BIJIMWA bingijisha jishinda jakobankana bingi pa kulenga kajo kupichila mu kufumya bulume ku juba. Bafunda pa bilengwa bimo bataana kuba’mba bijimwa byabanya bulongo kajo ko byafwainwa kwingijisha kimye kya bufuku.

Langulukai pa kino: Kimye kya mute, bijimwa bingijisha mwela watama (carbon dioxide) pa kulenga kajo. Bufuku, bijimwa byavula bingijisha kajo ko bilenga mute, kuba bino kwibikwashako kubula kwikala na nzala ne kutwajijila kwingila bulongo ne kukoma. Kabiji bingijisha kano kajo pa kimye kyafwainwa, kechi byuba bino lubilo lubilo nangwa pachepache ne, pa kuba’mba bikengijishe kajo kavula kimye kya lukelo po bikala na mwingilo wa kulenga kajo kakwabo kavula.

Bataaine bino bishinka byo bafunjilenga pa kijimwa kyapasha kibangankonde. Bashayuka bataaine kuba’mba kino kijimwa kyabanya bulongo kajo kakyo kwesakana na kulepa kwa bufuku, nangwa bwaikala na maola 8, 12 nangwa 16, pa kuba’mba kafike ne lukelo. Kyamweka kino kijimwa kyabanya kajo ko kikala nakyo kwesakana na kimye kishalako saka bukyangye kukya, onkao mambo, kiyuka kuvula kwa kajo ko kyafwainwa kwingijisha.

Pano bino bijimwa biyuka byepi kajo ko byafwainwa kulama, kabiji bipima byepi kubaya kwa kimye? Ñanyi jishinda jo bingijisha pa kwabanya kano kajo? Bakebakeba bishinka bakatokeshapo bulongo kulutwe na lwendo.

Mwalangulukapo’mba ka? Nanchi bulume bwa bijimwa bwa kwabanya kajo bwaishilekotu bwine nyi, inyi bwalengelwe?