1. Mambo ka o twafwainwa kwinengezhezha jimo kumanyikwa?

BUFUKU bwapeleleko Nkambo Yesu saka bakyangye kumwipaya, waambile’mba bonse bafuukulapo kwikala baana banji ba bwa bwanga bakebashikwa. (Yoa. 17:14) Kufikatu ne lelo jino, bena Kilishitu ba kishinka babena kwibamanyika bingi ku bantu bashikwa bupopweshi bwa kine. (2 Timo. 3:12) Mpelo ya buno bwikalo byo iji pepi, twafwainwa kuyuka’mba balwanyi betu bakakizhamo kwitumanyika.—Mat. 24:9.

2-3. (a) Twafwainwa kuyuka ka pa mambo a moyo? (b) Tusakwisamba pa ka mu uno mutwe?

² Twakonsha kwinengezhezha byepi jimo kumanyikwa? Kechi twafwainwa kufwanyikizha bintu byonse byatama byakonsha kwitumwekela ne. Mambo kuba bino kwakonsha kwitulengela kwikala bingi na moyo ne bijikila. Umvwe ketulanguluke pa byonse byatama byakonsha kwitumwekela, twakonsha kwikala bingi na moyo kya kuba twaleka ne kwingijila Yehoba meseko saka akyangye ne kufika. (Maana 12:25; 17:22) Moyo ke kingijisho kingijisha ‘Mulwanyi wetu aye Diabola’ kwi atweba. (1 Pe. 5:8, 9) Twafwainwa kuba byepi pa kuba’mba tuchinchike lumanamo?

³ Mu uno mutwe, tusakwisamba pa byo twafwainwa kukosesha bulunda bwetu ne Yehoba, ne ene mambo o kyanemena kuba bino lonka luno. Kabiji tusakwisamba ne pa byo twafwainwa kuba pa kuba’mba tuchinchike. Ne kyapelako, tusakwimba pa byo twafwainwa kuba inge bantu betushikwa.

4. Kwesakana na byaamba Bahebelu 13:5, 6, twafwainwa kushiinwa’mba ka, kabiji mambo ka?

⁴ Shiinwai kuba’mba Yehoba wimutemwa bingi kabiji kechi ukemulekelela ne. (Tangai Bahebelu 13:5, 6.) Myaka ya kala, Kyamba kya Usopa kyaambile’mba: “Muntu wayuka Lesa bulongo  umuketekela mu kimye kya meseko.” Kino ke kishinka bingi. Pa kuba’mba tuchinchike lumanamo, twafwainwa kutemwa Yehoba ne kumuketekela na muchima wetu yense, kabiji kechi twafwainwa kuzhinaukanga butemwe bwanji ne.—Mat. 22:36-38; Yako. 5:11.

5. Ki ka kikemukwasha kuyuka’mba Yehoba wimutemwa?

⁵ Tangainga Baibolo kimye kyonse pa kuba’mba mufwenyenga kwipi ne Yehoba. (Yako. 4:8) Kimye kyo mubena kutanga Baibolo, mwafwainwa kuta muchima pa byubilo byawama bya Yehoba. Inge mubena kutanga pa bintu byo oba ne byo amba, esekai kumona byo emutemwa. (Lupu. 34:6) Bamo kyakonsha kwibakatazha kuswa’mba Lesa wibatemwa mambo kafwako wakibamweshapo kala butemwe ne. Inge byobyo kiji ne kwi anweba, pa juba pa juba, esekainga kunemba mashinda amo Yehoba mo emumweshesha lusa ne kifyele. (Sala. 78:38, 39; Loma 8:32) Kimye kyo mubena kulanguluka pa bintu byo mwapitamo mu bwikalo bwenu ne kulanguluka-languluka pa byo mutanga mu Mambo a Lesa, mwakonsha kwikala na bintu byavula bya kunemba bimubila Yehoba. Inge ke musanchile Yehoba pa byo emubila, bulunda bwenu ne aye bukakosa bingi.—Sala. 116:1, 2.

6. Kwesakana na byaamba Salamo 94:17-19, kulomba kufuma panshi ya muchima kukemukwasha byepi?

⁶ Lombainga kimye kyonse. Fwanyikizhai kalombwana uji mu maboko a bashanji bamutemwa bingi. Uno kalombwana uyuka’mba wazhikijilwa kabiji ubuula bashanji byonse byaji kumumwekela pa jojo juba, byatama ne byawama. Ne anweba mwakonsha kwiyowa bulunda bwawama ne Yehoba inge ke mufwenye kwipi ne aye kupichila mu kulomba kimye kyonse. (Tangai Salamo 94:17-19.) Inge mubena kulomba kwi Yehoba, ‘mubuulainga bintu byonse biji ku muchima wenu’ kabiji mubuulai Shenu wa butemwe bintu byonse bimuletela moyo ne bijikila. (Jila. 2:19) Ñanyi bintu bikafumamo? Mukemwena kufika kwa byambo bya mu Baibolo bya kuba’mba: “Mutende wa Lesa wakila milanguluko ya bantu.” (Fili. 4:6, 7) Umvwe ke mulombe mu jino jishinda, bulunda bwenu ne Yehoba bukakoselako.—Loma 8:38, 39.

7. Mambo ka o mwafwainwa kushiinwa’mba milaye ya Lesa yaamba pa Bufumu bwanji ikafika?

⁷ Shiinwai kuba’mba mapesho etulaya Lesa akafika. (Bala. 23:19) Umvwe kechi mwaitabila kuba’mba milaye ya Lesa ikafika ne, Satana ne bantu banji bakemulengesha moyo. (Maana 24:10; Hebe. 2:15) Mwakonsha kukosesha byepi lwitabilo lwenu mu Bufumu bwa Lesa lonka luno? Ibikilai kikonkwanyi kya kufunda pa milaye ya Lesa yaamba pa Bufumu bwanji ne ene mambo o mwafwainwa kushiinwa’mba kine ikafika. Kuba bino kukemukwasha byepi? Akilangulukai pe ba Stanley Jones bo bakashile myaka itanu na ibiji na mambo a lwitabilo lwabo. * Ñanyi kintu kibakwashishe kuchinchika? Baambile’mba: “Lwitabilo lwami lwakosele mambo nayukile byavula pa Bufumu bwa Lesa  ne byo bukoba, kabiji kechi nazhinaukanga nangwa pachechetu ne.” Inge muji na lwitabilo lwakosa mu milaye ya Lesa, mukafwenya kwipi ne Yehoba kabiji kechi mukachiinanga muntu ne.—Maana 3:25, 26.

8. Kupwila kimye kyonse kumweshapo ka pe atweba? Lumbululai.

⁸ Pwilainga kimye kyonse. Kupwila kwitukwasha kufwenya kwipi ne Yehoba. Kupwila kimye kyonse kumwesha byo tukatwajijila kuchinchika kimye kyo baketumanyikanga kulutwe. (Hebe. 10:24, 25) Mambo ka o twakonsha kwambila bino? Inge twaswisha tumakatazho tucheche kwitulengela kuleka kupwila luno, tukoba byepi kulutwe inge kikakebewenga kubika bumi bwetu mu kizumba pa kuba’mba tupwile pamo na bakwetu ba mu lwitabilo? Pano bino, inge twatemwa kupwila luno, kechi tukaleka kupwila inge balwanyi betu bakanya kupwila ne. Kino kyo kimye kyo twafwainwa kutemwa bingi kupwila. Umvwe twatemwa kupwila, nangwatu kafulumende inge wakanya kupwila kechi tukaleka kukookela Lesa ne.—Byu. 5:29.

9. Mambo ka kulabijila binembelo o kwawamina pa kwinengezha kumanyikwa?

⁹ Labijilai binembelo byo mwatemwa. (Mat. 13:52) Nangwa kya kuba mwibambulwa kulumbuluka, bino Yehoba wakonsha kwingijisha mupashi wanji wazhila kwimuvululamo Binembelo. (Yoa. 14:26) Akilangulukai pa byaambile mulongo umo wa ku East Germany ye bakashijile mu kaleya ka bunke. Waambile’mba: “Nakonsheshe kuvuluka binembelo byavula byo nalabijile. Nangwa kyakuba najinga mwa bunke, nalangulukanga pa binembelo byapusana-pusana bya mu Baibolo.” Bino binembelo byakwashishe mulongo wetu kwikala na bulunda bwakosa ne Yehoba ne kuchinchika.

10. Mambo ka o twafwainwa kulabijila nyimbo yetu?

¹⁰ Labijilainga nyimbo ya kutota Yehoba ne kwiimbanga. Filipai, Paulo ne Silasa byo bajinga mu kaleya, baimbilenga nyimbo ya kutota Yehoba yo balabijile. (Byu. 16:25) Nga balongo bajinga mu byalo byo balamanga ku kafulumende wa Soviet Union bo bapangijile mu Siberia, baubile byepi pa kuba’mba batwajijile kwikala bakosa? Nyenga Mariya Fedun uvuluka kuba’mba: “Twaimbanga nyimbo yonse yo twayukile yajinga mu buku wa nyimbo.” Uno nyenga wambile’mba ino nyimbo ibatundaikanga bingi bonse ne kwibakwasha kwikala na bulunda bwakosa ne Yehoba. Nanchi mutundaikwa inge mubena kwimba nyimbo ya Bufumu yo mwatemwa nyi? Ilabijilai lonka luno. —Monai ka kitenguluzha ka kuba’mba “Nkwashai Nchinchike.”

11-12. (a) Kwesekana na byaamba 1 Samwela 17:37, 45-47, mambo ka Davida o achinchikijile? (b) Ñanyi kintu kyanema kyo tufunjilako kwi Davida?

¹¹ Kikebewa kuchinchika inge babena kwimumanyika. Pano mwakonsha kuba byepi inge mwamona’mba mukankalwa kuchinchika? Vulukai kuba’mba kuchinchika kechi kwaimena pa kimino, bulume nangwa kujimuka kwa muntu ne. Akilangulukai pa nsongwalume Davida kimye kyo ayile na kulwa na Goliata. Inge kumwesakanya ku uno kitonzhi, Davida wakepele bingi, kechi wajinga na bulume ne, kabiji kechi wajingapo na bilwilo bya nkondo ne. Davida kechi wajingapo nangwa na mpoko ne. Pano bino, wachinchikile bingi. Davida wayile lubilo na kulwa na uno kitonzhi witotele bingi.

¹² Mambo ka Davida o achinchikijile bino? Waketekejile na muchima wanji yense kuba’mba Yehoba wajinga ne aye. (Tangai 1 Samwela 17:37, 45-47.) Davida kechi watele muchima pa byamwekelenga Goliata ne. Pano bino, watele muchima pa byakepele Goliata kwi Yehoba. Tubena kufunjilako ka ku jino jishimikila? Tukachinchika inge twashiinwa’mba Yehoba uji ne atweba kabiji ne kuyuka kuba’mba balwanyi betu bakepa bingi inge kwibesakanya kwi Lesa wa Bulume Bonse. (2 Moba 20:15; Sala. 16:8) Twakonsha kuba byepi pa kuba’mba twikale bachinchika lonka luno saka bakyangye kutendeka kwitumanyika?

13. Twakonsha kwikala byepi bachinchika? Lumbululai.

¹³ Twakonsha kufunda kuchinchika luno inge ke tusapwile mambo awama a Bufumu bwa Lesa. Mambo ka? Mambo kusapwila kwitufunjisha kuketekela mwi Yehoba ne kubula kuchiina bantu. (Maana 29:25) Byonkatu mubiji wetu byo akosa inge ke tukaye makayo akosesha mubiji, twikala bachinchika inge ke tusapwile ku nzubo ku nzubo, ku mapunzha kutanwa bantu bavula, busapwishi bwa kushikilwa ne ku mapunzha a busulu. Umvwe twachinchika luno pa kusapwila, tukatwajijila kusapwila inge bakanya mwingilo wetu.—1 Tesa. 2:1, 2.

14-15. Ñanyi bintu byo twakonsha kufunjilako kuba ba Nancy Yuen ne ba Valentina Garnovskaya?

¹⁴ Twakonsha kufunjilako byavula bingi ku banyenga babiji ba kishinka bachinchikile. Nangwa kya kuba ba Nancy Yuen baipipile bingi, kechi bachinanga muntu ne. * Bakaine kuleka  kusapwila mambo awama a Bufumu bwa Lesa. Na mambo a kino, bebakashile myaka 20 mu kyalo kya China. Bakapokola bebatebawizhenga baambile’mba uno ye mwanamukazhi “uji bingi na bitala” mu kino kya kyalo kyonse kya China.

¹⁵ Ba Valentina Garnovskaya nabo bebakashile ku kafulumende watelwanga kala amba Soviet Union pa bimye bisatu kabiji myaka yonse yo baikele mu kaleya yajinga 21. * Ñanyi kintu kyalengejile kwibakasa? Mambo kechi bakebelenga kuleka kusapwila ne, kino kyalengejile bantangi ba mu kafulumende kwibatela’mba “mbanzhi watama bingi.” Ñanyi kintu kyalengejile bano banabakazhi babiji bakishinka kuchinchika? Mambo bashiinwe kuba’mba Yehoba wajinga nabo.

16. Ñanyi kintu kyakonsha kwitukwasha kuchinchika?

¹⁶ Byonkatu byo twisambapo kala, pa kuba’mba tuchinchike kechi twafwainwa kuta muchima pa bulume bwetu ne. Pano bino, twafwainwa kuketekela’mba Yehoba uji ne atweba kabiji amba ye ubena kwitulwilako. (Mpitu. 1:29, 30; Zeka. 4:6) Kino kyo kiketukwasha kuchinchika.

17-18. Byonka byaamba Yoano 15:18-21, Yesu witujimwineko amba ka? Lumbululai.

¹⁷ Tumvwa bingi bulongo inge bantu betunemeka, pano bino, kechi twafwainwa kumvwa kutama inge babula kwitunemeka ne. Yesu waambile’mba: “Mwi ba lusekelo anweba umvwe bantu bemushikwa, bemukana, bemwambila mwenga ne kwimwambila’mba mwi babi pa mambo a Mwana muntu.” (Luka 6:22) Yesu walumbulwilenga ka?

¹⁸ Yesu kechi walumbulwilenga’mba bena Kilishitu bomvwa bulongo kwibashikwa ne. Pano bino, witujimwinengako pa kiketumwekela. Kechi twi ba pano pa ntanda ne. Tulondela byafunjishanga Yesu ne kusapwila byambo byonka byo asapwilangapo. Na mambo a kino, ba pano pa ntanda betushikwa. (Tangai Yoano 15:18-21.) Tukeba kusangajika Yehoba. Inge bantu betushikwa na mambo a kuba’mba twatemwa Yehoba, kechi tumvwa kutama ne.

19. Twakonsha kulondela byepi byaubile batumwa?

 ¹⁹ Kange muswishe byamba bantu nangwa byubilo byabo kwimulengela kumvwa bumvu na mambo a kwikala Kamonyi wa Yehoba ne. (Mika 4:5) Twakonsha kufunda bya kushinda moyo wa kuchina bantu inge twalanguluka pa byaubile batumwa mu Yelusalema kimye kyafwile Yesu. Bayukile bantangi ba bupopweshi bwa Bayudea byo bebashikilwe. (Byu. 5:17, 18, 27, 28) Pano bino, pa juba pa juba, bayanga ku nzubo ya Lesa kabiji besololanga ku bantu kuba’mba bajinga baana ba bwanga ba kwa Yesu. (Byu. 5:42) Kechi baswishishe moyo kwibalengela kuleka kusapwila ne. Ne atweba twakonsha kushinda moyo wa kuchina bantu inge ketwisolole ku bo twingila nabo, bo tufunda nabo, ne ku ba kikalankulo amba twi Bakamonyi ba kwa Yehoba.—Byu. 4:29; Loma 1:16.

20. Mambo ka batumwa o baikejile na lusekelo nangwa kya kuba bebashikilwe?

²⁰ Mambo ka batumwa o baikejile na lusekelo nangwa kya kuba bebashikilwe? Mambo bayukile kyalengejile kwibashikwa, kabiji bamwenenga kuba’mba ke munema kumanyikwa na mambo a kuba kyaswa muchima wa Yehoba. (Luka 6:23; Byu. 5:41) Palutwe kacheche, mutumwa Petelo wanembele’mba: “Nangwa kya kuba mwamanama na mambo a bololoke, mukekala na lusekelo.” (1 Pe. 2:19-21; 3:14) Inge twayuka’mba betushikwa na mambo a kuba byawama, kechi tukaleka kwingijila Yehoba na mambo a kuba’mba bantu betushikwa ne.

21-22. (a) Mwafuukulapo kuba byepi byo twayuka’mba tukamanyikwa kulutwe? (b) Tukesamba pa ka mu mutwe walondelapo?

²¹ Kechi twayuka kimye bantu kyo bakatendeka kwitumanyika nangwa makafulumende kyo akakanya mwingilo wetu ne. Pano bino, twayuka’mba twafwainwa kwinengezhezha jimo lonka luno kupichila mu kukosesha bulunda bwetu ne Yehoba, kuyuka bya kuchinchika makatazho ne bya kuba inge bantu betushikwa. Inge twinengezhezha jimo lonka luno, kiketukwasha kutwajijila kwingijila Yehoba kulutwe.

²² Pano kyakonsha kwikala byepi inge bakanya mpopwelo yetu? Mu mutwe walondelapo, tukesamba pa mafunde a mu Baibolo afwainwa kwitukwasha kutwajijila kwingijila Yehoba inge bakanya mwingilo wetu.