Mu mulaka mwine wa Kihebelu, milanguluko yonse ibiji mo iji mu kino kinembelo. Byambo biji mu Baibolo wa Binembelo bya Ntanda Ipya wa mu 2013 byaimena pa bishinka byalondelapo:

1. Ndumbulwilo ya katataka yaswañana na byajinga nnembelo ya byambo ne ñambilo ya mu oa moba. Lukwatankano luji pa byambo biji pa Salamo 144:12-15 na byepelo byatendekelapo lwaimena pa bilumbulula kyambo kitanshi kiji mu kyepelo 12 kya Kihebelu kya asher. Kyambo kya Asher kyakonsha kulumbulula byavula. Kyakonsha kutuntululwa’mba “abo.” Kyambo kya “abo” kyo kyo baingijishe mu Baibolo wa Binembelo bya Ntanda Ipya wa kala. Onkao mambo, bintu byawama byo batongola mu byepelo 12 kufika ku 14 bebingijishe kwamba pa babi bo baambapo mu byepelo bitanshi. Pano bino, kyambo kya asher kyakonsha ne kutuntululwa’mba “pa kuba’mba,” “onkao mambo,” nangwa’mba “kepo.” Kyambo kya “kepo” kyo kyo baingijisha mu Baibolo wa mu 2013 ne mu Mabaibolo akwabo.

2. Byambo biji mu Baibolo wa mu 2013 byakwatankana bingi bulongo na byambo byonse biji mu uno salamo. Kyambo kya “kepo” kiji mu kyepelo 12 kibena kulumbulula’mba bintu byawama byatongolwa mu byepelo 12 kufika ku 14 bibena kwamba pa bantu baoloka, aba balomba kuba’mba ‘bebapokolole ne kwibapulusha” ku babi (kyepelo 11). Luno lupimpu lwaubiwa ne mu kyepelo 15, mwanembwa kyambo kya “lusekelo” bimye bibiji kulumbulula kintutu kimo. Onkao mambo, kyambo kya lusekelo bekingijisha ku bantu bamotu “baji na Lesa wabo Yehoba!” Yukai amba mu mulaka mutanshi wa Kihebelu kechi mwajinga tuchibawilo nabiji tupitulukilo ne. Onkao mambo, bantuntuluzhi pa kutuntulula bafwainwa kuyuka mulanguluko mwine, nnembelo ya Kihebelu ya nsansawilo, kibena kwambiwapo ne Binembelo bikwabo byaamba pa kyokyo kintu.

3. Byambo biji pa kino kyepelo mu Baibolo ye bapitulukamo byakwatankana na byambo bikwabo biji mu Baibolo byaamba pa mulaye wa Lesa wa kupesha bantu banji ba kishinka. Na mambo a lupimpu lwaubiwa ku ntuntulwilo ya kyambo kya asher, luno uno salamo umwesha luketekelo lwajinga ne Davida lwa kuba’mba byonkatu Lesa byo apokolwele kisaka kya bena Isalela ku balwanyi babo, byo byo akwasha bantu banji kwikala na lusekelo ne kwikala bwikalo bwawama. (Levi 26:9, 10; Mpitu. 7:13; Sala. 128:1-6) Pa Mpitulukilo ya mu Mizhilo 28:4 paamba’mba: “Baana benu ne kajo ka mu mushiji wenu ne baana ba banyama benu ba kulela, baana ba bañombe ne baana ba mikooko yenu, bakobilwa bibusa.” Mu kimye kya bukalama bwa mwana Davida aye Solomone, kisaka kya bena Isalela kyaikele mu mutende ne ku matwi nzoo. Kyakila pa byonse, bukalama bwa kwa Solomone bwamwesheshenga bikekala bukalama bwa Mesiasa.—1 Mfu. 4:20, 21; Sala. 72:1-20.

Mu kupezhako, lupimpu lwaubiwa ku byambo biji mu Salamo 144 kechi lwapimpula ndumbulwilo yetu ya mafunjisho a mu Baibolo ne. Pano bino, luno lupimpu lwakwasha uno salamo yense kulumbulula bulongo luketekelo luji na bakalume ba Yehoba lwa kuba’mba, ukazhachisha babi ne kulengela bantu baoloka kukekala na mutende wa myaka ne myaka.—Sala. 37:10, 11.