JIFUNDE JA MU BAIBOLO: “Kilekai kubambisha michima.”—Mateo 6:25.

Bino byambo bilumbulula ka? Yesu waambile bino byambo mu Jashi ja pa Mutumba. Kwesakana na dikishonale umo waamba pa Baibolo, walumbulwile’mba kyambo kya Kingiliki kyo batuntulula’mba “kubambisha muchima” kyakonsha ne kulumbulula “bijikila byo twikala nabyo na mambo a buyanji, nzala ne makatazhotu akwabo o tupitamo pa juba pa juba.” Kubambisha muchima kwavwangamo kwakamwa pa bintu byakonsha kumweka kulutwe. Kijitu bulongo kwakamwa pa bintu bya ku mubiji byo tukeba ne pa bwikalo bwa batemwe betu. (Filipai 2:20) Yesu byo aambile’mba “kubambisha muchima ne,” watundaikilenga baana banji ba bwanga kubula kukizhamo kwakamwa, mambo kwakamwa pa bintu bya kulutwe kwakonsha kwitupwishishatu lusekelo.—Mateo 6:31, 34.

Nanchi kino kingila lelo jino nyi? Twafwainwa kulondela lujimuno lwapaine Yesu. Mambo ka? Mabuku amo amba’mba inge bantu bakizhamo kwikala na bijikila, mubiji wabo wingila kukilamo, kabiji kino “kilengela muntu kwikala na bikola nabiji bilonda munda, kikola kya muchima ne kushinka mu kyaji.”

Yesu walumbulwile ene mambo a kubula kukizhamo kwakamwa: Kechi kukwasha ne. Yesu washikishe’mba, “Ñanyi mwi anweba pa kubambisha muchima wakonsha kunungako kyubichi umo ku bumi bwanji?” (Mateo 6:27) Kukizhamo kwakamwa kechi kwakonsha kunungako bumi bwetu ne, ke kutayatu kimye. Nangwatu twaakamwa, bintu kechi bikala mo tubena kukebela ne. Shayuka umo waambile’mba: “Kwakamwa pa bintu bya kulutwe bikabula kumweka ke kutayatu kimye.”

Twakonsha kuchinuzhuka byepi kubambisha muchima? Kitanshi, twafwainwa kuketekela mwi Lesa. Umvwe Lesa ujiisha bañonyi ne kuvwika maluba, nanchi kechi wakonsha kupa bantu bamwingijila bintu byo bakeba nenyi? (Mateo 6:25, 26, 28-30) Kya bubiji, taitu muchima pa jojo juba. Yesu waambile’mba: “Kange mubambishenga michima na mambo a juba ja kesha ne, mambo juba ja kesha jikekala na bijikila byajo.” Nanchi kechi mwaswa kuba’mba “juba jonse jiji na makatazho ajo” nenyi?—Mateo 6:34.

Inge twalondela bitujimwineko Yesu, tukakepeshako kwikala na bijikila. Kabiji tukakasuluka bingi ne kwikala na kintu kyaambapo Baibolo amba “mutende wa Lesa.”—Filipai 4:6, 7.