“MAKONDO onse ajingako kala kechi aesakana pamo na nkondo ijiko luno mu Europe ne.” Abino byo byaambile Kyamba kya Usopa kya September 1, 1915, pa kulumbulula nkondo itanshi ya ntanda yonse yabikile byalo 30 mu kañumbwañumbwa. Na mambo a malwañano ajingako, Kyamba kya Usopa kyaambile’mba: “Mwingilo wa [Bufumu] waimanako pacheche, kikatakata mu Germany ne France.”

Na mambo a kuba’mba nkondo yajingatu ntanda yonse, Bafunda Baibolo kechi baumvwishishe jifunde ja bena Kilishitu jaamba pa kubula kwivwanga milukuchi ya ntanda ne. Nangwa byonkabyo, bafuukwilepo kusapwila mambo awama. Wilhelm Hildebrandt byo enengezhezhenga kwingilako uno mwingilo wa Bufumu, walombele kuba’mba bamutumine matalakiti a The Bible Students Monthly mu Kifulenchi. Kechi wayile mu France na kwingila bukoputala (musapwishi wa kimye kyonse) ne, bino wajinga mushilikale mwina Germany. Uno muntu wamwekelenga nobe mulwanyi, wavwajile bivwalo bya bushilikale wasapwijile byambo bya mutende ku bena France bapichilenga.

Makalata anembelwe mu Kyamba kya Usopa amwesha’mba Bafunda Baibolo bavula bena Germany bajinga na kizaku kya kusapwila mambo awama a Bufumu saka baji bashilikale. Mulongo Lemke waingilanga ku maato akatampe a nkondo, waambile’mba bakwabo batanu mo baingijilanga baswile mambo awama. Wanembele’mba: “Nangwatu mu bwato, namwenamo byawama mu kutota Yehoba.”

Georg Kayser wayile na kulwa nkondo, bino pa kubwela ku nzubo wajinga kalume wa Lesa wa kine. Ki ka kyamwekele? Kyamweka watambwileko buku wa Bafunda Baibolo, kabiji watambwijile bukine bwa Bufumu na muchima yense, kabiji walekele kulwa nkondo. Kepo atendekele kwingila mwingilo wa kubula kwingijisha mata. Nkondo byo yapwile, waingijile bupainiya pa myaka yavula.

Nangwa kya kuba Bafunda Baibolo kechi baumvwishishe byo kilumbulula kubula kwivwanga mu milukuchi ya ntanda ne, byubilo byabo byapusene bingi na bantu bavula batemenwe nkondo. Bamulwila ntanda ne bantangi ba bupopweshi baimikilenga mabandela a byalo, bino Bafunda Baibolo batumbijikilenga “Mfumu wa Mutende.” (Isa. 9:6) Nangwa kya kuba bamo  bevwangilengamo mu bimo byaubilenga bantu, bino bavulukilenga kishinka kyanema kyaambilepo Ufunda Baibolo aye Konrad Mörtter amba: “Byo nafunjile mu Mambo a Lesa byankwashishe kuyuka’mba mwina Kilishitu kechi wafwainwa kwipayañana ne.”—Lupu. 20:13. *

Mu Germany, mwajinga mizhilo yabujile kuswisha bantu kukana kutwela bushilikale, Bafunda Baibolo kukila pa 20 bakaine kwingila nkito ya bushilikale. Bamo bebamwenanga’mba bavulañana, nabiji Gustav Kujath, bamutwajile ku Kipatela kya bakonye ne kumupa muchi wa bukonye. Hans Hölterhoff naye wakaine kwingila bushilikale, bamukashile, kabiji mu kaleya namo wakaine kwingila mingilo yonse yatundaikilenga nkondo. Baota ba kaleya bamukashile kya kuba ne mbavu ke ikole. Byo atwajijiletu kukana kutundaika ino mingilo, bamuzakamishe amba basakumwipaya. Nangwa byonkabyo, Hans watwajijile kukana kufikatu ne nkondo byo yapwile.

Balongo bakwabo bajinga mu kaleya bakaine nkito ya kwingijisha mata kabiji balombele kwibapako nkito ya kubula kwingijisha mata. * Johannes Rauthe wakaine kwingijisha mata bamutumine kuya na kwingijila mupita shitima. Konrad Mörtter bamupele mwingilo wa kwingijila mu ofweshi wa badokotala, kabiji Reinhold Weber waingijilenga bumanase. August Krafzig waumvwine bingi bulongo mambo mingilo yanji kechi yamulengejilenga kuya ku nkondo ne. Bano Bafunda Baibolo ne bakwabotu bafuukwilepo kwingijila Yehoba mambo a kuba baumvwishishe byo kilumbulula kutemwa bantu ne bukishinka.

Na mambo a kubula kwivwanga mu nkondo, Bafunda Baibolo bebalondaizhanga bingi ku ba mu kafulumende. Myaka yalondejilepo, Bafunda Baibolo mu Germany bebatwajilenga ku bije na mambo a mwingilo wabo wa kusapwila. Pa kuba’mba bebakwashe, ofweshi wa musampi mu Germany walengele kavoto ka kwimenako bakamonyi mu bije bya mambo pa Betele mu Magdeburg.

Bakamonyi ba kwa Yehoba pachepache batendekele kumvwisha byo kilumbulula bena Kilishitu kubula kwivwanga mu milukuchi ya ino ntanda. Nkondo ya kibiji ya Ntanda yonse byo yatendekele, kechi bevwangilemo nangwatu pacheche mu mingilo ya bushilikale ne. Onkao mambo, bebamwenenga’mba balwanyi ba kyalo kya Germany kabiji bebamanyikile kya mama nafwa. Abino byo byo tukambapo mu bibaba bikalondelapo mu mutwe wa kuba’mba “Kufuma mu Butala Bwetu.”—Kufuma mu butala bwetu mu Central Europe.