1-2. Mambo ka muchima wa kwa Yesu o amukatezhe?

PA JUBA japeleleko pano pa ntanda, muchima wamukatezhe bingi Yesu. Kimye kyafwenyenyenga pepi kya kumwipaya lufu lwatama ku banabalume bajinga babi. Pano bino, Yesu kechi waakaminwetu na mambo a kuba’mba basakumwipaya ne. Watemenwe bingi Shanji kabiji wakebelenga kumutokesha ku muchima. Yesu wayukile’mba inge watwajijila kwikala wa kishinka mu meseko aishilenga, ukabingisha jizhina ja Yehoba. Kabiji Yesu watemenwe bantu kabiji wayukile’mba bumi bwabo bwa myaka ne myaka bwaimenejile pe aye kutwajijila kwikala wa kishinka kufikatu ne ku lufu.

² Nangwa kya kuba Yesu wajinga bingi na bijikila, bino wajinga na mutende. Wabuujile batumwa banji amba: “Nemupa mutende wami.” (Yoa. 14:27) Wajinga na “mutende wa Lesa,” ko kuba’mba mutende wikala na muntu na mambo a kwikala na bulunda bwawama ne Yehoba. Uno mutende ye walengejile Yesu kubula kwakamwa.—Fili. 4:6, 7.

3. Ñanyi bintu byo tusakwisambapo mu uno mutwe?

³ Kechi tukapita mu makatazho onka apichilemo Yesu ne, pano bino, bonse balondela Yesu bakapita mu meseko. (Mat. 16:24, 25; Yoa. 15:20) Ne atweba muchima uketukatazha byonka byo kyajinga kwi Yesu. Twakonsha kuba byepi pa kuba’mba tubule kukizhamo kwikala na bijikila ne kwitulengela kubula kwikala na mutende wa mu muchima? Twayai twisambe pa bintu bisatu byaubile Yesu kimye kyo aingijilenga mwingilo wanji pano pa ntanda ne kufunjilako byo twakonsha kumulondela inge ke tupite mu meseko.

4. Kwesakana na byaamba 1 Tesalonika 5:17, ambaipo bimo bimwesha’mba Yesu walombele bimye byavula bingi juba japeleleko saka bakyangye kumwipaya?

⁴ Tangai 1 Tesalonika 5:17. Yesu walombele bimye byavula bingi juba japeleleko pano pa ntanda. Byo atendekeshe kijiilo kya kuvuluka lufu lwanji, walombele pa shinkwa ne pa binyu. (1 Ko. 11:23-25) Saka bakyangye kufuma mo baikejile na Kijiilo kya Lupitailo, Yesu walombejile pamo na baana banji ba bwanga. (Yoa. 17:1-26) Kabiji Yesu ne baana banji ba bwanga byo bafikile ku Mutumba wa Maolivi bufuku, walombele pa bimye byavula bingi. (Mat. 26:36-39, 42, 44) Kabiji byambo byapeleleko byo aambile saka akyangye kufwa, wibyambile mu lulombelo. (Luka 23:46) Yesu walombelenga kwi Yehoba pa bintu byonse byamwekele pa juba japeleleko ja bumi bwanji pano pa ntanda.

5. Mambo ka batumwa o bakankejilwe kuchinchika?

⁵ Kishinka kimo kyalengejile Yesu kuchinchika lweseko ke kya kuba’mba waketekejile mwi Shanji kabiji wamwesheshe kino kupichila mu kulomba javula kwi aye. Pano bino, batumwa banji bobwa bufuku bakankelwe kutwajijila na kulomba. Kyafuminemo, bakankelwe kuchinchika kimye kya lweseko. (Mat. 26:40, 41, 43, 45, 56) Twakonsha kutwajijila kwikala ba kishinka mu kimye kya meseko inge twalondela byaubile Yesu, ko kuba’mba “kutwajijila na kulomba.” Ñanyi bintu byo twakonsha kulombapo?

6. Lwitabilo luketukwasha byepi kutwajijila kwikala na mutende?

⁶ Twakonsha kulomba kwi Yehoba kuba’mba ‘avuzhe lwitabilo lwetu.’ (Luka 17:5; Yoa. 14:1) Twafwainwa kwikala na lwitabilo mambo Satana ukeseka bonse balondela Yesu. (Luka 22:31) Lwitabilo luketukwasha byepi kwikala  na mutende nangwa kya kuba tubena kupita mu makatazho a misango ne misango? Inge twaingila papelela bulume bwetu kushinda meseko, lwitabilo luketukwasha kushila byonse mu maboko a Yehoba. Mambo twaketekela’mba wayuka bya kuba na makatazho o tubena kupitamo, twikala na mutende wa mu milanguluko ne mu muchima.—1 Pe. 5:6, 7.

7. Mwafunjilako ka ku byaambile ba Robert?

⁷ Milombelo itukwasha kutwajijila kwikala na mutende wa mu muchima nangwatu tupite mu meseko a mutundu ka. Akilangulukai pa byaubile mukulumpe mu kipwilo wa kishinka uji na myaka ya mu ma 80 aye Robert. Waambile’mba: “Lujimuno luji pa Filipai 4:6, 7 lwankwasha kuchinchika meseko avula mu bwikalo bwami. Pa kimye kimo kechi najinga na mali ne. Kabiji nalekelepo ne mwingilo wa bukulumpe mu kipwilo pa kimye kicheche.” Ñanyi kintu kyakwashishe ba Robert kutwajijila kwikala na mutende wa mu milanguluko? Baambile’mba: “Nalombanga kimye kyonse inge natendeka kwikala na bijikila. Kulomba na mukoyo kimye kyonse kundengela kwikala na mutende.”

8. Kwesakana na byaamba Yoano 8:29, ñanyi kintu kikwabo kyalengejile Yesu kwikala na mutende wa mu milanguluko?

⁸ Tangai Yoano 8:29. Yesu watwajijile kwikala na mutende wa mu milanguluko nangwa kya kuba bamumanyikilenga, mambo wayukile kuba’mba wasangajikilenga muchima wa Shanji. Watwajijile kukookela nangwatu pa kimye po kyakatezhe bingi. Watemenwe Shanji kabiji kwingijila Yehoba kyo kintu kyo anemekele bingi mu bwikalo bwanji. Saka akyangye  kwiya pano pa ntanda, wajinga “sendwe” wa Lesa. (Maana 8:30) Kabiji byo ajinga pano pa ntanda, wafunjishanga bantu pe Shanji na mukoyo. (Mat. 6:9; Yoa. 5:17) Uno mwingilo waletelanga Yesu lusekelo lukatampe.—Yoa. 4:34-36.

9. Kupayankana mu mwingilo wa kusapwila kwakonsha kwitukwasha byepi kutwajijila kwikala na mutende wa mu milanguluko?

⁹ Twakonsha kulondela Yesu kupichila mu kukookela Yehoba ne kwikala “na bya kuba byavula mu mwingilo wa Nkambo.” (1 Ko. 15:58) Inge ‘twateshako bingi muchima’ ku mwingilo wa kusapwila, kechi tukakakilwanga na mambo a makatazho ne. (Byu. 18:5) Bantu bo tutaana mu mwingilo javula bapita mu makatazho akatampe kukila ne o tupitamo. Pano bino, inge bafunda kutemwa Yehoba ne kwingijisha byo bafunda mu bwikalo bwabo, bekala na lusekelo. Inge twamona byo bekala na lusekelo, tushiinwa kuba’mba Yehoba uketukwashanga. Kabiji kushiinwa bino kuketukwasha kwikala na mutende wa mu milanguluko. Nyenga umo walangulukanga’mba kechi wanema ne, kabiji wajinga na bijikila pa kimye kyabaya waambile’mba: “Inge napayankana mu mwingilo wa kusapwila, binyenge bikepako kabiji ngikala na lusekelo. Namona kikala bino na mambo a kuba’mba inge nji mu mwingilo, ñumvwa’mba Yehoba uji pepi ne amiwa.”

10. Mwafunjilako ka ku byaambile ba Brenda?

¹⁰ Kabiji akilangulukai pa byuba nyenga wa jizhina ja Brenda. Aye ne mwananji wamukazhi baji na kikola kyatama bingi. Ba Brenda kechi benda ne, bendelatu pa kakinga ka bilema kabiji kechi baji na bulume bwa kwingila mingilo yakosa ne. Onkao mambo, bimye bimo basapwila ku nzubo ku nzubo, pano bino, javula basapwila busapwishi bwa kutuma makalata. Baambile’mba: “Nayukile kuba’mba kikola kyami kechi kikapwa ne, onkao mambo, natele muchima pa mwingilo wa kusapwila. Kusapwila kundengela kuvulama ku bijikila byami. Kunkwasha kuta muchima pa kukwasha bantu bo ntaana mu nyaunda ya kipwilo kyetu. Kabiji kusapwila kumvululamo pa luketekelo lwa bwikalo bwa kulutwe.”

11-13. (a) Batumwa ne bantu bakwabo baikele byepi balunda bawama ne Yesu? (b) Balunda nanji Yesu bamulengelanga kumvwa byepi?

¹¹ Kimye Yesu kyo aingijilenga mwingilo wa kusapwila, batumwa banji ba kishinka bo bajinga balunda nanji ba kine. Bajinga balunda bo balumbulula mu Byambo bya Maana amba: “Kuji mulunda wa kishinka wakila ne mulongo.” (Maana 18:24) Yesu wanemekele bingi bano balunda nanji. Kimye kyo aingijilenga mwingilo wanji, kafwako mulongo wanji wamwitabijile ne. (Yoa. 7:3-5) Pa kimye kimo, balongo banji balangulukilenga ne kuba’mba wakonya. (Mako 3:21) Pakuba Yesu wabuujile batumwa banji ba kishinka bufuku bwapeleleko saka bakyangye kumwipaya amba: “Anweba yenu mwatwajijila kwikala pamo ne amiwa mu makatazho ami.”—Luka 22:28.

¹² Pa bimye bimo, batumwa bamufichishanga ku muchima Yesu, pano bino, kechi watele muchima pa bintu byo balubankanyanga ne, mambo wayukile’mba bamwitabijile. (Mat. 26:40; Mako 10:13, 14; Yoa. 6:66-69) Bufuku bwapeleleko saka bakyangye kumwipaya, Yesu wabuujile bano banabalume ba kishinka amba: “Nemutela’mba balunda nami, mambo bintu byonse byo naumvwine kwi Batata nemubulabyo.” (Yoa. 15:15) Kwa kubula nangwa kuzhinaukatu ne, balunda nanji Yesu bamutundaikanga bingi. Luno lutundaiko lwamulengejile kwingila mwingilo wanji na lusekelo.—Luka 10:17, 21.

¹³ Kununga pa batumwa, Yesu wajinga ne na balunda bakwabo, banabalume ne banabakazhi  bamukwashangako mu mwingilo wa kusapwila ne mu mashindatu akwabo. Bamo bamwitanga ku mazubo abo pa kuba’mba bajiile nanji pamo kajo. (Luka 10:38-42; Yoa. 12:1, 2) Bamo bayanga nanji konse ko ayanga ne kumupapo bintu byabo. (Luka 8:3) Yesu wajinga na balunda bamukwashanga, mambo nabo bayukile’mba wibakwashanga. Wibobilanga bintu byawama kabiji kechi wibakebelanga kuba bintu byakila pa bulume bwabo ne. Yesu wajinga muntu walumbuluka, pano bino, wasantanga pa bukwasho bwamukwashanga balunda nanji bajinga bambulwa kulumbuluka. Kabiji kwa kubula nangwa kuzhinauka ne, bamukwashishe kutwajijila kwikala na mutende wa mu milanguluko.

14-15. Twakonsha kuba byepi pa kuba’mba twikale na balunda bawama, kabiji balunda netu bakonsha kwitukwasha byepi?

¹⁴ Balunda bawama baketukwasha kutwajijila kwikala ba kishinka kwi Yehoba. Kabiji pa kuba’mba mwikale na balunda bawama, mwafwainwa kwikala mulunda wawama. (Mat. 7:12) Baibolo witutundaika kwingijisha kimye ne ngovu yetu kukwasha bakwetu, kikatakata boba ‘bakajilwa.’ (Efi. 4:28) Nanchi mwakonsha kulangulukapo muntu umo mu kipwilo kyenu ye mwakonsha kukwasha nyi? Abya mwakonsha kuya na kupotelako bintu musapwishi wakolwa nangwa wakota ukankalwa kwenda nyi? Nanchi mwakonsha kupapo kajo kisemi kyabula mali nyi? Inge mwayuka bya kwingijisha keyala wa jw.org^® ne JW Library^® app, nanchi mwakonsha kukwashako bakwenu mu kipwilo kufunda bya kwibingijisha nyi? Inge twata muchima pa kukwasha bakwetu, tukekala bingi na lusekelo.—Byu. 20:35.

¹⁵ Balunda netu baketukwashanga inge ketupite mu meseko, ne kwitukwasha kutwajijila kwikala na mutende wa mu milanguluko. Byonkatu Elihu byo atelekele kimye kyaambilenga  Yoba pa meseko o apichilengamo, balunda netu betukwasha kupichila mu kuteleka inge tubena kwibabuula makatazho o tubena kupitamo. (Yoba 32:4) Pano bino, kechi twafwainwa kuleka balunda netu kwitufuukwila bya kuba ne, bino twafwainwa kumvwina lutundaiko lwabo lwa mu Binembelo. (Maana 15:22) Byonkatu Mfumu Davida byo aswile bukwasho kufuma ku balunda nanji, ne atweba twafwainwa kwipelula ne kuswa bukwasho bufuma ku balunda netu inge twakajilwa. (2 Sam. 17:27-29) Kine, balunda ba uno mutundu ke bupe bwafuma kwi Yehoba.—Yako. 1:17.

16. Kwesakana na Filipai 4:6, 7, ñanyi jishinda jimotu jakonsha kwitukwasha kwikala na mutende wa mu milanguluko? Lumbululai.

¹⁶ Tangai Filipai 4:6, 7. Mambo ka Yehoba o etubuujila’mba twakonsha kwikala na mutende ye apana “kupichila mwi Kilishitu Yesu”? Mambo twakonshatu kwikala na mutende wa mu milanguluko ne mu muchima inge twayuka ne kwikala na lwitabilo mu mwingilo wa kwa Yesu mu kufikizha kyaswa muchima wa Lesa. Na mambo a kitapisho kya bukuzhi kyapaine Yesu, mambo etu onse akonsha kulekelwa. (1 Yoa. 2:12) Kuyuka kino kishinka kwitutekenesha bingi. Byo aji Mfumu wa Bufumu bwa Lesa, Yesu ukafumyapo makatazho onse aleta Satana ne ntanda yanji. (Isa. 65:17; 1 Yoa. 3:8; Lum. 21:3, 4) Kino kitulengela kwikala na luketekelo lwakosa mu milaye ya kulutwe. Kabiji nangwa kya kuba Yesu witupa mwingilo wabaya bingi, bino uji ne atweba, kabiji ukatwajijila kwitukwasha kufikatu ne ku mpelo ya buno bwikalo. (Mat. 28:19, 20) Kino kitukosesha bingi. Lutekenesho, luketekelo, ne kuchinchika, byo bitukwasha kwikala na mutende wa mu milanguluko.

17. (a) Mwina Kilishitu wakonsha kutwajijila byepi kwikala na mutende wa mu milanguluko? (b) Kwesakana na mulaye uji pa Yoano 16:33, ñanyi kintu kyo twakonsha kuba?

¹⁷ Pano mwakonsha kwikala byepi na mutende inge mubena kupita mu meseko akatampe? Mwakonsha kuba bino kupichila mu kulondela byaubile Yesu. Kitanshi, mwafwainwa kulombanga na mukoyo. Kya bubiji, kookelainga Yehoba ne kusapwila na mukoyo nangwatu inge kyakatazha kuba byobyo. Kya busatu, tambwilainga bukwasho bufuma ku bakwenu. Kepo mutende wa Lesa akalama milanguluko ne muchima wenu. Kabiji byonka byaubile Yesu, ne anweba mukashinda meseko onsetu.—Tangai Yoano 16:33.