Nanchi twakonsha kushiinwa kuba’mba milaye ya Lesa ikafika nyi? Yesu washiinwe kuba’mba ikafika, kabiji byo afunjishanga byalengejile bantu kwikala na lwitabilo. Akilangulukai pa kishimpi kyo aambile mu Jashi janji ja pa Mutumba kiji mu Mateo 5:18. Kyaamba’mba: “Kine nemwambila namba, jiulu ne ntanda bikapita, pakuba kafwako ka kyambo nangwa kamo ka mu Mizhilo kakapitatu ne, poso bintu byonse bikafike.”

Ka kyambo kacheche ka mu Kihebelu ka (yod), ko kuba’mba kyambo kitanshi mu bisopelo bina bya Tetragrammaton ke jizhina jazhila ja Lesa ja kuba’mba Yehoba. * Kabiji kununga pa byambo biine bya mu Mizhilo ya Lesa, banembeshi ne Bafaliseo bamonanga’mba “ka kyambo” konse kanema bingi.

Kyamweka Yesu walumbulwilenga’mba jiulu ne ntanda byakonsha kupita, bino tubyambo twa mu Mizhilo twafwainwa kufika. Kabiji tufunda mu Binembelo amba jiulu ne ntanda bikekala myaka ne myaka. (Salamo 78:69) Onkao mambo, bino byambo bimwesha amba tubyambo tonse twa mu Mizhilo tukafika.

Nanchi Yehoba Lesa utako muchima ku tubyambo tucheche twa mu Mizhilo yanji nyi? Ee. Langulukai pa kino: Bena Isalela bebabuujile’mba kechi bafwainwa kuchimuna kikupa kya mwana mukooko pa Kijiilo kya Lupitailo ne. (Kulupuka 12:46) Uno muzhilo wamwekelengatu nobe kechi wanema ne. Nanchi bayukile ene mambo a kubujila kuchimuna bikupa nyi? Kyamweka kechi bayukile ne. Bino Yehoba Lesa wayukile kuba’mba uno mukambizho wakwatankene na bungauzhi bwaambilenga pe Mesiasa bwa kuba’mba kechi bakamuchimuna bikupa byanji byo bakamwipaya pa kichi kya lumanamo ne.—Salamo 34:20; Yoano 19:31-33, 36.

Ñanyi bintu byo twakonsha kufunjilako ku byambo byaambile Yesu? Twafwainwa kushiinwa’mba milaye ya Yehoba Lesa yonse ikafika. Ke mulaye wawama bingi wa ka kyambo kacheche kafuma ku kyambo kya Kihebelu!