1. Ñanyi bintu Yehoba byo amona mu bantu banji?

YEHOBA LESA “usekela mu bantu banji.” (Sala. 149:4) Kuyuka bino kwitusangajika bingi. Yehoba umona byubilo byetu byawama, umona bintu byo twakonsha kuba, kabiji witukwasha kwikala balunda nanji. Umvwe twatwajijila kwikala ba kishinka kwi aye, ukekala mulunda netu myaka ne myaka.—Yoa. 6:44.

2. Mambo ka bamo o kibakatezha kuswa kuba’mba Yehoba wibatemwa?

² Bantu bamo bakonsha kwamba’mba, ‘Nayuka’mba Yehoba watemwa bantu mu bujibumba, pano nakonsha kushiinwa byepi amba Yehoba wantemwa amiwa bunke bwami?’ Ki ka kyakonsha kulengela muntu kwipuzha buno bwipuzho? Mwanamukazhi wa jizhina ja Oksana * wapichile mu makatazho avula saka akiji mwanyike. Waambile’mba: “Nasangalele bingi kimye kyo nabatizhiwe, kabiji natendekele mwingilo wa bupainiya. Bino byo papichile myaka 15, natendekele kuvuluka bintu byatama byo napichilemo saka nkiji mwanyike. Natendekele kulanguluka’mba Yehoba waleka kuntala bulongo kabiji kechi wakonsha kuntemwa ne.” Nyenga Yua kabiji painiya, naye wapichile mu makatazho avula saka akiji mwanyike. Waambile’mba: “Napaine bumi bwami kwi Yehoba mambo nakebelenga kumusangajika ku muchima. Bino nashiinwe’mba Yehoba kechi wakonsha kuntemwa ne.”

3. Tusakwisamba pa ka mu uno mutwe?

³ Byonkatu byo kyajinga ku bena Kilishitu ba kishinka bo twisambapo, ne anweba mwatemwa bingi Yehoba, bino mwakonsha kuzhinauka’mba kechi wimutemwa ne. Mambo ka o mwafwainwa kushiinwa’mba Yehoba wimuta bingi muchima? Kabiji ki ka kyakonsha kwimukwasha inge ke mulanguluke’mba Yehoba kechi wimutemwa ne? Twayai tukumbule ano mepuzho.

4. Mambo ka o kyatamina kuzhinauka’mba Yehoba kechi witutemwa ne?

⁴ Butemwe buji bingi na bulume. Umvwe twashiinwa’mba Yehoba witutenwa kabiji witukwasha, kiketulengela kumwingijila na muchima yense nangwa kya kuba tubena kupita mu bintu byakatazha. Bino inge tuzhinauka’mba Lesa kechi wituta muchima ne, “ngovu ikakepa.” (Maana 24:10) Kabiji umvwe twalefulwa ne kutendeka kulanguluka’mba Lesa kechi witutemwa ne, Satana uketutola kyangwa.—Efi. 6:16.

5. Ki ka kyamwekejile balongo ne banyenga bamo bazhinaukilenga’mba Lesa kechi wibatemwa ne?

⁵ Balongo ne banyenga bamo lwitabilo lwabo lwakooka na mambo a kuzhinauka’mba Yehoba kechi wibatemwa ne. Mukulumpe mu kipwilo umo wa jizhina ja James waambile’mba: “Nangwa kya kuba naingijilanga pa Betele ne kwiyowa mwingilo wa kusapwila mu kipwilo kingijisha mulaka ungi mo najinga, nazhinaunga inge Yehoba watambwilanga mingilo yami. Kabiji kimye kimo nazhinaukilenga inge Yehoba watelekanga ku milombelo yami.” Nyenga Eva naye wingila mwingilo wa kimye kyonse, waambile’mba: “Nataana kuba’mba kuzhinauka’mba Yehoba witutemwa kwatama bingi, mambo kulengela kubula kumwingijila na muchima yense. Kuba bino kwakonsha kwimulengela kuleka kutako muchima ku mwingilo wa Lesa kabiji kechi tukekala na lusekelo pa kwingijila Yehoba ne.” Mukulumpe mu kipwilo wa jizhina ja Michael kabiji painiya wa kimye kyonse waambile’mba: “Umvwe mwaitabila’mba Lesa kechi wimuta muchima ne, mukaleka kumwingijila.”

6. Twafwainwa kuba byepi inge twatendeka kulanguluka’mba Lesa kechi witutemwa ne?

⁶ Byapichilemo bano bakalume ba Lesa bimwesha kuba’mba kulanguluka’mba Lesa kechi witutemwa ne, kwakonsha konauna lwitabilo lwetu. Pano twakonsha kuba byepi inge twatendeka kulanguluka’mba Lesa kechi witutemwa ne? Twafwainwa kuleka bukiji-bukiji ino milanguluko. Lombai Yehoba kwimukwasha kuleka kwikala na “bijikila,” kabiji ‘mutende wa Lesa ukalama michima ne milanguluko yenu.’ (Sala. 139:23; tubyambo twa munshi.; Fili. 4:6, 7) Kabiji yukai kuba’mba kechi yenu bonkatu mwikala na bijikila ne. Balongo ne banyenga ba kishinka nabo bekala na bijikila. Nangwatu bakalume ba Yehoba ba kala nabo bapichilenga mu lukatazho luntutu lumo. Monai byo twakonsha kufunjilako ku byapichilemo mutumwa Paulo.

7. Ñanyi makatazho apichilemo Paulo?

⁷ Nanchi kimye kimo mumvwa’mba muji na bya kuba byavula kabiji amba mubena kukankalwa  kwingila byonse byo mukeba nyi? Umvwe byo byo kiji, musa kufunjilako ku byapichilemo Paulo. Paulo wajinga bingi na kijikila “pa mambo a bipwilo byonse.” (2 Ko. 11:23-28) Nanchi muji na kikola kibula kupwa kibena kwimupwishisha lusekelo nyi? Paulo wajinga na “mwiba mu mubiji.” Uno mwiba kyamweka wajinga kikola kyabulanga kupwa kabiji wakebeshe kuba’mba kipwe. (2 Ko. 12:7-10) Nanchi bumbulwa kulumbuluka bwenu bwimulengela kulefulwa nyi? Paulo naye bimye bimo walefulwanga. Witelele aye mwine amba, “kamulanda” na mambo a kuba’mba kimye kyonse walwanga pa kuba’mba obe kyawama.—Loma 7:21-24.

8. Ñanyi kintu kyakwashishe Paulo kuchinchika makatazho o apichilengamo?

⁸ Nangwa kya kuba Paulo wapichile mu meseko avula ne bintu bya mulefwilenga, watwajijile kwingijila Yehoba. Ñanyi kintu kyamukwashishe kwikala na bulume bwa kuchinchika? Nangwa kya kuba wajinga mbulwa kulumbuluka, bino wajinga na lwitabilo lwakosa mu bukuzhi. Wayukile mulaye wa kwa Yesu wa kuba’mba “bonse bamwitabila [Yesu ] . . . bakekale na bumi bwa myaka ne myaka.” (Yoa. 3:16; Loma 6:23) Kya kine, Paulo wajinga na lwitabilo mu bukuzhi. Washiinwe kuba’mba Yehoba waswila jimo kulekelako bantu mambo inge balapila, nangwatu boba balengele mambo akatampe.—Sala. 86:5.

9. Tubena kufunjilako ka ku byambo bya kwa Paulo byanembwa pa Ngalatiya 2:20?

⁹ Kabiji Paul wajinga na lwitabilo lwa kuba’mba Lesa wamutemenwe bingi mambo watumine Kilishitu kwiya na kumufwila. (Tangai Ngalatiya 2:20.) Monai byambo byawama byapelako mu kino kyepelo. Paulo waambile’mba: “Mwana Lesa . . . wantemenwe kabiji wipaine mwine na mambo a amiwa.” Paulo kechi walangulukilenga’mba butemwe bwa Lesa buji na po bupelela, uba nobe waambilenga amba, ‘Nayuka ene mambo Yehoba o atemenwa balongo, bino kechi wakonsha kuntemwa amiwa ne. Paulo wavulwilemo bena Loma amba: “Mambo byo twakijinga bandengamambo, Kilishitu witufwijile.” (Loma 5:8) Onkao mambo, kafwako kyakonsha kukanya Lesa kwitutemwa ne.

10. Tubena kufunjilako ka ku byambo biji pa Loma 8:38, 39?

¹⁰ Tangai Loma 8:38, 39. Paulo wayukile’mba butemwe bwa Lesa bwabaya bingi. Wanembele’mba kafwako bintu “byakonsha kwitwabanya na butemwe bwa Lesa.” Paulo wayukile Yehoba byo amwesheshe butekanye ku kisaka kya bena Isalela. Kabiji wayukile Yehoba byo amubijile lusa. Onkao mambo, mu ñambilo ikwabo, Paulo waambilenga’mba, ‘Yehoba byo atumine Mwananji kwiya na kumfwila, nanchi nakonsha kuzhinauka’mba Lesa kechi wantemwa ne nyi?’—Loma 8:32.

11. Nangwa kya kuba Paulo walengele mambo nabiji atongolwa pa 1 Timoti 1:12-15, mambo ka o ashiinwe kuba’mba Lesa wamutemenwe?

 ¹¹ Tangai 1 Timoti 1:12-15. Bimye bimo Paulo waumvwanga kutama na mambo a bintu byatama byo aubile saka akyangye kwikala mwina Kilishitu. Witelelenga aye mwine amba ndengamambo “wakilamo.” Paulo saka akyangye kufunda bukine, wamanyikile bingi bena Kilishitu mu mizhi yonse mo baikalanga, kabiji waswishisheko kukasa bena Kilishitu bamo mu kaleya ne kwibepaya. (Byu. 26:10, 11) Kyamweka Paulo kyamukolanga ku muchima inge wamonañana na banyike bena Kilishitu bajinga na bansemi bo aswishisheko amba bebepaye. Paulo wilangulwishe pa bintu byo alubankenye, bino wayukile’mba kechi wakonsheshe kubipimpula bintu ne. Waswile’mba Kilishitu wamufwijile, kabiji wanembele saka ashiinwa’mba: “Na mambo a lusa lukatampe lwa Lesa, lo lwalengela’mba ngikale byonka bino byo nji.” (1 Ko. 15:3, 10) Tubena kufunjilako ka? Mwafwainwa kuswa kuba’mba Kilishitu wimufwijile kabiji ye wimulengela kwikala na bulunda bwawama ne Yehoba. (Byu. 3:19) Kintu kyanema kwi Lesa ke byo tubena kuba luno ne byo tukobanga kulutwe, kechi bintu byo twalubankenye kala saka tukyangye kwikala Bakamonyi ba kwa Yehoba nangwa kimye kyo twaikele Bakamonyi ba kwa Yehoba ne.—Isa. 1:18.

12. Byambo byanembwa pa 1 Yoano 3:19, 20 byakonsha kwitukwasha byepi inge ke tulanguluke’mba kechi twanema kwi Lesa ne?

¹² Umvwe mwalanguluka pe Yesu byo emufwijile na mambo a bundengamambo bwenu, kampe mwakonsha kwamba’mba, ‘Amiwa kechi nafikilamo kutambwila bubwe bupe ne.’ Mambo ka? Byo tuji bambulwa kulumbuluka, muchima wetu wakonsha kwitulengela kwilengulula nangwa kumona’mba kechi twanema ne. (Tangai 1 Yoano 3:19, 20.) Umvwe ketulanguluke bino, twafwainwa kuvuluka’mba “Lesa wakila michima yetu.” Nangwa kya kuba tulanguluka’mba Yehoba kechi witutemwa ne, nangwa’mba kechi uketulekelako mambo etu ne, bino Shetu wa mwiulu ukatwajijila  kwitutemwa ne kwitulekelako mambo. Twafwainwa kushiinwa kuba’mba Yehoba witutemwa. Pa kuba’mba tubena bino, twafwainwa kufundanga Mambo anji moba onse, kulomba kwi aye kimye kyonse, ne kupwanañananga na bantu banji ba kishinka. Mambo ka kuba bino bintu o kwanemena?

13. Kufunda Mambo a Lesa kwakonsha kwitukwasha byepi? (Monai kakitenguluzha ka kuba’mba “ Mambo a Lesa byo Ebakwasha.”)

¹³ Kufunda Mambo a Lesa pa juba pa juba kukemukwasha kuyuka byubilo byawama bya Yehoba. Mukayuka byo emutemwa. Kulangulukishapo pa byo mutanga mu Mambo a Lesa pa juba pa juba kwakonsha kwimukwasha kwikala na milanguluko yawama ne ‘kwimololako.’ (2 Timo. 3:16) Mukulumpe mu kipwilo wa jizhina ja Kevin walangulukanga’mba kechi wanema kwi Lesa ne. Waambile’mba: “Kutanga Salamo 103 ne kulanguluka-langulukapo kwankwashishe kuleka kwilengulula ne kuyuka Yehoba byo ammona.” Ba Eva bo twaambapo kala baambile’mba: “Pa juba pa juba saka nkyangye kulaala, ngikalako na kimye kya kulanguluka pa milanguluko ya Yehoba. Kuba bino kundengela kwikala na mutende wa mu muchima kabiji lwitabilo lwami lukoselako.”

14. Lulombelo lwakonsha kwitukwasha byepi?

¹⁴ Lombainga kimye kyonse. (1 Tesa. 5:17) Pa kuba’mba mutwajijile kwikala balunda na muntu , mwafwainwa kwisambanga ne kumubuula biji ku muchima wenu. Kyo kimotu ne bulunda bwetu ne Yehoba. Umvwe ketumubuule mu lulombelo byo tubena kumvwa, byo tulanguluka ne makatazho etu, tumwesha’mba twamuketekela kabiji twayuka’mba witutemwa. (Sala. 94:17-19; 1 Yoa. 5:14, 15) Nyenga Yua ye twaambapo kala waambile’mba: “Inge nalomba kwi Yehoba, kechi mpelelatu pa kumubuula bintu byaji kumweka pa jo jo juba ne. Namubuula byonse byo mbena kulanguluka ne byo mbena kumvwa ku muchima. Kuba bino kwankwasha kuyuka’mba Yehoba ke Shetu watemwa bingi baana banji kabiji kechi namumona nobe mukulumpe wa nkito pa kampanyi ne.”—Monai kakitenguluzha ka kuba’mba “Nanchi Mwakimutangapo Nyi?”

15. Yehoba umwesha byepi amba wituta muchima?

¹⁵ Pwanañanainga na balunda ba kishinka; bano bantu ke bupe bwafuma kwi Yehoba. (Yako. 1:17) Shetu wa mwiulu witumwesha’mba wituta muchima kupichila mu kwitupa kisemi kya balongo ne banyenga mu kipwilo bamwesha “butemwe kimye kyonse.” (Maana 17:17) Mu nkalata yanji yo anembejile bena Kolose, Paulo watongwele bena Kilishitu bamo bamukwashishe amba ‘bamutekeneshanga bingi.’ (Kolo. 4:10, 11) Kilishitu Yesu naye wakebanga ba kumutekenesha, kabiji wasantanga bingi pa byamutundaikanga balunda nanji ne bamalaika.—Luka 22:28, 43.

16. Balunda ba kishinka bakonsha kwitukwasha byepi kwikala na bulunda bwakosa ne Yehoba?

¹⁶ Nanchi mubena kumwenamo pakatampe mu kwikala na balunda ba kishinka bemupa Yehoba nyi? Kubuulako mulunda wakoma mu lwitabilo makatazho o tubena kupitamo kechi kilumbulula’mba  lwitabilo lwetu lwakooka ne. Bino kuba bino kwituzhikijila bingi. Akilangulukai pa byaambile mulongo wa jizhina ja James ye twaambapo kala. Waambile’mba: “Kupwanañana na balunda baji na bulunda bwakosa na Lesa kwankwasha bingi. Umvwe naikala na bijikila na mambo a makatazho, balunda nami ba kishinka bateleka saka batekanya kabiji bambuula kuba’mba bantemwa. Abano balunda bandengela kuyuka’mba Yehoba wantemwa kabiji wanta muchima.” Onkao mambo, kyanema bingi kukosesha bulunda na balongo ne banyenga mu kipwilo.

17-18. Kwi ñanyi ko twafwainwa kutelekanga, kabiji mambo ka?

¹⁷ Satana ukeba’mba tuleke kwibikako kuba kyawama. Ukeba’mba twitabile’mba Yehoba kechi witutemwa ne, kabiji amba kumwingijila ke kutayatu kimye. Bino kwesakana na byo twafunda, abuno ke bubela.

¹⁸ Yehoba wimutemwa bingi kabiji mwanema bingi kwi aye. Umvwe ke mumukookele, “mukekala mu butemwe [bwanji]” myaka ne myaka byonkatu byo kiji kwi Yesu. (Yoa. 15:10) Onkao mambo, kange mutelekenga kwi Satana nangwa kubimubuula muchima wenu amba Yehoba kechi wimutemwa ne. Pakuba telekainga kwi Yehoba umona byawama mwi atweba bonse pa muntu pa muntu. Shiinwai kuba’mba “Yehoba usekela mu bantu banji,” kubikapotu ne anweba!