1, 2. (a) Mambo ka bantu bajingako mu moba a mutumwa Paulo o baambilanga pa buzha ne bwana bwa bene? (b) Paulo watundaikile bena Kilishitu bakwabo kuyuka ñanyi pa kuba’mba bekale na bwana bwa bene bwa kine?

BENA Kilishitu batanshi baikalanga mu mapunzha ajinga mu bufumu bwa bena Loma, kabiji bantu ba mu buno bufumu betotanga’mba bayuka mizhilo, kabiji amba batundaikanga bunchibamambo bwaoloka ne bwana bwa bene. Pano bino, Bufumu bwa Loma bwakosele ne kutumbalala na mambo a kwikala na bazha bavula bingi. Pa kimye kimo, bantu bavula bajinga mu buno bufumu bajinga bazha. Na mambo a kino, bantu bavula mu buno bufumu, kubikakotu ne bena Kilishitu, baambanga bingi pa buzha ne pa kwikala na bwana bwa bene.

² Makalata anembele mutumwa Paulo aamba bingi pa bwana bwa bene. Pano bino, mwingilo wanji kechi wajinga wa kuwamisha bwikalo bwa bantu nangwa kupimpula kafulumende, byonka byakebeshanga bantu pa kyokya kimye ne. Paulo ne bena Kilishitu bakwabo kechi baketekejile mu bukalama bwa bantu kuleta bwana bwa bene ne, bino batele muchima pa mwingilo wa kufunjisha bantu mambo awama a Bufumu bwa Lesa ne buneme bwa kitapisho kya bukuzhi bwa kwa Kilishitu Yesu. Paulo watundaikile bena Kilishitu  bakwabo kuyuka mwine Nsulo ya bwana bwa bene bwa kine. Mu nkalata yanji ya bubiji ku bena Kilishitu mu Kolinda, wanembele’mba: “Yehoba ye Mupashi, kabiji paji mupashi wa Yehoba po paji ne bwana bwa bene.”—2 Ko. 3:17.

3, 4. (a) Mambo ka Paulo o anembejile byambo biji pa 2 Kolinda 3:17? (b) Twakonsha kuba byepi pa kuba’mba tumwenemo mu bwana bwa bene bufuma kwi Yehoba?

³ Mu nkalata itanshi yo anembejile bena Kolinda, Paulo waambile pa lukumo lwamwekele ku kilungi kya Mosesa kimye kyo afumine ku Mutumba wa Sinai na kwisamba na malaika wa Yehoba. Bantu byo bamwene Mosesa bachiine, onkao mambo, Mosesa wivwetele kitambala ku meso. (Lupu. 34:29, 30, 33; 2 Ko. 3:7, 13) Bino Paulo walumbulwile’mba, “Umvwe muntu waalulukila kwi Yehoba, kino kitambala bekivwetulapo.” (2 Ko. 3:16) Bino byambo bya kwa Paulo bilumbulula ka?

⁴ Byonka byo twafunjile mu mutwe wafumako, Yehoba, Mulenga wa bintu byonse, ye yenka uji na luusa lonse. Onkao mambo, kyayilamo kwamba’mba “paji mupashi wa Yehoba,” po paji ne bwana bwa bene. Pa kuba’mba tumwenemo mu buno bwana bwa bene, twafwainwa ‘kubwela kwi Yehoba,’ ko kuba’mba kwikala na bulunda bwakosa ne aye. Bena Isalela byo bajinga mu kiselebwa kechi bamwenenga bintu monka mwi bemwenejilenga Yehoba ne. Kyajingatu nobe michima ne milanguluko yabo beivwetele kabiji yakosele. Bateletu michima pa bwana bwa bene bo bajinga nabo mu Ijipita nangwa pa bintu bya ku mubiji.—Hebe. 3:8-10.

5. (a) Ñanyi bwana bwa bene bwitupa mupashi wa Yehoba? (b) Twayuka byepi amba kukaswa mu kaleya nangwa mu buzha kechi kwakonsha kwitwangata bwana bwa bene bwitupa Yehoba ne? (c) Ñanyi mepuzho o twafwainwa kukumbula?

⁵ Bwana bwa bene bupana mupashi wa Yehoba bwanema kukila kukasuluka ku buzha bwa bantu. Mupashi wa Yehoba ukasulula bantu ku buzha bwa bundengamambo ne lufu, ku bupopweshi bwa bubela ne bisho. (Loma 6:23; 8:2) Buno ke bwana bwa bene bwa kine. Muntu wakonsha kwiyowa buno bwana bwa bene nangwatu inge uji mu kaleya nangwa mu buzha. (Nte. 39:20-23) Kino kyo kyamwekejile Nyenga Nancy Yuen ne Mulongo Harold King, bonse babiji bachinchikile mu kaleya pa myaka yavula na mambo a lwitabilo lwabo mwi Lesa. Mwakonsha kutamba mashimikila abo pa JW Library. (Chintai po banemba’mba INTERVIEWS AND EXPERIENCES > ENDURING TRIALS.) Pano twakonsha kuba byepi pa kuba’mba tumweshe’mba twanemeka bwana bwa bene bwetu? Kabiji twafwainwa kuba byepi pa kuba’mba twingijishenga bulongo bwana bwa bene?

6. Bena Isalela bamwesheshe byepi muchima wa kubula kusanta pa bwana bwa bene bwibapele Yehoba?

⁶ Umvwe twanemeka bupe bwitupa muntu, tumusanchila. Bena Isalela kechi banemekele bwana bwa bene bwibapele Yehoba byo ebapokolwele mu buzha mu Ijipita ne. Byo papichiletu bañondo bacheche kufuma po bebapokolwejile mu buzha, batendekele kutonga kajo ko bajanga mu Ijipita ne kwijizhanya pa bintu bibapelenga Yehoba kya kuba kebakebe ne kubwela ku Ijipita. Abo banemekele bingi ‘masabi, bibimbi, bainamunwa, kanyenze ne galiki, kukila kupopwela Lesa wa kine Yehoba wibapele bwana bwa bene. Nanchi twakonsha kukumya Yehoba pa kuzhingijila bantu banji nyi? (Bala. 11:5, 6, 10; 14:3, 4) Luno ke lufunjisho lwanema bingi kwi atweba.

7. Paulo walondejile byepi byambo bya lujimuno byo anembele pa 2 Kolinda 6:1, kabiji twakonsha kulondela byepi byo aubile?

⁷ Mutumwa Paulo watundaikile bena  Kilishitu bonse kunemeka bwana bwa bene bwitupa Yehoba kupichila mu Mwananji, Yesu Kilishitu. (Tangai 2 Kolinda 6:1.) Vulukai jiwi ja mu muchima ja kwa Paulo byo jamukatazhanga na mambo a kwikala muzha ku bundengamambo ne lufu. Pano bino waambile’mba: “[Nsanchila] Lesa kupichila mwi Yesu Kilishitu Nkambo yetu!” Mambo ka? Walumbulwijile bena Kilishitu bakwabo amba: “Mambo muzhilo wa mupashi upana bumi kupichila mwi Kilishitu Yesu wimukasulula ku muzhilo wa bundengamambo ne wa lufu.” (Loma 7:24, 25; 8:2) Kulondela byaubile Paulo, ne atweba twafwainwa kunemeka bwana bwa bene bwitupa Yehoba byo etukasulula ku buzha bwa bundengamambo ne lufu. Na mambo a bukuzhi, twakonsha kwingijila Lesa na jiwi ja mu muchima jatooka ne kwikala na lusekelo.—Sala. 40:8.

8, 9. (a) Ñanyi lujimuno mutumwa Petelo lo aambilepo pa bya kwingijisha bwana bwa bene? (b) Ñanyi lukatazho lo twikala nalo lelo jino?

⁸ Pa kuba’mba tumweshe kusanta pa bwana bwa bene bwitupa Lesa, kechi twafwainwa kwibwingijishanga kutama ne. Mutumwa Petelo witujimunako kubula kwingijishanga bwana bwa bene bwetu kubilamo bisakasaka michima yetu. (Tangai 1 Petelo 2:16.) Nanchi luno lujimuno kechi lwimuvululamo kyamwekejile bena Isalela mu Kiselebwa nenyi? Ne atweba kyakonsha kwitumwekela, kampe kukila ne pa kyamwekejile bena Isalela. Satana ne ntanda yanji waletako bintu bimweka nobe byawama bingi, nabiji mvwajilo, mwekelo, kajo, makayo, bya kisangajimbwe ne bintutu bikwabo. Bantu batentemesha bintu javula bamwesha bipikichala bya bantu bamweka bulongo pa kuba’mba betulengele kupota bintu byo tubena kubula ne kukeba. Kyapela bingi kufwamo mu kano kakose ne kwitulengela kwingijisha kutama bwana bwa bene.

⁹ Kabiji lujimuno lwa kwa Petelo lwamba ne pa bwikalo bwa bantu, nabiji kufuukulapo kufunda sukulu, kutwela nkito nangwa bintutu bikwabo. Lelo jino, banyike bavula bengila na ngovu ku sukulu kuba’mba bakebasale kuya ku masukulu akatampe. Bebabuula’mba kufunda kufika palepa kulengela muntu kutwela nkito ya peulu ne kufola mali avula, kabiji bamba ne lupusano lwikala pa mali afola boba bafunda kufika palepa ne boba bafundatu mu kwesakanya. Na mambo a kuba’mba banyike bakeba kuba bintu bikebakwasha mu bwikalo, kibalengela kumona nobe ino milanguluko yawama. Ñanyi kintu kyafwainwa kuvulukanga baana ne bansemi?

10. Ñanyi kintu kyo twafwainwa kuvulukanga pa kwingijisha luusa lwetu lwa kwifuukwila bintu?

¹⁰ Bantu bamo bakonsha kulanguluka’mba na mambo a kuba’mba muntu mwine ye wafwainwa kwisajilapo, wakonsha kwikala na bwana bwa bene bwa kwisajila kyonse kyo akeba kwesakanatu na jiwi janji ja mu muchima. Kampe balanguluka pa byambo mutumwa Paulo byo anembejile bena Kilishitu mu Kolinda pa kajo, amba: “Mambo ka bwana bwa bene bwami o bebuzhachishisha ku jiwi ja mu muchima ja muntu mukwabo?” (1 Ko. 10:29) Ibyo kuba’mba tuji na luusa lwa kwisajilapo kufunda nangwa nkito, pano bino, twafwainwa kuvulukanga’mba tuji na pa kupelela mu kwingijisha luusa lwa kwifuukwila kabiji mu byo tufuukula mufuma byawama nangwa byatama. Kino kyo kyalengejile Paulo kwamba byambo bya kuba’mba: “Bintu byonse bijitu bulongo mwayila mizhilo, bino kechi byonse byafwainwa kuba muntu ne. Bintu byonse bijitu bulongo mwayila mizhilo, bino kechi byonse bikomesha muntu ne.” (1 Ko. 10:23) Kino kitukwasha kuyuka’mba kuji bintu byavula byo twafwainwa kulangulukapo kukila bintu byo twatemwa kimye kyo  twingijisha luusa lwetu pa kufuukula bintu mu bwikalo.

11. Mambo ka Lesa o etupokolwela ku bundengamambo ne lufu?

¹¹ Petelo byo apaine lujimuno pa kwingijisha bwana bwa bene kutama, waambile ne pa kwibwingijisha bulongo. Witutundaikile kwingijisha bwana bwa bene mu “kwikala bakalume ba Lesa.” Onkao mambo, kine kintu Yehoba kyo etupokolwela ku bundengamambo ne lufu kupichila mwi Yesu ke kya kuba’mba twipane “kwikala bakalume ba Lesa.”

12. Twakonsha kufunjilako ka ku byaubile Nowa ne kisemi kyanji?

¹² Jishinda jimo mo twakonsha kubula kwingijisha bwana bwa bene bwetu kutama ne kubula kwikala bazha jikwabo ku ino ntanda ne bisakasaka muchima ke kwingilako pakatampe mingilo ya Lesa. (Nga. 5:16) Akilangulukai pa mushakulu Nowa ne kisemi kyanji. Baikalanga mu ntanda mwajinga bantu baubilenga bukapondo ne bulalelale. Bino kechi baubilengako byubilo byatama byaubilenga bantu ne. Ñanyi kintu kibakwashishe? Basajilepo kupayankana na mwingilo wibapele Yehoba wa kufiika bwato, kulonga kajo kabo ne ka banyama, ne kujimunako bantu. “Nowa waubile byonse byamukambizhe Lesa. Waubiletu byonse.” (Nte. 6:22) Ñanyi bintu byafuminemo? Nowa ne kisemi kyanji bapulukile mpelo ya ntanda.—Hebe. 11:7.

13. Ñanyi mwingilo Yesu ye bamupele kabiji ye akambizhe ne baana banji ba bwanga kwingila?

¹³ Ñanyi mwingilo witukambizha Yehoba kwingila lelo jino? Byo tuji baana ba bwanga ba kwa Yesu, twayuka mwingilo witupa Lesa. (Tangai Luka 4:18, 19.) Lelo jino, bantu bavula bebapofula michima ku lesa wa buno bwikalo kabiji bazha ku bupopweshi bwa bubela ne ku bya bukomo bwa ino ntanda. (2 Ko. 4:4) Onkao mambo, twafwainwa kwingila na ngovu byonka byaingilanga Yesu kukwasha bantu kuyuka ne kupopwela Yehoba, Lesa upana bwana bwa bene. (Mat. 28:19, 20) Uno mwingilo kechi wapeela ne, muji makatazho avula. Mu byalo bimo, bantu bakana kumvwa mambo awama kabiji bamo bakanama bingi. Atweba  bonse pa muntu pa muntu twafwainwa kwiipuzha’mba, ‘Nakonsha kwingijisha byepi bwana bwa bene bwami kwingilako pakatampe mwingilo wa Bufumu?’

14, 15. Bantu ba Yehoba batundaika byepi mwingilo wa kusapwila? (Monai kipikichala kitanshi.)

¹⁴ Kitutundaika bingi kumona bavula bayuka’mba tubena kwikala mu moba a kupelako kabiji bapeezhako bwikalo bwabo ne kutwela mu mwingilo wa kimye kyonse. (1 Ko. 9:19, 23) Bamo bengijila mu manyaunda a kipwilo kyabo; bakwabo baya na kwingijila kwakepa basapwishi. Masawakya abena kumwesha’mba pa myaka itanu yapitapo, bapainiya ba kimye kyonse bavujilako, luno bakila pa 1,100,000, kino kibena kumwesha’mba bantu bavula mwaya ntanda batwela mu mwingilo wa kimye kyonse. Ke kintu kya lusekelo bingi pa kumona bavula byo babena kwingijisha bulongo bwana bwa bene bwabo mu kwingijila Yehoba.—Sala. 110:3.

¹⁵ Ki ka kyakwashishe bano balongo ne banyenga kwingijisha bulongo bwana bwa bene bwabo? Akilangulukai pa ba John ne ba Judith baingijila Lesa mu byalo byapusana pusana pa myaka 30. Bavuluka’mba kimye Sukulu wa Mwingilo wa Bupainiya kyo atendekele mu 1977, watundaikanga bapainiya kwipana kuya na kwingijila ku mapunzha kwakepa basapwishi. Ba John pa kuba’mba bafikizhe kikonkwanyi kyabo, bimye byavula balekanga nkito ibatayilanga kimye ne kutwela ikwabo pa kuba’mba bapeezhako bwikalo bwabo. Byo bayile ku kyalo kingi, bamwene kuba’mba kulomba kwi Yehoba ne kumuketekela kwibakwashishe kushinda mikiika, nabiji kufunda mulaka ungi, bisho ne nkilo. Uno mwingilo wibakwasha byepi? Baambile’mba: “Kafwako mwingilo wawama wandetelanga lusekelo kukila mwingilo wa kimye kyonse ne. Yehoba wajinga ne amiwa kimye kyonse, byonkatu bikala nsemi wa mulume wa butemwe. Po po naumvwisha kinembelo kya Yakoba 4:8, kyaamba’mba: ‘Fwenyai kwipi ne Lesa, ne aye ukafwenya kwipi ne anweba.’ Nayukile’mba nataaine kintu kyo nakebelenga, kintu kyandengela kwikala na lusekelo mu bwikalo bwami.”

16. Aba bekala bwikalo bubula kwibaswisha kwingilako kimye kyabaya bengijisha byepi bulongo bwana bwa bene bwabo?

¹⁶ Kupusanako ne ba John ne ba Judith, bamo bekala bwikalo bwibaswishatu kwingilako mwingilo wa kimye kyonse pa kimye kicheche. Nangwa byonkabyo, bavula bepana kwingilako mwingilo wa buntungi ubena kwingijiwa ntanda yonse. Kimye kyo bashimikilenga ofweshi mukatampe wa ntanda yonse mu muzhi wa Warwick ku New York, balongo ne banyenga 27,000 bepaine kwingilako, bamo baingijileko milungu ibiji, mwaka umo, nangwa kukilapo. Bavula balekeleko bintu byabo pa kuba’mba bengileko mwingilo wa Lesa. Twakonsha kufunjilako ku bano balongo ne banyenga bengijisha bwana bwabo bwa bene mu kutota ne kunemeka Yehoba, Lesa upana bwana bwa bene.

17. Ñanyi mapesho akatambula boba bengijisha bulongo bwana bwa bene bwibapa Lesa?

¹⁷ Tusanta bingi pa kuyuka Yehoba ne byo tumwenamo mu bwana bwa bene bwa kine bwa kupopwela Lesa. Twayai tufuukulenga bintu bimwesha’mba twanemeka bwana bwa bene bo tuji nabo. Kechi twafwainwa kwingijishanga kutama bwana bwa bene ne, twayai twibwingijishenga mu kwingijila Yehoba papelela bulume bwetu. Umvwe ketube bino, tukatambula mapesho a Yehoba kimye kikafika bungauzhi bwa kuba’mba: “Bilengwa [bikapokololwa] ku buzha bwa bubole ne kwikala na bwana bwa bene bwa lukumo lwa baana ba Lesa.”—Loma 8:21.