1. Ñanyi kintu kitubila Yehoba atweba bonse pa muntu pa muntu?

ATWEBA bonse Yehoba witukokela kwi aye. (Yoa. 6:44) Langulukai pa kino byo kilumbulula. Yehoba byo atajiletajile pa biumbi bya bantu baji pano pa ntanda, wamwenemo kintu kyanema mwi anweba, ko kuba’mba muji na muchima wa bukishinka kabiji mwakonsha kumutemwa. (1 Moba 28:9) Yehoba wimuyuka bulongo byo muji kabiji wimutemwa. Kuyuka bino kwitusangajika bingi.

2. Yesu walumbulwile byepi Yehoba byo atemwa mikooko yanji umo umo?

² Yehoba wimuta bingi muchima, kabiji wata muchima ne balongo ne banyenga yenu bena Kilishitu bonse. Pa kuba’mba etukwashe kumvwisha kino kishinka, Yesu waesakenye Yehoba ku kafunga. Umvwe pa mikooko 100 paeleka umo, kafunga ukoba byepi? “Ukasha aya 99 pa mitumba, ne kuya na kukeba awa umo waeleka.” Inge kafunga wataana mukooko ye abakebenga, kechi umuzhipaula ne, bino usekela bingi. Ñanyi kishinka Yesu kyo aambilengapo? Mukooko yense wanema kwi Yehoba. Yesu waambile’mba: “Batata ba mwiulu kechi bakeba nangwa umotu wa mu bano bantu baji nobe baana ba bacheche konaika ne.”—Mat. 18:12-14.

3. Tusakwisamba pa ka mu uno mutwe?

³ Atweba bonse kechi twafwainwa kwikala kya kwituntulako balongo nangwa banyenga ne. Twakonsha kuchinuzhuka byepi kutuntwisha bakwetu? Kabiji twakonsha kuba byepi umvwe mukwetu witufichisha ku muchima? Tusa kukumbula ano mepuzho mu uno mutwe. Bino patanshi twayai tufunjileko byavula ku “bantu  baji nobe baana ba bacheche” bo baambapo mu Mateo kitango 18.

4. “Bantu baji nobe baana ba bacheche” bo bañanyi?

⁴ “Bantu baji nobe baana ba bacheche” ke baana ba bwanga ba kwa Yesu ba mafumbi apusana-pusana. Nangwa kya kuba baana ba bwanga bamo bakulumpe mu myaka, bino ke “baana ba bacheche” kwi Yesu mambo baswa kufunda kwi aye. (Mat. 18:3) Kabiji nangwa kya kuba bafuma mu mapunzha ne bisho byapusana-pusana, kabiji baji na byubilo byapusana-pusana, bino bonse bamwitabila Kilishitu. Kabiji Kilishitu wibatemwa bingi.—Mat. 18:6; Yoa. 1:12.

5. Yehoba umvwa byepi inge muntu watuntwisha nangwa wauba byatama bantu banji?

⁵ Bantu bonse “baji nobe baana ba bacheche” banema kwi Yehoba. Pa kuba’mba tuyuke Lesa byo ebatemwa, langulukai pa byo twatemwa baana. Baana banema bingi kwi atweba. Tukebesha kwibazhikijila mambo twayuka’mba kechi baji na bulume ne, kechi bayuka byavula ne, kabiji kechi baji maana a kwibakwasha kufuukula bintu nobe bakulumpe ne. Tumvwa kutama inge twamona muntu na kuba byatama muntu mukwabo, bino kikilamo kukola ku muchima kumona muntu na kumanyika mwana wa mucheche. Byo byumvwa ne Yehoba. Ukeba kwituzhikijila kabiji kimukola ku muchima inge muntu watuntwisha nangwa wauba byatama bantu banji.—Isa. 63:9; Mako 9:42.

6. Kwesakana na byaamba 1 Kolinda 1:26-29, bantu mu ntanda bamona byepi baana ba bwanga ba kwa Yesu?

⁶ Mu ñanyi jishinda jikwabo baana ba bwanga ba kwa Yesu mo baikela “baana ba bacheche”? Bantu ba mutundu ka bo banemeka ku bantu mu ino ntanda? Banonshi, bantu baya nkuwa ne baji bingi na bulume. Bino baana ba bwanga ba kwa Yesu kechi byo byo baji ne. Bantu bebamona’mba kafwako byo baji ne. (Tangai 1 Kolinda 1:26-29.) Bino Yehoba wibanemeka bingi.

7. Yehoba ukeba’mba tumonenga byepi balongo ne banyenga?

⁷ Yehoba watemwa bingi bakalume banji bonse, bamwingijila pa myaka yavula nangwa ba katataka mu bukine. Balongo ne banyenga yetu bonse banema kwi Yehoba, ne atweba twafwainwa kwibanemeka. Twafwainwa ‘kutemwa balongo bonse mwaya ntanda’ kechi kutemwakotu bamo ne. (1 Pe. 2:17) Twafwainwa kwibazhikijilanga ne kwibata muchima. Inge twayuka’mba twibafichisha ku muchima, kechi twafwainwa kulubakotu ne kwamba’mba batemwatu kuzhingila bukiji ne. Ki ka kyakonsha kulengela bamo kuzhingila? Kampe na mambo a nkomeno yabo, balongo ne banyenga bamo balanguluka’mba kechi banema ne. Bakwabo ba katataka mu bukine, kechi bayuka’mba bafwainwa kulekelako bakwabo mambo inge bebalubankanya ne. Monse mo kyakonsha kwikela, twafwainwa kwibikako kubwezha mutende. Kunungapo, umvwe muntu watemwa kuzhingila bukiji, wafwainwa kuyuka’mba ke muteeto watama ne kumona’mba wamuleka. Umvwe wauba bino, ukekala na lusekelo ne kwikala na bulunda bwawama na bakwabo.

8. Yesu byo ajinga pano pa ntanda, ñanyi byubilo byajinga na bantu byasambukijile ne baana banji ba bwanga?

⁸ Ki ka kyalengejile Yesu kwamba pa “bantu baji nobe baana ba bacheche”? Baana banji ba bwanga bamwipwizhe’mba: “Ñanyi mukulumpe mu Bufumu bwa mwiulu?” (Mat. 18:1) Bayudea bavula bajingako pa kyo kya kimye, batemenwe bingi bifulo. Shayuka umo waambile’mba: “Banabalume bamonanga’mba kutambula munema ne kuya nkuwa kyajinga kintu kyanema bingi.”

9. Baana ba bwanga ba kwa Yesu bafwainwe kuba byepi?

⁹ Yesu wayukile’mba baana banji ba bwanga  bafwainwe kwingila na ngovu pa kuba’mba baleke kwikala na muchima wa kukeba bifulo wajingapo na Bayudea. Wibabuujile’mba: “Yense mukulumpe mwi anweba ekale nobe mwanyike, ne yense ubena kutangijila ekale nobe wa mwingilo.” (Luka 22:26) Twikala “nobe mwanyike” inge ‘ke tulanguluke’mba bakwetu betukila.’ (Fili. 2:3) Umvwe ke tulanguluke bino, kechi tukatuntwishanga bakwetu ne.

10. Ñanyi lujimuno lwapaine Paulo lo twafwainwa kulondelanga?

¹⁰ Balongo ne banyenga bonse betukila mu bintu bimo. Twakonsha kuyuka bino umvwe twata muchima pa byubilo byabo byawama. Twafwainwa kulondelanga lujimuno lwapaine mutumwa Paulo ku bena Kolinda lwa kuba’mba: “Ñanyi wimulengela kwimona’mba mwakila bakwenu? Kabiji ñanyi kintu kyo muji nakyo kyo mwabujile kutambula? Umvwe mwikitambwile, pano mambo ka o mwitotela uba nobe kechi mwikitambwile ne?” (1 Ko. 4:7) Twafwainwa kuchinuzhuka muchima wa kukeba kutumbalala nangwa kulanguluka’mba twanema kukila bakwetu. Umvwe mulongo wamba majashi bulongo nangwa nyenga wayuka kufunjisha bantu Baibolo, bonse babiji bafwainwa kupana munema kwi Yehoba pa byo babena kwingila.

11. Ñanyi kishinka Yesu kyo etufunjishenga byo aambile kishimpi kya mfumu ne muzha wanji?

¹¹ Yesu byo apwishishetu kujimunako baana banji ba bwanga pa kubula kutuntwisha bakwabo, waambile kishimpi kya mfumu ne muzha wanji. Mfumu walekejileko muzha nkongole ikatampe yo akankelwe kupana. Palutwe kacheche, uno muzha wakaine kulekelako mukwabo muzha wajinga na nkongole yanji icheche. Kino kyalengejile mfumu kutaya pa kazhima uno muzha wabujile lusa. Tubena kufunjilako ka? Yesu waambile’mba: “Batata ba mwiulu byo byo bakemuba ne anweba, inge mwabula kulekelako mambo balongo benu na muchima wenu yense.”—Mat. 18:21-35.

12. Umvwe twakana kulekelako bakwetu mambo, ki ka kyakonsha kufumamo?

¹² Byubilo byamwesheshe muzha byakozhezhe bakwabo ku muchima kabiji ne aye mwine byamubikile mu lukatazho. Kitanshi, wakozhezhe bazha bakwabo ku muchima pa “kukashisha mukwabo mu kaleya amba kanatu akabwezhe nkongole yo ajinga nayo.” Kya bubiji, wakozhezhe ku muchima bakwabo bazha bamweneko kyo aubile. “Bazha bakwabo byo bamwene kyo aubile, baubile bingi bulanda.” Ne atweba byubilo byetu byakonsha kukozha bakwetu ku muchima. Umvwe muntu witulubankanya kabiji twakana kumulekelako mambo, ki ka kyakonsha kufumamo? Kitanshi, twakonsha kumukozha ku muchima umvwe twakana ku mulekelako mambo, kampe ne kuleka kwisamba nanji ne kumumwesha butemwe. Kya bubiji, tulengela bakwetu mu kipwilo kumvwa kutama pa kumona’mba kechi twapwana na yeo muntu ne.

13. Mubena kufunjilako ka ku kyapichilemo painiya umo?

¹³ Umvwe twalekelako mambo balongo ne banyenga, tumwenamo byawama atweba bene, kabiji bakwetu nabo bamwenamo. Abino byo byaubile painiya wa jizhina ja Crystal. Bamufichishe ku muchima ku nyenga mukwabo mu kipwilo. Nyenga Crystal waambile’mba: “Byambo byaambanga uno nyenga kimye kimo byaumvwanyikangatu nobe mupenyi wa kuchiba. Kabiji kechi nakebanga kwingijila pamo na uno nyenga mu mwingilo ne. Kizaku kya kwingila mwingilo ne lusekelo byatendekele kupwa.” Nyenga Crystal walangulukilenga’mba kyajingatu bulongo kuzhingila. Bino kechi watwajijile kuzhingijila nyenga mukwabo, nangwa kwitatu muchima aye mwine ne. Walondejile lujimuno lwa mu Baibolo luji mu kibaaba kya kuba’mba, “Lekelaingako Bakwenu Mambo na Muchima Wenu Yense,” kiji mu Kyamba kya Usopa kya Kizungu kya October 15, 1999. Walekejileko  mambo uno nyenga. Nyenga Crystal waambile’mba: “Pano nayuka namba atweba bonse tubena kwibikako kuvwala bumuntu bupya, kabiji Yehoba witulekelako mambo etu pa juba pa juba kyatutu. Mbena kumvwatu nobe bafumyapo kipe kyanema pa bipuzhi byami. Luno nji bingi na lusekelo.”

14. Kwesakana na byaamba Mateo 18:21, 22, ñanyi lukatazho lwajinga na mutumwa Petelo, kabiji tubena kufunjilako ka ku byakumbwile Yesu?

¹⁴ Twayuka’mba twafwainwa kulekelako bakwetu mambo, mambo kyo kintu kyawama kuba. Pano bino, kyakonsha kwitukatazha kuba bino. Lo lukatazho lwajingapo ne na mutumwa Petelo. (Tangai Mateo 18:21, 22.) Ki ka kyakonsha kwitukwasha? Patanshi, langulukai pe Yehoba byo emulekelako mambo anweba. (Mat. 18:32, 33) Kechi twafikilamo kwitulekelako mambo ne, pano bino, witulekelako mambo etu kyatutu. (Sala. 103:8-10) Kabiji “ne atweba twafwainwa kwitemwa atwe bene na bene.” Onkao mambo, kulekelako mambo bakwetu kechi kya kwifuukwilapo ne, bino ke mukambizho. Ke mutembo wetu wa kulekelako mambo balongo ne banyenga. (1 Yoa. 4:11) Kya bubiji, langulukai pa kyakonsha kumweka inge twalekelako bakwenu mambo. Twakonsha kukwasha muntu witulubankenye, kulengela kipwilo kukwatankana, kuzhikijila bulunda bwetu ne Yehoba, kabiji tukakasuluka. (2 Ko. 2:7; Kolo. 3:14) Kyapelako, lombai ku Mwine witukambizha kulekelako bakwetu mambo. Kange muswishe Satana kulubankanya mutende ye mubena kwiyowa na bapopweshi bakwenu ne. (Efi. 4:26, 27) Twafwainwa kulomba bukwasho bwa Yehoba pa kuba’mba tubule kufwa mu kakose ka kwa Satana.

15. Kwesakana na byaamba Kolose 3:13, twakonsha kuba byepi inge mulongo nangwa nyenga wauba kintu kitufichisha ku muchima?

¹⁵ Mwakonsha kuba byepi umvwe mukwenu mwina Kilishitu wauba kintu kimufichisha ku  muchima? Ingilai papelela bulume bwenu kubwezha mutende. Buulai Yehoba byo mubena kumvwa ku muchima. Lombai kuba’mba Lesa akwashe muntu wimufichisha ku muchima ne kwimukwasha anweba kumona byubilo byawama biji na yeo muntu byalengela Yehoba kumutemwa. (Luka 6:28) Inge mwakankalwa kulubako ku kimubile mulongo wenu, langulukaipo jishinda jawama ja kwisambilamo nanji. Kyawama kuyuka’mba mulongo kechi waubijilemotu kuba’mba emukozhe ku muchima ne. (Mat. 5:23, 24; 1 Ko. 13:7) Kimye kyo mubena kwisamba nanji, yukai kuba’mba wimutemwa. Pano mwakonsha kuba byepi inge wakana kupwana? Twajijilai ‘kumutekenya,’ kange mukooke ne. (Tangai Kolose 3:13.) Kyakilamo kunema, kechi mwafwainwa kutwajijila kumuzhingijila ne, mambo kuba bino kwakonsha konauna bulunda bwenu ne Yehoba. Kange muswishe kintu nangwa kimo kwimutuntwisha ne. Umvwe mwauba bino, mukamwesha’mba mwatemwa Yehoba kukila bintu bikwabo.—Sala. 119:165.

16. Ñanyi mwingilo ye tuji nanji atweba bonse?

¹⁶ Tusanta bingi pa kwingijila Yehoba saka twakwatankana byo tuji “jitanga jimo” jo batangijila ku “kafunga umo.” (Yoa. 10:16) Buku wa kuba’mba Bakwatankana Kuba Kyaswa Muchima wa Yehoba, pa jipa 165, paamba’mba: “Pa kuba’mba mumwenemo mu kuno kukwatankana ne anweba muji na mwingilo wa kwikulamawizha.” Onkao mambo, twafwainwa kwifunjisha “atweba bene kumona balongo ne banyenga yetu byonka Yehoba byo ebamona.” Kwi Yehoba, atweba bonse twanema mambo twi “baana ba bacheche.” Nanchi byo byo mumona balongo ne banyenga yenu nyi? Yehoba umona kabiji wanemeka byonse byo muba pa kwibakwasha ne byo mwibata muchima.—Mat. 10:42.

17. Mwafuukulapo kuba byepi?

¹⁷ Twatemwa bapopweshi bakwetu. Onkao mambo, twayai tutwajijile “kubula kubika kya kwituntulako nangwa mukiika ku mulongo wetu.” (Loma 14:13) Tumona balongo ne banyenga amba betukila, kabiji tukeba kwibalekelako mambo na muchima yense. Kange twituntulenga na mambo a byuba bakwetu ne. Bino “twayai tubenga bintu bileta mutende ne bintu bya kwikomesha atwe bene na bene.”—Loma 14:19.