BYAMBAPO BAIBOLO
Mweo
Bupopweshi bwamba bintu byapusana pusana pa biji mweo ne kimweka inge muntu wafwa. Pano bino, Baibolo walumbulula bulongo bino bintu.
Nanchi mweo kechi ufwa nenyi?
BYAMBA BANTU
Bantu bavula baitabila’mba mweo kechi ufwa ne. Bamo baitabila’mba mweo utwajijilatu na kusemenwa mu bilengwa bikwabo inge mubiji wafwa. Bakwabo baitabila’mba mweo uya ku mpunzha ikwabo, nabiji mwiulu nangwa ku helo.
BYAMBA BAIBOLO
Baibolo kechi waambapo’mba mweo utwajijila kwikala na bumi ne. Javula wamba’mba mweo ufwa. Ngauzhi Ezikyo ye baingijishe kwi Lesa kunemba buku umo wa mu Baibolo waambile’mba mweo ufwa. Pakwabo, Baibolo waingijisha kyambo kya kuba’mba “mweo wafwa” pa kwamba pa kitumbi. (Bena Levi 21:11, tubyambo twa munshi) Kya kine, Baibolo kechi ufunjisha’mba mweo utwajijila kwikala na bumi ne.
“Mweo ulenga mambo ye ukafwa.”—Ezikyo 18:20.
Nanchi mweo ne mubiji byapusana nyi?
BYAMBA BANTU
Mweo wikala mu mubiji inge muntu uji na bumi, bino ufumamo inge muntu wafwa.
BYAMBA BAIBOLO
Baibolo pa Ntendekelo 46:18 waamba’mba mwanamukazhi wasemene “myeo,” ko kuba’mba bantu baji na bumi. (Ntendekelo 46:18, tubyambo twa munshi) Kyambo kine kya Kihebelu kyo baingijisha mu Baibolo amba “mweo” kyakonsha kutuntululwa’mba “kintu kipema.” Kimye kimo, kino kyambo bekingijisha ne pa kwamba pa banyama. Kabiji Baibolo waamba pa mweo amba ukeba kuja. (Mpitulukilo ya mu Mizhilo 12:20, tubyambo twa munshi) Inge mweo ne mubiji byapusana, nanchi wakonsha kupema nangwa kuja nyi? Mu Baibolo kyambo kya “mweo” kilumbulula muntu mumi, kokuba’mba mubiji, milanguluko, ne byubilo.
“Bano bo bo asemene . . . bantu bonse pamo bajinga 16 [Nangwa’mba myeo 16, tubyambo twa munshi].”—Ntendekelo 46:18.
Ki ka kimweka ku mweo inge muntu wafwa?
BYAMBA BAIBOLO
Inge muntu wafwa, “mu Kilende . . . kechi muji kwingila mingilo, kulanguluka, kuyuka kintu nangwa kwikala na maana ne.” (Musapwishi 9:10) Binembelo bitubula’mba inge muntu wafwa, “ubwela ku mushiji; pa jonkaja juba milanguluko yanji yonaika.” (Salamo 146:4) Mweo wafwa kafwako kyo oba ne, o ene mambo Binembelo javula o byambila pa bafwa amba ‘balaala tulo.’—Mateo 9:24.
MAMBO KA O KYANEMENA?
Umvwe muntu ye mwatemwa wafwa, mukeba kuyuka mikumbu ya mepuzho nabiji a kuba’mba: Baya kwepi? Baji byepi? Nanchi babena kuyanda nyi? Byo kiji kuba Baibolo waamba’mba bafwa kafwako kyo bayuka ne, kitutekenesha bingi mambo batemwe betu bafwa kechi babena kuyanda ne. Kabiji kikwabo kitutekenesha ke kuyuka kuba’mba Yehoba walaya’mba ukasangula bafwa.—Isaiah 26:19.
“Bantu bafwa kafwako kintu nangwa kimo kyo bayuka ne.”—Musapwishi 9:5.
Mwakonsha Kutemwa
MEPUZHO A MU BAIBOLO A KUMBULWA
Nanchi Lusanguko lo lu Ka?
Kampe mwakonsha kukeba kuyuka bakasangulwa.
MEPUZHO A MU BAIBOLO A KUMBULWA
Nanchi Mweo ye mu ka?
Nanchi mweo kintu kiji mukachi kenu nyi? Nanchi mweo ukatwajijila kwikala na bumi inge mwafwa nyi?
