NANCHI mwakonsha kutanga Baibolo wa Kihebelu nyi? Kampe kechi mwakonsha kutanga ne. Kabiji kampe mukyangye ne kumonapotu Baibolo wa Kihebelu. Nangwa byonkabyo, mwakonsha kunemeka Baibolo wa Binembelo Byazhila ye muji nanji inge mwayuka bishinka byaamba pa Mabaibolo a Kihebelu abiji anembele Elias Hutter nobe mu myaka kitota kya bu 16.

Elias Hutter wasemekelwe mu mwaka wa 1553 mu kamuzhi kacheche ka Görlitz kaji kwipi na mupaka wa kyalo kya Germany, kyalo kya Poland ne kya Czech Republic. Hutter wafunjile milaka yo bamba ku Asia pa sukulu mukatampe wa Lutheran mu Jena. Byo afikizhe myaka 24, bamutongwele kwikala shayuka wa mulaka wa Kihebelu mu Leipzig. Na mambo a kuba wakebelenga kukwasha bantu kufunda milaka, washimikile sukulu mu Nuremberg mo atendekele kufunjisha baana basukulu mulaka wa Kihebelu, Kingiliki, Kilatini ne Kijemani pa myaka ina. Pa masukulu acheche ne akatampe, bafundanga ino milaka pa myaka yavula.

Mu 1587, Hutter walupwile Baibolo wa Kihebelu utelwa luno amba Lulayañano lwa Kala. Uno Baibolo bamutelanga’mba Derekh ha-Kodesh, byambo byafumine mu Isaya 35:8 bilumbulula amba, “Mukwakwa Wazhila.” Muntu umo waambile’mba “uno Baibolo wawamine bingi” na mambo a jishinda jo bamunembejilemo kabiji ye Baibolo waingijishanga baana ba sukulu pa kufunda Kihebelu.

Pa kuba’mba tuyuke ene mambo bantu o batemwejile Baibolo wa Kihebelu wanembele Hutter, langulukai pa bintu bibiji byakatazhanga muntu pa kutanga Baibolo wa Kihebelu. Kitanshi, baingijishe bisopelo byakatazha. Kya bubiji, tubyambo twa kutendekelako pa kunemba kyambo ne twa kupezhako, twalengelanga bantu kubula kuyuka mwatala kyokyo kyambo. Akilangulukai pa kyambo kya Kihebelu kya נפשׁ (kyatuntululwa amba ne’phesh), kilumbulula’mba “mweo.” Pa Ezikyo 18:4, kino kyambo kyatendeka na tubyambo twa ה (ha), kulenga kyambo kya הנפשׁ (han·ne’phesh), nangwa amba “mweo.” Ku muntu wabula kufunda uno mulaka, kyambo kya kuba’mba הנפשׁ (han·ne’phesh) kechi wakonsha kuyuka’mba kyo kimotu na kyambo kya נפשׁ (ne’phesh) ne.

Pa kuba’mba akwashe bantu bo afunjishanga, Hutter waingijishe jishinda jawama pa kulenga bisopelo bya Kihebelu mu byambo bikatampe biji mu ndonda. Wanembelenga kwafuma byambo byonse kwingijisha byambo bikatampe bya Kihebelu bifiita. Pa kunemba tubyambo twakutendekelako ku kyambo ne twapelako, waingijishe byambo byabula kufiita. Kunemba byambo mu jino jishinda kwakwashishe bantu bo afunjishenga  kuyuka kwafumine kyambo kya Kihebelu. Kuba bino kwibakwashanga kufunda mulaka bukiji. Jino jo jishinda jo baingijishe ne pa kunemba tubyambo twa munshi mu Baibolo wa Kizungu wa New World Translation of the Holy Scriptures—With References. * Kyambo kine kiji mu byambo bifiita kabiji tubyambo twakutendekelako twakununga ku kyambo ne twapelako kechi tuji mu bifiita ne. Byambo byo bamwesha pano ke byambo byajinga mu Baibolo wa Kihebelu byanembele Hutter pa Ezikyo 18:4, byobyo bauba ne mu Baibolo wa Reference Bible mu tubyambo twa munshi pa kino kyepelo.

Hutter wanembele ne Baibolo wajinga mu milaka 12 utelwa’mba Baibolo wa Lulayañano Lupya. Uno Baibolo bamunembele mu 1599 mu Nuremberg kabiji utelwa amba Nuremberg Polyglot. Hutter wakebelenga ne kutuntulula Baibolo wa Binembelo bya Kingiliki bya Bwina Kilishitu mu Kihebelu. Kabiji waambile’mba, “nangwa kya kuba wakebelenga kwingijisha mali avula” pa kutuntulula uno Baibolo mu Kihebelu, inge kechi wakwashishe bantu bavula ne. * Onkao mambo, wafuukwilepo kutuntulula Baibolo wa Lulayañano Lupya kufuma mu Kigiliki kutwala mu Kihebelu. Hutter wateletu muchima pa kutuntulula Baibolo kabiji wapwishishe kumutuntulula mu mwakatu umo!

Mambo ka Baibolo wa Kihebelu watuntulwile Hutter kufuma mu Binembelo bya Bwina Kilishitu bya Kingiliki o awamijile? Shayuka Muhebelu aye Franz Delitzsch wajingako mu myaka kitota kya bu 19 wanembele’mba: “Mu Baibolo wa Kihebelu ye atuntulwile waingijishe mulaka wabujile kwingijishapo bena Kilishitu kabiji bantu bafunjijilengako bintu byavula, mambo byo atuntulwilenga uno Baibolo waingijishe byambo byapeela kumvwa.”

Hutter kechi wanonkele na mambo a kutuntulula Mabaibolo ne, mambo bantu bavula kechi beapotanga ne. Nangwa byonkabyo, mwingilo ye aingijile wa kutuntulula Mabaibolo mwafumine bintu byawama bingi. Baibolo wa Kihebelu wa Lulayañano Lupya bamupitulukilemo kwi William Robertson ne kumupulinta jikwabo mu 1661. Kabiji bamupitulukilemo jikwabo kwi Richard Caddick mu 1798. Byo atuntulwilenga kufuma mu mulaka mwine wa Kingiliki, Hutter watuntulwile byambo bya kuba’mba Kyʹri·os (Nkambo) ne The·osʹ (Lesa) nangwa “Yehoba” (יהוה, JHVH) pajinga byambo byafuma mu Binembelo bya Kihebelu nangwa po amwene kuba’mba bibena kwamba pe Yehoba. Kino kitusangajika bingi. Nangwa kya kuba mu Mabaibolo avula a Lulayañano Lupya kechi babikamo jizhina ja Lesa ne, bino Hutter Mabaibolo o atuntulwile wabwezhezhemo jizhina ja Lesa byonka byo bauba mu Baibolo wa Binembelo bya bwina Kilishitu bya Kingiliki.

Inge mukamone jizhina ja kuba’mba Yehoba mu Binembelo bya bwina Kilishitu bya Kingiliki nangwa mu tubyambo twa munshi mu Reference Bible, muvulukenga mwingilo waingijile Elias Hutter pa kutuntulula Mabaibolo a Kihebelu.