1-2. Ñanyi jishinda jawama kwingijisha inge tubena kutanga ne kufunda Baibolo? Lumbululai.

 FWANYIKIZHAI’MBA mubena kukeba kupota nzubo. Ñanyi bintu byo mwafwainwa kumona ku ino nzubo saka mukyangye kufuukula kwiipota? Nanchi kipikichala kibena kumweshatu nzubo byo beishimika kulutwe nyi? Kwakubula nangwa kuzhinaukatu ne, mukayako pa kuba’mba mukeimone byo iji. Mukatwela mukachi pa kuba’mba mumone bibamba byonse byo biji, ne bintutu bikwabo biji mu ino nzubo. Kimo kimye mwakonsha ne kwipuzhako muntu wayuka bulongo ino nzubo byo eishimikile. Kwambatu kine, mukakebesha kuyuka biji ino nzubo yonse yo mukeba kupota.

² Abino byo byo twafwainwa kubanga pa kutanga ne kufunda Baibolo. Shayuka umo wa Baibolo waambile’mba: “Baibolo uji nobe kishimikwa kikatampe kyalepa bingi kyo bashimika pa kitendekesho kyazhika.” Pano ñanyi bintu byakonsha kwitukwasha kukwatakanya bulongo byonse biji mu Baibolo? Inge ke mupitemotu kapambala mukayukakotu “mafunjisho atanshi a Mambo a Lesa.” (Hebe. 5:12) Byonkatu byo tutwela mu nzubo pa kuba’mba tuyuke bintu byonse bijimo, byo byo twafwainwa ne kuba inge tubena kutanga Mambo a Lesa pa kuba’mba tukwatakanye bijimo. Jishinda jawama kufunjilamo Baibolo, ke kumona bishinka byo mubena kutanga mu Baibolo byo byakwatankana na bikwabo. Kechi mwafwainwa kukwatakanyatu bintu byo mwaketekela mu Baibolo ne, bino mwafwainwa ne kuyuka ene mambo o mwibiketekela.

3. Ñanyi bintu mutumwa Paulo byo atundaikile bena Kilishitu bakwabo kuba, kabiji mambo ka? (Efisesa 3:14-19)

³ Kuji bintu bimo byo twafwainwa kuba pa kuba’mba tumvwishenga  biji mu Mambo a Lesa. Mutumwa Paulo watundaikile balongo ne banyenga kufunda Mambo a Lesa na mukoyo pa kuba’mba ‘bakwatakanye bulongo mwayila bwipi, ne bula ne kimino ne kuzhika’ kwa bukine, pa kuba’mba ‘bakose byonka byajimba mizhazhi ya kichi’ ne kushimikwa bulongo mu lwitabilo lwabo. (Tangai Efisesa 3:14-19.) Ne atweba byo byo twafwainwa kuba. Pano twayai tumone byo twafwainwa kuba pa kuba’mba tumvwishenga biji mu Mambo a Lesa.

4. Ñanyi bintu bimo byo mwafwainwa kuba pa kuba’mba mufwenye kwipi ne Yehoba? Ambaipo bimo byo mwafwainwa kuba.

⁴ Atweba bena Kilishitu kechi twafwainwa kuyukatu mafunjisho atanshi a mu Baibolo ne. Twafwainwa kufunda “ne bintu byazhika bya Lesa” kabiji mupashi wazhila wakonsha kwitukwasha. (1 Ko. 2:9, 10) Mwakonsha kukebakeba bishinka pa kufunda Baibolo pa bunke byakonsha kwimukwasha kufwenya kwipi ne Yehoba, nangwa kukebakeba bishinka pa byo atemenwe bapopweshi banji ba kala ne bino byo bimwesha’mba ne anweba wimutemwa. Kabiji mwakonsha kukebakeba bishinka byaamba pe Yehoba byo akebelenga bena Isalela kumupopwelanga ne kwibyesakanya ku byo akeba’mba ne atweba tumupopwelenga mu ano moba. Nangwa kampe mwakonsha kukebakeba bishinka byaamba pa bungauzhi bwafikizhe Yesu mu bwikalo bwanji ne byo aingijilenga mwingilo wa kusapwila pano pa ntanda.

5. Nanchi kujipo mutwe ye mubena kukeba kuyukilapo bishinka byavula nyi?

⁵ Bantu bamo bakebakeba bishinka pa kufunda Baibolo baambilepo bintu bimo bibakwasha kukwatakanya biji mu Mambo a Lesa. Bintu bimo byo baambilepo biji mu kakitenguluzha ka kuba’mba “ Bintu Bimo byo Mwafwainwa Kukwatakanya pa Kufunda Baibolo pa Bunke.” Buku wa Kukwasha Bakamonyi ba kwa Yehoba Kukebakeba Bishinka ukemukwasha bingi kukwatakanya bino bintu byo mukafundanga. Kukwatakanya bino bintu bya  mu Baibolo kukakosesha bingi lwitabilo lwenu kabiji ‘mukamuyuka Lesa.’ (Maana 2:4, 5) Pano twayai twisambe pa bukine bumo bwa mu Baibolo bwazhika bo twafwainwa kufunda ne kwibukwatakanya bulongo.

6. (a) Ñanyi lupusano luji pa kintu kyo mubena kulanguluka kuba ne kintu kyo mwafuukulapo kuba? (b) Mambo ka o twafwainwa kwambila’mba byakebelenga Yehoba kuba ku bantu ne ntanda ke bya “myaka ne myaka”? (Efisesa 3:11)

⁶ Akilangulukai pa Baibolo byo aambapo pa kyaswa muchima wa Lesa. Kyo mubena kulanguluka kuba kyapusana na kyo mwafuukulapo. Kyo mubena kulanguluka kuba kiji nobe jishinda jo mukeba kwingijisha jisakwimufikizha ko mukeba kuya. Inge jino jishinda bejishinka, mwakonsha kukankalwa kufika ko mubena kuya. Kintu kyo twafuukulapo kuba twakonsha kwikyesakanya ku mpunzha yo tubena kuyako. Ino mpunzha yo tukeba kuyako twiiyuka bulongo. Pano bino twakonsha kwingijisha mashinda apusana pusana kufika ku mpunzha yo tubena kuyako. Jishinda jimo inge bejishinka, twakonsha kwingijisha jikwabo. Tumusanchila bingi Yehoba mambo witusolwela pachepache bintu bya “myaka ne myaka” byo afuukula mu Baibolo. (Monai Efisesa 3:11.) Yehoba wakonsha kwingijisha mashinda apusana pusana kufikizha kyaswa muchima wanji kabiji uba bino mambo “ulengela bintu byonse kumweka monka mwayila byo akeba.” (Maana 16:4) Bintu byonse byuba Yehoba bikekala myaka ne myaka. Pano ñanyi kintu kikeba kuba Yehoba, kabiji ñanyi bintu byo auba pa kuba’mba ekifikizhe?

7. Bantu batanshi byo basatukile, Yehoba waubile byepi pa kuba’mba afikizhe byo akebelenga? (Mateo 25:34)

⁷ Lesa wabuujile bantu batanshi kyaswa muchima wanji. Bafwainwe “kusemanga ne kusemununa, kuyuzha ntanda ne kwiijima ne kwikala na bunkambo . . . pa bilengwa byumi byonse” pano pa ntanda.” (Nte. 1:28) Adama ne Evwa byo basatukile, bantu bonse baikele ke bandengamambo. Kino kechi kyalengejile Yehoba kubula kufikizha kyaswa muchima wanji ne. Pa kuba wapimpwiletu jishinda ja kwikifikizhizhamo. Ponkapotu wafuukwilepo kwikajika Bufumu mwiulu bukafikizha kyaswa muchima wanji ku bantu ne ntanda. (Tangai Mateo 25:34.) Kimye kyanji mwine byo kyafikile, Yehoba watumine Mwananji mubeji pano pa ntanda kwiya na kufunjisha bantu pa Bufumu ne kupana bumi bwanji pa kuba’mba etupokolole ku bundengamambo ne lufu. Kepo Lesa amusangwile ne kwikala Mfumu wa mu Bufumu bwa Lesa. Nangwa byonkabyo, kuji bintu byavula byo mwafwainwa kuyuka pa kyaswa muchima wa Lesa.

8. (a) Ñanyi kishina kya mu Baibolo? (b) Kwesakana na byaamba Efisesa 1:8-11, ñanyi kintu kikwabo Yehoba kyo akoba? (Monai kipikichala kiji pa nkupiko.)

⁸ Kishina kine kya mu Baibolo ke kya kuba’mba jizhina ja Yehoba jikatumbijikwa byo akafikizha kyaswa muchima wanji pano pa ntanda kwingijisha Bufumu bwanji bubena kulamwa na Kilishitu. Kino kechi kikapimpulwa ne. Witulaya kuba’mba byonse byo afuukula bikamweka monka mo aambijile. (Isa. 46:10, 11; Hebe. 6:17, 18) Ino ntanda ikekala Paladisa mukekalanga baana ba kwa Adama baoloka kabiji balumbuluka “myaka ne myaka.” (Sala. 22:26) Abino kechi byo byonkatu bikoba Yehoba ne. Ukakwatankanya ne bilengwa byanji byonse bya mwiulu ne bya pano pa ntanda. Bonse bakakookelanga Yehoba mambo ye ukekala kalama wabo. (Tangai Efisesa 1:8-11.) Nanchi kechi mwasangalala pa bino byonse bikoba Yehoba nenyi?

9. Kutanga Baibolo kwakonsha kwitukwasha byepi kukwatakanya bintu bikamweka kulutwe?

⁹ Akilangulukai pa bungauzhi Yehoba bo aambijile jimo mu bujimi bwa Edena bwanembwa pa Ntendekelo 3:15. b Waambile pa bintu bikafikizha kyaswa muchima wanji pa kupitapo myaka yavula. Yehoba waambijile Abalahama amba mu kisemi kyanji mo mukafuma ukekala Kilishitu. (Nte. 22:15-18) Kabiji mu 33 C.E., Yesu bamukabile ku kashiko byonka byaambijile jimo bungauzhi. (Byu. 3:13-15) Kintu kikapelako kumweka mu buno bungauzhi ke kya kuba’mba Satana bakamufumpa ku mutwe myaka 1,000 byo ikapwa. (Lum. 20:7-10) Kabiji Baibolo witubuula bintu bikwabo bikamweka pakachi ka jibumba ja kwa Satana ne jibumba ja Yehoba bintu byo bikafika pa kankomo.

10. (a) Ñanyi bintu bikamweka katataka kulutwe? (b) Twakonsha kwinengezha byepi ku bino bintu bikamweka kulutwe? (Monai tubyambo twa munshi.)

¹⁰ Akilangulukai pa bino bintu bilengesha moyo Baibolo byo yaambijile jimo. Kitanshi, bisaka bikabijika’mba “mutende ne luzhikijilo!” (1 Tesa. 5:2, 3) Ponkapotu malwa akatampe akatendeka inge bisaka bikalukuke bupopweshi bonse bwa bubela. (Lum. 17:16) Kepo kukamweka kiyukilo kya “Mwana muntu saka eya mu makumbi a mwiulu na bulume ne lukumo lukatampe.” (Mat. 24:30) Yesu ukachibila bantu mambo byo akabanya mikooko ne bambuzhi. (Mat. 25:31-33, 46) Nangwa byonkabyo, Satana ukatwajijila na kukanya kyaswa muchima wa Yehoba. Na mambo a kushikwa bantu ba Lesa, ukalengela bisaka bya bantu kukwatankana Baibolo bo itela amba Gogi wa mu ntanda ya Magogi kulukuka bantu ba Yehoba. (Ezi. 38:2, 10, 11) Mu kyonkakya kimye, bashingwa bashalapo bakebakonkanya mwiulu ne kwinunga kwi Kilishitu ne nzhita yanji ya mwiulu pa kuba’mba bakalwe nkondo ya Amagedonyi. Ino nkondo yo ikapelako mu kimye kya malwa akatampe. c (Mat. 24:31; Lum. 16:14, 16) Kepo myaka kiumbi ya bukalama bwa kwa Kilishitu ikatendeka pano pa ntanda.​—Lum. 20:6.

11. Kuyuka’mba mukekala na bumi bwa myaka ne myaka kwimukwasha byepi? (Monai kipikichala.)

 ¹¹ Pano akilangulukai pa bintu bikwabo bikekalako inge myaka kiumbi yapwa. Baibolo wamba’mba Mulenga wetu “wabika ne mulanguluko wa kwikala myaka ne myaka mu michima [yetu].” (Sapwi. 3:11) Akilangulukai kino byo kikekala kwi anweba ne bulunda bwenu ne Yehoba. Buku wa Fwenyai Kwipi ne Yehoba pa jipa 319, waamba bino byambo bya lutundaiko bya kuba’mba: “Panyuma ya kwikala bitota, biumbi ne mamilyonyi nangwatu mabilyonyi a myaka, tukayuka byavula pe Yehoba Lesa kukila byo twayuka pa kino kimye. Pano bino tukalangulukanga’mba kukiji bintu bikwabo byawama byo tukyangye kufunda. . . . Bumi bwa myaka ne myaka bukawama bingi kabiji ne kunema kabiji kufwenyesha kwipi ne Yehoba kimye kyonse kikekala kintu kisangajika bingi mu bumi bwa myaka.” Byo twatwajijila kufunda Mambo a Lesa pa kino kimye, ñanyi bintu bikwabo biketukwasha kukwatakanya bulongo byo tubena kufunda?

12. Mwakonsha kuba byepi pa kuba’mba mukwatakanye bintu biji mwiulu? Ambaipo bintu bimo.

¹² Baibolo wasolola biji “mwiulu mwine” mwikala Yehoba. (Isa. 33:5) Baibolo waamba pa bintu bya kukumya pe Yehoba ne pa jibumba janji ja mwiulu. (Isa. 6:1-4; Da. 7:9, 10; Lum. 4:1-6) Mu Baibolo tutangamo bintu bilengesha moyo byamwene Ezikyo ‘mwiulu byo mwashinkukile kabiji wamwene bimwesho bya Lesa.’​—Ezi. 1:1.

13. Kwesakana na byaamba Bahebelu 4:14-16, mumvwa byepi ku muchima pa mwingilo wanema uji ne Yesu mwiulu?

¹³ Langulukai pa bintu bibena kwitubila Mfumu wetu aye Yesu kabiji Ñanga Mukatampe uji na kifyele. Kupichila mwi aye, twakonsha kusolomoka Lesa “ku jitanda ja lusa lukatampe” ne kumulomba kwitubila kifyele ne  kwitukwasha “pa kimye kyafwainwa.” (Tangai Bahebelu 4:14-16.) Pa juba pa juba twafwainwa kusanchilanga Yehoba ne Yesu pa bintu byo betubila kala ne byo babena kwitubila mwiulu. Butemwe bo betumwesha bwafwainwa kwitulengelanga kwibengijila na mukoyo.​—2 Ko. 5:14, 15.

14. Ñanyi kintu kyanema bingi kyo twafwainwa kuba kyakonsha kumwesha’mba tusanchila Yehoba ne Yesu? (Monai bipikichala.)

¹⁴ Jishinda jimo mo tumweshesha’mba tusanchila Lesa ne Mwananji ke kukwasha bantu kwikala Bakamonyi ba kwa Yehoba kabiji baana ba bwanga ba kwa Yesu. (Mat. 28:19, 20) Abino byo byaubile mutumwa Paulo pa kumwesha kusanta kwi Lesa ne Kilishitu. Wayukile kuba’mba kyaswa muchima wa Yehoba ke kya kuba’mba “bantu bonse bapuluke ne kuyukisha bulongo bukine.” (1 Timo. 2:3, 4) Waingijilenga na ngovu mu mwingilo wa kusapwila pa kuba’mba inge ‘kyakonsheka apulushepo bamo.’​—1 Ko. 9:22, 23.

15. Kwesakana na Salamo 1:2, ñanyi kintu kyakonsha kwitulengela kwikala na lusekelo?

¹⁵ Nembi wa Salamo walumbulula’mba muntu wa lusekelo ke muntu “usekela monka mu mizhilo ya Yehoba” ne “kulanguluka langulukapo mute ne bufuku.” (Sala. 1:1-3) Ntuntuluzhi wa Baibolo aye Joseph Rotherham byo aambilenga pa kino kinembelo mu buku wanji wa kuba’mba Studies in the Psalms, waambile’mba “pa kuba’mba Lesa atangijile muntu, wafwainwa kukebakeba bishinka, kwibifunda ne kulanguluka langulukapo kimye kyabaya.” Kabiji waambile’mba “inge juba jazhikatu kwakubula kutangapo Baibolo ko kuba’mba aja juba jaonaikatu.” Kukebakeba bishinka pa kufunda Baibolo ne kumona byo byakwatankana na bishinka byonse kukemulengela kusangalela mu Mambo a Lesa. Kinetu kukwatakanya bishinka byonse byo mubena kufunda mu Baibolo kukemusangajika bingi.

16. Ñanyi bintu byo tukesambapo mu mutwe walondelapo?

¹⁶ Bukine bwawama bwitufunjisha Yehoba mu Mambo anji kechi bwakatazha kwibukwatakanya ne. Mu mutwe walondelapo, tukesamba pa bukine bukwabo bwazhika bwaamba pa nzubo ya Yehoba ikatampe ya ku mupashi Paulo yo alumbulwile mu nkalata yo anembejile bena Kilishitu Bahebelu. Kuyuka bishinka pa uno mutwe kukemuletela bingi lusekelo.