Byo kwashajiletu pacheche kufwa, mambo ka Yesu o aambijile pa byambo bya kwa Davida biji pa Salamo 22:1?

Yesu saka akyangye kufwa, waambile byambo byanembwa pa Mateo 27:46 bya kuba’mba: “Lesa wami, Lesa wami, mambo ka o mwanshila bunke?” Yesu byo aambile bino byambo, wafikizhe byambo bya nyimbi wa masalamo aye Davida byanembwa pa Salamo 22:1. (Mako 15:34) Kechi kyayilamo kwamba’mba Yesu waambile bino byambo mambo waumvwine kutama ku muchima nangwa’mba lwitabilo lwanji lwakepele pa kyo kya kimye ne. Yesu wayukile ene mambo o afwainwe kufwa kabiji wipaine kufwa. (Mat. 16:21; 20:28) Kabiji wayukile’mba kimye kya lufu lwanji, Yehoba ukaleka kumuzhikijila. (Yoba 1:10) Yehoba walekele kumuzhikijila pa kuba’mba Yesu amweshe’mba wakonsha kutwajijila kwikala wa kishinka kufika ne ku lufu.—Mako 14:35, 36.

Mambo ka Yesu o aambijile pa byambo biji mu uno salamo? Nangwa kya kuba kechi twayuka bishinka byonse ne, bino twayai twisambeko bimo byalengejile. *

Yesu byo aambile bino byambo, nanchi walumbulwilenga’mba Yehoba kechi ukamuzhikijila kimye kya lufu lwanji nenyi? Yesu wafwainwe kupana bukuzhi kwa kubula bukwasho bwa Yehoba. Wajinga muntu kabiji kyamufwainwe kufwa pa kuba’mba “atompele lufu bantu bonse.”—Hebe. 2:9.

Yesu byo aambile byambo bicheche biji mu uno salamo, nanchi wakebelenga bakwabo kulanguluka  pa byambo byonse biji mu uno salamo nyi? Mu kimye kyajingako Bayudea, bantu batemenwe kulabijila byambo byavula bya mu masalamo. Byo baumvwinetu kyepelo kimo kya mu salamo, ponkapotu bavulukile byambo byonse biji mu uno salamo. Umvwe kya kuba Yesu byo byo akebelenga kuba, ko kuba’mba wakwashishe Bayudea bamulondejilenga kuvuluka bungauzhi bwavula buji mu salamo bwaambile pa bintu byamwekele pa lufu lwanji. (Sala. 22:7, 8, 15, 16, 18, 24) Kabiji byepelo byapelako bya uno salamo byatakaika Yehoba ne kumulumbulula’mba ye Mfumu wa pano pa ntanda ponse.—Sala. 22:27-31.

Yesu byo aambile pa byambo bya kwa Davida, nanchi waambilenga’mba kechi walengelepo mambo nenyi? Yesu saka bakyangye kumwipaya, kije kikatampe kya Saniedilini kyamutotolwesheshe kwa kubula kulondela mizhilo ne kumuzhachisha na mambo a kuba’mba waubilenga Lesa mwenga. (Mat. 26:65, 66) Ba mu kije kya Saniedilini bakonkene bukiji bukiji bufuku na kutotolola mambo a kwa Yesu kwa kubula kulondela byaambile mizhilo. (Mat. 26:59; Mako 14:56-59) Yesu byo aipwizhe’mba “Lesa wami, Lesa wami, mambo ka o mwanshila bunke?” wafwainwa walumbululwilenga’mba kechi walengelepo mambo a kumwipayilapo ne.

Yesu byo avulwilemo bantu amba nangwa kya kuba nnembi wa uno salamo aye Davida bamuswishishe kumanama, nanchi kyalumbulwilenga’mba Yehoba walekele kumupesha nyi? Bwipuzho bwaipwizhe Davida kechi bumwesha’mba wabujile lwitabilo ne. Davida byo aipwizhe buno bwipuzho, wamwesheshe’mba waketekejile mu bulume bwa Yehoba bwa kupulusha bantu banji, kabiji Yehoba watwajijile kumupesha. (Sala. 22:23, 24, 27) Byo byo kyajinga ne kwi Yesu “Mwana wa kwa Davida.” Nangwa kya kuba wajinga na misongo pa kichi kya lumanamo, kechi kyalumbulwilenga’mba Yehoba walekele kumupesha ne.—Mat. 21:9.

Nanchi byambo byaambile Yesu bimwesha’mba wajinga bingi na bulunda mambo Yehoba walekele kumuzhikijila pa kuba’mba amweshe bukishinka bwanji nyi? Yehoba byo alengele Mwananji kechi wamulengele kuba’mba akamaname ne kufwa ne. Bunsatuki bwa ba Adama ne Evwa bo bwalengejile kuba’mba amaname ne kufwa. Yesu kechi walengelepo mambo ne, pano bino, wafwainwe kumanama ne kufwa pa kuba’mba akumbule mepuzho aipwizhe Satana ne kupana bukuzhi bwakebewenga pa kuba’mba abwezhe kintu kyaelele bantu batanshi. (Mako 8:31; 1 Pet. 2:21-24) Yehoba walekeleko pacheche kuzhikijila Yesu pa kuba’mba apwishe ano mambo. Kino kyajinga kimye kitanshi Yehoba kuba bino.

Nanchi Yesu wakwashishenga baana banji ba bwanga kuta muchima pa ene mambo Yehoba o amuswishishe kufwila pa kichi kya lumanamo nyi? * Yesu wayukile’mba kufwa nobe kapondo pa kichi kya lumanamo kukatuntwisha bavula. (1 Ko. 1:23) Nangwa byonkabyo, kuta muchima pa ene mambo o afwijile, kwakwashishe baana banji ba bwanga kuyuka buneme bwa lufu lwanji. (Nga. 3:13, 14) Kuyuka bino kwibakwashishe kumona Yesu amba Mupulushi kechi amba kapondo ne.

Nangwa kya kuba kechi twayuka bishinka byonse byalengejile Yesu kwamba pa byambo biji mu uno Salamo ne, bino wayukile’mba kufwila pa kichi kya lumanamo kwajinga kuba kyaswa muchima wa Yehoba. Byo apwishishetu kwamba pa byambo biji mu uno Salamo, Yesu waambile’mba: “Byonse byaubiwa!” (Yoa. 19:30; Luka 22:37) Kya kine, Yehoba byo alekeleko pa kimye kicheche kuzhikijila Yesu, kyamukwashishe kupwisha mingilo yo amutumijile pano pa ntanda. Kabiji kyamukwashishe kufikizha byonse byanembelwe pe aye “mu Mizhilo ya Mosesa, mu byambo bya Bangauzhi ne mu Masalamo.”—Luka 24:44.