BAFUNDA Baibolo bajitu pamo na bashayuka bakeba ngolode. Bano bafunda Baibolo bafwainwa kwingila na ngovu ne kutwajijila kukeba keba bishinka mu Binembelo pa kuba’mba bataane maana alumbuluka. Onkao mambo, twakonsha kufunjilako ka ku mashinda asatu o bengijisha pa kukeba ngolode?

Fwanyikizhai kuba’mba mubena kwenda kwapela mukola, kabiji mwamona kibena kumweka nobe ka jibwe kabena kubekauka na mute. Mwabandama kabiji mwaumvwa bulongo amba mwataana ngolode. Kakeepa kukila kamutwe ka jinkishi bino kanema bingi. Onkao mambo, mwakenkenta kuba’mba kampe musakumonapo kakwabo.

Kyo kimotu, kampe muvuluka mu myaka ya kunyuma, kalume wa Yehoba umo waishile pa nzubo yenu na kwisamba nenu byambo bya luketekelo biji mu Baibolo. Kyamweka muvuluka kimye kitanshi kyo mwataaine mafunjisho anema a mu Mambo a Lesa aji nobe ngolode. Kampe kino kyamwekele kimye kyo mwamwene jizhina ja Lesa ja Yehoba mu Baibolo. (Sala. 83:18) Nangwa kampe kimye kyo mwafunjile kuba’mba mwakonsha kwikala mulunda na Yehoba. (Yako. 2:23) Ponkapotu mwayukile’mba mwataana kintu kyanema kukila ngolode. Kabiji kampe mwakebelenga kufunjilapo ne mafunjisho akwabo a mu Baibolo aji nobe ngolode.

Tumabwe tucheche twa ngolode bimye bimo mwakonsha kwitutaana ku tukola tucheche ne ku mikola ikatampe. Uno ngolode bamutela’mba ngolode wa mu mema. Bimye bimo, bantu bakeba mabwe bakonsha kutaana ngolode wavula bingi upotwa mali avula.

Byo mwatendekele kufunda Baibolo na Bakamonyi ba kwa Yehoba, kampe mwaumvwinengatu nobe bantu bakeba mabwe bataana ngolode yavula. Kulanguluka languluka pa kyepelo kimo kimo kya mu Baibolo, kyamweka kwimulengejile kuyukilako byavula, kabiji kino kyakoseshe bulunda bwenu na Lesa. Byo mwatwajijile na kulanguluka languluka pa bukine bwa mu Baibolo, mwafunjile kufwenya kwipi ne Yehoba ne kutwajijila kwikala mu butemwe bwanji na luketekelo lwa kwikala na bumi bwa myaka ne myaka.—Yako. 4:8; Yuda 20, 21.

Byonkatu muntu ukeba mabwe byo atwajijila na kukeba keba ngolode washikama pa mema, kyamweka mwibikileko bingi kukeba keba bya buneme  bya mu Mambo a Lesa. Byo mwafunjile bukine bwanema bwa mu Baibolo, mwafuukwilepo kwipana ne kubatizhiwa.—Mat. 28:19, 20.

Muntu ukeba mabwe, wakonsha kutaana tumabwe tucheche twa ngolode mukachi ka mabwe akatampe. Mu ano mabwe mwakonsha kutaanamo ngolode wavula bingi ye mwafwainwa kupoya ne kwialala pa kuba’mba mufumyemo ngolode. Kimye kitanshi, kechi mwakonsha kumumona ngolode uji mu mabwe akatampe ne. Mambo ka? Mambo mu mabwe akatampe mwakonsha kwikalatu tumabwe twa ngolode twanema magalamu 10. Nangwa byonkabyo, ukeba ngolode utwajijila na kupoya mambo wayuka’mba ukamwenamo.

Kikebewa kwibikako bingi inge kya kuba muntu wapwisha “kufunda mafunjisho atanshi aamba pe Kilishitu.” (Hebe. 6:1, 2) Mwafwainwa kwingila na ngovu pa kuba’mba mumvwishe bishinka bikwabo ne mafunjisho anema pa lufunjisho lwa Baibolo lwa pa bunke. Onkao mambo, mwakonsha kuba byepi pa kuba’mba mumwenengamo mu lufunjisho lwa Baibolo lwa pa bunke, nangwa kya kuba mwatendekele kala kufunda Binembelo?

Kebeshainga kufunda. Taingako muchima ku bishinka byonse. Twajijilai kwibikako, kabiji mukataana bya buneme bya mu Binembelo, ko kuba’mba maana a Lesa ne lutangijilo lwanji. (Loma 11:33) Pa kuba’mba mutwajijile kuyukilapo byavula bya mu Binembelo, ingijishainga bulongo bingijisho bya kukeba kebamo bishinka biji mu mulaka wenu. Kebakebai byambo byanema byo mwakonsha kwingijisha ne mikumbu ya mepuzho enu akumbulwa mu Baibolo. Shikishai bakwenu binembelo ne bibaaba byo bataana bibakwasha ne kwibatundaika. Buulaiko bakwenu bishinka byo mwataaine pa lufunjisho lwenu lwa pa bunke lwa Mambo a Lesa.

Kine kintu kyo mufunjila Mambo a Lesa kechi kuyukatu bintu ne. Mutumwa Paulo witujimunako amba “kuyuka bintu kulengela kwilundumika.”(1 Ko. 8:1) Onkao mambo, ingilainga na ngovu pa kuba’mba mutwajijile kwipelula ne kukosesha lwitabilo lwenu. Kupopwela kwa kisemi ne lufunjisho lwa pa bunke kukemukwasha kulondela mizhilo ya Yehoba kabiji kukemutundaika kukwashako bakwenu. Kyakila pa byonse, mukekala na lusekelo mambo mwataana kintu kyanema kukila ngolode.—Maana 3:13, 14.