Mepuzho Afuma ku Batanga
Nanchi bena Isalela byo bajinga mu kiselebwa bajangatu manna ne bitentu kwapwa nyi?
Pa myaka 40 bena Isalela yo bajinga mu kiselebwa manna ko kajo ko bajile bingi. (Lupu. 16:35) Kabiji pa bimye bibiji Yehoba wibanengezhejile bitentu. (Lupu. 16:12, 13; Bala. 11:31) Nangwa byonkabyo, kimye kimo bena Isalela bajanga ne kajotu kakwabo.
Kimye kimo Yehoba wakebejile bantu banji “pa kukookolokela” pajinga mema a kutoma ne kajo. (Bala. 10:33) Mpunzha imo yo bakokolokejilepo yajinga Elimu, mpunzha “kwajinga masulo a mema 12 ne bisonga 70.” Bino bichi bya bisonga byamwekanga nobe biji pa kipikichala kiji pa jipa 31 mu kino kyonka Kyamba kya Usopa. (Lupu. 15:27) Buku umo waamba’mba bino bisonga “bipanga bipangwa kabiji bimena mu mapunzha avula. Bino bipangwa ko kajo kaja bingi bantu bekala mu bino biselebwa. Bengako manyi kabiji bebingijisha bino bisonga pa kutunga mazubo avula ekalamo bantu.”—Plants of the Bible.
Kimye kikwabo bena Isalela bakokolokejile pa mpunzha yabaya itelwa luno amba Feiran, iji ku Wadi Feiran. Buku mukwabo waambile’mba: “Kufuma ku kalunga kachila na pasangila mukola wa Valley kufika ku mpunzha ya Feiran paji makilomita 45. Ino mpunzha iji mwakunama kabiji yabaya bingi. Mu ino mpunzha muji bisonga byavula bingi kabiji yawama bingi kya kuba bantu beyesakanya ku byajinga bujimi bwa Edena. Pa myaka yavula bingi bantu bafwakesha ino mpunzha na mambo a bisonga byavula bijiko.”—Discovering the World of the Bible.
Bisonga biji mu mpunzha mutentamina mema ya mu Feiran
Bena Isalela byo bafumine mu Ijipita basendele mushinshi wa fulaulo, masanyi mwa kukanjila, bukula bwa wichi ne manyi. Bino bintu byapwile, kechi byabanjile ne. Kabiji bantu basendele “mikooko ne bañombe, kyajinga kipanyi kikatampe kya banyama.” (Lupu. 12:34-39) Nangwa byonkabyo, na mambo a bintu byo byajinga mu kiselebwa, banyama bavula bafwile. Bamo banyama baikele ke manyi o bajilenga. Bakwabo bebatapishenga ku balesa babo ba bubela. a (Byu. 7:39-43) Nangwa byonkabyo, bena Isalela bashajilepo na mikooko ne bañombe bamo. Yehoba byo aambijile bena Isalela byo bakankelwe kumukookela byo bimwesha’mba bajinga na banyama. Wibambijile’mba: “Baana benu bakekala bakafunga mu kiselebwa pa myaka 40.” (Bala. 14:33) Bino, kechi bafwainwe kwikala na mukaka ne nyama kufuma ku bano banyama ya kukonsha kujanga bantu bafikile ku mamilyonyi asatu pa myaka 40 ne. b
Pano nga kajo kajiilenga bano banyama ne mema o batomenenga byafuminenga kwepi? c Pa kyokya kimye mvula wanokanga bingi ne bijimwa nabyo byavujile. Buku wa Insight on the Scriptures, Volyumu 1, waamba’mba myaka 3,500 yapitapo, “mema avujile bingi ku mapunzha kwajinga bena Isalela kukila byo kiji lelo jino. Twayuka bino, na mambo a bimbotela ne misanza byalengele mikola yajingako pa kyokya kimye.” Nangwa byonkabyo, mu kiselebwa mwajinga bisanzangala ne bintu bimo byalengeshanga moyo. (Mpitu. 8:14-16) Pa bimye bimo Yehoba po abujile kupana mema mu jishinda ja kukumya, bena Isalela ne banyama bamo bafwile.—Lupu. 15:22-25; 17:1-6; Bala. 20:2, 11.
Mosesa waambijile bena Isalela amba Yehoba wibajishishe manna pa “kuba’mba [bayuke’mba] muntu kechi umwena bumi mu kajo konkatu ne, bino muntu umwena bumi ne mu byambo bifuma mu kanwa ka Yehoba.”—Mpitu. 8:3.
a Baibolo waamba pa bimye bibiji bena Isalela po balambwile banyama kwi Yehoba kimye kyo bajinga mu kiselebwa. Kimye kitanshi ke kimye kyatongwelwe bañanga ne kwibashinga manyi. Kimye kya bubiji ke pa juba ja kijiilo kya lupitailo. Bino byonse byamwekele mu 1512 B.C.E., byo papichile mwaka umo kufuma kimye kyafumine bena Isalela mu Ijipita.—Levi. 8:14–9:24; Bala. 9:1-5.
b Ku mpelo ya myaka 40 yo bajinga mu kiselebwa, bena Isalela bapukwile banyama bavula bingi ku bantu bo balwile nabo nkondo. (Bala. 31:32-34) Nangwa byonkabyo, batwajijile kuja manna kufikatu ne byo batwelele mu Ntanda ya Mulaye.—Yosh. 5:10-12.
c Kishinka ke kya kuba’mba banyama kechi bajanga manna ne, mambo Yehoba waambijile bantu amba muntu yense wafwainwa kuwolatu manna o afwainwa kuja kwapwa kabiji kechi waambilepo’mba banyama bafwainwa kuja manna ne.—Lupu. 16:15, 16.
