Bansemi bami baikalanga mu Tellancourt mu muzhi wa ku kabeta ka ku muzhika buyeke bwa France. Batata ba ku France kabiji bamama ba ku Italy. Byo najinga na myaka itanu na isatu, twavilukijile kwaikalanga bantu bayanji ku Rome, mu Italy. Twayanjile bingi. Bamama ne batata batobokanga bingi mambo a kubula mali.

Byo nafikizhe myaka 15, bamama bañambijile kufuma pa nzubo ne kuya na kulenga balunda. Onkao mambo, kechi nabwelanga bukiji pa nzubo ne. Natendekele kukaya na balunda batama. Juba jimo, muntu wamwekele kuwama muchima wangichile. Wampele bizhima, ne amiwa natambwile mambo nakebelenga kumweka’mba nemukulumpe. Natendekele kwingijisha bizhima ne kuba bulalelale. Bimye byavula, bantu bangubanga bintu byatama bingi. Bwikalo bwankatezhe bingi, kechi nakebelenga ne kwikala na bumi ne. Kabiji naumvwanga bingi mukose. Byo nafikizhe myaka 16, nakebelenga kwiipaya byo natomene maalwa avula ne kwitaya mu kalunga ka mema. Nakolelwe kya kuba batajilengapotu pa moba asatu.

Natendekele kwikala bulongo, nangwa byonkabyo nakanamine bingi ne kubula bukishinka. Naubanga bulalelale na bantu, kwibapepesha bizhima mu mazubo abo ne kwibebila bintu byabo byonse. Bipanyi byapoteshanga bizhima byañingijishanga kutwala bizhima mu kyalo kyonse kya Italy. Nekatazhanga kimye kyonse na bakapokola. Bwikalo bwami bwatamine bingi. Nangwa byonkabyo, nayukile kuba’mba kuji kintu kyandengela kwikala na bumi. Nalombele kwi Lesa kuba’mba ngikale mu mutende ne lusekelo pa mwaka umotu.

Byo nafikizhe myaka 24, navilukijile ku England. Bumi bwami bwajinga mu kizumba byo nakwatankene na bantu bapoteshanga bizhima. Saka nkyangye kuya ne, nafwakashijile bamama kabiji nakuminye bingi pa kumona Annunziato Lugarà saka abena kwisamba ne bamama bya mu Baibolo. * Byo namuyukile’mba wajinga mbanzhi, naakaminwe kabiji namwipwizhe namba ubena kuba ka kuno. Wambuujile’mba  wapimpula bwikalo bwanji pa kuba’mba ekale Kamonyi wa kwa Yehoba, kabiji wañambijile’mba nkesambe na Bakamonyi inge nafika ku England. Naswile kuba byo ambuujile. Byo nafikiletu kokwa, natendekele jikwabo byubilo byatama.

Juba jimo, nasambakene Kamonyi wapainenga Kyamba kya Usopa ne Labainga! mu mukwakwa wa ku London mupita bantu bavula. Byo navulukile byañambijile Annunziato, nashikishe Kamonyi umvwe wakonsha kumfunjishanga Baibolo.

Bintu byo nafunjile mu Baibolo byamfikile pa muchima. Natemenwe bingi bintu byo nafunjile mu Baibolo biji pa 1 Yoano 1:9, byaamba pe Lesa amba: “Umvwe twasolola mambo etu, aye uketulekelako mambo etu ne kwitutokesha ku mingilo yonse yabula koloka.” Akino kyepelo kyamfikile bingi pa muchima mambo bwikalo bwami bwatamine bingi. Ponkapotu natendekele kutanwa ku kupwila ku Nzubo ya Bufumu ya Bakamonyi ba kwa Yehoba. Bakamonyi bantambwijile bingi bulongo. Butemwe bo namwene mwi abo, bwandengejile kukeba kukwatankana nabo mambo kyo kintu kyo nakebeshanga.

Nangwa kya kuba kechi kyankatezhe kuleka kwingijisha bizhima ne kuba bintu byatama ne, kyankatezheko ke kuwamisha byubilo byami. Namwene’mba nafwainwa kunemekanga bantu ne kwibalangulukilako. Ne lunotu nkibikako kuleka byubilo byatama. Pano bino, na bukwasho bwa Yehoba, natendeka kuba bulongo. Papichiletu bañondo batanu na umo kufuma po natendekejile kufunda Baibolo, nabatizhiwe kwikala Kamonyi wa kwa Yehoba. Mwajinga mu 1997.

Byo nabatizhiwetu, nasongwele nsongwakazhi wa jizhina ja Barbara, naye popo aikeletu Kamonyi wa kwa Yehoba. Mukwetu umo mo twakayilanga kala, byo amwene byo napimpula byubilo byami, naye watendekele kufunda Baibolo. Kechi papichile ne kimye kyabaya ne, aye ne nyenga yanji baikele Bakamonyi. Bakolojabo ba nkambo bajinga na myaka 80, nabo batendekele kufunda Baibolo kabiji babatizhiwe saka bakyangye kufwa.

Luno nemukulumpe mu kipwilo, kabiji amiwa ne mukazhami tubena kwingila mwingilo wa kimye kyonse, tubena kufunjisha bantu Baibolo bamba mulaka wa ku Italy mu London. Bimye bimo, kinkola bingi ku muchima pa byubilo byami byatama bya kala, bino Barbara untundaika bingi. Pano luno nji na bwikalo bwawama bo nakebanga mu kisemi kyami, kabiji nji na Tata wantemwa ye nakebanga bingi. Nalombele kwi Lesa namba ankwashe kwikala mu mutende ne lusekelo pa mwaka umotu, bino aye wankwasha mu bintu byavula bingi!