Ba Winston, tubuulaiko byo mwakebele Lesa.

Nakomejile pa bujimi bwaikejile kwalepa bingi mu muzhi wa Queensland, mu kyalo kya Australia. Kisemi kyetu kechi kyapopwelanga Lesa ne. Na mambo a kwikala kwalepa, kechi napwanañanangapo na bantu bakwabo ne, kanatu ba mu kisemi kyetu. Byo nafikizhe myaka nobe 12, natendekele kukeba Lesa. Nalombele kwi aye kuba’mba ankwashe kuyuka bukine pe aye. Mu kuya kwa kimye, nafuminepo pa bujimi po twaikalanga kabiji nataaine nkito mu muzhi wa Adelaide, ku South Australia. Byo nafikizhe myaka 21, namonañene ne ba Pam byo nayile na kufwakasha mu muzhi wa Sydney, kabiji bambuujile’mba kwajinga jibumba ja bupopweshi bwa bena Britain, bamba’mba bena Britain bafumine mu mikoka ya bena Isalela. Jino jibumba ja bupopweshi jamba’mba ino mikoka ya bena Isalela ke mikoka jikumi yajinga mu bufumu bwa ku buyuke bo batwajile mu buzha mu myaka pakachi ka 700 ne 800 B.C.E. Onkao mambo, byo nabwelele ku Adelaide natendekele kwamba pa uno mutwe na mukwetu ye naingilanga nanji nkito wafundanga Baibolo na Bakamonyi ba kwa Yehoba. Byo twisambileko pa maola acheche pa byaitabilamo Bakamonyi, namwene kuba’mba lulombelo lwami lo nalombanga kufumatu ku bwanyike lwakumbwilwe. Natendekele kufunda bukine pa Mulenga wami ne pa Bufumu bwanji. Nataaine ‘mangalite ufwa mali avula.’—Mat. 13:45, 46.

Ba Pam, ne anweba mwatendekele kukeba mangalite ufwa mali avula saka mukijitu banyike. Mwamutaaine byepi?

Nakomejile mu kisemi kyatemenwe bya bupopweshi mu muzhi wa Coffs Harbour, ku New South Wales. Bansemi bami ne bankambo baitabijile mafunjisho a jibumba ja bupopweshi ja bena Britain betelanga’mba bena Isalela. Amiwa, nkasami wamulume, bakolojami babakazhi, ne bavyala bami  bavula bingi, twaitabijile kuba’mba Lesa upeshatu bantu baji na bashakulu babo bafumine ku Britain. Pano bino, nazhinaukanga luno lwitabilo, kabiji namonanga’mba Lesa kechi uji pepi ne amiwa ne. Byo nafikizhe myaka 14, nayile mu machechi apusana-pusana, nabiji chechi wa Anglican, wa Baptist, ne wa Seventh-day Adventist. Pano bino, kechi bankwashishe kuyuka Lesa ne.

Kisemi kyetu kyavilukijile ku Sydney ko nakamonañene ne ba Winston, kimye kyo bayile na kufwakasha. Byonkatu byo baamba, na mambo a kwisamba pa bya bupopweshi, batendekele kufunda Baibolo na Bakamonyi. Mu kuya kwa kimye, mu makalata o bantuminanga banembangamo binembelo byavula bingi. Kwambatu kine, pa kimye kitanshi, naakaminwe kabiji nazhingijile bingi. Bino mu kuya kwa kimye, namwene kuba’mba bintu byo banembanga byajinga bya kine pe Lesa.

Mu 1962, nayile ku Adelaide kuba’mba nkekalenga kipikipi ne ba Winston. Banengezhezhe kuba’mba nkekalenga na bamulume ne mukazhi bajinga Bakamonyi, abo ba Thomas ne ba Janice Sloman. Bano bantu bajinga bamishonale mu Papua New Guinea. Bammwesheshe kifyele kikatampe, kabiji pa kyokya kimye najingatu na myaka 18, kabiji bankwashishe kuyuka byavula pe Yehoba. Ne amiwa natendekele kufunda Mambo a Lesa, kabiji kechi pabanjile ne, nashiinwe kuba’mba nataana bukine. Byo twatwelele mu masongola ne ba Winston, twipaine ne kutendeka kwingijila Lesa, kabiji uno mwingilo witukwashishe kunemeka bingi mangalite ye twataaine nangwa kya kuba’mba twapitanga mu meseko.

Ba Winston, tubuulai bwikalo bwenu byo bwajinga byo mwatendekeletu kwingijila Yehoba.

Amiwa ne ba Pam byo twatweleletu mu masongola, Yehoba witushinkwijile “kibelo kikatampe” kya mwingilo. (1 Ko. 16:9) Witushinkwijile kibelo kitanshi kya mwingilo kupichila mu Mulongo Jack Porter, wajinga kalama wa mwanzo, kabiji waishile na kufwakesha kipwilo kyetu kyajingatu kicheche. (Luno tuji bonse mu Kavoto ka Musampi ka mu Australasia.) Ba Jack ne benakwabo ba Roslyn, betutundaikile kutendeka bupainiya bwa kimye kyonse, kabiji twaingijile uno mwingilo pa myaka itanu. Byo nafikizhe myaka ya kusemwa 29, bampele mwingilo wa bukalama bwa mwanzo kabiji betutumine kuya na kwingijila pa makuji a pa South Pacific o batangijilanga ku ofweshi wa musampi wa Fiji. Ano makuji ajinga American Samoa, Samoa, Kiribati, Nauru, Niue, Tokelau, Tonga, Tuvalu, ne Vanuatu.

Mu oa moba, bantu pa ano makuji bachinanga bingi Bakamonyi ba kwa Yehoba mambo kechi bebayukile bulongo ne. Onkao mambo, twajimukile pa kwingila mwingilo wetu. (Mat. 10:16) Bipwilo kechi byajinga na basapwishi bavula ne, kabiji pa bipwilo bimo bakankalwanga ne kwitukebela pa kulaala. Onkao mambo, twayanga na kukeba kwa kufikila mu mizhi, kabiji bantu bajinga na michima yawama bingi.

Ba Winston, mwatemwa bingi mwingilo wa kutuntulula mabuku. Ñanyi kintu kimulengejile kutemwa uno mwingilo?

Pa kyokya kimye, balongo pa jikuji ja Tonga bajingatu na matalakiti ne tubuku tucheche mu mulaka wa Tonga, mulaka ye bamba pa makuji a Polynesia. Mu mwingilo baingijishanga buku wa Kizungu ye bafunjishangamo bantu wa kuba’mba The Truth That Leads to Eternal Life (Bukine Butangijila ku Bumi bwa Myaka ne Myaka). Onkao mambo, kimye kyo twajinga na sukulu wa bakulumpe mu kipwilo wa moba ana, bakulumpe basatu bayukileko Kizungu pacheche baswile kutuntulula buku wa Bukine mu mulaka wa Tonga. Ba Pam bo bataipile byonse ne kutuma ku ofweshi wa musampi wa United States kuba’mba bapulinte. Uno mwingilo bamwingijile mu bañondo babiji. Nangwa kya kuba ntuntulwilo kechi yawamishetu ne, bino uno buku wakwashishe bantu bavula bamba mulaka wa Tonga kufunda bukine. Amiwa ne ba Pam kechi twibantuntuluzhi ne, bino kwingilako uno mwingilo kwandengejile kumutemwa bingi.

Ba Pam, bwikalo bwa pa makuji bwapusene byepi na bwikalo bwa ku Australia?

Bwikalo bwapuseneko bingi. Ku mapunzha amo kwajinga bingi mwañenze, kukwabo kwatwa bingi kyuya, kwajinga bakoswe bavula, twakolwanga,  kabiji bimye bimo kechi twaikalanga na kajo kavula ne. Pano bino, pa kuzhika juba twaumvwanga bingi bulongo inge twaikala mu kazubo ka nsono kabujile lubumbulu ko batela pa jikuji ja Samoa amba fale saka tubena kukookoloka ne kutala mwaya kalunga ka mema. Bimye bimo bufuku ñondo wasamanga bingi kya kuba twamona ne bichi bya tumbiji. Pa bino bimye, twalangulukanga pa bintu byawama ne kulomba, kechi kulanguluka pa byatama byo twapichilengamo ne.

Twatemenwe bingi baana kabiji nabo baumvwanga bingi bulongo pa kwitumona atweba bazungu bafumine ku kyalo kingi. Juba jimo byo twayilenga na kufwakesha jikuji ja Niue, mwanyike umo wakwachile pa masense aji ku mikoko ya ba Winston ne kwamba’mba, “Mayona enu awama bingi.” Kyamweka kechi wamwenepo kala muntu uji na masense avula ku maboko ne, kabiji kechi wayukile byo beatela ne.

Kitukolanga bingi ku muchima kumona bantu byo bayanjile bingi ne bwikalo byo bwakatezhe. Mapunzha abo awama bingi, pano bino, kechi kwajinga bipatela ne mema awama a kutoma ne. Pano bino, balongo ne banyenga kechi bajinga na binyenge ne. Kwi abo buno bwikalo bwajingatu bulongo. Bajinga bingi na lusekelo kwikala pamo na bisemi byabo ne kupopwela Yehoba pamo. Byubilo byabo bitukwashishe kuta muchima pa bintu byanema ne kupeezhako bwikalo.

Ba Pam, bimye bimo mwitapwilanga mema ne kwitekela kajo anweba bene mu mashinda o mwabujile kuyuka kala ne. Mwaubanga byepi bino?

Nsanchila bingi batata pa kumfunjisha bintu byavula. Bamfunjishe bintu nabiji bya kuteka kajo pa nkunyi ne kubula kwikala na kisuse kya bintu. Byo twayile na kufwakesha jikuji ja Kiribati, twaikelenga mu kazubo kacheche ka musemi wa nsono, mo babikile mabwe awama panshi, ne lubumbulu wa nsununu. Pa kuba’mba nteke kajo, napoyile kakimbo ka kubanzhilamo mujilo panshi monka mu kazubo, kabiji bipu bya nkunde ya koko byo byo nabanzhilanga mujilo. Pa kutapula mema nayanga na kutantama mu munongo ku mushima. Pa kuba’mba batapule mema, baingijishanga kichi kyalepa kyo bakashilako lutambo kwapela kyo balengele nobe kanda. Ku uno lutambo ko ko bakashijile kabekete. Mwanamukazhi umo inge watapula mema, pabwela mukwabo. Kabekete bekapinunanga pa kuba’mba katapule mema. Namwenenga nobe kyapelatu, kufika ne kimye kyami byo kyafikile. Naesekele pa bimye byavula bingi, bino kabekete kechi katapwilenga mema ne, katumpaukilengatu peulu. Bonse byo bapwishishe kunseka, inetu umo waishile na kunkwasha. Bano bantu bankwashanga bingi kabiji bajinga na lusa.

Bonse babiji mwatemenwe mwingilo ye mwaingijilenga pa makuji. Mwakonsha kwitushimikizhako byawama byamwekele byo mukivuluka nyi?

Ba Winston: Pabanjileko pa kuba’mba tufunde bisho bimo. Bimye bimo balongo betupangatu kajo konse ko banengezhanga. Kimye kitanshi, kechi twayukile’mba twafwainwe kwibashilapo inge twapwisha kuja ne. Onkao mambo, twajangatu kajo konse ko betupanga. Pano bino, byo twayukile kisho kyabo, twibashilangapo. Nangwa kya kuba twalubankanyanga, bino balongo bayukile’mba kechi twayukile kisho kyabo ne. Kabiji baumvwanga bingi bulongo kwitumona inge papita bañondo batanu na umo nangwa inge twaya na kufwakesha bipwilo. Yetu bonka Bakamonyi bafumine ku kyalo kingi bo bayukile pa kyo kya kimye.

Kufwakasha kwetu nako kwashimunanga bukamonyi mu manyaunda. Bantu bavula mu mizhi balangulukanga’mba bupopweshi bwa balongo bwajingatu bwa kwitendekela abo bene. Onkao mambo, mulongo wa ku kyalo kingi ne mwinakwanji inge wafwakesha balongo, bantu mu mizhi bamonanga’mba Bakamonyi bupopweshi bwa kine muji bantu bata bakwabo muchima, kabiji kino kibatundaikanga bingi.

Ba Pam: Kintu kimo kyawama kyo mvuluka ke kyamwekele pa jikuji ja Kiribati, pajinga kipwilo kyajingatu na basapwishi bacheche. Mukulumpe mu kipwilo umotu wajinga, Mulongo Itinikai Matera, waingilanga papelejile bulume bwaji kwitukebela bikebewa. Juba jimo, waishile na ntumbe mwajinga jike jimo ja nzolo. Waambile’mba: “Nemuletelapo jike.” Make a banzolo kechi amweka  mwekanga pa kyokya kimye ne. Twasanchile bingi pa buno bupe.

Ba pam, byo papichile myaka, jiimi ja japitayijile. Ñanyi kintu kimukwashishe kuchinchika?

Nanemene pa muchima mu 1973 kimye kyo twajinga pa makuji a pa South Pacific. Twafuukwilepo kubwela ku Australia, bino byo papichiletu bañondo bana, mwana wapitayijile. Ba Winston nabo bajinga bingi na bulanda pa uno mwanabo wapitayijile. Bulanda bwayilenga na kukepa pachepache, bino kechi bwapwile ne, kufikatu byo twatambwile Kyamba kya Usopa kya April 15, 2009. Mu kibaaba kya “Mepuzho Afuma ku Batanga” mwajinga bwipuzho bwa kuba’mba: “Nanchi mwana wafwila munda mwainanji ukasangulwa nyi?” Kino kibaaba kitukwashishe kuyuka’mba Yehoba ye ukafuukulapo bya kuba kabiji kimye kyonse uba byaoloka. Ukafumyapo bintu byonse byatama bitukozha ku muchima mu ino ntanda yatama byo akatangijila Mwananji kwiya na ‘konauna mingilo ya kwa Satana.’ (1 Yoa. 3:8) Kabiji kino kibaaba kitukwashishe ne kunemeka “mangalite” ufwa mali avula ye tuji nanji atweba bantu ba Yehoba. Inge kya kuba kechi twajinga na luketekelo lwa Bufumu ne, twakonsha kwikala byepi?

Mwanetu byo aonaikile, twatendekele jikwabo mwingilo wa kimye kyonse. Twaingijileko pa bañondo bacheche pa Betele mu Australia kabiji mu kuya kwa kimye, twatendekele jikwabo mwingilo wa mu mwanzo. Mu 1981, byo twaingijile myaka ina mu mapunzha a mu mizhi ku New South Wales ne mu muzhi wa Sydney, betwichile kuya pa musampi watelwanga’mba Australia pa kyokya kimye, kabiji ne luno popo tuji.

Ba Winston, nanchi byo mwapichilemo pa makuji a pa South Pacific po mwaingijilanga bimukwashishe byo mwaikele mu Kavoto ka Musampi wa Australasia nyi?

Ee, mu mashinda avula. Patanshi, musampi wa Australia bamupele mwingilo wa kutangijila jikuji ja American Samoa ne ja Samoa. Kepo musampi wa New Zealand ne wa Australia beivwangile pamo. Pa luno, musampi wa Australasia utangijila mwingilo mu nyaunda yavwangamo Australia, American Samoa ne Samoa, makuji a Cook Islands, New Zealand, Niue, Timor-Leste, Tokelau, ne Tonga, kabiji pa ano makuji avula nakiyapo kala na kwiafwakesha kwimenako musampi. Bintu byo nafunjile pa kwingila na balongo ne banyenga ba kishinka pa ano makuji byankwasha bingi mu mwingilo wami pa ofweshi wa musampi.

Lekai mpezheko na byambo bya kuba’mba amiwa ne ba Pam bintu byo twapitamo bitufunjisha kuba’mba bakulumpe kechi bo bonkatu bakeba Lesa ne. Ne banyike nabo bakeba ‘mangalite ufwa mali avula’ nangwa kya kuba balongo babo kechi bakeba kuyuka Lesa ne. (2 Mfu. 5:2, 3; 2 Moba 34:1-3) Kwambatu kine, Yehoba ke Lesa wa butemwe ukeba bonse, banyike ne bakulumpe kwikala na bumi bwa myaka.

Amiwa ne ba Pam byo twatendekele kukeba Lesa kala papita ne myaka 50, kechi twayukile bintu byo tukamwenamo mu kukeba mangalite ufwa mali avula ne. Kine, bukine bwa Bufumu ye mangalite ufwa mali avula. Kechi tukaleka kukakachila uno mangalite ufwa mali avula ne.