1, 2. (a) Elifwaza ne Bilidada baambile’mba Lesa umona byepi mingilo yo tumwingijila? (b) Yehoba waambilepo amba ka pa kino?

ELIFWAZA waipwizhe’mba: “Nanchi Lesa wakonsha kwingijisha muntu nyi? Nanchi Lesa wakonsha kumwenamo mu muntu uji na milangwe nyi? Nanchi wa Bulume Bonse utako muchima na mambo a kuba’mba obewa waoloka nyi? Nangwa umwenamo kintu na mambo a kuba’mba wi wa kishinka nyi?” (Yoba 22:1-3) Nanchi mwakilangulukapo kala pa mikumbu ya ano mepuzho nyi? Kimye Elifwaza mwina Temanyi kyo aipwizhe Yoba ano mepuzho, walangulukile’mba mukumbu wa ano mepuzho ke wa kuba’mba ine. Mulunda nanji, Bilidada mwina Shua aye waambile ne kuba’mba muntu kechi wakonsha kwikala waoloka ku meso a Lesa ne.—Tangai Yoba 25:4.

² Bano balunda nanji ba bubela baambilenga’mba Yehoba umona kuba’mba kwipana kwetu kumwingijila mu bukishinka ke kwatutu, amba witumonatu nobe kipuupulwa, jipila, nangwa nobe muzambo. (Yoba 4:19; 25:6) Nanchi Elifwaza ne Bilidada baambile bino na mambo a kuba’mba bepelwile nyi? (Yoba 22:29) Umvwe tuji peulu ya mutumba walepa nangwa mu ndeke, bantu baji panshi bamweka kukepa bingi, kabiji nobe kechi banema ne. Nanchi abino Yehoba byo  byo amona mingilo yo twingila mu kutundaika Bufumu inge watala pano pa ntanda nyi? Yehoba walumbulwile byo amona bantu kimye kyo akajipijile Elifwaza, Bilidada, ne Zofwala na mambo a kwamba bya bubela pe aye, bino watemenwe Yoba ne kumutela’mba “kalume wami.” (Yoba 42:7, 8) Onkao mambo, twafwainwa kushiinwa kuba’mba “Lesa wakonsha kwingijisha muntu.”

3. Elihu waambilepo’mba ka pa byo twingijila Yehoba, kabiji watazhizhe mwepi?

³ Elihu waipwizhe’mba: “Umvwe mwaoloka, ñanyi kintu kyo mumupa [Lesa]; ñanyi kintu kyo atambula kwi anweba?” (Yoba 35:7) Yehoba kechi wamukajipijile pa kwipuzha bino ne. Nanchi Elihu waambilenga’mba mingilo yo twingijila Lesa yatutu nyi? Ine. Waambilenga’mba Yehoba kechi witukanjikizha kumupopwela ne, uji na byonse byo akeba. Kechi twakonsha kumunonkesha nangwa kumulengela kukosa ne. Bino kishinka ke kya kuba’mba bintu byonse byawama byo tuji nabyo, bya bupe nangwa bulume, byonse bifuma kwi Lesa, kabiji umona byo twibingijisha.

4. Yehoba umona byepi bintu byawama byo tubila bakwetu?

⁴ Inge twamwesha butemwe ku bakalume banji, Yehoba umonatu nobe ye ye twaubila bino. Byambo bya Maana 19:17 byaamba’mba: “Awa ubila byawama mulanda ukongwesha Yehoba, ne aye ukamufweta pa bintu byo oba.” Nanchi kino kinembelo kibena kumwesha’mba Yehoba umona byonse byawama byo tubila bantu bakajilwa nyi? Nanchi twakonsha kwamba’mba Mulenga walengele bintu byonse umona kuba’mba byonse byawama byo tubila bantu biji nobe nkongole yo tumukongwesha kabiji witubwezhezha ne kwitubila bibusa nyi? Ee. Mwananji aye Yesu wamwesheshe’mba kino kya kine.—Tangai Luka 14:13, 14.

5. Ñanyi mepuzho o tusakwisambapo?

⁵ Yehoba watumine ngauzhi Isaya kuya na kumwambilako ne kumwesha byo omvwa bulongo inge bantu ba kishinka batwajijila kuba kyaswa muchima wanji. (Isa. 6:8-10) Isaya wipaine kwingila uno mwingilo. Lelo jino, bantu bavula bingi babena kumwesha muchima wajingapo ne Isaya wa kuba’mba “Amiwa bano! Ntumai!” kupichila mu kuswa kwingila mingilo ikatampe mu mwingilo wa Yehoba. Pano bino, muntu wakonsha kwamba’mba: ‘Namusanchila Yehoba pa kunswisha kwingilako mwingilo wanji, bino nanchi mingilo yo ñingila yanema nyi? Nangwatu inge kya kuba’mba amiwa kechi nepana kwingilako ne, nanchi Yehoba kechi uji na bulume bwa kumona kuba’mba mwingilo wanji waingijiwa nenyi?’ Twayai tumone bintu byapichilemo Debola ne Balaka byo byakumbula ano mepuzho.

6. Ñanyi lupusano lwajinga pa bangikazhi ba mu Isalela ne nzhita ya kwa Yabina?

⁶ Yabina mfumu wa Kenana ‘wamanyikile bingi’ bena Isalela pa myaka 20. Bantu mu mizhi baumvwinenga bingi moyo kya kuba kechi bapitañenenga mu mikwakwa ne. Bamwene kuba’mba kechi bafikijilemo kulwa nkondo ne, mambo balangulukilenga’mba kechi baji na bilwilo byavula nangwa makebo a kwizhikijilako ne, pakuba balwanyi babo bajinga na makalaki a nkondo 900 ajinga na bikwakwa bya kyela kya kapotwe.—Mito. 4:1-3, 13; 5:6-8. *

7, 8. (a) Ñanyi mikambizho Yehoba yo apele Balaka? (b) Bena Isalela bashinjile byepi nzhita ya kwa Yabina? (Monai kipikichala kitanshi.)

⁷ Nangwa byonkabyo, Yehoba watumine Debola ngauzhi wamukazhi kuya na kukambizha  Balaka amba: “Yanga ku Mutumba wa Tabola usende banabalume 10,000 ba mu mukoka wa bena Nafitali ne wa bena Zebuluna. Amiwa nkamuleta Sisela kwi obewa, yenka mukulumpe wa nzhita ya kwa Yabina, pamo na makalaki anji a nkondo ne nzhita yanji ku kakola ka Kishonyi, kabiji nkamupana mu kuboko kobe.”—Mito. 4:4-7.

⁸ Basampenye ino mbila, kabiji bantu bepaine bakonkene ku Mutumba wa Tabola. Balaka wakookejile mikambizho ya Yehoba. (Tangai Mitonyi 4:14-16.) Kimye kyo balwilenga nkondo mu Taanaka, kwanokele mvula mukatampe walengejile mpunzha yonse kwikala ke mateshitu. Balaka wapupijile nzhita ya kwa Sisela kufika ne ku Halosheta, kwalepele makilomita 24. Byo banyemenenga, Sisela washile kalaki wanji wa nkondo watapamine mu mateshi ne kunyemena ku Zaananimi, kampe kwipi na Kedeshi. Wayile na kufyama mu tente wa kwa Yaela muka Hebela mwina Keni, kabiji bamutambwijile bulongo kwi Yaela. Na mambo a kukooka, Sisela waponejile mu tulo. Yaela kechi waubile moyo ne, onkao mambo waipayile Sisela. (Mito. 4:17-21) Mulwanyi wa bena Isalela bamushinjile. *

9. Ñanyi bishinka biji mu Mitonyi 5:20, 21 byaamba pa nkondo ya bena Isalela ne Sisela?

⁹ Twafwainwa kufunjila pamo bitango 4 ne 5 biji mu buku wa Mitonyi, mambo kitango 4 kyaamba bishinka byabula mu kitango 5. Kabiji mu kitango 5 muji bishinka byabula mu kitango 4. Pa Mitonyi 5:20, 21 paamba’mba: “Tubangabanga mwiulu twalwile; monka mu mashinda ato mo mo twalwijile ne Sisela. Kakola ka Kishonyi kebakumpwile.” Nanchi kino kibena kwamba pa bukwasho bwa bamalaika nyi, inyi mabwe a mu lwelele atebaukilenga? Jishimikila kechi jaambapo byavula ne. Bino kwa kubula bukwasho bwa Lesa, ñanyi ye twakonsha kwamba’mba ye wanokeshe mvula mukatampe pa kimye ne mpunzha po balwijilenga nkondo walengejile makalaki a nkondo 900 kutapama? Mitonyi 4:14, 15 waamba bimye bisatu amba Yehoba ye wibalengejile kushinda. Kafwako nangwa umo pa bena Isalela 10,000 bepaine kuya ku nkondo wakonsheshe kwitota’mba ye waletele luno lupulukilo ne.

10, 11. “Melozi” ye mu ka, kabiji mambo ka o bamufingijile?

¹⁰ Kimye bena Isalela kyo bashinjile nkondo, Debola ne Balaka baimbile lwimbo wa lushinjilo ne kutota Yehoba pa kwibakwasha kushinda mu jishinda ja kukumya. Baimbile’mba: “Malaika wa Yehoba waambile’mba, ‘Mufingai Melozi, Fingai bangikazhi banji, mambo kechi baishile na kukwasha Yehoba ne, kechi baishile na kukwasha Yehoba pamo na ba biyangala ne.’”—Mito. 5:23.

¹¹ Melozi bamufingile kya kuba kyakatazha ne kuyuka bulongo byo ajinga. Kampe wajinga muzhi mwajinga bangikazhi bakaine kwipana kwingijila pamo ne Balaka mu nkondo. Kyamweka mu uno muzhi mo mwapichile Sisela pa kunyema, kabiji bangikazhi kechi bamukwachile ne. Ki ka kibalengejile kubula kukookela mukambizho wa Yehoba? Bantu 10,000 ba mu kino kibunji bakonkene pamo ne kuya na kulwa nkondo. Fwanyikizhai’mba bantu ba mu muzhi wa Melozi bamona uno ntangi wa nzhita byo anyemenenga kupita mu muzhi wabo na kukeba kwa kufyama. Bafwainwe kubapo kimo mu kutundaika kyaswa muchima wa Yehoba pa kuba’mba ebapeshe. Pa kyokya kimye kyakatezhe, abo bafwainwe kubapo kimo, pano bino, kafwako kyo baubile ne. Kya kine, bantu mu muzhi wa Melozi bapuseneko bingi ne Yaela wabujile moyo byonka byaamba byepelo byalondelapo.—Mito. 5:24-27.

12. Ñanyi lupusano lwajinga na bantu batongolwa pa Mitonyi 5:9, 10, kabiji kino kitutundaika kuba byepi lelo jino?

 ¹² Pa Mitonyi 5:9, 10 tutaanapo lupusano lwajinga pa bantu bavula bayile ne Balaka ku nkondo ne boba bakaine. Debola ne Balaka batakaikile “bakulumpe ba nzhita ba bena Isalela, bonka bepaine kuya na bantu.” Bapuseneko bingi na boba ‘baendanga pa bambongolo batokoloka’ bakaine kwipana na mambo a bwitote, ne boba ‘baikelenga pa mikeka yawama, ne baendelenga mu mikwakwa.’ Basajilepo kwikala bwikalo bwawama kukila kwipana kuya ne Balaka na kulwa nkondo mu binkunenke mwajinga mabwe ku Mutumba wa Tabola ne mu kiselebwa kya Kishonyi. Bano bonse bakebelenga kwiyowa bwikalo bebatundaikile ‘kulangulukapo pa kino!’ Kya kine, bafwainwe kulangulukapo pa kukana kuba kyaswa muchima wa Yehoba. Onkao mambo, bonse bakankazhama kwingijila Lesa na muchima yense lelo jino bafwainwa kulangulukapo.

13. Byubilo bya bantu ba mu mikoka ya bena Lubenyi, Danyi, ne Ashela, byapusene byepi na byajinga na ba mu mikoka ya bena Zebuluna ne Nafitali?

¹³ Aba bepaine, bemwenejile Yehoba byo atumbijikile bumfumu bwanji. Bemwenejile kintu kya kulangulukapo kimye kyo “baambilenga pa mingilo ya Yehoba yaoloka.” (Mito. 5:11) Pano bino, ba mu mukoka wa bena Lubenyi, mukoka wa bena Danyi, ne mu mukoka wa bena Ashela bebambapo pa Mitonyi 5:15-17 amba batele muchima ku bintu byabo, nabiji kulama matanga a mikooko, maato, kwikala ku kitulu kya kalunga ka mema, ne ku kiito, kukila kwingila mwingilo wa Yehoba. Pakuba ba mu mukoka wa bena Zebuluna ne ba mu mukoka wa bena Nafitali “babikile bumi bwabo mu kizumba” kuyila pamo ne Debola ne Balaka ku nkondo. (Mito. 5:18) Tufunjilako kintu kyanema bingi ku lupusano lwajinga pa bantu bepaine kwingila mwingilo wa Lesa ne boba babujile kwipana.

14. Tumwesha byepi amba tubena kutundaika bumfumu bwa Yehoba lelo jino?

¹⁴ Lelo jino, kechi betwita kuya na kulwa nkondo ne, bino twafwainwa kwingila mwingilo wa kusapwila kwa kubula moyo. Kubena kukebewa bantu bavula ba kwipana kwingila uno mwingilo. Balongo ne banyenga, ne banyike bavula  bingi babena kwipana kwingila mingilo yapusana, nabiji bupainiya, kwingijila pa Betele, kushimika Mazubo a Bufumu, ne kwingilako mingilo yapusana pusana pa kubuñana ne pa kushonkena. Kabiji akilangulukai pa bakulumpe mu kipwilo bengila mingilo yanema bingi baji mu Tuvoto twa Bambañana na ba Mingilo mu Bipatela, ne banengezha kushonkena. Yukai’mba Yehoba wimusanchila bingi pa kwipana kwenu kabiji kechi ukavulama mingilo yenu ne.—Hebe. 6:10.

15. Twakonsha kuba byepi pa kuba’mba twingilenga mwingilo wa Yehoba na muchima yense?

¹⁵ Atweba bonse pa muntu pa muntu twafwainwa kwishikisha’mba: ‘Nanchi ndekela bakwetu mingilo yabaya nyi? Nanchi natesha muchima ku bintu byami kya kuba bindengela kukankalwa kwipana kwingila mwingilo wa Lesa bulongo nyi? Nanchi nji na lwitabilo lwakosa lwa kwingila mwingilo wa Yehoba byonka byaubile Balaka, Debola, Yaela, ne bantu 10,000 bepaine kwingila mwingilo wa Lesa nyi? Inge mbena kulanguluka pa kuvilukila mu muzhi mukwabo nangwa kyalo kikwabo na kukeba bunonshi, nanchi ndombapo ne kulanguluka pa kisemi kyami byo kikashala ne kipwilo byo kikekala inge naviluka nyi?’ *

16. Nangwa kya kuba Yehoba ye mwina byonse, bino ñanyi kintu kyo twakonsha kumupa?

¹⁶ Yehoba witunemeka bingi pa kwituswisha kwingilako mwingilo wa kutundaika bumfumu bwanji. Na mambo a kuba’mba Diabola patanshi wajimbaikile bantu kutundaika bufumu bwanji bwa bunsatuki, inge ke mutundaike bukalama bwa Yehoba mumwesha’mba Satana wa bubela. Lwitabilo lwenu ne bukishinka bimulengela kwikala na muchima wa kwipana bisangajika muchima wa Yehoba. (Maana 23:15, 16) Bukishinka bwetu ne lukookelo bilengela Lesa kukumbula myendeleko ya kwa Satana. (Maana 27:11) Onkao mambo, inge mwaikala ba kishinka kwi Yehoba ne kumukookela, ko kuba’mba mubena kumupa kintu kyanema bingi mo amwena lusekelo.

17. Kinembelo kya Mitonyi 5:31 kitufunjishapo ka pa bikamweka kulutwe?

¹⁷ Katataka pa ntanda pakayule bantu basalapo kutundaika bumfumu bwa Yehoba kukila bintu bikwabo. Tubena kutengela bingi kyokya kimye. Tukemba byonka byaimbile Debola ne Balaka amba: “Anweba Yehoba, balwanyi benu bonse bonaike, bino aba bemutemwa bekale nobe juba jisela na lukumo lwajo.” (Mito. 5:31) Uno musashijilo ukakumbulwa kimye Yehoba kyo akaleta mpelo ya ino ntanda yatama ya kwa Satana. Inge nkondo ya Amagedonyi yatatula, kechi kukebewanga bantu ba kwipana kulwa na mulwanyi wa Yehoba ne. Kino kikekala kimye kya ‘kwimanatu, ne kumona Yehoba byo aketupulusha.’ (2 Moba 20:17) Pa kino kimye, twayai tutwajijile kutundaika bukalama bwa Yehoba na kizaku ne mukoyo.

18. Kwipana kwenu kwingila mwingilo wa Lesa kutundaika byepi bakwenu?

¹⁸ Debola ne Balaka batendekele lwimbo wa lushinjilo na byambo bya kutota Mwine Wakila, kechi bantu ne. Baimbile’mba: “Na mambo a kuba bantu bepaine kuya na kulwa nkondo, totai Yehoba!” (Mito. 5:1, 2) Ne lelo jino, monainga kuba’mba muchima wenu wa kwipana ubena kutundaika bonse ‘kutota Yehoba!’