1. Yehoba wakoseshe byepi bantu banji ba kala?

 MAMBO A LESA javula amba pa banabalume bajinga na lwitabilo lwakosa. Nangwa kya kuba bano banabalume bamo bajinga na lwitabilo lwakosa, pa bimye bimo balangulukanga’mba lwitabilo lwabo kechi lwakosa ne. Pa bimye bimo Davida walangulukanga’mba lwitabilo lwanji ‘lwakoseletu nobe mutumba,’ pano bino pa bimye bikwabo ‘waubile moyo.’ (Sala. 30:7) Nangwa kya kuba mupashi wa Lesa walengejile Samisonyi kwikala bingi na bulume, bino wayukile’mba kwa kubula bulume bufuma kwi Lesa, wakonsha “kukooka ne kwikalatu byonka biji bantu bonse.” (Mito. 14:5, 6; 16:17) Yehoba ye wapanga bulume bano banabalume ba kishinka.

2. Mambo ka mutumwa Paulo o aambijile’mba wakookele, kabiji pa kimye kimo amba wajinga na bulume? (2 Kolinda 12:9, 10)

² Mutumwa Paulo naye wayukile’mba wakebelenga bulume kufuma kwi Yehoba. (Tangai 2 Kolinda 12:9, 10.) Paulo naye wakolwanga byonka byo tukolwakolwa ne atweba mu ano moba. (Nga. 4:13, 14) Kabiji pa bimye bimo kyamukatazhanga bingi kuba bintu byaoloka. (Loma 7:18, 19) Waikalanga ne na bijikila pa bintu byakonsha kumumwekela. (2 Ko. 1:8, 9) Pano bino, Paulo byo aumvwanga kukooka, waikalanga na bulume. Mu ñanyi jishinda? Yehoba wapanga Paulo bulume inge wakooka. Buno bulume bwamukwashanga kuchinchika makatazho.

3. Ñanyi mepuzho o tusakukumbula mu uno mutwe?

³ Ne atweba Yehoba witulaya kwitupa bulume bwa kwitukwasha kuchinchika makatazho. (1 Pe. 5:10) Bino Yehoba kechi wakonsha kwitupa bulume kwa kubula kubapo kintu nangwa kimo ne. Twayai twambe pa motoka. Injinyi yo ilengela motoka kwenda. Nangwa byonkabyo, dalaivwa wafwainwa kunyanta pa kapamba pa kuba’mba motoka itendeke kwenda. Kyo kimotu, Yehoba waswila jimo kwitupa bulume, pano bino, twafwainwa kubapo bintu bimo pa kuba’mba buno bulume bwitukwashe. Ñanyi bintu Yehoba byo etupa bya kwitukwasha kwikala na bulume bwa  kuchinchika? Kabiji ñanyi bintu byo twafwainwa kuba pa kuba’mba Yehoba etupe buno bulume? Ano mepuzho asakukumbulwa byo tusakufundanga pe Yehoba byo akwashishe ngauzhi Yona, Maliya inanji Yesu ne mutumwa Paulo. Kabiji tusakumona Yehoba byo atwajijila kukosesha bakalume banji ba mu ano moba byonka byo akwashanga bakalume banji ba kala.

4. Yehoba wakonsha kwitupa byepi bulume?

⁴ Kulomba kwi Yehoba jo jishinda jimo Yehoba jo akonsha kwitupelamo bulume. Yehoba ukumbula milombelo yetu ne kwitupa bulume bwakila bwa bantu. (2 Ko. 4:7) Kabiji Yehoba wakonsha kwitukosesha inge ketutange Mambo Anji ne kulanguluka langulukapo. (Sala. 86:11) Byambo bya Yehoba biji mu Baibolo, ‘biji bingi na bulume.’ (Hebe. 4:12) Inge kemulombe kwi Yehoba ne kutanga Mambo anji, ukemupa bulume bwa kuchinchika kabiji ukemulengela kwikala na lusekelo ne kwimukwasha kwingila mingilo yakatazha. Pano twayai tumone Yehoba byo akoseshe ngauzhi Yona.

5. Mambo ka ngauzhi Yona o akebejilenga kumukosesha?

⁵ Ngauzhi Yona wakebelenga kumukosesha. Wanyemene mwingilo wakatezhe bingi wamupele Yehoba. Na mambo a kino, kwashajiletu tiki inge wafwile na luvula lukatampe. Kabiji wasaka akepayishe ne bo ajinga nabo mu bwato. Yona byo bamutayile pa mema, bamumiine ku jisabi. Wajinga munda mwa jisabi mwafichiletu bwii. Nanchi mwayuka byo aumvwinenga byo ajinga munda mwa jisabi nyi? Nanchi walangulukilenga’mba usakufwa nyi? Abya walangulukilenga’mba Yehoba wamusankilapo nyi? Kyamweka Yona wajinga bingi na bijikila.

6. Kwesakana na Yona 2:1, 2, 7, ñanyi bintu byakoseshe Yona byo ajinga munda mwa jisabi?

⁶ Ñanyi bintu byaubile Yona pa kuba’mba bamukoseshe kimye kyo ajinga munda mwa jisabi? Kintu kitanshi kyo aubile, walombele. (Tangai Yona 2:1, 2, 7.) Nangwa kya kuba kechi wakookejile Yehoba ne, Yona wajinga na luketekelo lwa kuba’mba Yehoba usakumvwa lulombelo lwanji lwa kukeba kulapila lo alombele kufuma panshi ya muchima. Yona walangulukilenga ne pa Binembelo. Mambo ka o twaambila bino? Mu lulombelo lwanji luji mu Yona kitango 2, muji byambo ne mikuku yavula itaanwa mu Masalamo. (Esakanyai byambo biji pa Yona 2:2, 5 na biji pa Salamo 69:1; 86:7.) Kyamwekeshatu patooka kuba’mba Yona wayukile bino byambo. Kulanguluka languluka pa bino byambo byo ajinga na bijikila, kwalengejile Yona kushiinwa’mba Yehoba usakumukwasha. Palutwe kacheche, Yona byo bamupulwishe, waswile kuya na kwingila mwingilo Yehoba ye amupele.​—Yona 2:10–3:4.

7-8. Mulongo wa ku Taiwan bamukwashishe byepi byo apichilenga mu meseko?

⁷ Byapichilemo Yona byakonsha kwitukwasha ne atweba inge tubena kupita mu makatazho. Twayai twambe pa mulongo Zhiming, b wikala mu Taiwan. Uno mulongo upita mu makatazho akatampe na mambo a kukolwakolwa. Kabiji ba mu kisemi nabo bamukatazha na mambo a kwingijila Yehoba. Kulomba kwi Yehoba ne kufunda pe aye kumukosesha bingi. Waambile’mba: “Kimye kimo inge naikala na makatazho, nkankalwa ne kwikala na kimye kya kufunda Baibolo.” Nangwa byonkabyo, utwajijila kuketekela mwi Yehoba kumukwasha. Waambile’mba: “Kitanshi, ndomba kwi Yehoba. Kya bubiji, ntola foni ne kutendeka kuteleka ku nyimbo ya Bufumu. Kimye kimo ndondelamo ne kwimba na jiwi ja panshi. Umvwe bijikila byapwa, po po ntendeka kutanga Baibolo.”

⁸ Kufunda pe Yehoba kwakoseshe Zhiming  mu mashinda apusana pusana. Byo bapwishishe kumutumbula, manase wamubuujile’mba bafwainwa kumubika mashi mambo akepele bingi mu mubiji. Byo kwashajile juba jimo kumutumbula, watangile pa nyenga ye batumbwile wajinga na lukatazho luntutu lumo. Uno nyenga mashi akepele bingi mu mubiji kukila ne aye, pano bino, kechi waswile kumubika mashi ne, kabiji wakosele. Byapichilemo uno nyenga byakoseshe mulongo Zhiming kutwajijila kwikala wa kishinka.

9. Mwakonsha kuba byepi inge mwaikala na bijikila na mambo a lweseko lo mubena kupitamo? (Monai bipikichala.)

⁹ Inge mubena kupita mu makatazho, nanchi mwikala na bijikila bingi kya kuba mwakankalwa ne kulomba bulongo kwi Yehoba nyi? Abya mukooka bingi kya kuba kemukankalwe kufunda Mambo a Lesa nyi? Vulukainga kuba’mba Yehoba wayuka makatazho enu onse o mubena kupitamo. Onkao mambo, nangwatu inge mwalomba mu byambotu bicheche, mwafwainwa kushiinwa’mba ukemupa byonse byo mukeba. (Efi. 3:20) Umvwe mwakankalwa kutanga Baibolo nangwa kufunda na mambo a kukolwa, kukooka nangwa bijikila, mwafwainwa kuteleka ku Baibolo ne mabuku alumbulula Baibolo o bakopela mu mawi. Kabiji mwakonsha kuteleka ku nyimbo yetu ne mavidyo aji pa jw.org. Yehoba ukeba bingi kwimukosesha kabiji uba bino inge mwalomba kwi aye. Kepo kebakebai mikumbu ya milombelo yenu mu Baibolo ne mu mabuku etu.

10. Balongo ne banyenga bakonsha kwitukosesha byepi?

¹⁰ Yehoba wakonsha kwingijisha balongo ne banyenga kwitukosesha. Bakonsha ‘kwitutekenesha bingi’ inge tubena kupita mu makatazho nangwa inge betupa mwingilo wakatazha kwingila. (Kolo. 4:10, 11) Tukebesha bingi kwikala na balunda kikatakata mu “kimye kya bya malwa.” (Maana 17:17) Umvwe twakooka, bena Kilishitu bakwetu bakonsha kwitupa bintu byo twakajilwa, kwitutekenesha ne kwitutundaika kutwajijila kwingijila Yehoba. Akilangulukai pe Maliya inanji Yesu byo bamukoseshe ku bakwabo.

11. Mambo ka Maliya o akebejilenga kumukosesha?

¹¹ Maliya wakebelenga kumukosesha. Akilangulukai  pa bijikila byo ajinga nabyo kimye malaika Ngabaliela kyo amupele mwingilo wanema bingi. Kechi wasongwelwepo ne, pano bino, bamwambijile’mba ukemita. Kechi wajingapo na baana ne, pano bino, bamwambijile’mba ukasema mwana wamulume ukekala Mesiasa. Kabiji byo kiji kuba’mba kechi walaajilepo na mwanamulume kala ne, kyakonsheshe kumukatazha bingi kulumbulwila Yosefwa wamwipangwizhe kuba’mba waimita.​—Luka 1:26-33.

12. Kwesakana na Luka 1:39-45, Maliya bamukoseshe byepi?

¹² Maliya bamukoseshe byepi pa kuba’mba engile uno mwingilo wanema ye bamupele? Bamukwashishe ku bakwabo. Kwesakana na mwingilo ye bamupele, Maliya waipwizhe malaika aye Ngabaliela pa kino byo kyafwainwe kubiwa. (Luka 1:34) Palutwe kacheche, wayile ku kyalo kya mitumba kya Yuda na kufwakesha mulongo wanji aye Elisabeta. Waubile bingi bulongo kuya na kumufwakesha mambo Elisabeta wasanchijile Maliya kabiji bamutangijile na mupashi wa Yehoba kumutundaika na bungauzhi bwaambile pa mwana wamulume ukasema Maliya. (Tangai Luka 1:39-45.) Maliya waambijile Yehoba amba: “Wauba bintu bya bulume na kuboko kwanji.” (Luka 1:46-51) Yehoba waingijishe malaika Ngabaliela ne Elisabeta kukosesha Maliya.

13. Ñanyi kintu kyamwekejile nyenga wa ku Bolivia byo alombele bukwasho ku balongo ne banyenga?

¹³ Ne anweba bena Kilishitu bakwenu bakonsha kwimukosesha byonka byo kyajinga kwi Maliya. Nyenga wa ku Bolivia aye Dasuri, naye wakebelenga kumukosesha. Bashanji bebataaine na kikola kibula kubukwa kabiji bajinga mu kipatela. Dasuri ye wibalaminenga kabiji kino kechi kyamupeelejile ne. (1 Timo. 5:4) Waambile’mba: “Uno mwingilo wakatezhe bingi.” Pano nanchi walombele bukwasho nyi? Ine. Wanungilepo’mba: “Kechi nakebelenga kukatazha balongo ne banyenga ne. Nalangulukilenga’mba Yehoba ye yenkatu wafwainwa kunkwasha. Pano bino, palutwe kacheche nayukile’mba nakebelenga kupwisha luno lukatazho bunke bwami kwa kubula kubuulako balongo ne banyenga kuba’mba bankwasheko.” (Maana 18:1) Kepo Dasuri afuukwilepo kubuulako balunda nanji ne kwibalumbulwila byajinga lukatazho lwanji. Waambile’mba: “Kwambatu kine, bano bena Kilishitu bakwetu bankoseshe bingi. Bandetejilenga kajo ku kipatela ne kuntangilapo Binembelo bimo byankoseshenga. Kino kyantundaikile bingi kuyuka’mba kechi nji bunke ne. Atweba bonse tuji mu kisemi kya kwa Yehoba. Balongo ne banyenga bakeba kwitukwasha inge twakajilwa nangwa inge tubena kupita mu makatazho. Kabiji betutundaika kutwajijila kwingijila Yehoba pamo nabo.”

14. Mambo ka o twafwainwa kubuujila bakulumpe mu kipwilo kuba’mba betukwashe?

¹⁴ Kabiji Yehoba wingijisha bakulumpe mu kipwilo kwitukosesha. Bano bakulumpe ke bya bupe Yehoba byo engijisha kwitutundaika ne kwitukokolosha. (Isa. 32:1, 2) Onkao mambo, inge mwaikala na bijikila, buulai bakulumpe mu kipwilo kabiji mwafwainwa kulondela byo bemubuula. Yehoba ukemukosesha kupichila mwi abo.

15. Ñanyi luketekelo luji na bena Kilishitu?

¹⁵ Milaye ya mu Baibolo yakonsha kwitukosesha ne kwitukwasha kutwajijila kwingijila Yehoba. (Loma 4:3, 18-20) Bena Kilishitu bamo baji na luketekelo lwa kuya mwiulu. Bakwabo baji na luketekelo lwa kwikala mu Paladisa pano pa ntanda. Luno luketekelo lwitukwasha kuchinchika meseko, kusapwila Mambo Awama a bufumu ne kukwasha balongo ne banyenga. (1 Tesa. 1:3) Luno luketekelo luntutu lumo lo lwakwashishe ne mutumwa Paulo.

16. Mambo ka mutumwa Paulo o akebejilenga kumukosesha?

 ¹⁶ Paulo wakebelenga kumukosesha. Mu nkalata yo anembejile bena Kolinda, wiesakenye ku kipe kya buchimba kyabula kukosa. Wazhokolokelwe na makatazho apusana pusana. Aye ‘wasusubele,’ ‘wamanyikilwe’ ne ‘kunyakwilwa panshi.’ Pa bimye bimo, bumi bwanji bwajinga ne mu kizumba. (2 Ko. 4:8-10) Paulo wanembele bino byambo pa lwendo lwanji lwa busatu lwa bumishonale. Kyamweka pa kyokya kimye byo apwishishe kunemba ano makalata, wapichile ne mu makatazho akwabo akatazha bingi. Mu moba apeleleko mu lwendo lwanji lwa bumishonale, jibumba jamulukukile ne kumukwata, walobele pa mema kabiji bamukashile mu kaleya.

17. Kwesakana na byaamba 2 Kolinda 4:16-18, ñanyi bintu byakwashishe Paulo kuchinchika meseko?

¹⁷ Kulanguluka pa luketekelo lwanji ko kwakwashishe Paulo kuchinchika makatazho o apichilengamo. (Tangai 2 Kolinda 4:16-18.) Wabuujile bena Kolinda kuba’mba nangwa kya kuba pangye ‘waonaikilenga,’ bino kechi waswishishe kino kumulefula ne. Wateletu muchima pa bintu byawama byajinga kulutwe. Luketekelo lwanji lwa kukekala mwiulu myaka ne myaka lo lwajinga “lukumo lukatampe” kwi aye lwakijile makatazho onse o apichilengamo. Paulo walangulukanga pa luno luketekelo kimye kyonse. Kyafuminemo, waikalanga ke mupya pa juba pa juba.

18. Kulanguluka pa luketekelo lwa bintu biji kulutwe kukosesha byepi Tihomir ne kisemi kyanji?

¹⁸ Luketekelo lwa bintu biji kulutwe lo lukosesha mulongo wikala ku Bulgaria, aye Tihomir. Myaka icheche yapitapo wafwishishe nkasanji, aye Zdravko mu mapuso a pa mukwakwa. Luno lufu lwalengejile Tihomir kwikala bingi na bulanda. Kulanguluka pa bikekala lusanguko kumukosesha aye ne kisemi kyanji. Waambile’mba: “Javula twisamba ko tukamonañena na Zdravko, kajo ko tukamunengezhezha, bantu bo tuketako ku kino kijiilo kitanshi kya kumutambwila ne bintu byo tukamubuula byamwekele mu moba a kupelako.” Tihomir watwajijila kwamba’mba kulanguluka pa luno luketekelo kukosesha aye  ne kisemi kyanji pamo. Kabiji kwibalengela kuchinchika meseko o babena kupitamo ne kupembelela kimye Yehoba kyo akasangula Zdravko.

19. Ñanyi bintu byo mwafwainwa kuba pa kuba’mba mukoseshe luketekelo lwenu mu bintu biji kulutwe? (Monai kipikichala.)

¹⁹ Mwakonsha kukosesha byepi luketekelo lwenu? Umvwe muji na luketekelo lwa kwikala myaka ne myaka pano pa ntanda, tangainga byaambapo Baibolo pa Paladisa ne kulanguluka langulukapo. (Isa. 25:8; 32:16-18) Langulukainga pa bikekala bwikalo mu ntanda ipya. Fwanyikizhai kuba’mba muji monka. Ñanyi bantu bo mubena kumona? Ñanyi bintu byo mubena kumvwa? Mubena kumvwa byepi ku muchima kutamba bipikichala biji mu mabuku etu byamwesha Paladisa nangwa kutamba mavidyo a nyimbo nabiji a kuba’mba Ntanda Ipya Iji Kulutwe, Paladisa Ujitu Pepi nangwa Fwanyikizhai Ntanda Ipya. Kuba bino kukemukwasha kufwanyikizha bulongo bikekala Paladisa. Inge twatwajijila kulanguluka pa ntanda ipya, tukamonanga’mba makatazho o tupitamo ke a pa ‘kakimye kacheche kabiji apela.’ (2 Ko. 4:17) Luketekelo lwitupa Yehoba luketulengela kuchinchika makatazho.

20. Twakonsha kwikala byepi na bulume jikwabo inge twakooka?

²⁰ Nangwatu inge twakooka, “Lesa uketupa bulume.” (Sala. 108:13) Yehoba wanengezhezha jimo bintu byonse byo tukeba pa kuba’mba twikale na bulume. Onkao mambo, umvwe mukeba kwingila bulongo mwingilo ye bemupa, kuchinchika makatazho nangwa kutwajijila kwikala na lusekelo, mwafwainwa kulomba kwi Yehoba kufuma panshi ya muchima ne kufundanga pe aye. Lombainga bukwasho ku balongo ne banyenga mu kipwilo pa kuba’mba bemutundaikenga. Langulukainga pa luketekelo lwenu lwa bintu byawama biji kulutwe. Inge mwauba bino, mukachinchika saka mwatekanya mu bintu byonse ne kwikala na lusekelo.​—Kolo. 1:11.