Byo nalekele kuzhinauka ne kutendeka mwingilo wa bupainiya, bwikalo bwami bwapimpwilwe bingi mu jishinda jo nabujilenga kuketekela. (Efi. 3:20) Pano bino, mwakonsha kukeba kuyuka kyalengejile. Lekai nemubuule mwapita bwikalo bwami.

Nasemekejilwe mu muzhi wa Berlin mu kyalo kya Germany, byo papichiletu bañondo bacheche kufuma kimye kyatendekele Nkondo ya Bubiji ya Ntanda Yonse mu 1939. Byo kwashajiletu pacheche nkondo kupwa mu 1945, madeke a bashilikale alakashijile mabomba avula mu muzhi wa Berlin. Kimye kyo balakeshe mabomba amiwa ne ba mu kisemi kyami twayile na kufyama ku mpunzha yazhikijilwa. Pa kuba’mba tupuluke, twanyemejile mu muzhi wa Erfurt mwasemekejilwe bamama.

Bamama batendekele kukeba bukine. Batangile mabuku anembele bantemwamaana ne a bupopweshi bwapusana-pusana, bino bapulwijilemotu mabula. Mu 1948, Bakamonyi ba kwa Yehoba babiji baishile pa nzubo yetu. Bamama baswishishe bano Bakamonyi kutwela mu nzubo kabiji bebepwizhe mepuzho avula. Saka pakyangye kupita kimye kyabaya, bamama betubuujile amiwa ne nkasami wamukazhi amba, “Nataana bukine.” Palutwe kacheche, bamama, amiwa ne nkasami twatendekele kupwila mu muzhi wa Erfurt.

Mu 1950, twabwelele ku Berlin, kabiji twatendekele kupwila mu kipwilo kya Berlin-Kreuzberg. Byo twavilukile jikwabo, twatendekele kupwila mu kipwilo kya Berlin-Tempelhof. Mu kuya kwa kimye, bamama babatizhiwe, bino amiwa nakankazhaminenga. Mambo ka?

Kyankatazhanga bingi kwingila mwingilo wa Yehoba mambo najinga bingi na bumvu. Nangwa kya kuba nayanga mu mwingilo, bino pa myaka ibiji kechi nesambilepo na muntu ne. Bintu byapimpwilwetu kimye kyo nayukile balongo ne banyenga bavula bajinga na bumvu kala, pano bino, bachinchikile pa kwingila mwingilo wa Yehoba. Bamo bachinchikile lumanamo mu makampu a Nazi nangwa mu tuleya twa ku East Germany. Bakwabo babikile bumi bwabo mu kizumba pa kutwala mabuku mu bufyamfya ku East Germany.  Byo bapichilemo byantundaikile bingi. Natendekele kulanguluka’mba inge bano balongo babikile bumi bwabo mu kizumba na mambo a kutemwa Yehoba ne balongo, ne amiwa nafwainwa kuleka kumvwa bumvu.

Natendekele kuleka kumvwa bumvu byo naingijileko mukwekele wa kusapwila wajingako mu 1955. Mu nkalata yajinga mu Informant, * Mulongo Nathan Knorr wabijikile kuba’mba uno mukwekele wabayile bingi kukila mikwekele yonse yo twaingijilepo mu jibumba ja Lesa. Waambile’mba inge basapwishi bonse baingilako uno mukwekele, “usakwikala ñondo mutanshi kwingilako pakatampe busapwishi mwaya ntanda yonse.” Basapwishi bavula byo byo baubile. Kechi papichile kimye ne, mu 1956 nepaine kwi Yehoba ne kubatizhiwa pamo ne batata ne nkasami wamukazhi. Bino nafwainwe kufuukulapo kintu kikwabo kyanema mu bwikalo bwami.

Pa myaka yavula, nayukile’mba mwingilo wa bupainiya ye mwingilo wawama ye nafwainwe kwingilako, bino nalangulukanga’mba nkengilako kulutwe. Patanshi, byo naikelenga mu Berlin, nafuukwilepo kufunda busulu bwa kupota ne kupotesha bintu mu byalo bikwabo. Byo napwishishe uno sukulu, nakebelenga kwingilako ino nkito pa kuba’mba ngikale shenyenye, apa bino nkatendeke bupainiya. Onkao mambo, mu 1961, natendekele kwingila ku kiito kikatampe kiji mu muzhi wa Hamburg mu kyalo kya Germany. Natemenwe bingi uno mwingilo kya kuba kechi nakebelenga kutendeka bupainiya bukiji ne. Nafwainwe kuba byepi?

Mbena kusanchila Yehoba pa kwingijisha balongo kunkwasha kuyuka’mba mwingilo wa Lesa wanema bingi kukila bintu byonse. Balunda nami bavula batendekele bupainiya kabiji nafunjijileko byavula. Kabiji mulongo Erich Mundt, wapulukile mu kampu wa lumanamo, wantundaikile kuketekela mwi Yehoba. Waambile’mba mu kampu wa lumanamo, balongo beketekejile bene mu kuya kwa kimye bakookele. Bino baketekejile mwi Yehoba batwajijile kwikala ba kishinka kabiji baikele ke mashiki mu kipwilo.

Kabiji ne Mulongo Martin Poetzinger waingijileko mu Jibumba Jitangijila, watundaikile balongo amba, “Kuchinchika ke kyubilo kyanema bingi kyo mwafwainwa kwikala nakyo.” Kulanguluka pa bino byambo, kwandengejile kuleka nkito ne kutendeka bupainiya mu June 1963. Nafuukwilepo kintu kyawama bingi. Byo papichile bañondo babiji, saka kyangye kutendeka kukeba nkito ikwabo, bantongwele kwikala painiya wiikajila. Kabiji byo papichile myaka icheche, Yehoba wampele byavula kukila pa byo naketekejilenga. Bangichile kuya ku Sukulu wa Gileada wa nambala 44.

Kintu kimo kyanema kyo twafunjile ke kya kuba’mba, “kechi wafwainwa kufikenatu kuleka mwingilo ye bakupa ne.” Nafunjile kino kikatakata ku Mulongo Nathan Knorr ne Mulongo Lyman Swingle. Betutundaikile kutwajijila kwingila mwingilo wetu nangwa kya kuba bintu byakatazha. Mulongo Knorr waambile’mba: “Ñanyi bintu byo mukatangapo muchima? Ndochi, byupu, nangwa buyanji nyi? Inyi mukata muchima pa bichi byawama, maluba, nangwa pa bantu baji na lusekelo nyi? Fundai kutemwa bantu.” Juba jimo, Mulongo Swingle byo alumbulwilenga kilengela balongo bamo kupelawizha kuleka mwingilo wabo, wakankelwe kulumbulula bulongo mambo mu meso mwayujile mipolo na mambo a bulanda. Waimikile jashi pa kuba’mba abwezhemo mu muchima. Kyangikele bingi ku muchima, onkao mambo, nafuukwilepo kutwajijila kwikala wa kishinka kwi Kilishitu ne balongo banji ba kishinka.—Mat. 25:40.

Byo betubuujile kwa kuya na kwingijila, balongo ba pa Betele bamo bakebelenga kuyuka ko betutumine. Baambile byawama ku mapunzha ko batumine bakwetu. Bino amiwa byo naambiletu’mba bantuma ku “Congo (Kinshasa),” batulumene ne kwamba’mba: “Oo, Congo! Yehoba akekale ne anweba.” Mu oa moba, mu Congo (Kinshasa) mwafumanga masawakya aambilenga pa bantu balwilenga ne kwiipaya bene na bene. Bino natwajijile kulanguluka pa bintu byo nafunjile ku sukulu. Byo twapwishishetu sukulu mu September 1967, amiwa, ba Heinrich Dehnbostel, ne ba Claude Lindsay, twatendekele kuya mu muzhi mukatampe wa Kinshasa mu kyalo kya Congo.

Byo twafikile mu muzhi wa Kinshasa, twafunjile mulaka wa Kifulenchi pa bañondo basatu. Kepo twavilukijile mu muzhi wa Lubumbashi, watelwanga kala amba Elisabethville uji ku kabeta ka bulenge bwa Congo kwipi na kyalo kya Zambia. Twavilukijile mu nzubo ya bamishonale yajinga mukachi ka muzhi.

Na mambo a kuba’mba pa kyokya kimye kafwako basapwilanga mu muzhi wa Lubumbashi ne, twasangalele bingi pa kwikala batanshi kusapwila bukine ku bantu bavula baji mu uno muzhi. Kechi papichile ne kimye kyabaya ne, twaikele na bantu bavula bakufunjisha Baibolo. Kabiji twasapwilanga ne ku bamingilo mu kafulumende ne bakapokola. Bavula banemekele bingi Mambo a Lesa ne mwingilo wetu wa kusapwila. Bantu bavula baambanga Kiswahili, onkao mambo, amiwa ne ba Claude Lindsay twafunjile uno mulaka. Byo papichiletu kimye kicheche, betuvilwijile mu kipwilo kya Kiswahili.

Nangwa kya kuba twiyowelenga bintu byavula byawama, bino twapitanga ne mu makatazho. Javula bashilikale bapendwa baiyanga na mata na kwitukatazha nangwa bakapokola bakanama baiyanga na kwitubepela amba twauba bintu byo twabujile ne kuba. Juba jimo, bakapokola bajinga na mata betulukukile saka tubena kupwila pa nzubo yajinga ya bamishonale kabiji betusendele ne kwitutwala ku ofweshi mukatampe wa bakapokola, ko betwikajikile panshi kufika kimye kya 10 koloko wa bufuku, kepo betulekeleko.

Mu 1969, bampele mwingilo wa kwenda. Pa kufwakesha bipwilo byajinga mu mwanzo wami, twapitanga mu jisaka, kwenda miseke yalepa kupita mu tulolo muji nsono ya musanse ne mateshi.  Abino byo biji bwikalo mu Africa. Pa muzhi umo, nzolo wa kyaje walaalanga na twana twanji munshi ya mwanya wami. Kechi ndubamo byo ambushanga ku manyanshi na mambo a kyongo kyo aubanga ne. Kabiji kechi nkalubamo byo twisambanga bukine bwa mu Baibolo na balongo mabanga saka twaikala ku kyoto na kota mujilo ne.

Lukatazho lukatampe lumo lo twajinga nalo ke bantu betelanga’mba Bakamonyi ba kwa Yehoba saka bajinga mu jibumba ja ba Kitawala. * Bamo babatizhiwe ne kwikala bakulumpe mu kipwilo. Bano bantu bajinga “nobe mabwe akatampe afyama” bebasolwele ku balongo ne banyenga ba kishinka. (Yuda 12) Mu kuya kwa kimye, Yehoba wafumishemo bano bantu mu kipwilo, kabiji bantu bavula baishile mu bukine.

Mu 1971, bantumine kuya na kwingijila ku ofweshi wa musampi wa Kinshasa, ko nakengijilenga mingilo yavula, nabiji kutuma ne kutambwila makalata, kuoda mabuku, ne pa mwingilo wa kusapwila. Pa Betele, nafunjile bya kunengezha mwingilo mu kino kyalo kikatampe mwabujile bintu byavula bya kwingijisha pa kwingila mwingilo. Bimye bimo, papitanga bañondo bavula pa kuba’mba bintu byo twatuma na ndeke bifike ku bipwilo. Balongololanga bino bintu mu ndeke ne kwibilonga mu maato, kabiji maato kechi afikanga bukiji ko ayanga ne, mambo a bitavu ne bikwibu. Nangwa byonkayo, mwingilo waendangatu bulongo nangwa kya kuba kwajinga ano makatazho ne akwabotu.

Nakuminye bingi pa kumona balongo byo banengezhanga kushonkena kukatampe na mali achechetu. Bapoyanga pa kyulu ne kulengapo mutuntamo, baingijishanga nsono ya musanse pa kuvweta ku kipaka kya kupwilamo ne kukasa bikuta bya musanse ke bipona pa kwikala. Pa kushimika mutuntamo baingijishanga nsununu kabiji bilalo byo bavwetanga pa musemi ne kulengela matebulu. Kabiji bakasanga na ngozhi, kechi baingijishanga misumali ne. Naumvwanga bingi bulongo pa kumona busendwe ne maana aingijishanga balongo ne banyenga pa kwingila ino mingilo. Nebatemenwe bingi bano balongo ne banyenga. Kabiji nebavulukanga bingi byo bantumine kuya na kwingijila mu kyalo kikwabo.

Mu 1974, bantumine kuya na kwingijila ku ofweshi wa musampi mu muzhi wa Nairobi, ku Kenya. Twajinga na mingilo yavula, mambo musampi wa mu Kenya watangijilanga mwingilo wa kusapwila mu byalo bikwabo jikumi, kabiji mu byalo bimo mwingilo wetu bamushinkile. Pa bimye byavula bantumanga kuya na kufwakesha bino byalo, kikatakata kyalo kya Ethiopia, mo bamanyikilenga bingi balongo betu kabiji bapichilenga mu meseko apusana-pusana. Balongo bavula bebapuminenga ne kwibakasa mu tuleya, kabiji bamo bebepayilenga. Pano bino, bachinchikile mambo bajinga na bulunda bwakosa ne Yehoba kabiji betemenwe abo bene na bene.

Mu 1980, kwaubiwe kintu kyawama bingi. Nasongwele ba Gail Matheson bafumine ku Canada. Ba Gail ne amiwa twatainwe ku sukulu umo wa Gileada. Twituminanga makalata. Ba Gail baingijilenga bumishonale mu Bolivia. Byo papichile myaka 12, twamonañene jikwabo ku New York. Kechi pabanjile ne, ba Gail baishile ku Kenya, kabiji twatwelele mu masongola. Mbena kusanchila bingi ba Gail pa byo bamwena bintu mu jishinda jibimwenamo Yehoba, kabiji basanta pa byonka byo baji nabyo. Nebatemwa kabiji bantundaika bingi.

Mu 1986, amiwa ne ba Gail betupele mwingilo wa kwenda, kabiji najinga mu Kavoto ka Musampi. Mwingilo wa kwenda wavwangilemo kufwakesha byalo byo batangijilanga ku musampi wa mu Kenya.

Mvuluka kimye kyo twanengezhezhenga kushonkena mu kyalo kya Asmara (mu Eritrea) mu 1992 saka bakyangye kukanya mwingilo wetu. Kyatamine bingi byo bakainye mwingilo wetu mu kino kyalo. Pa juba ja kushonkena, naumvwine bingi bulongo pa kumona balongo byo bawamishe mpunzha kuba’mba tupopwelepo Yehoba bulongo. Bisemi byavula byaletele bisapi byawama ne kuvweta ponse pa bujilenga kumweka bulongo. Kuno  kushonkena kwawamine bingi kabiji kwatainwe bantu 1,279.

Mwingilo wa kwenda waletele lupimpu lwabaya bingi mambo twalaalanga mu mazubo apusana-pusana. Kimye kimo, betutambwijile mu nzubo yawamine bingi kubwipi na kitulu kya kalunga ka mema, kabiji pa kimye kikwabo, twaikele mu nzubo ya malata mwaikalanga ba nkito kabiji byolonyi byajinga kwalepa mamita 100. Pano bino, ku mapunzha onse ko twayanga na kwingijila tuvuluka bingi byo twaingilanga mwingilo wa kusapwila na bapainiya ne basapwishi ba mukoyo. Byo betupele mwingilo mukwabo, twashile balunda netu bavula bingi bo tuvuluka kimye kyonse.

Kufuma mu 1987 kufika mu 1992, mwingilo wetu bamuswishishe ku kafulumende mu byalo byavula byo batangijilanga ku ofweshi wa musampi wa mu Kenya. Na mambo a kino, batungile maofweshi a musampi ne maofweshi a kyalo mu byalo bimo. Mu 1993, betutumine kuya na kwingijila pa ofweshi mu Addis Ababa, mu kyalo kya Ethiopia, balongo mo baingijile mwingilo wetu mu bufyamfya pa myaka yavula, pano pa kikye kimye mwingilo wetu bamuswishishe ku kafulumende.

Yehoba wapesheshe mwingilo wetu mu Ethiopia. Balongo ne banyenga bavula batendekele bupainiya. Kutendeka mu mwaka wa 2012, basapwishi bavula batendeka kwingila bupainiya bwa kimye kyonse pa mwaka pa mwaka. Kunungapo, masukulu a mu jibumba ja Lesa abena kufunjisha basapwishi bya kwingila mwingilo wa kusapwila, kabiji Mazubo a Bufumu kukila pa 120 ashimikwa. Mu 2004, kisemi kya Betele kyavilukijile mu bishimikwa bya katataka, kabiji ponka paji bishimikwa bya betele, po po bashimikila ne Nzubo ya Kubuñenamo, abino byonse bibena kumwesha mapesho a Lesa.

Pa myaka yavula yapitapo, amiwa ne ba Gail twalenga bulunda bwawama bingi na balongo ne banyenga mu Ethiopia. Twibatemwa bingi mambo baji na lusa ne kifyele. Ano moba tubena kukolwakolwa, kabiji kino kyo kyalengejile’mba betuvilwile ku ofweshi wa musampi wa mu Central Europe. Kuno, babena kwitulama bulongo, bino tuvuluka bingi balunda netu ba ku Ethiopia.

Twimwena Yehoba byo alengela mwingilo wanji kukoma. (1 Ko. 3:6, 9) Kimye kitanshi kyo twasapwijile ku bena Rwanda baingilanga mu mikochi mu Congo, mu kyalo kya Rwanda kechi mwajingapo basapwishi ne. Luno muji balongo ne banyenga kukila pa 30,000. Mu 1967, mu Congo (Kinshasa) mwajingatu basapwishi nobe 6,000. Luno bakila pa 230,000, kabiji bantu kukila pa 1 milyonyi bataainwe ku Kivuluko mu 2018. Mu byalo byonse byo batangijilanga ku ofweshi wa musampi wa mu Kenya, basapwishi bavujilako kukila pa 100,000.

Pa myaka kukila pa 50 yapitapo, Yehoba waingijishe balongo bapusana-pusana kunkwasha kutendeka mwingilo wa kimye kyonse. Nangwa kya kuba’mba ne lunotu nji na bumvu, bino nafunda kuketekela mwi Yehoba na muchima yense. Bintu byo napichilemo mu Africa byankwasha kwikala muntu watekanya ne kutondwa na bintu byo nji nabyo. Amiwa ne ba Gail tutundaikwa bingi pa kumona balongo ne banyenga byo batambwila benyi, byo bachinchika makatazho, ne byo baketekela mwi Yehoba. Nsanchila bingi Yehoba pa lusa lwanji lukatampe. Kine, mapesho a Yehoba akila pa bintu byonse byo naketekejilenga.—Sala. 37:4.