1-2. (a) Kwesakana na mukambizho wa kwa Yesu wanembwa pa Mateo 28:18-20, ñanyi mwingilo wanema uji na Kipwilo kya bwina Kilishitu? (b) Ñanyi mepuzho o tusakukumbula mu uno mutwe?

BATUMWA bafwainwa basangalele bingi kimye kyo bapwijile ku mutumba. Yesu byo asangwilwe, wanengezhe kuba’mba basambakene ku ino mpunzha. (Mat. 28:16) Kino kyafwainwa kwikala kimye kyo ‘amwekele ku balongo kukila pa 500 pa kimye kimo.’ (1 Ko. 15:6) Mambo ka Yesu o abuujile baana banji ba bwanga kusambakana nanji ku ino mpunzha? Kuba’mba ebape mwingilo wanema. Wibakambizhe’mba: “Onkao mambo, yainga na kufunjisha bantu ba mu bisaka byonse bya bantu kwikala ke baana bami ba bwanga.”—Tangai Mateo 28:18-20.

² Baana ba bwanga baumvwine byambo bya kwa Yesu, bo balengele kipwilo kya bena Kilishitu kitanshi. Mwingilo mukatampe wajinga na kino kipwilo ke wa kufunjisha bantu bavula kwikala baana ba bwanga ba kwa Kilishitu. * Lelo jino, kuji bipwilo byavula bingi bya bena Kilishitu ba kine mwaya ntanda yonse, kabiji mwingilo mukatampe wingila bino bipwilo ke yenka waingijilengapo kipwilo kitanshi. Mu uno mutwe tusa kukumbula ano mepuzho ana: Mambo ka mwingilo wa kufunjisha bantu kwikala baana ba bwanga o anemena? Ñanyi bintu byavwangwa mu kwingila uno mwingilo? Nanchi bena Kilishitu bonse bafwainwa kwingilako uno mwingilo wa kufunjisha bantu kwikala baana ba bwanga  nyi? Kabiji mambo ka o twafwainwa kutekenya pa kwingila uno mwingilo?

3. Kwesakana na byaamba Yoano 14:6 ne 17:3, mambo ka mwingilo wa kufunjisha bantu kwikala baana ba bwanga o anemena?

³ Mambo ka mwingilo wa kufunjisha bantu kwikala baana ba bwanga o anemena? Mambo a kuba’mba baana ba bwanga ba kwa Kilishitu bo bonka bakonsha kwikala balunda na Lesa. Kikwabo, aba balondela Kilishitu bekala bwikalo bwawama luno kabiji baji na luketekelo lwa kwiyowa bumi bwa myaka ne myaka kulutwe. (Tangai Yoano 14:6; 17:3.) Ne atweba, Yesu witupa mwingilo wanema bingi, pano uno mwingilo kechi tumwingilatu bunke bwetu ne. Mutumwa Paulo wanembele pe aye mwine ne pa balunda nanji amba: “Atweba twi ba mwingilo umo ne Lesa.” (1 Ko. 3:9) Yehoba ne Kilishitu betunemeka bingi pa kwitupa uno mwingilo atweba bantu bambulwa kulumbuluka.

4. Twakonsha kufunjilako ka ku kyamwekejile ba Ivan ne ba Matilde?

⁴ Mwingilo wa kufunjisha bantu kwikala baana ba bwanga wituletela bingi lusekelo. Akilangulukai pa ba Ivan ne bakazhi babo ba Matilde ba ku Colombia. Basapwijile nsongwalume wa jizhina ja Davier kabiji wibabuujile kuba’mba: “Mbena kukeba kupimpula byubilo byami, bino kyankatazha.” Davier watemenwe makayo a kulwa na binkonyi, kwingijisha bizhima, kupendwapendwa kabiji waikalanga na mukambwe wanji aye Erika. Ba Ivan balumbulwile’mba: “Twatendekele kumufunjisha Baibolo. Twayanga na makinga mambo waikalanga kwalepa. Erika byo amwene Davier watendeka kupimpula byubilo byanji, naye watendekele kwikalapo inge tubena kufunjisha Davier Baibolo.” Mu kuya kwa kimye, Davier walekele kwingijisha bizhima, kupendwapendwa ne makayo a kulwa na binkonyi. Kabiji wafuukwilepo kusongola Erika. Ba Matilde baambile’mba: “Kimye Davier ne Erika kyo babatizhiwe mu 2016, twavulukile byaambile Davier kuba’mba, ‘Mbena kukeba kupimpula byubilo byami, bino kyankatazha.’ Twaumvwine bingi bulongo kya kuba twajijile ne kujila.” Kwambatu kine, tumvwa bingi bulongo inge twakwasha bantu kwikala baana ba bwanga ba kwa Kilishitu.

5. Ñanyi kintu kitanshi kyo twafwainwa kuba pa kwingila mwingilo wa kufunjisha bantu kwikala baana ba bwanga?

⁵ Kintu kitanshi kyo twafwainwa kuba pa kuba’mba tufunjishe bantu kwikala baana ba bwanga ke kukeba bantu baji na muchima wa kukeba kufunda pe Yehoba. (Mat. 10:11) Umvwe ketusapwile bantu bonse bo tutaana, tumwesha’mba twi Bakamonyi ba kwa Yehoba ba kine. Kabiji inge ketukookele mukambizho wa kwa Kilishitu wa kusapwila, tumwesha’mba twibena Kilishitu ba kine.

6. Ki ka kiketukwasha kwingila bulongo mwingilo wetu wa kusapwila?

⁶ Bantu bamo bakeba kufunda bukine bwa mu Baibolo, pano bavula bo tutaana kimye kitanshi bamwekana nobe kechi bakeba ne. Twafwainwa kwibatundaika pa kuba’mba bekale na muchima wa kukeba kufunda. Pa kuba’mba twingile bulongo mwingilo wetu, twafwainwa kwinengezha bulongo. Salai mitwe yakonsha kufika bantu pa muchima bo mwakonsha kutaana mu mwingilo. Kabiji nengezhai byo mwakonsha kutendeka mwisambo.

7. Mwakonsha kutendeka byepi kwisamba na bantu, kabiji mambo ka o kyanemena kuteleka ne kunemeka milanguluko ya bantu?

⁷ Kampe mwakonsha kwipuzha mwina nzubo amba: “Mbena kukeba kwimwipuzhako kintu kimo. Makatazho o tubena kupitamo o abena kupitamo bantu bavula mwaya ntanda. Nanchi mulanguluka’mba kafulumende wa bantu ye ukapwisha makatazho a bantu mu ntanda nyi?” Kepo mwakonsha kwisamba kinembelo kya Danyela 2:44. Nangwa mwakonsha  kwamba’mba: “Ñanyi jishinda jawama ja kufunjishishamo baana kwikala na byubilo byawama? Mulangulukapo amba ka?” Kepo mwisamba pa kinembelo kya Mpitulukilo ya mu Mizhilo 6:6, 7. Mutwe yense ye mwasala kwisamba na bantu, mwafwainwa kulanguluka pa bantu bo mukesambanga nabo. Langulukai byo bakamwenamo inge bafunda bukine bwa mu Baibolo. Kimye kyo mubena kwisamba nabo, kyanema kutelekesha ne kunemeka milanguluko yabo. Umvwe mwauba bino, po po mukebayuka bulongo kabiji bakatangako muchima inge mubena kwibasapwila.

8. Mambo ka o kyanemena kubwelako bimye byavula ku bantu?

⁸ Muntu saka akyangye kufuukulapo kufunda Baibolo, pakebewa kimye ne ngovu kubwelako bimye byavula. Mambo ka? Mambo inge twabwelakotu jimo, kimye kimo kechi twakonsha kwibatanapo ne. Kabiji mwakonsha kubwelako bimye byavula pa kuba’mba mwina nzubo emukasulukile ne kuswa kufunda Baibolo. Yukai’mba kipangwa pa kuba’mba kikome, mwafwainwa kwikitekezhanga moba onse. Ne muntu ukeba kufunda bukine, butemwe bo atemwa Yehoba ne Kilishitu bukomenako inge saka mwisamba nanji Mambo a Lesa bimye byavula.

9-10. Mambo ka o twakonsha kwambila’mba mwina Kilishitu yense wakonsha kwingilako mwingilo wa kukeba bantu bakonsha kwikala baana ba bwanga?

⁹ Mwina Kilishitu yense uji na mwingilo wa kufunjisha bantu bakeba kuyuka Lesa. Twakonsha kwesakanya uno mwingilo ku muntu uya na kukeba mwana waeleka. Mu ñanyi jishinda? Akilangulukai pa kalombwana uji na myaka isatu walubilamo. Bantu 500 baya na kukeba uno kalombwana. Byo papita maola 20 kufuma kimye kyo aelekele, muntu umo wamutaana mu bujimi. Uno muntu wakana kumutakaika ku bantu mambo a kutaana uno kalombwana waelekele. Uno muntu waamba’mba: “Twataana uno kalombwana  mambo bantu bavula baji kuya na kumukeba.”

¹⁰ Bantu bavula baji nobe uno mwana. Bajitu nobe baeleka. Kechi baji na luketekelo ne, bakeba wa kwibakwasha. (Efi. 2:12) Atweba Bakamonyi kukila pa 8 milyonyi tubena kwingijila pamo kukeba bantu baji na muchima wa kukeba kuyuka Lesa. Kimye kimo, kechi mwakonsha kutaana muntu ukeba kufunda bukine ne. Pano bino, basapwishi babena kwingijila mu nyaunda imo bakonsha kutaana muntu ukeba kufunda bukine buji mu Mambo a Lesa. Umvwe mulongo nangwa nyenga wataana muntu ne kumufunjisha kwikala mwana wa bwanga wa kwa Kilishitu, bonse baingijileko mwingilo wa kukeba bantu bakeba kufunda bukine basekela.

11. Inge kechi mubena kufunjishapo muntu Baibolo ne, mu ñanyi mashinda mo mwakonsha kwingijilako mwingilo wa kufunjisha bantu kwikala baana ba bwanga?

¹¹ Inge kya kuba luno kechi mujipo na muntu ye mubena kufunjisha Baibolo ne, bino mwakonsha kukwasha mwingilo wa kufunjisha bantu kwikala baana ba bwanga. Inge mwamona wakatataka waiya pa Nzubo ya Bufumu, mwakonsha kumutambwila ne kumukwasha. Umvwe mwamumwesha butemwe mu jino jishinda, mukamukwasha kuyuka’mba twibena Kilishitu ba kine. (Yoa. 13:34, 35) Nangwa kya kuba mukumbula mikumbu ipi pa kupwila, mwakonsha kufunjisha ba katataka kwamba pa lwitabilo lwabo saka bakasuluka kabiji mu mushingi. Kabiji mwakonsha kwingijila pamo na musapwishi wa katataka mu mwingilo ne kumukwasha kwingijisha Binembelo pa kwisamba na bantu. Umvwe ke mube bino, mukamukwasha kulondela byafunjishanga Kilishitu.—Luka 10:25-28.

12. Nanchi twafwainwa kwikala na bya bupe bya bufunjishi pa kuba’mba tufunjishe bantu kwikala baana ba bwanga nyi? Lumbululai.

¹² Kafwako wakonsha kwamba’mba twafwainwa kwikala na bya bupe bya bufunjishi pa kuba’mba tufunjishe bantu kwikala baana ba bwanga ba kwa Yesu ne. Mambo ka? Akilangulukai pe ba Faustina bekala ku Bolivia. Kimye kitanshi kyo batendekele kupwanañana na Bakamonyi ba kwa Yehoba kechi bayukile kutanga ne. Luno, besekako kutanga. Babatizhiwa kabiji bomvwa bulongo kufunjisha bantu Baibolo. Pa kino kimye, bafunjisha bantu batanu pa mulungu pa mulungu. Nangwa kya kuba ba Faustina kechi batanga bulongo byonka bitanga bavula bo bafunjisha Baibolo ne, bino bakwasha bantu batanu na umo kufika ne ku lubatizhilo.—Luka 10:21.

13. Nangwa kya kuba twapayankana bingi, ñanyi bintu byawama byo twakonsha kumwenamo mu mwingilo wa kufunjisha bantu kwikala baana ba bwanga?

¹³ Bena Kilishitu bavula bapayankana bingi mambo baji na bya kuba byavula. Nangwa byonkabyo, bamonapo kimye kya kufunjisha bantu Baibolo, kabiji bomvwa bingi bulongo kwingila uno mwingilo. Akilangulukai pe nyenga Melanie wa ku kyalo kya Alaska, wajinga na mwana wamukazhi wa myaka itanu na isatu kabiji kechi wajinga na balume ne. Waingilanga nkito  yawama kabiji wakwashanga bansemi banji bakolelwe kikola kya kansa. Nyenga Melanie ye yenkatu Kamonyi wajinga mu uno muzhi. Walombanga kimye kyonse pa kuba’mba ekale na bulume bwa kuya na kusapwila nangwa kya kuba kwajinga bingi mashika. Waubanga bino mambo a kuba’mba wakebeshenga kwikalapo na muntu wa kufunjisha Baibolo. Palutwe kacheche, wataaine ba Sara, baumvwine bulongo pa kufunda kuba’mba Lesa uji na jizhina. Byo papichile kimye, ba Sara baswile kufunda Baibolo. Ba Melanie baambile’mba: “Pa Kitanu mabanga nakookanga bingi, bino amiwa ne mwanami wamukazhi twaumvwanga bulongo kuya na kufunjisha ba Sara. Twaumvwanga bulongo kukumbula mepuzho aipuzhanga ba Sara, kabiji twasangalele byo bepaine kwikala balunda na Yehoba.” Ba Sara bachinchikile byo bebakainyenga kwingijila Lesa, balekele kuya mu chechi mo bayanga kabiji babatizhiwe.

14. (a) Mwingilo wa kufunjisha bantu kwikala baana ba bwanga wipasha byepi na mwingilo wa kukwata masabi? (b) Byambo bya kwa Paulo byanembwa pa 2 Timoti 4:1, 2 bimutundaika kuba byepi?

¹⁴ Umvwe kya kuba kechi mwataanapo muntu ukeba kwikala mwana wa bwanga ne, kange mukooke ne. Yesu waesakenye mwingilo wa kufunjisha bantu kwikala baana ba bwanga ku mwingilo wa kukwata masabi. Bantu bakwata masabi bakonsha kwingila maola avula pa kuba’mba bakwatepo jisabi. Javula bengila uno mwingilo wabo bufuku nangwa lukelo-kelo kabiji bimye bimo bakonsha kuya na bwato kwalepa na kukwata masabi. (Luka 5:5) Kyo kimotu, ne bengila mwingilo wa kufunjisha bantu kwikala baana ba bwanga nabo bengila maola avula pa bimye byapusana-pusana ne ku mapunzha  apusana-pusana. Mambo ka? Boba bino pa kuba’mba bataane bantu bavula bakeba kufunda. Aba bengila na ngovu bamwenamo byawama mambo bataana bantu bakeba kufunda bukine. Nanchi ne anweba mwakonsha kwingila mwingilo wa kusapwila kimye kitanwa bantu pa mazubo nangwa kwingijila pa mpunzha po mwakonsha kutana bantu bavula nyi?—Tangai 2 Timoti 4:1, 2.

15. Mambo ka o kikebewa kutekanya pa kufunjisha muntu Baibolo?

¹⁵ Mambo ka o kikebewa kutekanya pa kufunjisha bantu Baibolo? Kishinka kimo ke kya kuba’mba twafwainwa kwibikako pa kuba’mba tukwashe muntu kuyuka mafunjisho a mu Baibolo ne kwiatemwa. Twafwainwa kukwasha muntu ye tufunjisha kuyuka mwine mwina Baibolo aye Yehoba ne kumutemwa. Kununga pa kufunjisha muntu bintu byakambizhe Yesu kuba’mba byo byafwainwa kubanga baana banji ba bwanga, twafwainwa ne kumukwasha kuyuka bya kulondela ino mikambizho mu bwikalo bwanji. Twafwainwa kutekanya ne kumukwasha kuyuka bya kulondela mafunde a mu Baibolo. Bamo kechi babanda kupimpula byubilo byabo ne, bino bakwabo papita kimye kyabaya.

16. Mwafunjilako ka ku jishimikila ja ba Raúl?

¹⁶ Mishonale wa ku Peru wimwenejile buwame buji mu kutekanya. Waambile’mba: “Bo nafunjishanga Baibolo, ba Raúl, nebafunjishe mu mabuku abiji. Bino bakijinga na makatazho mu bwikalo bwabo. Mu masongola abo mwajinga makatazho, baingijishanga ñambilo yatama, kabiji kechi bebapanga mushingi ku baana babo ne, na mambo a byubilo byabo. Batanwanga ku kupwila kimye kyonse, onkao mambo, nayanga na kwibafwakesha pamo na kisemi kyabo. Byo papichile myaka kukila pa isatu kufuma po batendekele kufunda, bafikijilemo kubatizhiwa.”

17. Tukesamba pa ka mu mutwe walondelapo?

¹⁷ Yesu witukambizha kuya na “kufunjisha bantu ba mu bisaka byonse bya bantu kwikala ke baana [banji] ba bwanga.” Pa kuba’mba tufikizhe uno mukambizho, javula twisamba na bantu baitabila mu bintu byapusana na byo twaitabilamo. Bamo kechi bayapo nangwa mu bupopweshi bumo ne, kabiji bakwabo kechi baitabila mwi Lesa ne. Mutwe walondelapo ukamba pa byo twakonsha kusapwila mambo awama ku bantu ba nkomeno yapusana-pusana.