Mu yewa mwaka, jibumba ja Lesa japimpwileko bintu bimo byakwashishe Bafunda Baibolo kukwatankana mu mpopwelo. Mu Kyamba kya Usopa batendekele kunembamo byambo byalumbulwilenga kinembelo kyo bafunjilenga mu yewo mulungu. Baubanga bino pa Kupwila kwa Milombelo ne Kutota Yehoba. Kabiji Bafunda Baibolo bapulinchile kalenda wamweshanga kinembelo kya kwisambapo mu yewo mulungu ne lwimbo ye baimbanga pa juba pa juba pa kupopwela kwa kisemi ne pa lufunjisho lwa pa bunke.

Pa kupwila, Bafunda Baibolo baambangapo bintu bimo byamwekanga mu mwingilo wa kusapwila, kusanchila Yehoba pa bintu bimo byo ebobila, kwimba lwimbo nangwatu kulomba. Nyenga umo aye Eva Barney wabatizhiwe mu 1923 saka aji na myaka 15 waambile’mba: “Byo twaubanga inge ubena kukeba kwambapo byambo bimo, twaimananga ne kutendeka kwamba’mba, ‘Mbena kukeba kusanchila Nkambo pa bintu byonse byawama byo angubila.’” Balongo bamo batemenwe bingi kwambapo. Nyenga Barney watwajijile kwamba’mba: “Mulongo mukulumpe aye Godwin wajinga na bintu byavula bingi bya kusanchilapo nkambo. Bino mukazhanji inge wamona’mba mulongo ubena kutangijila wakankalwa kuchibikizha mwatawanji, wamukokanga pacheche ku kibaki kabiji ponkapotu wikilekanga kwamba kabiji wabwela waikala.”

Jimo pa ñondo, bipwilo byonse byaikalanga na Kupwila kwa Milombelo ne Kutota Yehoba. Kyamba kya Usopa kya April 1, 1923, kyaambilepo pa byo baubanga pa kuno kupwila amba: “Pa kupwila bafwainwa kwambapo byambo bimo byalumbulula kinembelo, bintu bimo byamwekele mu mwingilo wa kusapwila ne kutundaika basapwishi. . . . Twaketekela’mba kuno kupwila kusakwitutundaika ne kwitukwatankanya pamo bonse.”

Mulongo aye Charles Martin, musapwishi mu kipwilo wa myaka 19 wa ku Vancouver, mu Canada, wamwenejilemo bingi mu kuno kupwila. Palutwe kacheche waambile’mba: “Pa kuno kupwila po po nafunjile bya kwamba pa kusapwila ku nzubo ku nzubo. Javula basapwishi baambangapo bintu bimo byawama byamwekanga pa kusapwila ku nzubo ku nzubo. Kino kyankwashishe kuyuka bya kwamba ne bya kukumbula bantu bapusana pusana babulanga kukeba kwibasapwila.”

Kwikalako na kimye kya kusapwila kwalengejile balongo ne banyenga kukwatankana. Kyamba kya Usopa kya April 1, 1923, kyaambile’mba: “Pa kuba’mba bonse tukwatankane mu mwingilo wa kusapwila . . . , twasala juba ja pa Kibiji pa 1 May uno yenka  mwaka wa 1923 ja kuya na kwingila bonsetu mu mwingilo wa kusapwila. Kabiji tukayanga bonse mu mwingilo pa juba ja pa Kibiji jitanshi mu ñondo. . . . Musapwishi yense wafwainwa kwingilako uno mwingilo.”

Banyike nabo baingilangako uno mwingilo wa kusapwila. Nyenga Hazel Burford, wajinga na myaka 16 pa kyokya kimye waambile’mba: “Mu Bulletin mwaikalanga mashinda amweshanga bya kwisamba na bantu o twaingijishanga. a Amiwa ne bankambo twaingijishanga ano mashinda onse.” Nangwa byonkabyo, Nyenga Burford wakuminye bingi pa byaubile mulongo umo, wamukainyenga kuya na kusapwila. Waambile’mba: “Mulongo wakoma wañambijile’mba kechi nafwainwa kusapwila ku bantu nangwa pachechetu ne. Pa kyokya kimye, bamo kechi bayukilenga’mba Bafunda Baibolo bonse kuvwangakotu ne ‘bansongwalume ne bansongwakazhi’ bafwainwa kutota Mulenga wabo Wakila ne.” (Sala. 148:12, 13) Nyenga Burford kechi walekele kusapwila ne. Palutwe kacheche watainwe ku Sukulu wa Gileada wa bubiji kabiji bamutumine kuya na kwingila mwingilo wanji wa bumishonale mu kyalo kya Panama. Mu kuya kwa moba, balongo bayukile kuba’mba ne banyike nabo bafwainwa kusapwila.

Kushonkena nako kwalengejile balongo ne banyenga kukwatankana bingi. Pa kushonkena kwavula banengezhangapo moba amo a kusapwila byonka byo kyajinga mu Winnipeg, mu Canada. Pa kyokya kimye, bonse batainwe ku kuno kushonkena bayile na kusapwila pa 31 March. Ino mikwekele yalengelanga kusapwila ku bantu bavula bingi kabiji mwafumanga bintu byawama. Pa 5 August, bantu 7,000 bo batainwe ku kushonkena kukwabo kwajingako mu Winnipeg. Kuno kushonkena kwajingako mu Canada ko kwajinga kushonkena kutanshi kwatainwe bantu bavula bingi.

Kushonkena kwanema kwa bantu ba Yehoba kwajingako mu 1923 pa 18 kufika pa 26 August, mu muzhi wa Los Angeles mu California. Mu milungu icheche kushonkena saka kukyangye kutendeka, mu mapepala a byambo banembelemo byambo byaambilenga pa kuno kushonkena kabiji Bafunda Baibolo basampenye tupepala twakwichilapo bantu kukila 500,000. Bino byambo byaambilenga pa kushonkena bebilamikile ne pa myotoka ikatampe ne icheche.

 Pa Kibelushi pa 25 August, Mulongo Rutherford waambile jashi jaambilenga pa “Mikooko ne Bambuzhi.” Mu jino jashi, walumbulwile’mba “mikooko” ke bantu baji na michima ya bukishinka bakekala mu paladisa pano pa ntanda. Kabiji waambile jashi jikwabo ne kutanga byambo bya “Lujimuno.” Mu bino byambo bya lujimuno, waambilepo bintu bimo byatama byuba Kilishitendomu kabiji wakambizhe bantu baji na michima ya bukishinka kufuma mu “Babilona Mukatampe.” (Lum. 18:2, 4) Palutwe kacheche, Bafunda Baibolo bonse mwaya ntanda baingijile bingi na ngovu kusampanya matalakiti avula bingi aambilenga pa bino byambo bya lujimuno.

Pa juba japeleleko ja kushonkena, bantu kukila 30,000 batelekele ku jashi ja mvula bantu jaambile Mulongo Rutherford jajinga na mutwe wa kuba’mba “Bisaka bya Bantu Byonse Babena Kwibikonkanya ku Juba ja Amagedonyi, Bino Bantu Bavula Bajiko Lelo Jino Kechi Bakafwa Ne.” Bafunda Baibolo bayukile’mba ku kushonkena kukatanwa bantu bavula bingi. Onkao mambo, basonkejile kibanza kyajinga kya katataka kitelwa’mba Los Angeles Coliseum. Balongo bakebelenga’mba bonse bakatanwako bakatelekenga bulongo. Onkao mambo, baingijishe bya kwambilamo bikatampe bya katataka bya mu kibanza. Kabiji bantu bakwabo bavula batelekejile kuno kushonkena pa waileshi.

Mu mwaka wa 1923, mwingilo wa kusapwila wafikile mu Africa, Europe, India, ne South America. Mu India, Mulongo A. J. Joseph nangwa kya kuba wajinga na mwingilo wa kulama bakazhi ne baana banji batanu na umo, bino wajinga ne na mwingilo mukwabo wa kupulinta mabuku mu mulaka wa Hindi, Tamil, Telugu ne Urdu.

Mu Sierra Leone, Bafunda Baibolo abo ba Alfred Joseph ne ba Leonard Blackman banembejile ofweshi mukatampe wa ntanda yonse mu Brooklyn mu New York nkalata ya kulomba basapwishi bakwibakwashako mu mwingilo wa kusapwila. Bebakumbwile pa 14 April, 1923. Mulongo Alfred waambile’mba: “Pa Kibelushi bufuku bantumijile foni.” Byo akumbwile foni, bamwipwizhe’mba: “Yobe mulongo watumijile nkalata ku Watch Tower Society ya kulomba basapwishi ba kwimukwashako mu mwingilo wa kusapwila nyi?” Aye wakumbwile’mba: “Emwane.” Kabiji Mulongo William R. Brown wibabuujile’mba “Yami batuma.” Uno Mulongo Brown ne mukazhanji aye Antonia kubikapotu ne baana babo babiji, Louise ne Lucy bafikile pa jonkaja juba kufuma ku Caribbean. Balongo bakebeshe bingi kumonañana na kino kisemi.

Mulongo Alfred watwajijile kwamba’mba: “Juba jalondejilepo lukelo amiwa ne Leonard byo twisambilenga byambo bya mu Baibolo byonka byo twakelwanga  kuba mu mulungu, twamwenekotu muntu walepa see mu kibelo. Uno muntu wajinga Mulongo Brown. Na mambo a kuba wakebeshanga bingi kwamba pa bukine, wakebele kwamba jashi ja mvula bantu pa jonkaja juba.” Mu ñondotu umo, Mulongo Brown washiijile bantu mabuku onse o ayishile nao. Bamutumijile mabuku akwabo 5,000 kabiji mu kakimyetu kacheche nao apwile, kebakebe ne akwabo. Nangwa byonkabyo, Mulongo Brown kechi bamuyukile’mba muntu upotesha mabuku ne. Mu myaka yonse yo aingijile Yehoba, waingijishanga binembelo mu majashi anji kabiji kino kyalengejile bantu kumutumba’mba Bible Brown.

Mu Germany, balongo bafuukwilepo kuvilula ofweshi wa musampi kumufumya mu muzhi wa Barmen mambo wakepele kabiji baumvwine’mba nzhita ya bena France yakebelenga kulukuka uno muzhi. Bafunda Baibolo bataine kishimikwa kikwabo mu muzhi wa Magdeburg kyo bamwene’mba kyawama kupulinchilamo mabuku. Pa 19 June, balongo balongele munkinyi wa kupulinchilako mabuku ne biñambañambatu bikwabo ne kuvilukila ku Betele wa katataka mu Magdeburg. Pa jonkaja juba, byo babuujile ofweshi mukatampe wa ntanda yonse amba baviluka, mapepala a byambo aambile’mba bena France balukuka muzhi wa Barmen. Balongo basanchijile Yehoba pa kwibapokolola ne pa kwibakwasha.

Mu Brazil, Mulongo George Young wasapwijile bingi mambo awama washimikile musampi ne kutendeka kupulinta Kyamba kya Usopa mu mulaka wa Kipotogizi. Mu bañondotu bacheche, washiijile bantu mabuku kukila 7,000. Nyenga Sarah Ferguson waumvwine bingi bulongo Mulongo Young byo afwakashijile kisemi kyanji. Watanganga Kyamba kya Usopa kufuma mu 1899, pano bino kechi kwajinga wa kumukwasha pa kuba’mba abatizhiwe kumwesha patoka amba wipaine ne. Byo papichiletu bañondo bacheche, Nyenga Ferguson ne baana banji bana babatizhiwe.

Ku mpelo ya mwaka wa 1923, Kyamba kya Usopa kya December 15, 1923 kyalumbulwile kupimpulako kupwila, kusapwila ne kushonkena byo kwakwashishe Bafunda Baibolo. Kyaambile’mba: “Kyamwekeshatu patoka kuba’mba lwitabilo lwa balongo ne banyenga lwakoselako. . . . Twayai twinengezhe kwingila mingilo ikwabo yavula, kutwajijila kwingijila Yehoba na mukoyo ne na lusekelo mu mwaka ubena kwiya wa 1924.”

Mu mwaka walondejilepo wa 1924, Bafunda Baibolo baingijile mingilo yavula bingi. Pa bañondo bavula balongo ba pa Betele bayanga na kwingijila pa mpunzha mu Staten Island, yajinga kwipi na ofweshi wabo mukatampe mu Brooklyn. Bishimikwa byo bashimikilenga pa ino mpunzha ya katataka bapwishishe kwibishimika ku ntendekelo ya 1924 kabiji byalengejile balongo ne banyenga kukwatankana ne kusapwila mambo awama mu mashinda amwekelenga nobe kechi akonsha kwingila ne.