Bibena Kumweka Mu Ntanda
Kwamba pa Europe
Mu Europe, kala bantu batemenwe bingi bya bupopweshi, pano luno kechi batako maana ne. Nangwa byonkabyo, mwakonsha kukumya bingi pa kumvwa masawakya abena kufuma ku Europe byo abena kufikizha byanembwa mu Baibolo.
Mwana byo amwenamo mu jiwi ja bainanji
Bashayuka mu muzhi wa Milan mu kyalo kya Italy bashiinwa kuba’mba baana basemwa babishi bebakwasha kwikala bulongo kupichila mu kumvwa jiwi ja bainabo jo bakopela mu kakiñambañamba ko bakashila pa kuboko kwa mwana saka akiji mu kipatela. Kino kiñambañamba kisombolola byaumvwanyikanga jiwi ja bainanji kimye kyo ajinga munda saka akyangye kusemwa. Bafunda pa baana babacheche bataaine kuba’mba “inge mwana watendeka kumvwa jiwi ja bainanji saka akijitu mucheche, kilengela mwana wasemwa mubishi kukoma bulongo.”
BYAMBA BAIBOLO: “Natekanya ne kuzhindamika mweo wami nobe mwana ye basumuna waikala ne inanji.”—Salamo 131:2.
Kutundaika baana kwimona kunema kukila bakwabo
Byo bakebele kebele bishinka ku baana 565 baji na myaka ya kusemwa 7 kufika ku 11 mu kyalo kya Netherlands, bataaine kuba’mba baana baji na bansemi bebamona kuba’mba “banema bingi kukila bakwabo” kabiji amba bafwainwa “kwibanemeka bingi” bo baana bo bataaine na lukatazho lwa kulanguluka’mba bakila bakwabo. Wanembele uno sawakya waambile’mba: “Baana bomvwina bansemi babo inge bebabuula’mba banema bingi kukila bakwabo. Ino ñambilo kechi yakonsha kwibakwasha mu bwikalo bwabo nangwa bantu bo bakekalanga nabo ne.”
BYAMBA BAIBOLO: “Mbena kwambila yense uji mwi anweba namba, kange alangulukenga kukila po afwainwa kwilangulukila ne, poso kwikala na milanguluko yawama.”—Loma 12:3.
Bantu baji na myaka ya kusemwa 100 ne kukilapo baji na luketekelo lwakosa
Bashayuka pa Sukulu Mukatampe wa Heidelberg mu Germany baambile’mba, nangwa kya kuba bantu bakila pa myaka 100 bakolwa kabiji bakankalwa kwingila mingilo imo, bino bakeba kutwajijila kwikala na bumi. Pa bantu bana baji na ino myaka bo baipwizhe, basatu bambile’mba bakeba kutwajijila kwikala na bumi, kabiji beseka kwikala kwa kubula binyenge. Bano bakote bafikizha ne bikonkwanyi byo bebikila mu bwikalo, baji na luketekelo lwa kuba’mba bakatwajijila kwikala na bumi, bayuka ne bantu kyo baikelako, kabiji batwajijila kulondela mafunjisho a bupopweshi ne kwikala na byubilo byawama.
BYA KULANGULUKAPO: Kwesakana na byaamba Musapwishi 3:11, muchima wa kukeba kwikala myaka ne myaka umwesha ka?
