MU BAIBOLO tutangamo byambo byaambile bantu bajinga “byonka byo tuji.” (Yako. 5:17) Twakonsha kuswa byambo byaambile Paulo byanembwa pa Loma 7:21-24 bya kuba’mba: “Byo nkeba kuba kyaoloka, kyatama kyo kinkosela. . . . Amiwa kamulanda!” Abino byambo bitutekenesha bingi inge tubena kupita mu makatazho na mambo a bumbulwa kulumbuluka.

Paulo waambile ne pa kintu kikwabo. Pa Ngalatiya 2:20 walumbulwile byo ashiinwe kuba’mba Yesu “[wamutemenwe] kabiji wipaine mwine na mambo a [aye]” Nanchi ne anweba byo byo mumvwa nyi? Kampe kimo kimye kechi byo byo mumvwa ne.

Inge kya kuba’mba ketumone nobe kechi twanema ne, na mambo a bubi bo twaubile kala, bimye bimo kyakonsha kwitukatazha kuswa kuba’mba Yehoba witutemwa kabiji witulekelako mambo, kabiji twakonsha kumona nobe kitapisho kya bukuzhi kechi kitufwainwa ne. Nanchi Yesu ukeba’mba tumonenga bukuzhi amba bupe nyi? Inge byo byo akeba, ki ka kiketukwasha kwibumonanga mu jino jishinda? Twayai tukumbule ano mepuzho abiji.

Ee, Yesu ukeba’mba tumonenga kitapisho kyanji amba bupe bwanema. Twakonsha kushiinwa byepi byobyo? Fwanyikizhai bintu byamwekelenga byanembwa pa Luka 23:39-43. Kuji muntu ye bapopa pa kichi kwipi ne Yesu. Waswa kuba’mba waubile byatama. Kyamweka walengele mambo akatampe, mambo bambanzhi bo bapopelanga pa kichi. Waakamwa bingi kabiji wasashijila Yesu amba: “Mukamvuluke kimye kyo mukeya mu Bufumu bwenu.”

Yesu wamukumbwile’mba ka? Fwanyikizhai Yesu byo aumvwinenga kukola pa kuzhalulula mutwe kuba’mba atale uno muntu. Nangwa kya kuba ubena kumvwa kukola, Yesu wamwemwesela ne kutekenesha uno muntu amba: “Kine nakwambila lelo jino namba, ukekala ne amiwa mu Paladisa.” Yesu wavulwilengamo uno muntu kuba’mba “Mwana muntu . . . waishile . . . [na] kupana bumi bwanji kwikala bukuzhi bwa kukuula bavula.” (Mat. 20:28) Nanchi mwamona kuba’mba Yesu wakwashishe uno muntu kumona’mba wamupanyijile kino kitapisho nyi? Byo aingijishe byambo bya kuba’mba “ukekala” ne “amiwa” kimwesha kuba’mba wamutemenwe. Kabiji wabuujile uno muntu kuba’mba ukekala mu paladisa pano pa ntanda.

Kwa kubula nangwa kuzhinaukatu ne, Yesu wakebelenga uno muntu kuswa kuba’mba ne aye ukamwenamo mu kitapisho kya kwa Kilishitu. Inge kya kuba’mba Yesu wakwashishe uno mbanzhi wabujile jishuko ja kwingijila Lesa, twashiinwa kuba’mba ukakwasha mwina Kilishitu wabatizhiwa ubena kwingijila Lesa. Pano ki ka kyakonsha kwitukwasha kwitabila’mba Kilishitu witufwijile atweba bonse pa muntu pa muntu nangwa kya kuba kala twajinga bandengamambo?

Mwingilo wa kusapwila Yesu ye apele Paulo, wamukwashishe kuyuka’mba Yesu wamufwijile. Mu ñanyi jishinda? Walumbulwile’mba: “Namusanchila Kilishitu Yesu Nkambo yetu, wampele bulume, mambo  wammwene’mba ne wa kishinka kupichila mu kumpa mwingilo, nangwa kya kuba kala najinga wa mwenga, wamanyikanga bantu kabiji wa bulunji.” (1 Timo. 1:12-14) Mwingilo waingijilenga Paulo wamulengejile kushiinwa’mba Yesu wamubijile lusa, wamutemenwe, kabiji wamuketekejile bingi. Ne atweba Yesu witupa mwingilo wa kusapwila mambo awama. (Mat. 28:19, 20) Nanchi mwingilo wetu wa kusapwila wakonsha kwitukwasha kuyuka’mba Yesu witufwijile nyi?

Ba Albert babwelele katataka kwi Yehoba byo papichile myaka 34 kufuma po bebapangijile mu kipwilo, baambile’mba: “Mambo ami ajinga ku meso ami kimye kyonse. Bino luno inge naya mu mwingilo ñumvwatu byonka byaumvwanga mutumwa Paulo kuba’mba Yesu wampa mwingilo wa kusapwila. Unkosesha ne kundengela kwikala na lusekelo mu bwikalo bwami ne kukosesha luketekelo lwami lwa bwikalo bwa kulutwe.”—Sala. 51:3.

Ba Allan baubanga bintu byatama ne kulwa na bantu saka bakyangye kufunda bukine, baambile’mba: “Nkivuluka bintu byatama byo naubile bantu. Bimye bimo, bindengela kwikala na binyenge. Bino nsanchila Yehoba pa kunswisha amiwa ndengamambo kubuulako bantu mambo awama. Inge namona bantu byo batambwila mambo awama, kimvululamo buwame ne butemwe bwa Yehoba. Ñumvwa kuba’mba ubena kuñingijisha kukwasha bantu baji na byubilo byo najinga nabyo kala.”

Mwingilo wa kusapwila witukwasha kwingijisha bulume bwetu mu bintu byawama ne kwitulengela kwikala na milanguluko yawama. Witukwasha ne kuyuka’mba Yesu witubila lusa, witutemwa, kabiji wituketekela.

Kufikatu ne kimye kikonaunwa ntanda ya kwa Satana, michima yetu isakutwajijila kwituzhachisha pa bundengamambo bwetu bwa kala. Ki ka kiketukwasha kushinda ino milanguluko?

Ba Jean javula bezhachisha pa bwikalo buncha bo bajingamo saka bakiji banyike. Baambile’mba: “Ñumvwa bingi bulongo pa kuyuka’mba ‘Lesa wakila michima yetu.’” (1 Yoa. 3:19, 20) Ne atweba kyakonsha kwitutekenesha inge twayuka’mba Yehoba ne Yesu bayuka bulongo byo twalengwa kuba’mba twibandengamambo kukila ne byo twiyuka atweba bene. Vulukainga kuba’mba na mambo a kwitutemwa, bapaine bukuzhi ku bantu bambulwa kulumbuluka kechi ku bantu baoloka ne.—1 Timo. 1:15.

Tubuula michima yetu kuba’mba betupele bukuzhi atweba bonse pa muntu pa muntu inge saka tulomba ne kulanguluka-languluka pa jishinda Yesu jo akwashishamo bantu bambulwa kulumbuluka, ne kwibikako kwingila mwingilo ye etupa wa kusapwila. Umvwe saka muba bino, mukamba byonka byaambile Paulo amba: Yesu “wantemenwe kabiji wipaine mwine na mambo a amiwa.”