MUTWE WA KUFUNDA 26
Nanchi Mwakonsha Kufunjisha Bantu Kwikala ke Baana ba Bwanga Nyi?
‘Lesa ubena kwimupa kizaku ne bulume bwa kwingila.’—FILI. 2:13.
LWIMBO 64 Kwingilako na Lusekelo mu Mwingilo wa Kunowa
BIJI MU UNO MUTWE *
1. Ñanyi bintu bimubila Yehoba?
MWAIKELE byepi Kamonyi wa Yehoba? Patanshi, mwaumvwine “mambo awama,” kampe ku bansemi benu, ku mukwenu ye mwingila nanji nkito nangwa mo mufunjila sukulu, nangwa kimye Bakamonyi kyo baishile na kusapwila pa nzubo yenu. (Mako 13:10) Kepo Kamonyi umo aingijishe kimye ne bulume bwanji kwimufunjisha Baibolo. Kimye kyo mwafunjilenga Baibolo, mwatendekele kutemwa Yehoba kabiji mwafunjile kuba’mba wimutemwa bingi. Yehoba wimukokejile mu bukine, kabiji luno byo muji mwana wa bwanga wa kwa Yesu Kilishitu, muji na luketekelo lwa kwikala na bumi bwa myaka ne myaka. (Yoa. 6:44) Mwafwainwa musanchila Yehoba pa kutundaika muntu kwiya na kwimufunjisha bukine ne kwimwitabizha kwikala kalume wanji.
2. Ñanyi bintu byo tusakufunda mu uno mutwe?
2 Pano byo twayuka bukine, tuji na mwingilo wa kukwasha bantu bakwabo kwiya mu jishinda jaya ku bumi. Kampe twatemwa bingi busapwishi bwa ku nzubo ku nzubo, bino kitukatazha kwipuzha muntu inge wakonsha kutemwa kufunda Baibolo ne atweba, nangwa kufunjisha muntu Baibolo. Nanchi ne anweba lo lukatazho lo mwikala nalo nyi? Inge byo byo kiji, mashinda o baambapo mu uno mutwe kampe akonsha kwimukwasha. Tusakwisamba kine kintu kitulengela kukwasha bantu kwikala baana ba bwanga. Kabiji tusakwisamba byo twakonsha kushinda makatazho akonsha kwitulengela kukankazhama kufunjisha muntu Baibolo. Patanshi, twayai twisambe pa ene mambo o twafwainwa kusapwila bantu ne kwibafunjisha mambo awama.
YESU WITUKAMBIZHE KUSAPWILA NE KUFUNJISHA
3. Mambo ka o twingijila mwingilo wa kusapwila?
3 Yesu byo ajinga pano pa ntanda, wakambizhe baana banji ba bwanga kwingila mwingilo uji na mbaji ibiji. Lubaji lutanshi, wibakambizhe Mat. 10:7; Luka 8:1) Kabiji Yesu wabuujile baana banji ba bwanga bya kuba inge bantu baswa byambo bya Bufumu, ne bya kuba inge bakana. (Luka 9:2-5) Walumbulwile ne kuba’mba baana banji ba bwanga bakasapwila ku bantu bavula bingi mu mapunzha avula byo aambile’mba bakashimuna “bukamonyi ku bisaka byonse bya bantu.” (Mat. 24:14; Byu. 1:8) Nangwa kya kuba bantu baswa nangwa bakana, Yesu wakambizhe baana banji ba bwanga kusapwila pa Bufumu bwa Lesa ne bintu byo bukoba.
kusapwila mambo awama a Bufumu, kabiji wibabuujile ne bya kwingila uno mwingilo. (4. Kwesakana na byaamba Mateo 28:18-20, ñanyi kintu kikwabo kyo twafwainwa kuba kununga pa kusapwila pa Bufumu?
4 Ñanyi lubaji lwa bubiji lwa mukambizho wapaine Yesu? Wakambizhe baana banji ba bwanga kufunjisha bantu kwikala ke baana ba bwanga ne kwibakwasha kulama byonse byo akambizhe. Nanchi mwingilo wa kusapwila ne kufunjisha wajingatu wa bena Kilishitu batanshi, byonka byamba bantu bamo nyi? Ine, Yesu wamwesheshe kuba’mba uno mwingilo wanema ukatwajijila “kukafikatu ne ku mpelo ya buno bwikalo.” (Tangai Mateo 28:18-20.) Yesu kyamweka wapaine uno mukambizho kimye kyo amwekele ku baana banji ba bwanga bakijile pa 500. (1 Ko. 15:6) Kabiji mu Lumwekesho lo amwesheshe Yoano, Yesu wamwesheshe patoka kuba’mba baana banji ba bwanga bonse bafwainwa kukwasha bantu kuyuka Yehoba.—Lum. 22:17.
5. Kwesakana na byaamba 1 Kolinda 3:6-9, ñanyi kintu kyaambilepo Paulo kimwesha’mba twafwainwa kusapwila ne kufunjisha?
5 Mutumwa Paulo waesakenye mwingilo wa kufunjisha bantu kwikala baana ba bwanga ku kujima bijimwa. Kino kimwesha kuba’mba twafwainwa kuba bintu byavula kechi kubyalatu nkunwa ne. Wavulwilemo bena Kolinda amba: “Amiwa nabyajile, Apolosa watekezhe . . . Anweba mwi bujimi bwa Lesa bo abena kujima.” (Tangai 1 Kolinda 3:6-9.) Byo tuji ba mingilo mu “bujimi bwa Lesa,” kechi tubyalatu nkunwa ne, bino twiitekezha kabiji kimye kyonse tubwelako na kumona umvwe ibena kukoma. (Yoa. 4:35) Bino twayuka kuba’mba Lesa ye ulengela bijimwa kukoma.
6. Ñanyi bintu byavwangwamo mu mwingilo wetu wa kufunjisha bantu?
6 Tubena kukeba bantu baji “na michima ya bukishinka ya kukeba bumi bwa myaka ne myaka.” (Byu. 13:48) Pa kuba’mba tukwashe bano bantu kwikala ke baana ba bwanga, twafwainwa kwibakwasha (1) kuyuka, (2) kuswa, ne (3) kwingijisha bintu byo bafunda mu Baibolo. (Yoa. 17:3; Kolo. 2:6, 7; 1 Tesa. 2:13) Bonse mu kipwilo bakonsha kukwasha bantu bafunda Baibolo kupichila mu kumwesha bano ba katataka butemwe ne kwibatambwila inge baiya na kupwila. (Yoa. 13:35) Kabiji mwine ufunjisha yeo muntu wakonsha kwingijisha kimye kyabaya ne ngovu yanji kumukwasha kusankilapo bintu byo aitabilamo nangwa miteeto imo. (2 Ko. 10:4, 5) Pakonsha kupita bañondo bavula pa kubatu’mba tukwashe muntu kupimpula bwikalo bwanji ne kufikilamo kubatizhiwa. Bino mu kuba bino mufuma bintu byawama bingi.
BUTEMWE BO BWITULENGELA KUFUNJISHA BANTU KWIKALA KE BAANA BA BWANGA
7. Mambo ka o twingijila mwingilo wa kusapwila ne kufunjisha bantu kwikala baana ba bwanga?
7 Mambo ka o twingijila mwingilo wa kusapwila ne kufunjisha bantu kwikala ke baana ba bwanga? Kitanshi, ke na mambo a kuba’mba twatemwa Yehoba. Umvwe mwibikako kukookela mukambizho wa kusapwila ne kufunjisha bantu kwikala ke baana ba bwanga, mumwesha kuba’mba mwatemwa Lesa. (1 Yoa. 5:3) Langulukai pa kino: Kutemwa Yehoba ko kwimutundaika kusapwila ku nzubo ku nzubo. Abya kyapelele kukookela uno mukambizho nyi? Kampe ine. Kimye kitanshi kyo mwayile pa nzubo ya muntu na kusapwila, abya mwaumvwine moyo nyi? Kwa kubula nangwa kuzhinaukatu ne. Bino mwayukile’mba uno ye mwingilo Yesu ye akeba’mba mwingile, kabiji mwakookejile uno mukambizho. Kabiji kyamweka mu kuya kwa kimye, mwingilo wa kusapwila watendekele kupeela. Pano ibyepi pa kufunjisha muntu Baibolo? Nanchi kulangulukatu pa uno mwingilo kwimulengela kumvwa moyo nyi? Kampe. Nangwa byonkabyo, inge mwalomba Yehoba kuba’mba emukwashe kushinda moyo ne kuchinchika pa kuba’mba mwipuzhe muntu inge wakonsha kutemwa kufunda Baibolo, Yehoba wakonsha kwimukwasha kwikala na kizaku kya kufunjisha bantu kwikala ke baana ba bwanga.
8. Kwesakana na byaamba Mako 6:34, ñanyi kintu kikwabo kyakonsha kwitutundaika kufunjisha bantu?
8 Kya bubiji, kutemwa bantu kwitutundaika kwibafunjisha bukine. Pa kimye kimo, Yesu ne baana banji ba bwanga bakookele bingi byo bafumine na kusapwila. Bakebelenga mpunzha kwa kukookolokela, bino jibumba jikatampe jibalondejile. Na mambo a kuba’mba wibobijile lusa, Yesu watendekele kwibafunjisha “bintu byavula.” (Tangai Mako 6:34.) Yesu wibikileko kwingila uno mwingilo nangwa kya kuba wakookele bingi pa kikye kimye. Mambo ka? Mambo Yesu walangulukile pa bintu byapichilengamo bano bantu. Wakebele kwibakwasha mambo wamwene byo bamanaminenga kabiji bakebelenga luketekelo. Byo biji ne bantu ano moba. Mwekelo yabo kechi yafwainwa kwimulengela kumona nobe baji na lusekelo kabiji bwikalo bwabo bwawama ne. Bajitu nobe mikooko yaeleka yabula kafunga wa kwiitangijila. Mutumwa Paulo walumbulwile bantu ba uno mutundu amba kechi bamuyuka Lesa ne, kabiji kechi baji na luketekelo ne. (Efi. 2:12) Baji mu ‘jishinda jitwala ku lonaiko.’ (Mat. 7:13) Umvwe twalanguluka pa bantu baji mu nyaunda yetu kuba’mba babena kukeba kuyuka Lesa, butemwe ne lusa biketutundaika kwibakwasha. Kabiji jishinda jawama kwibakwashishamo ke kwibepuzha kuba’mba twibafunjishenga Baibolo.
9. Kwesakana na byaamba Filipai 2:13, Yehoba wakonsha kwimukwasha byepi?
9 Kampe mukankazhama kwipuzha muntu kuba’mba mu mufunjishenga Baibolo mambo mwayuka’mba uno mwingilo ukebewa kimye ne kutako muchima. Inge byo byo mulanguluka, buulaiko Yehoba. Mulombai kuba’mba emukwashe kwikala na kizaku kya kukebapo muntu ye mwakonsha kufunjishanga Baibolo. (Tangai Filipai 2:13.) Mutumwa Yoano witubuula’mba Lesa ukakumbula milombelo yetu umvwe ke tulombe mwayila kyaswa muchima wanji. (1 Yoa. 5:14, 15) Onkao mambo, mwakonsha kushiinwa kuba’mba Yehoba ukemukwasha kwikala na kizaku kya kwingilako mwingilo wa kufunjisha bantu kwikala ke baana ba bwanga.
BYO TWAKONSHA KUSHINDA MAKATAZHO AKWABO
10-11. Ñanyi bintu byakonsha kwitulengela kukankazhama kufunjisha muntu Baibolo?
10 Twayuka’mba mwingilo wa kufunjisha bantu kwikala baana ba bwanga wanema bingi, bino kyakonsha kwitukatazha kumwingila kwesakana na mo tukebela. Twayai twisambeko pa makatazho amo ne byo twakonsha kwiashinda.
11 Kukankalwa kwingila mo tukebela. Basapwishi bamo bakoma kabiji bakwabo kechi baji na butuntulu bwa mubiji bwawama ne. Nanchi luno lo lukatazho lo muji nalo nyi? Inge byo byo kiji, langulukai pa bintu byo twafunjilako ku mwalo wa COVID-19. Twataana kuba’mba twakonsha kufunjisha bantu Baibolo kwingijisha mafoni ne biñambañamba bikwabo. Onkao mambo, mwakonsha kufunjishanga muntu Baibolo saka mwaikala mu nzubo yenu kwa kubula kwenda kuya kwalepa. Kabiji kuji ne buwame bukwabo buji mu kwingijisha biñambañamba. Bamo bakeba kufunda Baibolo, bino javula kechi bataanwa pa mazubo abo kimye balongo kyo baya na kusapwila ne. Nangwa byonkabyo, bakonsha kutaanwapo lukelo nangwa bufuku. Nanchi mwakonsha kufunjisha muntu Baibolo pa bino bimye Yoa. 3:1, 2.
nyi? Yesu wafunjishe Nikodema bufuku, mambo kyo kimye Nikodema kyo akebele kufunda.—12. Ñanyi bintu bitulengela kushiinwa kuba’mba twakonsha kwikala bafunjishi bayuka kufunjisha?
12 Twakonsha kulanguluka’mba kechi tuji na busendwe bwa kufunjisha muntu Baibolo ne. Kampe tulanguluka’mba twafwainwa kuyuka byavula nangwa kwikala mufunjishi wayuka kufunjisha apa bino twatendeka kufunjisha muntu. Inge byo byo mulanguluka, langulukai pa bintu bisatu byakonsha kwimukwasha kushiinwa’mba mwakonsha kufunjisha muntu Baibolo. Kitanshi, Yehoba wimumona’mba mwafikilamo kufunjisha bakwenu. (2 Ko. 3:5) Kya bubiji, Yesu yenka ye bapa “luusa lonse pa bintu bya mwiulu ne bya pano pa ntanda,” ye wimukambizha kufunjisha bantu. (Mat. 28:18) Kya busatu, basapwishi bakwenu bakonsha kwimukwasha. Yesu waketekejile mu bintu byamufunjishe Shanji kwamba, ne anweba byo byo mwafwainwa kuba. (Yoa. 8:28; 12:49) Kikwabo, mwakonsha kwipuzhako kalama wa jibumba jenu ja mwingilo, painiya wingila bulongo, nangwa musapwishi wayuka kufunjisha kwimukwashako kutaana muntu wa kufunjisha Baibolo ne bya kufunjisha. Jishinda jimo jakonsha kwimukwasha kwikala mufunjishi wawama ke kuyila pamo na basapwishi bakwenu kimye kyo baya na kufunjisha bantu Baibolo.
13. Mambo ka o twafwainwa kwingijishishanga mashinda a katataka pa kufunjisha bantu Baibolo?
13 Kyakonsha kwitukatazha kwingijisha mashinda a katataka ne bingijisho bya katataka. Jishinda jo tufunjishishamo bantu Baibolo luno japimpulwa. Buku ye tubena kwingijisha pa kufunjisha bantu Baibolo luno wa kuba’mba Mukekala Myaka ne Myaka!, ukebewa kunengezha lufunjisho ne kufunjisha mu jishinda japusanako na byo twaubanga kala. Tutangatu mafuka acheche ne kwisambapo kimye kyabaya na ye tufunjisha. Pa kufunjisha, twingijisha mavidyo avula ne bingijisho nabiji JW Library®. Inge kechi mwayuka bya kwingijisha bino bingijisho ne, ipuzhaiko muntu wakonsha kwimukwasha kufunda bya kwibingijisha. Atweba bantu kechi tukeba kupimpulako jishinda jo twapijilwa kubilamo bintu ne. Onkao mambo, kechi kyapeela kwingijisha mashinda a katataka a kubilamo bintu ne. Bino na bukwasho bwa Yehoba ne bakwenu, kechi kikemukatazha kupimpula ne, kabiji mukeyowanga bingi kufunjisha bantu. Byonkatu byaambilepo painiya umo amba jino jishinda ja kufunjishishamo bantu “jilengela bonse babiji, ubena kufunda ne mufunjishi kwiyowa bingi lufunjisho.”
14. Ñanyi kintu kyo twafwainwa kuvulukanga inge twingijila mu nyaunda yakatazha, kabiji kinembelo kya 1 Kolinda 3:6, 7 kitutundaika byepi?
14 Twakonsha kwikala ku mpunzha ko kyakatazha kutaana bantu bakeba kufunda Baibolo. Bantu bamo kechi bakeba kuteleka ku byambo byo tusapwila ne. Ki ka kyakonsha kwitukwasha kuketekela kuba’mba bantu ba mu nyaunda ya uno mutundu bakonsha kuswa byambo bya mu Baibolo? Vulukainga kuba’mba mu ino ntanda yakatazha, bintu mu bwikalo bwa muntu byakonsha kupimpulwatu nobe mu kukopa kwa jiso. Kabiji aba bakainenga kuteleka ku byambo byo tusapwila bakonsha kuyuka kuba’mba babena kukebewa lutangijilo lwa Lesa mu bwikalo bwabo. (Mat. 5:3) Bamo bakananga kala kutanga mabuku etu mu kuya kwa kimye baswile kufunda Baibolo. Kabiji twayuka kuba’mba Yehoba ye Mwine mwina mwingilo wa kunowa. (Mat. 9:38) Ukeba’mba tutwajijile kukusa kunwa ne kutekezha, bino aye ye Mwine wiilengela kukoma. (1 Ko. 3:6, 7) Kabiji kitutundaika bingi kuvuluka kuba’mba nangwa kya kuba kechi tujipo na muntu ye tufunjisha Baibolo pa kino kimye ne, Yehoba uketufweta na mambo a byo twingila na ngovu, kechi na mambo a bifumamo mu mwingilo wetu ne. *
IKALAI NA LUSEKELO LUFUMA MU KUKWASHA BANTU KWIKALA BAANA BA BWANGA
Monai mwingilo wetu wa kusapwila ne kufunjisha byo akonsha kukwasha muntu (Monai mafuka 15-17) *
15. Yehoba umvwa byepi inge muntu waswa kufunda Baibolo ne kwingijisha byo abena kufunda?
15 Yehoba usangalala bingi inge muntu waswa bukine bwa mu Baibolo ne kubuulako bakwabo. (Maana 23:15, 16) Yehoba wafwainwa usangalala bingi pa kumona bantu banji byo babenga kwingila na mukoyo mwingilo wa kusapwila ne kufunjisha. Nangwa kya kuba kuji mwalo wakumbanatu ntanda yonse, mu mwaka wa mwingilo wa 2020, bantu bafunjilenga Baibolo bajinga 7,705,765, kabiji bantu bo bakwashishe kwipana bene kwi Yehoba ne kubatizhiwa bajinga 241,994. Bano baana ba bwanga ba katataka nabo babena kufunjisha bakwabo Baibolo ne kwibakwasha kwikala baana ba bwanga. (Luka 6:40) Kwa kubula nangwa kuzhinaukatu ne, tusangajika muchima wa Yehoba kupichila mu kwingilako mwingilo wa kufunjisha bantu kwikala ke baana ba bwanga.
16. Ñanyi kikonkwanyi kyawama kyo twakonsha kwibikila?
16 Mwingilo wa kufunjisha bantu kwikala baana ba bwanga ke mwingilo wakosa bingi, bino na bukwasho bwa Yehoba, twakonsha kwingilako mwingilo wa kukwasha ba katataka kutemwa Shetu wa mwiulu. Nanchi kechi twakonsha kwibikila kikonkwanyi kya kwikalapotu nangwa na muntu umo wa kufunjisha Baibolo nenyi? Twakonsha kukumya bingi na kyakonsha kumweka inge twaipuzha muntu yense ye twataana inge wakonsha kutemwa kufunda Baibolo ne atweba. Twakonsha kuketekela kuba’mba Yehoba uketupesha umvwe twibikako.
17. Tukomvwanga byepi umvwe twaikalapo na muntu wa kufunjisha Baibolo?
17 Ke munema mukatampe bingi kwingilako mwingilo wa kusapwila ne kufunjisha bantu bukine. Uno mwingilo wituletela lusekelo lwa kine. Mutumwa Paulo wakwashishe bantu bavula mu Tesalonika kwikala baana ba bwanga waambile byo aumvwinenga ku muchima amba: “Nga luketekelo, lusekelo ne munchinya wetu wa kwitotelamo kwi Nkambo yetu Yesu mu kimye kya kwikalapo kwanji ye wepi? Nanchi kechi anweba nenyi? Kine, anweba yenu lukumo ne lusekelo lwetu.” (1 Tesa. 2:19, 20; Byu. 17:1-4) Ne bavula lelo jino byo byo bomvwa byonkabye. Nyenga wa jizhina ja Stéphanie waingijila pamo na bamwatawanji kukwasha bantu bavula kufika ne ku lubatizhilo waambile’mba: “Kafwako kintu kikwabo kileta lusekelo lukatampe kyakila pa kukwasha bantu kwipana bene kwi Yehoba ne.”
LWIMBO 57 Sapwilainga Bantu Bonsetu
^ jifu. 5 Yehoba witunemeka bingi pa kwitupa mwingilo wa kusapwila bantu ne kwibafunjisha kulama bintu byonse byakambizhe Yesu. Ñanyi kintu kitutundaika kufunjisha bantu? Ñanyi makatazho o tupitamo pa kwingila mwingilo wa kusapwila ne kufunjisha bantu kwikala baana ba bwanga? Kabiji twakonsha kushinda byepi ano makatazho? Uno mutwe wakumbula ano mepuzho.
^ jifu. 14 Pa kuba’mba mufunjilepo byavula pa mwingilo wingila bonse mu kipwilo pa kukwasha bantu kwikala baana ba bwanga, monai mutwe wa kuba’mba “Bonse mu Kipwilo byo Bakonsha Kukwasha Bafunda Baibolo Kukomenako Kufika ku Lubatizhilo,” mu Kyamba kya Usopa kya March 2021.
^ jifu. 53 KULUMBULULA BIPIKICHALA: Monai kufunjisha muntu Baibolo byo kwakonsha kumulengela kupimpula bwikalo bwanji: Patanshi, uno mwanamulume ubena kumona nobe bumi bwanji kechi bwanema ne, kabiji kechi wayuka Yehoba ne. Bakamonyi ba kwa Yehoba bamutaana kimye kyo baji mu busapwishi, kabiji waswa kufunda Baibolo. Bintu byo bamufunjisha byamulengela kwipana ne kubatizhiwa. Mu kuya kwa kimye, naye watendeka kukwasha bakwabo kwikala baana ba bwanga. Kyapelako, bonse babena kwiyowa bumi mu Paladisa.