1, 2. (a) Ñanyi nshiji yo bamubile Nabota ne baana banji? (b) Ñanyi byubilo bibiji byo tusakwisambapo mu uno mutwe?

MWANAMULUME umo bamubepejile’mba walenga mambo akatampe. Banabalume babiji bayukanyikilwe mu kimasamasa amba babula maana baishile na kumushinawina bya bubela pa kuba’mba bamuzhachishe. Byo bamuzhachishe ne kumufwisha na mambo, bamwipayijile pamo na baana banji. Bantu batemwa bunchibamambo bwaoloka baumvwine bingi bulanda pa kumona muntu wabula mambo byo bamwipayile kya nshiji. Bino byo bintu byamwekejile kalume wa Yehoba wa kishinka aye Nabota, wajingako mu moba a Mfumu Ahaba wa mu Isalela.—1 Mfu. 21:11-13; 2 Mfu. 9:26.

² Mu uno mutwe, tusakwisamba pa byamwekejile Nabota, ne byamwekejile mukulumpe mu kipwilo wa kishinka wajingako kala mu moba a batumwa wabujile kufuukula bulongo bintu pa kimye kimo. Byo tusakwisambanga pa bano bantu banembwa mu Baibolo, tusakufunda kuba’mba kyanema bingi kwipelula pa kuba’mba  tumonenga bunchibamambo bwaoloka byonka Yehoba byo ebumona. Tusakufunda ne kwilekelako mambo byo kwakonsha kwitukwasha kumona bintu monka mwibimwena Yehoba inge twamona bamo mu kipwilo bauba nshiji.

3, 4. Nabota wajinga na byubilo bya mutundu ka, kabiji mambo ka o akaine kupotesha bujimi bwanji bwa miñanzañanza ku Mfumu Ahaba?

³ Nabota watwajijile kwikala wa kishinka kwi Yehoba kimye bena Isalela bavula kyo balondejilenga byubilo byatama bya Mfumu Ahaba ne mukazhanji aye Yezebeli. Bano bantu bapopwelanga Baela kechi baakamwanga Yehoba nangwa mizhilo yanji ne. Pakuba Nabota aye wanemekele bingi bulunda bwanji na Yehoba kya kuba wafwijilepo ne kufwilapo.

⁴ Tangai 1 Bamfumu 21:1-3. Ahaba byo akebele kupota bujimi bwa miñanzañanza bwa kwa Nabota, Nabota wakaine. Mambo ka? Nabota wabuujile Ahaba amba: “Kwesakana na Yehoba byo amona bintu, kechi kyawama kuba’mba nemupe buswanyi bwa bashakulu bami ne.” Nabota wakaine mambo wanemekele muzhilo wa Yehoba wakainye bena Isalela kupotesha mpunzha ya buswanyi bwa mukoka wa bashakulu babo. (Levi 25:23; Bala. 36:7) Kino kyamweshatu’mba Nabota wanemekele Mizhilo ya Yehoba.

5. Yezebeli waubile byepi pa kuba’mba angate bujimi bwa kwa Nabota?

⁵ Pano bino, Nabota byo akaine kupotesha bujimi bwanji, Mfumu Ahaba ne mukazhanji aye Yezebeli bamubile bintu byatama bingi. Yezebeli wakebeshe bingi kwangata bujimi bwa kwa Nabota, onkao mambo wanengezhezhe banabalume babiji kuba’mba babepele Nabota amba walenga mambo akatampe. Kino kyo kyalengejile Nabota kumwipayila pamo na baana banji. Nga Yehoba waubilepo byepi pa ino nshiji?

6, 7. Yehoba wamwesheshe byepi amba watemwa bunchibamambo bwaoloka, kabiji kino kyatekeneshe byepi balongo ne balunda ba kwa Nabota?

⁶ Pa kyonkakya kimye, Yehoba watumine Elaija kuya kwi Ahaba. Elaija wanenene Ahaba pa mambo a kwipayañana ne bwivi. Nga Yehoba wachibile byepi ano mambo? Wachibile’mba Ahaba, mukazhanji ne baana banji babalume bakamona bya malwa ne kufwa byonka byafwile Nabota ne baana banji.—1 Mfu. 21:17-25.

⁷ Nangwa kya kuba balongo bwa kwa Nabota ne balunda nanji bajinga bingi na bulanda pa nshiji yaubile Ahaba, kibatekeneshe bingi kuyuka’mba Yehoba wayukile byonse byamwekele kabiji wachibijile Ahaba mambo. Pano bino, bintu byalondejilepo byafwainwa byaesekele bingi luketekelo lwabo mwi Yehoba ne kwipelula kwabo.

8. Ahaba waubile byepi byo bamubuujile lukabisho lwa Yehoba, kabiji ki ka kyafuminemo?

⁸ Ahaba byo bamubuujile lukabisho lwa Yehoba, “watabwile bivwalo byanji ne kwinyinga kisapi kya majila; kabiji wazhikilwenga na nzala ne kulaala na bisapi bya majila ne kwenda saka apopomenwa.” Ahaba wipelwile. Ki ka kyafuminemo? Yehoba waambijile Elaija amba: “Na mambo a kuba’mba wipelula kwi amiwa, kechi nkaleta bya malwa mu moba a bumi bwanji ne. Nkaleta bya malwa pa ba mu nzubo yanji mu moba a mwananji.” (1 Mfu. 21:27-29; 2 Mfu. 10:10, 11, 17) Yehoba, aye “utalatala mu michima” waubijile Ahaba lusa.—Maana 17:3.

9. Kwipelula kwakonsheshe kukwasha byepi balongo ba kwa Nabota ne balunda nanji?

⁹ Nga bantu bayukile bintu byatama byaubile Ahaba baumvwine byepi? Kino kyafwainwa kyaesekele bingi lwitabilo lwa balongo ba kwa Nabota ne balunda nanji. Umvwe baumvwine bibi, ko kuba’mba bafwainwe kwipelula bingi pa  kuba’mba batwajijile kupopwela Yehoba mu bukishinka ne kuketekela’mba Lesa wabo kechi uba nshiji ne. (Tangai Mpitulukilo ya mu Mizhilo 32:3, 4.) Nabota ne baana banji ne bisemi byabo bonse bakekala bingi na lusekelo kimye Yehoba kyo akasangula bantu baoloka. (Yoba 14:14, 15; Yoa. 5:28, 29) Kunungapo, muntu wipelula uvuluka’mba “Lesa wa kine ukachibila bantu mambo pa bintu byonse byo boba ne pa bintu byonse byafyamika, ne kumona inge byawama nangwa byatama.” (Sapwi. 12:14) Kine, Yehoba inge ubena kuchiba mambo, utala pa bishinka byonse, ne byo twabula kuyuka atweba. Onkao mambo, kwipelula kwitukwasha kutwajijila kuketekela mwi Yehoba.

10, 11. (a) Ñanyi bintu byakonsha kweseka lwitabilo lwetu? (b) Kwipelula kwakonsha kwituzhikijila byepi?

¹⁰ Mwakonsha kuba byepi inge kechi mwaumvwisha byafuukulapo bakulumpe mu kipwilo ne, nangwa inge mwamona’mba kechi byawama ne? Twambe’mba anweba nangwa muntu ye mwatemwa bamwangata mingilo imo mu kipwilo. Nangwa kampe benakwenu, mwanenu, nangwa mulunda nenu bamupanga mu kipwilo, bino mwalanguluka’mba bakulumpe kechi bafuukula bulongo ne. Mwakonsha kuba byepi? Kabiji mwakonsha kuba byepi inge mwalanguluka’mba muntu ye balekelako mambo bafwainwe kumupanga mu kipwilo? Abino byonse byakonsha kweseka lwitabilo lwenu mwi Yehoba ne  mu jibumba janji. Kwipelula kwakonsha kwimuzhikijila byepi inge mwaesekwa mu bino bintu? Twayai twisambe pa mashinda abiji.

¹¹ Kitanshi, kwipelula kuketukwasha kuswa kuba’mba javula kechi twikala na bishinka byonse ne. Kabiji nangwa tuyuke byavula byepi pa kyamwekele, bino Yehoba ye yenkatu uji na bulume bwa kutala mu muchima wa muntu. (1 Sam. 16:7) Kuyuka kino kishinka kuketukwasha kwipelula ne kuyuka papelela bulume bwetu bwa kuyuka bintu, ne kupimpula ndangulukilo yetu. Kya bubiji, kwipelula kuketukwasha kutekanya ne kukookela byo tubena kupembelela kuba’mba Yehoba akengijilepo pa nshiji yo twamona. Baibolo waamba’mba: “Bantu bakamwa Lesa wa kine bakamona byawama . . . , pakuba mubi kechi ukamona byawama nangwa kwikala myaka yavula ne.” (Sapwi. 8:12, 13) Bantu bepelula bamwenamo byawama kabiji kino kikwasha bonse bavwangwamo mu oo mambo.—Tangai 1 Petelo 5:5.

12. Tusakwisamba pa ka, kabiji mambo ka?

¹² Bena Kilishitu batanshi mu Silya Antioka bapichile mu lukatazho lwakonsheshe kwibalengela kubula kwipelula ne kulekelako bakwabo mambo. Tusakwisamba pa luno lukatazho ne kumona byo twakonsha kufunjilako pa kwilekelako mambo, ne kwilekelako mambo byo kwitukwasha kumona bunchibamambo byonka Yehoba byo ebumona.

13, 14. Ñanyi mingilo yaingijile Petelo, kabiji wamwesheshe byepi kubula moyo?

¹³ Mutumwa Petelo wajinga mukulumpe mu kipwilo wayukanyikilwe bingi. Wajinga mulunda wa kwa Yesu, kabiji bamupele mingilo ikatampe bingi. (Mat. 16:19) Mu mwaka wa 36 C.E., Petelo wasapwijile mambo awama kwi Koneleusa ne ba mu nzubo yanji. Kino kechi kyapelele ne, mambo Koneleusa wajinga muntu wabujile kuya ku mukanda. Koneleusa ne kisemi kyanji byo batambwijile mupashi wazhila, Petelo waambile’mba: “Bano bantu batambula mupashi wazhila byonkatu byo twatambwile ne atweba, onkao mambo, ñanyi wakonsha kwibakanya kubatizhiwa mu mema?”—Byu. 10:47.

¹⁴ Mu 49 C.E., batumwa ne bakulumpe mu kipwilo mu Yelusalema bakonkene pamo na kwisamba inge kya kuba bantu ba mu bisaka bikwabo bafwainwe kuya ku mukanda pa kuba’mba bekale bena Kilishitu. Pa ino misambo, Petelo waambile na kuchinchika, kuvululamo balongo kuba’mba myaka ya kunyuma bantu ba mu bisaka bikwabo babujile kuya ku mukanda batambwile mupashi wazhila. Bintu byaambile Petelo byo emwenejile na meso byakwashishe jibumba jatangijilanga mu kimye kya bena Kilishitu batanshi kufuukulapo bulongo. (Byu. 15:6-11, 13, 14, 28, 29) Kyamweka bonse bena Kilishitu Bayudea ne ba mu bisaka bikwabo baumvwine bingi bulongo pa bishinka byaambile Petelo kwa kubula moyo. Kine, bamuketekejile bingi uno mwanamulume wa kishinka wakomene mu maana.—Hebe. 13:7.

15. Petelo waubile ñanyi kintu kyatama byo ajinga mu Silya Antioka? (Monai kipikichala kitanshi.)

¹⁵ Bino byo papichiletu moba acheche kufuma kimye kyo basambakene mu 49 C.E., Petelo wayile ku Silya Antioka. Byo ajinga kokwa, wapwanañenenga na balongo ba mu bisaka bikwabo. Kwa kubula nangwa kuzhinaukatu ne, bafunjijileko byavula ku bintu byayukile Petelo ne byo apichilemo. Onkao mambo, kibakolele bingi ku muchima kimye Petelo kyo alekele kujila nabo pamo kajo. Kabiji Petelo walengejile ne balongo mu kipwilo Bayudea, kubikapotu ne Banabasa kulondela byubilo byanji. Pano ki ka kyalengejile uno mukulumpe mu kipwilo kwikala na byubilo byakonsheshe kuleta mabano mu kipwilo? Kyakilamo kunema, ñanyi bintu byo twakonsha kufunjilako ku byalubankenye Petelo byakonsha  kwitukwasha inge kya kuba mukulumpe mu kipwilo witukozha ku muchima na byambo nangwa byubilo byanji?

16. Petelo bamukwashishe byepi, kabiji ñanyi mepuzho o twakonsha kwishikisha?

¹⁶ Tangai Ngalatiya 2:11-14. Petelo wafwile mu kitewa kya kuchina bantu. (Maana 29:25) Nangwa kya kuba Petelo wayukile Yehoba byo amona bantu ba mu bisaka bikwabo, bino wachiine byaambilenga Bayudea bajinga mu kipwilo mu Yelusalema. Mutumwa Paulo wamusanzhilemo Petelo kuba’mba uji na byubilo bya bukamfutumfutu. Mambo ka? Mambo Paulo wataainweko ku kusambakana kwaikejile mu Yelusalema mu 49 C.E., kabiji waumvwine Petelo byo aambijileko bena Kilishitu ba mu bisaka bikwabo. (Byu. 15:12; Nga. 2:13; tubyambo twa munshi.) Nga bena Kilishitu ba mu bisaka bikwabo bo bakozhezhe ku muchima kwi Petelo baubile byepi? Nanchi balekele kwingijila Lesa nyi? Nanchi Petelo bamwangachile mingilo yo aingilanga na mambo a byo alubankenye nyi?

17. Petelo wamwenejilemo byepi byo bamulekejileko mambo kwi Yehoba?

¹⁷ Petelo wipelwile kabiji waswile byo bamukwashishe kwi Paulo. Binembelo kechi byaambapo amba bamwangachile mingilo yanji ne. Mu kuya kwa kimye watangijilwe na mupashi kunemba makalata abiji aji mu Baibolo. Mu nkalata yanji ya bubiji, Petelo waambile pe Paulo amba “mulongo wetu ye twatemwa.” (2 Pe. 3:15) Nangwa kya kuba kubula kufuukulapo bulongo kwaubile Petelo kwakozhezhe balongo ba mu bisaka bikwabo ku muchima, bino Yesu, aye mutwe wa kipwilo watwajijile kumwingijisha. (Efi. 1:22) Onkao mambo, ba mu kipwilo bafwainwe kulondela Yesu ne Shanji kupichila mu kulekelako Petelo mambo. Kyamweka kafwako walekele kwingijila Lesa na mambo a byatamishe muntu wabula kulumbuluka ne.

18. Mu bintu bya mutundu ka mo twafwainwa kumwesha bololoke bwa Yehoba?

¹⁸ Byonkatu byo kyajinga ku bena Kilishitu batanshi, bakulumpe mu kipwilo lelo jino bonse bambulwa kulumbuluka, “mambo atweba bonse tulubankanya javula.” (Yako. 3:2; tubyambo twa munshi.) Twakonsha kuswa kino kishinka, bino kikatazha bingi inge kya kuba mulongo mu kipwilo wituzhingijisha. Inge kyaikala bino, nanchi mukoba byonka byuba Yehoba watemwa bunchibamambo bwaoloka nyi? Akilangulukai pa kino: Mukoba byepi inge mukulumpe mu kipwilo waamba byambo bimwesha nobe ubena kuba misalululo? Nanchi mukaleka kwingijila Lesa inge mukulumpe mu kipwilo waamba byambo byatama bimukozha ku muchima nyi? Nanchi mukafikenatu kupwisha’mba uno mulongo kechi wafikilamo kutwajijila kwikala mukulumpe mu kipwilo nenyi, inyi mukatekanya ne kupembelela Yesu mwine mutwe wa kipwilo kwingijilapo? Nanchi mukebikako kubula kuta muchima pa byatamisha mulongo, kampe kupichila mu kulanguluka pa myaka yavula yo aingijila Lesa mu bukishinka nyi? Inge mulongo wimulengele mambo watwajijila kwikala mukulumpe mu kipwilo nangwa bamupa ne mingilo ikwabo, nanchi mukasekela nyi? Kulekelako bakwenu mambo kukamwesha’mba mulondela bololoke bwa Yehoba.—Tangai Mateo 6:14, 15.

19. Twafwainwa kutwajijila kuba ka?

¹⁹ Bantu batemwa bunchibamambo bwaoloka babena kutengela juba Yehoba jo akapwisha nshiji yaleta Satana ne ntanda yanji. (Isa. 65:17) Byo tubena kupembelela jino juba, twayai tutwajijile kumwesha bololoke bwa Yehoba kupichila mu kwikala bepelula ne kuyuka kuba’mba kechi twikala na bishinka byonse ne, kabiji twafwainwa kulekelangako bantu mambo inge betufichisha ku muchima.