho 17:1, 15) Baibolo waambijile jimo amba  ano mema a kifwanyikizho akooma, kimwesha kuba’mba lonaiko lwa Babilona wa ano moba katatakatu lufike kabiji kikobiwatu nobe mu kukopa kwa jiso. (Lumwekesho 16:12; 18:8) Pano bañanyi bakonauna Babilona? Balunda nanji bamulwila ntanda bonka bamutemwa, bakamushikwa. Bakamonauna, nangwa’mba bakaja nyama yanji ya kifwanyikizho.—Lumwekesho 17: 16, 17. *

Na mambo a kuba’mba Babilona Mukatampe bakamonauna, Lesa witujimunako amba: “Anweba bantu bami, lupukaimo mwi aye, inge kechi mukeba kwivwangamo mu bubi bwanji ne, kabiji inge kechi mukeba kupitamo mu binkunka byanji ne.” (Lumwekesho 18:4) Inge mwamona, kyambo kya kuba’mba “inge,” kyatongolwa bimye bibiji. Kya kine, lujimuno lwa Lesa ke lwa kukwasha bantu bo bafichisha ku muchima na mafunjisho atama kabiji bakeba kutalwa bulongo kwi Lesa, baji nobe Gaffar ne Hediye batongolwa ku ntendekelo ya kino kibaba.

Saka akyangye kutendeka kufunda Baibolo, Gaffar wayukile kuba’mba wafwainwetu kukookela Lesa na mambo a moyo. Waambile’mba: “Kyantekeneshe bingi pa kufunda kuba’mba Yehoba ke Lesa wa butemwe, ne kuba’mba ukeba’mba tumukookelenga na mambo a kumutemwa.” (1 Yoano 4:8; 5:3) Hediye waikele na mutende wa mu milanguluko kimye kyo afunjile’mba Lesa kechi ye walengejile’mba ekale mwana wa kishale ne, ne kuba’mba bintu byo apichilengamo kechi byanengezhejilwe jimo ne. Byambo biji pa Kinembelo kya mu Baibolo kya Yakoba 1:13 bya kuba’mba Lesa kechi weseka bantu na bintu byatama ne, byamutekeneshe bingi. Aye ne Gaffar byo bafunjile bukine bwa mu Baibolo bafuminemo mu “Babilona.” —Yoano 17:17.

Inge Babilona Mukatampe waonaunwa, kafwako kyatama kikamwekela boba bakookela mukambizho wa kulupukamo ne ‘kupopwela Tata na mupashi ne na bukine’ ne. (Yoano 4: 23) Baji na luketekelo lwa kumona pano pa ntanda byo “pakakumbana maana a kuyuka Yehoba byonkatu mema byo akumbana mu kalunga ka mema.”—Isaya 11:9.

Kya kine, mpelo ya bupopweshi bwa bubela ne bipangwa byabo byatama ikafika, mambo Lesa kechi “ubepa” ne. (Titusa 1:2) Pakuba bupopweshi bwa kine bukatwajijila myaka ne myaka!