1-2. (a) Mambo ka o twakonsha kubujila kukumya inge bakanya bupopweshi bwetu? (b) Tusakwisamba pa ka mu uno mutwe?

MU 2018, basapwishi ba mambo awama kukila pa 223,000, baikalanga mu byalo mo bakainye mingilo yetu imo nangwa yonse. Kino kechi kyafwainwa kwitukumisha ne. Byonka byo twafunjile mu mutwe wafumako, bena Kilishitu ba kine bafwainwa kuketekela kwibamanyika. (2 Timo. 3:12) Konse ko twikala, kafulumende wakonsha kwitukanya kupopwela Lesa wetu wa butemwe aye Yehoba kya kubazhimukilatu.

² Inge kya kuba kafulumende wa mu kyalo kyenu wafuukulapo kwimukanya kupopwela Yehoba, mwakonsha kwiipuzha mepuzho nabiji a kuba’mba: ‘Nanchi kwitumanyika kumwesha’mba Lesa waleka kwitupesha nyi? Nanchi kukanya mwingilo wetu kuketulengela kuleka kwingijila Yehoba nyi? Nanchi nakonsha kuvilukila ku mpunzha ikwabo pa kuba’mba nkapopwelenga Lesa saka nakasuluka nyi?’ Mu uno mutwe, tusakukumbula ano mepuzho. Kabiji tusakwisamba ne pa byo twafwainwa kutwajijla kwingijila Yehoba inge mwingilo wetu bamukanya ne pa bintu byo twafwainwa kuchinuzhuka.

3. Kwesakana na 2 Kolinda 11:23-27, ñanyi lumanamo lwapichilemo mutumwa wa kishinka aye Paulo, kabiji tufunjilako ka?

³ Umvwe kafulumende wakanya bupopweshi bwetu, twakonsha kumona nobe Lesa waleka kwitupesha. Pano bino, twafwainwa kuvulukanga’mba kwitumanyika kechi kulumbulula’mba Yehoba witushikwa ne. Twayai twisambe pa byamwekejile mutumwa Paulo. Lesa waubijile bibusa Paulo. Lesa wamwingijishe kunemba  makalata 14 a mu Binembelo bya Kingiliki bya Bwina Kilishitu kabiji wajinga mutumwa ku bisaka bya bantu. Nangwa byonkabyo, bamumanyikile bingi. (Tangai 2 Kolinda 11:23-27.) Bintu byapichilemo mutumwa Paulo bitufunjisha kuba’mba Yehoba uswisha bakalume banji ba kishinka kumanyikwa.

4. Mambo ka bantu mu ino ntanda o betushikilwa?

⁴ Yesu walumbulwile ene mambo o twafwainwa kuketekela kwitumanyika. Waambile’mba bantu baketushikwa mambo kechi twi ba pano pa ntanda ne. (Yoa. 15:18, 19) Kupita mu makatazho kechi kulumbulula’mba Yehoba witushikwa ne. Pakuba kumwesha’mba tubena kuba byawama.

5. Nanchi bantu baji na bulume bwa kulekesha mpopwelo ya Yehoba nyi? Lumbululai.

⁵ Muntu kechi wakonsha kwitulengela kuleka kupopwela Lesa wa bulume bonse aye Yehoba ne. Bantu bavula baeseka kuba bino, pano bino bakankalwa. Akilangulukai pa kyamwekele kimye kya Nkondo ya Bubiji ya Ntanda Yonse. Pa kyo kya kimye, makafulumende a mu byalo byavula amanyikilenga bingi bantu ba Lesa. Mwingilo wa Bakamonyi ba kwa Yehoba bamukainye ku kipanyi kya Nazi mu Germany ne kafulumende wa mu Australia, Canada, ne mu byalo bikwabo. Pano bino, akimonai kyamwekele. Nkondo byo yatendekele mu 1939, kwajingatu basapwishi 72,475 mu ntanda yonse. Nkondo byo yapwile mu 1945, basapwishi bafikile ku 156,299, mambo Yehoba wapesheshe bantu banji. Basapwishi bavujijileko bingi.

6. Ñanyi bintu byawama bifumamo inge kebetumanyike? Ambaipo kyamwekele.

⁶ Kumanyikwa kwakonsha kwitulengela kwingijila Yehoba pakatampe kwa kubula moyo. Bamulume ne mukazhi bamo bajinga na kalombwana baikalanga mu kyalo kafulumende mo akainye mpopwelo yetu. Bano bamulume ne mukazhi kechi balefwilwe ne, bino bafuukwilepo kutendeka bupainiya bwa kimye kyonse. Bakazhi balekele ne nkito yo bafolanga muzema wa mali pa kuba’mba bengile bulongo bupainiya. Balume baambile’mba, kukanya mwingilo wetu kwalengejile bantu bavula kukeba kuyuka byavula pa Bakamonyi ba Yehoba. Kino kyamukwashishe kwikala na bantu bavula bakufunjisha Baibolo. Kukanya mwingilo wetu kwalengejile bavula kumwenamo. Mukulumpe mu kipwilo wa mu kyonka kino kya kyalo, waambile’mba bavula balekele kwingijila Yehoba batendekele kupwila ne kusapwila.

7. (a) Tubena kufunjilako ka ku kinembelo kya Bena Levi 26:36, 37? (b) Mukoba byepi inge bakanya mwingilo wetu?

 ⁷ Balwanyi betu inge bakanya mpopwelo yetu, balanguluka’mba tusakuleka kwingijila Yehoba na mambo a moyo. Kabiji bano balwanyi betu basampanya byambo bya bubela pe atweba, kutuma bantangi ba mu kafulumende kuya na kupikita mu mazubo etu, kwitutwala ku bije byambo nangwa kwitukasa. Balanguluka’mba tusa kuleka kwingijila Lesa na mambo a balongo betu bamo bo bakasa. Umvwe ketwibachine ne kuchina byo bakonsha kwituba, twakonsha kutendeka kukankalwa nangwa kulekatu kwingijila Yehoba. Kechi tukeba kwikala byonka byajinga bantu banembwa pa Bena Levi 26:36, 37 ne. (Tangai.) Kechi tukaswisha moyo kwitulefula nangwa kwitulengela kuleka kwingijila Yehoba ne. Twaketekela mwi Yehoba na muchima yense kabiji kechi tukabambisha michima ne. (Isa. 28:16) Tulomba kwi Yehoba kwitutangijila. Mambo twayuka’mba na bukwasho bwanji, nangwatu kafulumende uji bingi na bulume kechi wakonsha kwitulengela kuleka kwingijila Lesa wetu mu bukishinka ne.—Hebe. 13:6.

8-9. (a) Ñanyi kintu mutwe wa kisemi nangwa mwina Kilishitu yense kyo afwainwa kwifuukwilapo? (b) Ki ka kikakwasha muntu kufuukulapo bulongo?

⁸ Umvwe kafulumende uji mu kyalo kyenu wakanya mpopwelo yetu, kampe mwakonsha kukeba kuvilukila ku kyalo kikwabo ko mwakonsha kukasuluka kwingijila Yehoba. Anweba bene yenu mwakonsha kwifuukwilapo kuba bino, kechi muntu mukwabo ne. Bamo bakonsha kufuukulapo kulondela byaubile bena Kilishitu batanshi kimye kyo bebamanyikilenga. Setepena byo bamwipayile ku balwanyi na mabwe, baana ba bwanga bajinga mu Yelusalema bavilukijile ku Yudea ne ku Samaliya ne ku mapunzha ajinga kwalepa, ko kuba’mba ku Fenesha, Kipilusa ne Antioka. (Mat. 10:23; Byu. 8:1; 11:19) Nangwa byonkabyo, bamo bakonsha kwamba’mba bena Kilishitu batanshi byo bebamanyikile jikwabo ku balwanyi babo, mutumwa Paulo wafuukwilepo kubula kufuma mu mapunzha mo bakainye mwingilo wa kusapwila. Pakuba wabikile bumi bwanji mu kizumba pa kusapwila mambo awama ne kukosesha balongo bo bamanyikilenga bajinga mu ino mizhi.—Byu. 14:19-23.

⁹ Tubena kufunjilako ka ku ano mashimikila? Mutwe wa kisemi ye wafwainwa kufuukulapo bya kuviluka. Saka akyangye kufuukulapo bino, wafwainwa kulomba ne kulangulukapo bulongo pa biji kisemi kyanji ne kulanguluka pa buwame ne butame buji mu kuviluka. Mambo a kuba’mba mwina Kilishitu yense “ukesendela mwine kisendwa kyanji.” (Nga. 6:5) Kechi twafwainwa kuzhachisha bakwetu pa byo bafuukulapo ne.

10. Ñanyi mikambizho ikapananga ofweshi wa musampi ne bakulumpe mu kipwilo?

¹⁰ Twakonsha kutwajijla byepi kupopwela Yehoba inge bakanya mwingilo wetu? Ofweshi wa musampi ukapananga mikambizho ku bakulumpe mu kipwilo, ne mashinda mwa kutambwila kajo ka ku mupashi, bya kupwila pamo ne bya kusapwila mambo awama. Umvwe kyakatazha ofweshi wa musampi kwisamba na bakulumpe mu kipwilo, ko kuba’mba bakulumpe mu kipwilo bakemukwasha kabiji ne bonse baji mu kipwilo pa kuba’mba mutwajijile kupopwela Yehoba. Bakapana mikambizho yaimena pa Baibolo ne mabuku etu alumbulula Baibolo.—Mat. 28:19, 20; Byu. 5:29; Hebe. 10:24, 25.

11. Mambo ka o mwashiinwa’mba mukatwajijila kwikala na kajo ka ku mupashi, kabiji mwakonsha kuba byepi pa kuba’mba muzhikijile kano kajo ka ku mupashi?

¹¹ Yehoba walaya’mba bakalume banji bakekalanga na kajo ka ku mupashi kavula. (Isa. 65:13, 14; Luka 12:42-44) Onkao mambo, mwafwainwa  kuketekela kuba’mba jibumba ja Lesa jikamonapo mashinda a kupainamo bikebewa pa kuba’mba twikale na lwitabilo lwakosa. Pano bino, kuji bintu byo mwafwainwa kuba ne anweba. Inge bakanya mwingilo wetu, mwafwainwa kukeba mpunzha ko mwakonsha kufya Baibolo ne kajo kakwabo ka ku mupashi ko mwakonsha kwikala nako. Kechi mwafwainwa kubika bino bintu byanema bingi, ko kuba’mba mabuku nangwa biñambañamba muji bya ku mupashi pa mpunzha po bakonsha kwibimona ne. Atweba bonse pa muntu pa muntu twafwainwa kubapo bimo pa kuba’mba tutwajijile kwikala na bulunda bwakosa na Lesa.

12. Bakulumpe mu kipwilo bakonsha kunengezha byepi kupwila kwa kubula balwanyi betu kuyuka?

¹² Kikekala byepi inge bakanya kupwila kwetu? Bakulumpe mu kipwilo bakanengezha jishinda ja kupwijilamo kya kuba balwanyi benu kechi bakayuka ne. Bakonsha kwimubuula’mba musa kupwilanga mu mabumba acheche, kabiji bakonsha kupimpulanga ne kimye kya kupwila ne mapunzha a kupwijilako. Mwakonsha kuzhikijila bonse beya na kupwila inge kemubule kuba kyungwe kimye kyo mubena kwiya na kupwila nangwa pa kupwisha kupwila. Kabiji mwakonsha kuvwalanga bivwalo bibula kumwesha’mba mubena kuya na kupwila.

13. Tubena kufunjilako ka ku balongo bajinga mu byalo byalamwanga na kafulumende wa Soviet Union?

¹³ Pa mambo a busapwishi, jishinda ja kusapwilamo jikapusana kwesakana na biji bintu ku mpunzha ko twikala. Pano bino, twatemwa Yehoba kabiji tumvwa bulongo kubuulako bakwetu pa Bufumu bwanji, onkao mambo, tukatanapo jishinda ja kwingijilamo busapwishi. (Luka 8:1; Byu. 4:29) Shayuka wa bintu byamwekele kala aye Emily B. Baran, waambilepo pa mwingilo wa kusapwila wa Bakamonyi ba kwa Yehoba bajinga mu byalo byalamwanga na kafulumende wa Soviet Union amba: “Kafulumende byo akainye Bakamonyi ba kwa Yehoba kusapwila, batendekele kusapwila ku bakinkalankulo, ku bakwabo mo baingijilanga nkito ne ku balunda nabo. Byo bebakashile na mambo a kusapwila, Bakamonyi batendekele kusapwila ku bakwabo bakaili.” Nangwa kya kuba mwingilo wetu bamukainye, balongo betu kechi balekele kusapwila ne. Umvwe mwingilo wetu bakamukanye ku mpunzha ko mwikala, mukobenga byonka byaubile bano balongo betu.

14. Kinembelo kya Salamo 39:1 kyakonsha kwitukwasha kubula kuba byepi?

¹⁴ Ikalai bajimuka pa kwamba pa bintu bimo. Kimye kyo bakanya mwingilo wetu, twafwainwa kuyuka “kimye kya kuzhindama.” (Sapwi. 3:7) Twafwainwa kuzhikijila byambo byafwainwa kubula kuyuka bantu bakwabo, nabiji mazhina a balongo ne banyenga, mpunzha ko tupwijila, byo tusapwila, kabiji ne byo tutambwila kajo ka ku mupashi. Kechi twafwainwa kusolola bino bintu ku ba mingilo mu kafulumende, ku balunda netu, ku balongo betu baji mu  kyalo mo twikala nangwa bekala mu kyalo kingi ne. Umvwe twasolola bino, tukabika bumi bwa balongo betu mu kizumba.—Tangai Salamo 39:1.

15. Satana ukeseka kuba ka kwi atweba, kabiji twakonsha kuchinuzhuka byepi kano kakose kanji?

¹⁵ Kange muswishe tumakatazho tucheche kwimulengela kwabenamo ne. Satana wayuka’mba inge twaleka kumvwañana tukabenamo. (Mako 3:24, 25) Ukatwajijila kukeba kwitulengela kuba’mba twabenemo. Mambo wayuka’mba tukatendeka kwilwisha atweba bene ne kuleka kulwisha Satana.

16. Ñanyi kintu kyo tufunjilako kwi nyenga Gertrud Poetzinger?

¹⁶ Bena Kilishitu baingijila Lesa pa myaka yavula nabo bafwainwa kujimuka kuchina kufwa mu kano kakose. Twayai twisambeko pa banyenga babiji bashingwa, ba Gertrud Poetzinger ne ba Elfriede Löhr. Bebakashijile pamo na banyenga bakwabo mu kampu wa lumanamo wa kipanyi kya Nazi. Ba Gertrud baubijile kichima ba Elfriede byo baambile jashi ja kutundaika bakwabo bajinga mu kampu. Palutwe kacheche, ba Gertrud baumvwine kutama pa byo baubile kabiji basashijile Yehoba kwibakwasha. Banembele’mba: “Twafwainwa kuswanga inge bakwetu baji na bulume bwa kwingila mingilo ikatampe nangwa inge baji na mingilo yavula kwitukila.” Uno nyenga washinjile byepi kichima? Ba Gertrud batele muchima pa byubilo byawama bya ba Elfriede ne muchima wabo wa kukasulukila bantu. Kuba bino kwibakwashishe kutwajijla kwikala balunda ne ba Elfriede. Bonse baikelenga bulongo mu kampu wa lumanamo kabiji batwajijile kwingijila Yehoba kufikatu ne byo bafwile. Umvwe twibikako kupwisha makatazho o tupusenamo na balongo betu, tukachinuzhuka bintu byonse byakonsha kwitulengela kwabenamo.—Kolo. 3:13, 14.

17. Mambo ka o twafwainwa kuchinuzhukila bwitote?

¹⁷ Chinuzhukainga bwitote. Umvwe ketumvwine lutangijilo lufuma ku balongo ba kishinka betutangijila, tukachinuzhuka makatazho. (1 Pe. 5:5) Mu kyalo mo bakanyishe mwingilo wetu, bakulumpe mu kipwilo babuujile basapwishi kubula kupananga mabuku mu mwingilo. Bino mulongo wajinga painiya wakaine kukookela bino kabiji watwajijile na kupana mabuku mu mwingilo. Ki ka kyamwekele? Kechi pa bajile ne, aye ne bakwabo byo bapwishishetu kwingila busapwishi bwa kushukilwa, bebakwachile ku bakapokola. Kyamweka bano bakapokola bebalondejilenga panyuma kabiji batambwile mabuku o bapele bantu. Tubena kufunjilako ka ku kino kyamwekele? Twafwainwa kulondela byo betukambizha nangwa kya kuba twayuka byavula. Yehoba umvwa bingi bulongo inge ketumvwine bibena kwitubula bakulumpe mu kipwilo bo atongola babena kwitutangijila.—Hebe. 13:7, 17.

18. Mambo ka o twafwainwa kuchinuzhuka kulengelanga bakwetu mizhilo?

 ¹⁸ Kange mulengelenga bakwenu mizhilo ne. Umvwe bakulumpe mu kipwilo ke balengele bakwabo mizhilo, kikala kisendwa ku balongo. Mulongo Juraj Kaminský uvuluka kyamwekele kimye kyo bakainye mwingilo wetu mu kyalo kyatelwanga kala amba Czechoslovakia kuba’mba: “Balongo bobabujile kukasa batendekele kulengela basapwishi mizhilo kabiji bebabuujilenga byo bafwainwe kuba ne kubula kuba.” Yehoba kechi witupa luusa lwa kulengela bakwetu mizhilo ne. Muntu ulengela bakwabo mizhilo kechi ukeba kuzhikijila balongo ne, bino ukeba kwikala nkambo wa lwitabilo lwa balongo.—2 Ko. 1:24.

19. Nangwa kya kuba Satana ukeba kukanya mwingilo wetu, ñanyi kishinka kitanwa pa 2 Byambo bya Moba 32:7, 8 kitulengela kwikala bakosa?

¹⁹ Mulwanyi wetu mukatampe aye Satana Diabola kechi ukaleka kumanyika bapopweshi ba kishinka ba Yehoba ne. (1 Pe. 5:8; Lum. 2:10) Satana ne bantu banji bakakebesha kwitukanya kupopwela Yehoba. Nangwa kya kuba tukomvwa moyo, kechi tukaleka kwingijila Yehoba ne. (Mpitu. 7:21) Yehoba uji ne atweba, kabiji ukatwajijila kwitukwasha inge mwingilo wetu bamukanya.—Tangai 2 Byambo bya Moba 32:7, 8.

20. (b) Mwafuukulapo kuba byepi?

²⁰ Twayai tutwajijile kwikala na muchima wajingapo na bakwetu bena Kilishitu batanshi. Babuujile bantangi bajingako mu kimye kyabo amba: “Anwe bene chibilai mo mwalangulukila, umvwe kyawama kwimumvwina anweba, kukila kumvwina Lesa. Pakuba atweba kechi twakonsha kuleka kwamba pa bintu byo twamwene ne kumvwa ne.”—Byu. 4:19, 20.