BYO nafikizhe myaka 12, nayukile’mba najinga na kintu kyanema kyo nafwainwe kupana. Pa kubuñana, mulongo wanshikishe inge nakonsheshe kwingilako mwingilo wa kusapwila. Nakumbwile’mba “Ee” nakonsha kutemwa nangwa kya kuba kechi nasapwijilepo kala ne. Twayile na kusapwila kabiji wampele ne tubuku twaambilenga pa Bufumu bwa Lesa. Wañambijile’mba: “Obewa usakusapwilanga bantu baji lubaji lukwabo lwa mukwakwa, amiwa ku lubaji lukwabo.” Natendekele kusapwila ku nzubo ku nzubo nangwa kya kuba naumvwinenga moyo, bino napaine tubuku tonse ku bantu. Kya kine, bantu bavula bakebelenga kwibapa bintu byo najinga nabyo.

Nasemekelwe mu 1923 mu muzhi wa Chatham, Kent, ku England, kabiji nakomejile mu kyalo mwajinga bantu bajinga na bijikila. Nkondo Ikatampe kechi yalengejile ntanda kuwama ne. Bansemi nabo bajinga bingi na bijikila na mambo a bantangi ba bupopweshi ba mu chechi wa Baptist betemenwetu bene. Byo nafikizhe myaka 9, ba maama batendekele kuya mu kishimikwa mwapwilanga Jibumba ja Bafunda Baibolo batendekele kutelwa’mba Bakamonyi ba kwa Yehoba. Nyenga umo watendekele kwitufunjisha mafunjisho a mu Baibolo o bafunjishanga banyike mu buku wa The Harp of God. Natemenwe bingi bintu byo nafunjilenga.

Byo najinga mwanyike, natemenwe kubuulako bantu bintu byawama biji mu Mambo a Lesa. Nangwa kya kuba nayanga na kusapwila ku nzubo ku nzubo bunke, bino kusapwila na bakwetu kwandengejile kufunjilako byavula. Juba jimo byo twayilenga na mulongo wakikulumpe na makinga na kusapwila, twapitaijile ntangi wa bupopweshi kabiji naambile’mba: “Mbuzhi awa uya.” Mulongo waimikile nkinga ne kuñambila’mba twaya twikaleko pa mwandalo. Wañambijile’mba: “Ñanyi wakupa luusa lwa kuzhachisha bantu amba bambuzhi? Twafwainwa kutwajijilatu na kusapwila mambo awama ku bantu ne kulekela Yehoba mwine akebazhachishe.” Mu oa moba, nafunjijileko byavula pa lusekelo lufuma mu kupana.—Mat. 25:31-33; Byu. 20:35.

Mulongo mukwabo wakikulumpe wambujile’mba pa kuba’mba twikale na lusekelo lufuma mu kupana, bimye bimo kikebewa kuchinchika saka twatekanya. Mukazhi wa uno mulongo kechi watemenwe Bakamonyi ba kwa Yehoba ne. Kimye kimo wangichilepo ku nzubo yanji na kujila pamo kajo. Wazhingijile bingi ne kutendeka kwitwasa tubibokoshi twa masamba mambo a kuba bamwatawanji bayile na kusapwila. Uno mulongo kechi wakajipijilepo mukazhanji ne, bino watolawile tubibokoshi twa masamba ne  kwitubwezha mo twikala. Pa kupitapo myaka, mukazhanji wabatizhiwe ne kwikala Kamonyi wa kwa Yehoba. Uno mukazhanji waubile bino mambo mwatawanji watekenye bingi.

Kizaku kyami kya kukeba kubuulako bantu bintu byawama bya kulutwe kyatwajijile, kabiji amiwa ne bamama twabatizhiwe mu muzhi wa Dover mu March 1940. Kabiji mu September 1939, saka nji na myaka 16, kyalo kya Britain kyatendekele nkondo na kyalo kya Germany. Mu June 1940, namwenenga bashilikale bazumba bapichilenga mu bimbayambaya bapulukile nkondo yajinga mu muzhi wa Dunkirk. Kechi bajingapo na luketekelo ne, kabiji nakebelenga kwibasapwila pa Bufumu bwa Lesa. Palutwe kacheche, bena Britain batwajijile kulakasha mabomba. Pa juba pa juba bufuku, namwenenga madeke a bashilikale ba ku Germany saka apita mwiulu pa mpunzha po twaikalanga. Mabomba atubikanga kabiji twiomvwanga saka abena kupona kabiji aletanga bingi moyo. Inge twalupuka pangye lukelo, twamonanga mazubo aonaika avula. Nayukile’mba Bufumu bo bonkatu bukawamisha bintu kulutwe.

Mu mwaka wa 1941 mo natendekele bwikalo bwandetejile bingi lusekelo. Naingilanga ku kipamo kyalenganga maato kya Royal Dockyard mu muzhi wa Chatham nafunjilenga bya kuvuwa bwato, mwingilo wandengejile kumwenamo bingi. Bakalume ba Yehoba bayukile’mba bena Kilishitu kechi bafwainwa kwivwanga mu nkondo ya pakachi ka byalo ne. Mu 1941, twaumvwishishe kuba’mba kechi twafwainwa kwingila mu makampanyi alenga bilwilo ne. (Yoa. 18:36) Na mambo a kuba’mba kipamo kyo naingilangako kyalenganga maato a nkondo, nafuukwilepo kuleka nkito ne kutendeka mwingilo wa kusapwila. Bantumine kuya na kwingijila mu muzhi wa Cirencester, muzhi umweka bingi bulongo mu kibunji kya tutumbatumba.

Byo nafikizhe myaka 18, bankashile mu kaleya bañondo 9 mambo nakaine kutwela bushilikale. Naumvwine bingi moyo byo bashinkile bibelo ne kunsha bunke. Bino baota ne bakaili batendekele kunshikisha kyalengejile’mba ntaanwe mu kaleya kabiji nebalumbulwijile lwitabilo lwami.

Byo nafumine mu kaleya, bantumine kuya na kwingijila pamo ne Leonard Smith * kuya na kusapwila mu mataunyi apusana pusana mu kibunji kyetu kya Kent. Kutendeka mu mwaka 1944, madeke a nkondo mwabujile bantu mwayujile tupata akaponejile mu Kent. Twajinga pa mpunzha papichilanga madeke a nkondo a ba Nazi a Europe ne ku London. Ano o ajinga mabomba a mwiulu o balakashishenga. Ino nkondo yaletelenga bingi moyo mambo inge mwaumvwatu kilulumo kyaleka kumvwanyika, twayukanga’mba ndeke isakupona ne kutubika. Twafunjishanga Baibolo bantu 5 ba mu kisemi kimo. Kimye kimo, twaikalanga munshi ya tebulu wa kyela kuba’mba inge nzubo  yakunduka ituzhikijila. Mu kuya kwa kimye, bonse ba mu kino kisemi babatizhiwe.

Nkondo byo yapwile, naingijileko bupainiya myaka ibiji ku kabeta ka ku bulenge bwa Ireland. Kechi twayukile’mba kyalo kya Ireland kyapusana na kyalo kya England ne. Twayilenga ku nzubo ku nzubo na kukeba kwa kwikala kabiji twibabuujilenga bantu amba twi bamishonale saka tupana ne magazini ku bantu bo twatainenga mu mikwakwa. Bakanyanga kusapwila mu kino kyalo mambo mwavula bupopweshi bwa Bakatolika. Mwanamulume umo byo akebelenga kwitupuma, nakabuujile kapokola kabiji witwambijile’mba: “Kafwako byo twakonsha kuba ne.” Kechi twayukile’mba bantangi ba bupopweshi baji bingi na bulume ne. Bapanganga bantu nkito inge kebatambule mabuku etu kabiji betupangile po twaikalanga.

Palutwe kacheche, twayukile’mba inge twafika ku mpunzha ikwabo twafwainwa kuyanga kwalepa na makinga na kusapwila bantu kwajinga bantangi ba bupopweshi bakatolika babujile kwituyuka. Ko kyakayanga, twatendekele kusapwila ku bantu bajinga pepi na ko twaikalanga. Mu muzhi wa Kilkenny, twafunjishenga nsongwalume jisatu mu mulungu nangwa kya kuba bakebanga kwitulukuka. Naumvwanga bingi bulongo kufunjisha bantu bukine bwa mu Baibolo kya kuba naipwizhe kuya na kufunda mwingilo wa bumishonale ku Sukulu wa Baibolo wa Gileada wa Watchtower.

Byo twapwishishe uno sukulu wa Gileada pa bañondo batanu mu New York, amiwa ne bakwetu basatu betutumine kuya na kwingijila ku tumakuji tucheche tuji pa Kalunga ka Caribbean. Mu November mu mwaka wa 1948, twafumine ku New York City kabiji twakanjijile bwato bwalepa mamita 18 bo batela’mba Sibia. Kyo kyajinga kimye kitanshi kukanjilapo bwato kabiji naumvwine bingi bulongo. Umo pe atweba aye Gust Maki ye wajinga shenyenye kwendesha bwato. Witufunjishe bya kuvuwa bwato, kuyuka bya kwenda ne bya kuba inge kwaiya kipuupu. Gust witukwashishe kuyuka bya kwendesha bwato pa moba 30 byo kwajinga kipuupu kikatampe kufikatu ne byo twafikile ku Bahamas.

Byo twaikelepo bañondo bamo na kusapwila pa tumakuji twa Bahamas, twakanjijile mu bwato ne kuya ku makuji a Leeward ne Windward palepa makilomita 800 kufuma ku makuji a Virgin kubwipi na kyalo kya Puerto Rico kufika ne kubwipi na kyalo kya Trinidad. Twasapwijile pa ano makuji pabujile Bakamonyi pa myaka itanu. Bimye bimo twaikalanga milungu yavula kwa kubula kutuma makalata nangwa kutambwilapo makalata. Pano bino, twajinga bingi na lusekelo pa kusapwila byambo bya Yehoba pa makuji.—Yele. 31:10.

Inge twafika ku kitulu, bantu baikalanga mu mizhi bakonkananga pamo kuba’mba bamone bantu baiya. Bamo kechi bamwenepo kala muzungu mu bwikalo bwabo ne. Bantu ba pa makuji bakasuluka bingi kabiji bayukile bingi Baibolo. Javula, betupangapo masabi, bipangwa ne nyimu. Mu kabwato ketu kechi mwajinga mpunzha yabaya ya kulaalamo, kutekelamo nangwa kuchapa bivwalo ne, bino twakonshanga kuba byonse bino.

Twakuzhanga mwaya mukola na kufwakesha bantu juba jonse. Twibabuulanga’mba kusakwikala jashi ja Baibolo. Kimye kya muntuwa muntuwa, twavumyanga ngengele yajinga mu bwato. Kyawamanga bingi pa kumona bangikazhi bavula baiyanga. Malampi abo amwekangatu nobe tubangabanga tubena kwikila pa mitumba. Bimye bimo bantu 100 bo baiyanga, kabiji baikalanga kufika ne bufuku na kwipuzha mepuzho. Baumvwanga bingi bulongo kwimba nyimbo,  onkao mambo, twapulintanga byambo bya nyimbo ya Bufumu ne kwibapa. Atweba bonse bana twibikangako bingi kwimba nyimbo, kabiji bantu balondelangamo, mawi abo aumvwanyikanga kimenge. Twaikalanga bingi na lusekelo!

Inge twapwisha kufunjisha muntu Baibolo, bantu bamo bo twafunjishanga betulondelanga pa muzhi mukwabo ye twayilengapo pa kuba’mba bafunjile nabo pamo. Nangwa kya kuba twavilukanga kufuma pa mpunzha imo panyuma ya kwikalapo milungu icheche, javula twabuulanga bantu bakebanga kufunda bukine kutwajijila kufunjisha bakwabo kufika ne kimye kyo tukabwela. Kituletelanga bingi lusekelo pa kumona bantu bamo byo batangako bingi muchima ku uno mwingilo.

Lelo jino, pa ano makuji avula patemwa kuya bakañenda bavula bingi na kufwakasha, bino pa kyokya kimye, kechi kwayanga bantu bavula ne, pajingatu bizhiba ne bitulu bya busenga, ne bisonga. Javula twavilukanga kufuma pa jikuji jimo kuya pa jikwabo bufuku. Bimasabi bikatampe byaiyanga ku bwato kabiji twaumvwangatu mema byo epakanga ku ntonga ya bwato. Kusama kwa ñondo kwalengelanga mema kumweka nobe siliva kukafika ne ku kitulu.

Byo twapwishishe myaka itanu na kusapwila pa makuji, twayile ku kyalo kya Puerto Rico na kupimpula kabwato ketu na bwato bwabaya. Byo twafikile, namonañene ne Maxine Boyd, nyenga walambile bingi wajinga mishonale. Wasapwilanga na mukoyo mambo awama kufumatu ku bwanyike. Mu kuya kwa kimye, wayile na kwingila bumishonale mu kyalo kya Dominican Republic kufika ne kimye kyo bamupangilemo ku kafulumende wa Bakatolika mu 1950. Na mambo a kuba’mba nayukile kuvuwa bwato, banswishishetu kwikala ñondo umo mu Puerto Rico. Kwashajiletu moba acheche kuya ku makuji ne kwikalako myaka icheche. Onkao mambo, naambile mu muchima namba, ‘Ronald, inge ubena kukeba uno nsongwakazhi, wafwainwa kupelawizha.’ Byo papichiletu milungu isatu, nesambile nanji, kabiji pa kupitapo milungu itanu na umo namusongwele. Amiwa ne Maxine betwambijile kwingila bumishonale monka mu Puerto Rico, onkao mambo, kechi nakanjijilemo mu bwato bwa katataka ne.

Mu 1956 twatendekele kufwakesha bipwilo mu mwingilo wa bukalama bwa mwanzo. Balongo bavula bajinga bayanji, bino twaumvwa bingi bulongo kwibafwakesha. Mu muzhi umo wa Potala Pastillo, mwajinga bisemi bibiji bya Bakamonyi bajinga na baana bavula, kabiji natemenwe bingi kwimbila nabo pamo mumpempe. Naipwizhe nsongwakazhi umo aye Hilda inge wakonsheshe kwingijila pamo ne amiwa mwingilo wa kusapwila. Wakumbwile’mba: “Nkeba kusapwila, bino kechi nakonsha ne. Kechi nji na nsapato ne.” Twamupotejile nsapato, kabiji twayile na kusapwila nanji. Byo papichile myaka, twayile na kufwakesha Betele mu Brooklyn mu 1972, nyenga wapwishishetu Sukulu wa Gileada witusolomokele. Wajinga pepi kuya ko bamutumine na kwingijila ku Ecuador. Waambile’mba: “Mwamvuluka nyi? Yami yewa kashimbi wa ku Pastillo wabujile nsapato.” Wajinga Hilda! Twaumvwine bingi bulongo kya kuba twajijile ne mipolo!

Mu 1960 betubuujile kuya na kwingijila pa musampi wa mu Puerto Rico, wajinga mu nzubo ya bibamba bibiji byatentakana kuya peulu mu muzhi wa Santurce, San Juan. Kimye kitanshi, Lennart Johnson ne amiwa yetu twaingilanga mingilo yavula. Aye ne mukazhanji bo bajinga batanshi kwikala Bakamonyi ba kwa Yehoba mu Dominican Republic, kabiji baishile mu Puerto Rico mu 1957. Pa kupitapo kimye, Maxine ye watambwilanga makalata atumanga bantu a kulomba magazini avula bingi pa mulungu pa mulungu. Watemenwe bingi kwingila umo mwingilo mambo wayukile’mba bano bantu bonse bafwainwa kutambwila kajo ka ku mupashi.

Natemwa mwingilo wa pa Betele, mambo ke bwikalo bwa kupana. Bino mu uno mwingilo muji ne makatazho. Kimye kyo twaikele na kukonkana kwa byalo kutanshi mu Puerto Rico mu 1967, najinga na mingilo yavula bingi. Mulongo Nathan Knorr, watangijilanga mwingilo wa Bakamonyi ba kwa Yehoba pa kyo kya kimye, waishile mu Puerto Rico. Kwa kubula kuyuka, walangulukile’mba kechi nanengezhezhe ñendelo ya bamishonale baishile ne, nangwa kya kuba byonse byajingatu bulongo. Palutwe kacheche, wanenene bingi pa kubula kunengezha bulongo bintu kuba’mba kechi waumvwine bulongo ne. Kechi nakebele kwipachika nanji ne, bino kyankolele bingi ku muchima mambo kechi wajinga na bishinka byonse ne. Nangwa byonkabyo, kimye kikwabo amiwa ne Maxine byo twamonañene na Mulongo Knorr, witwichile ku kibamba kyanji ne kwitutekelapo kajo.

 Twafumanga ku Puerto Rico kuya na kufwakesha kisemi kyami mu England bimye byavula. Batata kechi baswile bukine kimye bamama ne amiwa kyo twatambwijile bukine ne. Bino bañambi benyi inge baiya kufuma ku Betele, bamama javula bo bebatambwilanga mu nzubo yetu. Batata bamwene kwipelula kwa bakalama ba pa Betele, kupusanako na bantangi ba bupopweshi bebazhingijishe myaka ya kunyuma. Kepo mu 1962 babatizhiwe ne kwikala Bakamonyi ba kwa Yehoba.

Mukazhami ye natemenwe bingi aye Maxine, wafwile mu 2011. Mbena kutengela kukamumona kimye kya lusanguko. Luno luketekelo lundetela bingi lusekelo! Pa myaka 58 yo twaikele mu masongola, amiwa ne Maxine twimwena bantu ba Yehoba byo bavujilako mu Puerto Rico, kufuma pa 650 kufika ku Bakamonyi 26,000! Kepo mu 2013 musampi wa Puerto Rico bamushinkile ne kumuvwanga ku musampi wa United States, kabiji bantumine kuya na kwingijila pa Wallkill, New York. Myaka 60 yo naikele pa jikuji, nemonanga nobe kabombwe ka ku Puerto Rico ko batela’mba coqui, kemba mabanga’mba ko-kee, ko-kee. Pano kimye kyafikile kya kufumamo.

Ne luno ñumvwa bingi bulongo kwingijila Lesa pa Betele. Luno nji na myaka kukila pa 90, kabiji mwingilo ye ñingila ke wa kutundaika ba mu kisemi kya Betele byo nji kafunga wa ku mupashi. Bambuula’mba nafwakesha ba mu kisemi kya Betele 600 kufuma kimye kyo naishile ku Wallkill. Bamo beya kwi amiwa bakeba kwisamba ne amiwa pa makatazho abo nangwa a mu bisemi. Bakwabo bakeba kwibakwasha kuyuka bya kuba pa kuba’mba bengilenga bulongo mwingilo wa pa Betele. Kabiji aba batwelatu mu masongola katataka bakeba kwibakwasha pa kuba’mba masongola abo ekale bulongo. Bamo bebatuma kuya na kwingijila mu bipwilo. Nteleka ku bonse inge babena kumbula bintu, kabiji inge kyakonsheka, javula nebabuula’mba: “‘Lesa watemwa muntu upana na lusekelo.’ Onkao mambo, ingilainga na lusekelo mwingilo wenu. Mubena kwingijila Yehoba.”—2 Ko. 9:7.

Byonkatu bilengela bantu bonse kwikala na lusekelo, byo byo kiji ne pa Betele: Mwafwainwa kuta muchima pa ene mambo kyo mubena kuba o kyanemena. Byonse byo tuba pa Betele ke mwingilo wazhila. Mwingilo ye mwingila ukwasha “kalume wa kishinka kabiji wa maana” kupana kajo ka ku mupashi ku balongo ba ntanda yonse. (Mat. 24:45) Konse ko twingijila Yehoba, twafwainwa kumutotanga. Twayai twingilenga byo akeba’mba tubenga, mambo “Lesa watemwa muntu upana na lusekelo.”