MWAKA wapwa, balongo bavula bebatongwele kwikala bakulumpe ne bankwasho mu bipwilo bya Bakamonyi ba kwa Yehoba mwaya ntanda yonse. Umvwe muji pa bano balongo, twaketekela mwaumvwine bingi bulongo pa kwimupa uno mwingilo.

Nangwa byonkabyo, mwafwainwa mwaakaminwe pa byo mukengilanga uno mwingilo. Mukulumpe mu kipwilo ukijitu mwanyike aye Jason washimikizhe’mba: “Kimyetu kitanshi kyo bantongwele kwikala mukulumpe mu kipwilo, naakaminwe bingi.” Mosesa ne Yelemiya nabo balangulukile’mba kechi bafikijilemo kwingila mingilo ibapele Yehoba ne. (Lupu. 4:10; Yele. 1:6) Inge ne anweba byo byo mulanguluka, mwakonsha kushinda byepi ino milanguluko ne kutwajijila kuyilako palutwe? Monai byaubile mwana wa bwanga aye Timoti.—Byu. 16:1-3.

Timoti wajingatu mwanyike kimye mutumwa Paulo kyo amwichile kuba’mba bengijilenga pamo mwingilo wa Lesa, kampe po po afikizhetu myaka 20. Na mambo a kuba’mba Timoti wakijinga mwanyike, kampepo wilengulwile ne kukankazhama kwingila uno mwingilo. (1 Timo. 4:11, 12; 2 Timo. 1:1, 2, 7) Bino byo papichile myaka jikumi, Paulo wabuujile kipwilo kya mu Filipai amba: “Naketekela mwi Nkambo Yesu kwimutumina Timoti katataka . . . Mambo kechi njipo na muntu mukwabo wa kwimutumina uji na muchima nobe aye . . . ne.”—Fili. 2:19, 20.

Ki ka kyakwashishe Timoti kwikala mukulumpe mu kipwilo wawama? Twayai twambe pa bintu bitanu na kimo byo twakonsha kufunjilako kwi aye.

1. Watele bantu muchima. Paulo wabuujile balongo mu Filipai amba: “[Timoti] ukateshako muchima ku bijikila byenu.” (Fili. 2:20) Kya kine, Timoti watele bantu muchima. Watele muchima pa kwibakwasha kufwenya kwipi ne Yehoba, kabiji waingijile bingi na ngovu kwibakwasha.

Kechi mwafwainwa kwikala nobe muntu wendesha sakya ukana kusenda bantu mu jishinda na mambotu a kukeba kufika bukiji pa kiteshenyi ne. Ba William baingila mwingilo wa bukulumpe mu kipwilo pa myaka kukila pa 20, babuulako balongo batongolwa katataka amba: “Mwafwainwa kutemwa balongo. Kabiji mwafwainwa kuta muchima pa kwibakwasha, kechi kutatu muchima pa kunengezha mapepala a kipwilo ne.”

2. Watangizhangako mwingilo wa kusapwila. Pa kwamba pe Timoti byo apuseneko na bakwabo, Paulo waambile’mba: “Bonse babena kukeba kwiubila bintu byabo bene, kechi bintu bya kwa Yesu Kilishitu ne.” (Fili. 2:21) Paulo wanembejile ino nkalata mu Loma. Wamwene kuba’mba balongo mu Loma bateletu muchima ku bintu byabo. Kechi baingijilenga na ngovu mwingilo wa Lesa ne. Bino Timoti kechi byo byo ajinga ne. Aye wipananga kwingilako pakatampe mwingilo wa kusapwila mambo awama, byonkatu byaubile Isaya kimye kyo aambile’mba: “Amiwa bano! Ntumai!”—Isa. 6:8.

Mwakonsha kwingila byepi mingilo ya mu bwikalo kwa kubula kulekelela mingilo ya Lesa? Kitanshi, tanchikai bulongo mingilo yenu. Paulo wakambizhe’mba: “Muyuke bintu byanemesha.” (Fili. 1:10) Nemekai bintu byanemeka Lesa. Kya bubiji, peezhaiko bwikalo bwenu. Lekai kuba bintu bimonawina kimye ne ngovu. Paulo watundaikile Timoti amba: “China bya kusakasaka bya bwanyike, bino londalondanga bololoke, lwitabilo, butemwe ne mutende”—2 Timo. 2:22.

 3. Waingilanga mwingilo wazhila na mukoyo. Paulo wavulwilemo bena Filipai amba: “Mwayuka [Timoti] byo elumbulwile mwine, byonka byuba mwana uji na shanji, aye waingijile ne amiwa mu kutwala palutwe mambo awama.” (Fili. 2:22) Timoti waingilanga na mukoyo. Waingilanga bingi na ngovu pamo ne Paulo, kabiji kyakoseshe butemwe pakachi kabo.

Lelo jino, mu jibumba ja Lesa muji mingilo yavula bingi. Mingilo ya Lesa ileta lusekelo kabiji yakonsha kwimukwasha kukwatankana na balongo ne banyenga. Onkao mambo, ibikilai kikonkwanyi kya ‘kwikala na bya kuba byavula mu mwingilo wa Nkambo.’—1 Ko. 15:58.

4. Waingijishanga bintu byo afundanga. Paulo wanembejile Timoti amba: “Obewa walondela bulongo lufunjisho lwami, bwikalo bwami, kikonkwanyi kyami, lwitabilo lwami, butekanye bwami, butemwe bwami, kuchinchika kwami.” (2 Timo. 3:10) Mambo a kuba Timoti waingijishanga bintu byo afundanga, wafikijilemo kwingila mingilo yavula.—1 Ko. 4:17.

Nanchi kujipo mulongo waingijila Yehoba pa myaka yavula ye mufunjilako bya kuba nyi? Inge mufwaye, mwakonsha kukebapo umo. Mulongo Tom, mukulumpe mu kipwilo waingila pa myaka yavula uvuluka’mba: “Mukulumpe mu kipwilo waingijile pa myaka yavula waikele mulunda nami kabiji wamfunjishe bya kwingila mingilo ya Lesa. Namwipuzhanga inge paji byo nkeba kuyuka kabiji nalondelanga byo ambuulanga. Kino kyankwashishe kuyukilapo byavula.”

5. Wikoseshanga ne kwifunjisha aye mwine. Paulo watundaikile Timoti amba: “Saka wikosesha obe mwine ne kwikala na kikonkwanyi kya kumwesha munema wa kunemeka Lesa.” (1 Timo. 4:7.) Muntu ukaya makayo a kwikyombesha wakonsha kwikala na muntu umufunjisha, pano bino, wafwainwa ne kwifunjisha aye mwine. Paulo wakambizhe Timoti amba: “Uteshe muchima ku kutanga pa mvula bantu, kukosesha ne kufunjisha bantu. . . . Saka ulangulukishapo pa bino bintu; wikale monka, pa kuba’mba kuyilako palutwe kobe kumweke ku bantu bonse.”—1 Timo. 4:13-15.

Ne anweba mwafwainwa kutwajijila na kuwamishako busendwe bwenu. Taiko muchima kufunda Mambo a Lesa ne kulondela mikambizho ya katataka ifuma ku jibumba ja Lesa. Kabiji chinuzhukainga kukizhamo kwiketekela, nabiji kulanguluka’mba mwayuka byavula kya kuba kechi mwafwainwa ne kukeba keba bishinka pa kuba bintu bimo ne. Pa kuba’mba mulondele byonka byaubanga Timoti, mwafwainwa ‘kwita muchima anwe bene ne lufunjisho lwenu pamo.’—1 Timo. 4:16.

6. Waketekejile mu bukwasho bwa mupashi wa Yehoba. Paulo wavulwilemo Timoti pa mwingilo wanji amba: “Saka ulama kino kintu kyawama kyo bakupele na mupashi wazhila uji mwi atweba.” (2 Timo. 1:14) Pa kuba’mba alame mwingilo wanji, Timoti wafwainwe kuketekela mu bukwasho bwa mupashi wa Lesa.

Ba Donald baingila mwingilo wa bukulumpe mu kipwilo pa myaka yavula baambile’mba: “Banabalume batongolwa bafwainwa kunemeka bulunda bwabo na Lesa. Aba boba bino ‘bakakoselangakotu.’ Inge balomba mupashi wa Lesa ne kwikala na bipangwa bya mupashi, bakakwashanga bingi balongo mu kipwilo.”—Sala. 84:7; 1 Pe. 4:11.

Kitutundaika bingi pa kumona anweba balongo bavula mwatongolwa katataka byo mu bena kuyilako palutwe mu mwingilo wa Lesa. Ba Jason bo twaambapo ku ntendekelo ya kino kibaaba, baambile’mba: “Nafunda byavula bingi pa myaka yonse yo naingila bukulumpe mu kipwilo, kabiji ñingila na luketekelo. Luno neyowa bingi mwingilo wami kabiji namumona’mba mwingilo wawama bingi!”

Nanchi musakutwajijila kuyilako palutwe mu mwingilo wa Lesa nyi? Ibikilai kikonkwanyi kya kufunjilako byavula kwi Timoti. Umvwe mwauba bino, mukakwashanga bantu ba Lesa bulongo.