MUTWE WA KUFUNDA 17
Swainga Bukwasho bwa Yehoba pa Kuba’mba Mukanenga Bapashi Batama
“Tubena kulwa . . . na nzhita ya bapashi batama baji mu mapunzha a mwiulu.”—EFI. 6:12.
LWIMBO 55 Kwibachina Ne!
BIJI MU UNO MUTWE *
1. Byonka byalumbulula Efisesa 6:10-13, ñanyi jishinda jimo Yehoba mo amweshesha’mba wituta muchima? Lumbululai.
JISHINDA jimo Yehoba jo amwesheshamo’mba wituta muchima atweba bakalume banji ke kwitukwasha kuyuka bya kukana balwanyi betu. Balwanyi betu bene ke Satana ne bandemona. Yehoba witujimunako pa bano balwanyi betu, kabiji witupa ne bya kwitukwasha kwibakana. (Tangai Efisesa 6:10-13.) Inge twaswa bukwasho bwa Yehoba ne kumuketekela na muchima yense, tukashinda Diabola. Twakonsha kwikala na luketekelo lwajingapo na mutumwa Paulo. Wanembele’mba: “Umvwe Lesa uji ne atweba, ñanyi uketushinda?”—Loma 8:31.
2. Tusakwisamba pa ka mu uno mutwe?
2 Atweba bena Kilishitu ba kine kechi tuta muchima pe Satana ne bandemona ne. Bino tuta muchima pa kufunda byavula pe Yehoba ne kumwingijila. (Sala. 25:5) Nangwa byonkabyo, twafwainwa kuyuka bintu bimo byuba Satana. Mambo ka? Mambo twafwainwa kuyuka bino bintu pa kuba’mba abule kwitujimukila. (2 Ko. 2:11; tubyambo twa munshi) Mu uno mutwe, tusakwisamba pa jishinda jikatampe jingijisha Satana ne bandemona pa kutwala bantu mungi. Kabiji tusakufunda ne byo twakonsha kwibakana.
MIPASHI YATAMA BYO ITWALA BANTU MUNGI
3-4. (a) Kupopwela mipashi kulumbuluka ka? (b) Nanchi kupopwela mipashi kwakumbanatu konse nyi?
3 Jishinda jikatampe Satana ne bandemona jo bajimbaikilamo bantu ke kupopwela mipashi. Aba bapopwela mipashi bamba’mba bayuka nangwa’mba boba bintu byakonsha kukankalwa kuba bakwabo. Bamo bamba’mba bayuka bya kulutwe kupichila mu kuponga nangwa kutala tubangabanga. Bakwabo bakonsha kulengela bantu kumona nobe babena kwisamba na bantu bafwa. Bakwabo bapanda manga nangwa’mba bulozhi, kabiji bakonsha kweseka kulowa muntu mukwabo. *
4 Nanchi kupopwela mipashi kwakumbanatu konse nyi? Kukebakeba bishinka kwaubiwe mu byalo 18 bya ku Latin America ne pa makuji a Caribbean bataaine kuba’mba pa bantu basatu, umo, waitabila mu bya bulozhi, manga, nangwa bingelekezha, kabiji bavula baitabila kuba’mba bakonsha kwisamba na mipashi. Kabiji kwaikele kukebakeba bishinka kukwabo mu byalo 18 bya mu Africa. Bataaine kuba’mba pa bantu babiji, umo, waitabila mu bulozhi. Pano bino, konsetu ko twikala, twafwainwa kujimuka na kyubilo kya kupopwela mipashi. Mambo Satana ubena kukeba “kujimbaika bantu ba pano pa ntanda ponse.”—Lum. 12:9.
5. Yehoba umona byepi kupopwela mipashi?
5 Yehoba ke “Lesa wa bukine.” (Sala. 31:5) Onkao mambo, umona byepi kupopwela mipashi? Kino kyubilo wikishikwa bingi. Yehoba wabuujile bena Isalela amba: “Mwi anweba kechi mukatanwe muntu nangwa umo ukasoka mwananji wa mulume nangwa mwananji wa mukazhi mu mujilo ne, nangwa uponga, nangwa ñanga wa bisoko nangwa muntu yense uba bya lubuko nangwa mulozhi ne. Kabiji kechi mukatanwe muntu uta bakwabo bwanga nangwa wipuzha muntu wisamba na mipashi nangwa wamba bikamweka kulutwe nangwa wisamba na bafu ne. Mambo muntu yense uba bino bintu ye wa bunya kwi Yehoba.” (Mpitu. 18:10-12) Bena Kilishitu kechi balondela Mizhilo Yehoba yo apele bena Isalela ne. Nangwa byonkabyo, twayuka’mba umona kupopwela mipashi byonkatu byo ekumonanga kala.—Mala. 3:6.
6. (a) Satana wingijisha byepi kupopwela mipashi pa kumanyika bantu? (b) Kwesakana na byaamba Musapwishi 9:5, ñanyi bukine bwaamba pa bikala bantu bafwa?
6 Yehoba witukanya kupopwela mipashi mambo wayuka’mba jo jishinda Satana jo abena kwingijisha kumanyikilamo bantu. Satana wingijisha kupopwela mipashi kutundaika bubela bwavula, kubikapotu ne bwa kuba’mba bantu bafwa batwajijila kwikala bomi ku mpunzha ikwabo. (Tangai Musapwishi 9:5.) Kabiji Satana wingijisha kupopwela mipashi pa kuba’mba alengele bantu kwikala na moyo ne kwibafumya kwi Yehoba. Kine kintu kyo akeba ke kya kuba’mba bantu bapopwela mipashi baketekelenga mu bapashi batama kukila kuketekela Yehoba.
BYA KUKANA BAPASHI BATAMA
7. Yehoba witubuula ñanyi bintu?
7 Byonka byo twisambapo kala, Yehoba witubuula byo twafwainwa kuyuka pa kuba’mba babule kwitujimbaika kwi Satana ne bandemona. Twayai twisambe pa bintu bimo byo twakonsha kuba pa kuba’mba tushinde Satana ne bandemona.
8. (a) Ñanyi jishinda jimo jo twakonsha kukainamo bapashi batama? (b) Kinembelo kya Salamo 146:4 kyasolola byepi bubela bwa kwa Satana pa bikala bantu bafwa?
8 Tangainga Mambo a Lesa ne kulanguluka-langulukapo. Kuba bino ko kuketukwasha kukana bubela bwa bapashi batama. Mambo a Lesa aji nobe mpoko yatwa bingi kya kuba akonsha kusolola bubela bwa kwa Satana. (Efi. 6:17) Mambo a Lesa asolola bubela bwa kuba’mba bafwa bakonsha kwisamba na bantu bomi. (Tangai Salamo 146:4.) Kabiji etuvululamo kuba’mba Yehoba ye yenkatu wakonsha kubuulañana bya kulutwe. (Isa. 45:21; 46:10) Inge ketutange Mambo a Lesa pa juba pa juba ne kulangulukapo, tukenengezha bulongo kukana ne kushikwa bubela bapashi batama bo bakeba’mba twitabile.
9. Ñanyi byubilo bya kupopwela mipashi byo twafwainwa kubula kwivwangamo?
9 Kukana kuba bintu byakwatankana na kupopwela mipashi. Na mambo a kuba’mba twibena Kilishitu ba kine, kechi twivwanga mu kupopwela mipashi ne. Kechi tuya na kubukisha nangwa kukeba kwisamba na bantu bafwa ne. Byonka byo twisambile mu mutwe wafumako, kechi twivwanga mu bisho byubiwa pa bijilo bimwesha’mba bantu bafwa batwajijila kwikala na bumi ku mpunzha ikwabo ne. Kabiji kechi tuya ku bamfunji ba tubangabanga nangwa bantu babuulañana bikamweka kulutwe ne. (Isa. 8:19) Twayuka kuba’mba bino byubilo byonse byatama bingi kabiji byakonsha kwitulengela kutendeka kumvwañana na Satana ne bandemona.
Londelainga byaubile bena Kilishitu batanshi kupichila mu kutaya byonse byalamata ku bingelekezha ne kukana bya kisangajimbwe byonse byavwangamo kupopwela mipashi (Monai mafuka 10-12)
10-11. (a) Bamo mu kimye kya bena Kilishitu batanshi baubile byepi byo bafunjile bukine? (b) Kwesakana na byaamba 1 Kolinda 10:21, mambo ka o twafwainwa kulondela byaubile bena Kilishitu batanshi, kabiji twakonsha kuba byepi bino?
10 Tayai byonse byalamata ku bingelekezha. Bantu bamo baikalanga mu Efisesa mu kimye kya bena Kilishitu batanshi, bapopwelanga mipashi. Byo bafunjile bukine, baubilepo kimo. “Bantu bavula baubanga bya buñanga bakonkenye pamo mabuku abo ne kwiasoka bonse saka bamonako.” (Byu. 19:19) Bano bantu bafuukwilepo kuleka kupopwela mipashi yatama. Mabuku abo a bya buñanga beapotele na mali avula bingi. Pano bino, ano mabuku kechi beapaine ku bantu bakwabo nangwa kwiapotesha ne, beonawine. Batele muchima pa kutokesha Yehoba ku muchima kechi pa mali o bakonsheshe kwikala nao inge kya kuba bapoteshe ano mabuku ne.
11 Twakonsha kulondela byepi byaubile bano bena Kilishitu batanshi? Twafwainwa kutaya byonse byalamata ku bingelekezha. Bino byavwangamo, bizhimba, michi ya kwishiika, nangwa bintutu bikwabo bivwala bantu amba bya kwibazhikijila.—Tangai 1 Kolinda 10:21.
12. Ñanyi mepuzho o twafwainwa kwiipuzha atweba bene pa mambo a bya kisangajimbwe?
12 Salainga bulongo bya kisangajimbwe. Iipuzhai anweba bene amba: ‘Nanchi ntanga mabuku, magazini, nangwa bibaaba biji pa Intaneti byaamba pa bingelekezha nyi? Nga nyimbo yo ntelekako, mafilimu o ntamba, ne mitanchi ya pa TV yo ntamba, nangwa makayo a pa kompyuta o nkaya, nanchi bino bintu byavwangamo kupopwela mipashi nyi? Nanchi batambishamo bintu nabiji bantu bafuma ku bilende bufuku kwiya na kutoma mashi a bantu bomi, bafu saka babena kwenda, nangwa bingelekezha nyi? Nanchi batambisha bya bulozhi, manga, nangwa bisela bya kwifinga mafingo nyi?’ Ibyo kuba’mba kechi bya kisangajimbwe byonse muji mashimikila alamata ku kupopwela mipashi ne. Pa kusala bya kisangajimbwe, mwafwainwa kusala bintu bikemukwasha kuchinuzhuka bintu byashikwa Yehoba. Twafwainwa kwibikishako “kwikala na jiwi ja mu muchima jatoka kwi Lesa” wetu.—Byu. 24:16. *
13. Twafwainwa kuchinuzhuka kuba ka?
13 Chinuzhukainga kwisamba pa bandemona. Twafwainwa kulondela byaubanga Yesu. (1 Pe. 2:21) Yesu saka akyangye kwiya pano pa ntanda, wajinga mwiulu, kabiji wayukile byavula pe Satana ne bandemona. Pano bino, kechi waambangapo pa bintu byaubile bapashi batama ne. Yesu wakebelenga kwikala kamonyi wa Yehoba, kechi kwikala wa kwambilako Satana ne. Twakonsha kulondela byaubile Yesu kupichila mu kubula kwambapo pa bandemona. Pakuba tumwesha kupichila mu byo twamba kuba’mba muchima wetu “wasangalala na mambo a bintu byawama,” ko kuba’mba, bukine.—Sala. 45:1.
Kechi twafwainwa kuchina bapashi batama ne. Yehoba, Yesu, ne bamalaika baji bingi na bulume (Monai mafuka 14-15) *
14-15. (a) Mambo ka o twafwainwa kubujila kuchina bapashi batama? (b) Ñanyi bishiino bimwesha’mba Yehoba uzhikijila bantu banji lelo jino?
14 Kange muchinenga bapashi batama ne. Mu ntanda yatama yo tujimo, bintu byatama byakonsha kwitumwekela. Mapuso, kukolwa nangwa lufu byakonsha kumweka kwa kubula ne kuketekela. Pano bino, kechi twafwainwa kulanguluka’mba bapashi bo bauba bino ne. Baibolo walumbulula’mba “bimye ne bintu bya kubula kuketekela” bibamwekela bantu bonse. (Sapwi. 9:11) Kabiji Yehoba uji na bulume bukatampe kukila bandemona. Lesa kechi waswishishe Satana kwipaya Yoba ne. (Yoba 2:6) Mu moba a Mosesa, Yehoba wamwesheshe kuba’mba wajinga na bulume kukila bañanga bapandanga manga bajinga mu Ijipita. (Lupu. 8:18; 9:11) Yesu byo bamupele bulume kwi Yehoba, wamwesheshe kuba’mba uji na bulume kukila Satana ne bandemona byo ebatayile pano pa ntanda kufuma mwiulu. Kabiji katatakatu bakebataye mu kalengwa kabula kupela mo bakabula ngovu ya kumanyika bantu.—Lum. 12:9; 20:2, 3.
15 Twimwena bishiino bimwesha’mba Yehoba uzhikijila bantu banji lelo jino. Akilangulukai pa kino: Tubena kusapwila ne kufunjisha bukine monse mwapela ntanda. (Mat. 28:19, 20) Na mambo a uno mwingilo, tusolola mingilo yatama ya kwa Diabola. Kwambatu kine, inge kya kuba Satana wajinga na bulume, inge walekesha mwingilo wetu, pano wakankalwa. Onkao mambo, kechi twafwainwa kuchina bapashi batama ne. Twayuka kuba’mba “meso a Yehoba atalatala pano pa ntanda ponse kuba’mba amweshe bulume bwanji na mambo a boba bamuketekela na muchima wabo yense.” (2 Moba 16:9) Inge twaikala ba kishinka kwi Yehoba, bandemona kechi bakakonsha kwitumanyika ne.
YEHOBA UPESHA BANTU BASWA BUKWASHO BWANJI
16-17. Shimikizhaipo byachinchikile nyenga umo pa kukana bapashi batama.
16 Twafwainwa kuchinchika pa kuba’mba tukane bapashi batama, kikatakata inge balunda netu nangwa balongo betu betwimena ku ntundwa. Bino Yehoba upesha boba bachinchika. Akilangulukai pa byaubile nyenga Erica wikala mu Ghana. Ba Erica bajinga na myaka 21 kimye kyo baswile kufunda Baibolo. Na mambo a kuba’mba bashabo bajinga bantangi ba chechi kabiji baubanga bya bulozhi, baketekejilenga’mba ba Erica nabo basa kupopwelangako mipashi kwavwangilemo kuja nyama yo batapisha ku balesa bapopwelanga bashabo. Ba Erica byo bakaine, balongo babo bamwenenga’mba bauba mwenga balesa babo. Kino kisemi kyaitabijile kuba’mba balesa babo bakebakambula na kikola kya ku bongo ne bikolatu bikwabo.
17 Ba Erica bebakanjikizhe ku balongo babo kwivwangamo mu kino kisho, pano bino, bakaine nangwa kya kuba bayukile’mba basakwibapanga pa nzubo. Bayile na kwikala na Bakamonyi bamo. Mu jino jishinda, Yehoba wapesheshe ba Erica ne kwibapa kisemi kikwabo, ko kuba’mba bakwabo ba mu lwitabilo kabiji baikeletu nobe bakolojabo ne bankasabo babalume ne babakazhi. (Mako 10:29, 30) Nangwa kya kuba balongo babo bebakaine ne kwibasokela bipe byabo, ba Erica batwajijile kwikala ba kishinka kwi Yehoba kabiji babatizhiwe, kabiji luno ke bapainiya ba kimye kyonse. Kechi bachina bandemona ne. Baambile pa balongo babo amba: “Ndomba kimye kyonse kuba’mba balongo bami bakemwene mapesho afuma mu kuyuka Yehoba ne kwikala na bwana bwa bene bufuma mu kwingijila Lesa wa butemwe.”
18. Ñanyi mapesho afuma mu kuketekela mwi Yehoba?
18 Atweba bamo kechi tukapita mu lweseko lwa uno mutundu ne. Pano bino, atweba bonse twafwainwa kukana bapashi batama ne kuketekela mwi Yehoba. Umvwe twauba bino, tukatambula mapesho avula, kabiji bubela bwa kwa Satana kechi buketutwala mungi ne. Kikwabo, kechi tukachinanga bandemona ne. Ne kyakilamo kunema, tukakosesha bulunda bwetu ne Yehoba. Mwana wa bwanga Yakoba wanembele’mba: “Nekenenainga Lesa; pakuba Diabola mukanai ne aye ukemunyema. Fwenyai kwipi ne Lesa, ne aye ukafwenya kwipi ne anweba.”—Yako. 4:7, 8.
LWIMBO 150 Mukebai Lesa pa Kuba’mba Mukapuluke
^ jifu. 5 Yehoba witujimunako pa bapashi batama ne byatama byo bakonsha kuba. Bapashi batama batwala byepi bantu mungi? Twafwainwa kuba byepi pa kuba’mba tukane bapashi batama? Uno mutwe waamba pa mashinda Yehoba o etukwashishamo pa kuba’mba babule kwitutwala mungi ku bapashi batama.
^ jifu. 3 KULUMBULULA BYAMBO: Kupopwela mipashi kulumbulula kwitabila mu bandemona ne kuba bintu bitundaika bandemona. Kyavwangamo kwitabila’mba mipashi ya bantu bafwa itwajijila kwikalako inge mubiji wafwa, kabiji amba isamba na bantu bomi kikatakata kupichila mu muntu umo nangwa kintutu kikwabo. Kupopwela mipashi kwavwangamo ne byubilo bikwabo nabiji bulozhi ne kuponga. Kwesakana na byo bekingijisha mu uno mutwe, kyambo kya kuba’mba bulozhi kyavwangamo kupanda manga nangwa bingelekezha. Kabiji kyavwangamo mafingo nangwa kulowañana. Kechi kibena kulumbulula kwingijisha maboko kuba bantu bamo mu bya kisangajimbwe ne.
^ jifu. 12 Bakulumpe mu kipwilo kechi baji na luusa lwa kulenga mizhilo ya bya kisangajimbwe ne. Bino mwina Kilishitu yense uji na luusa lwa kwingijisha jiwi janji ja mu muchima jo afunjisha na Baibolo pa kusala bintu byo afwainwa kutanga, kutamba nangwa kukayako. Mitwe ya bisemi yafwainwa kumona kuba’mba ba mu bisemi byabo babena kulondela mafunde a mu Baibolo pa kusala bya kisangajimbwe.—Monai kibaaba kya pa jw.org® kya kuba’mba “Nanchi Mukanya Bantu Kutamba Mafilimu amo, Kutanga Mabuku amo Nangwa Kuteleka ku Nyimbo imo Nyi?” pa kipungu kya kuba’mba BAKAMONYI BA KWA YEHOBA > MEPUZHO EPUZHA BANTU JAVULA.
^ jifu. 54 KULUMBULULA BIPIKICHALA: Kipikichala kibena kumwesha Yesu saka aji mfumu wa bulume mwiulu kabiji ubena kutangijila nzhita ya bamalaika. Baji munshi ya jitanda ja Yehoba.
