“NABATIZHIWE saka nji na myaka 15, kabiji byo papichile bañondo batanu na umo natendekele kwingilako bupainiya bwa kukwasha. Byo papichile mwaka umo nanembeshe bupainiya bwa kimye kyonse. Byo napwishishe sukulu wa sekondale, naipwizhe kuba’mba ngye na kwingijila kwakepa basapwishi ba Bufumu. Nakebelenga kufuma mu muzhi mo naikalanga na bankambo babakazhi mambo kechi bajinga Bakamonyi ba kwa Yehoba ne. Kyankolele bingi ku muchima kalama wa mwanzo byo añambijile’mba nyaunda yami ke yenka uno muzhi mo nasemekejilwe. Kechi nakebelenga’mba ayuke’mba naumvwa bibi ne. Nakunyikiletu mutwe panshi ne kuya na kulanguluka pa byo ambuujile. Nabuujile mulunda nami mo twaingijilanga’mba: ‘Namona mbena kubatu byonka byaubile Yona. Bino byafuminemo, Yona wayile ku Ninevwa. Onkao mambo, ne amiwa nsakwingijilanga mu nyaunda yo bampa.’

“Naingila bupainiya myaka ina mu yenka uno taunyi mo nasemekejilwe, kabiji namona’mba naubile bulongo kukookela byo bambuujile. Kubula kutemwa ino nyaunda lo lukatazho lukatampe lo najinga nalo. Pano luno nji na lusekelo. Mu ñondo umo, nafunjishe Baibolo bantu 24. Nsanchila Yehoba mambo luno natendeka ne kufunjisha bankambo babakazhi bakananga kala kufunda Baibolo.”

Mwanamukazhi wafundanga Baibolo ku Fiji wafwainwe kusalapo kuya na kushonkena nangwa kuya na mwatawanji ku kijiilo kya kusekelela juba ja kusemwa kwa mulongo wanji. Mwatawanji wamuswishishe amba aye na kushonkena. Uno mwanamukazhi wabuujile mwatawanji’mba usakumulondela inge apwishe kushonkena. Byo afikile pa nzubo kufuma ku kushonkena, walangulukile’mba kyawama kubula kuba kintu kyakonsheshe kubika bulanda bwanji ne Lesa mu kizumba, onkao mambo, kechi wayileko ne.

Bino mwatawanji byo abuujile balongo banji amba mukazhanji usakwiya inge apwishe “kupwila na Bakamonyi,” bakumbwile’mba, “Kechi usakwiya ne, Bakamonyi ba kwa Yehoba kechi basekelela moba a kusemwa ne.” *

Kyafuminemo ke kya kuba’mba mwatawanji waumvwine bingi bulongo pa kuyuka’mba mukazhanji ulondela byo aitabilamo ne jiwi janji ja mu muchima. Bukishinka bwanji bwamulengejile kusapwila mwatawanji ne bantu bakwabo. Ki ka kyafuminemo? Mwatawanji waswile kufunda Baibolo kabiji watendekele kuya na kupwila pamo na mukazhanji.