1. Bantu bamo bomvwa byepi pa kusolomoka bantu mu mwingilo wa kusapwila? (Monai ne kipikichala.)

 ATWEBA bantu ba Yehoba tusapwila bantu mambo twatemwa Shetu wa mwiulu, kabiji tukeba kukwasha bantu kumuyuka. Basapwishi bavula bomvwa bingi bulongo kwingila mwingilo wa kusapwila. Pano bino, bakwabo kechi bamwingila na lusekelo ne. Mambo ka? Bamo bomvwa bumvu kabiji belengulula. Kabiji bakwabo nabo kechi bakasuluka kuya pa mazubo a bantu kwa kubula kwibeta ne. Bamo bachiina’mba kampe bakonsha kwibapanga. Bakwabo nabo bebafunjisha kubula kuzhingijisha bakwabo. Nangwa kya kuba bamutemwa bingi Yehoba, bano balongo ne banyenga kibakatazha bingi kusolomoka bantu ne kwibasapwila mambo awama. Pano bino, bayuka’mba uno mwingilo wanema bingi kabiji bamwingila kimye kyonse. Kino kisangajika bingi Yehoba.

2. Inge kimukatazha kwingila na lusekelo mu mwingilo, mambo ka o mwafwainwa kubujila kulefulwa?

² Nanchi kimukatazha kwingila na lusekelo mu mwingilo na mambo a bino bintu byo twaambapo nyi? Inge byo byo kiji, kange mulefulwe ne. Umvwe kya kuba mwilengulula, kino kimwesha’mba mwipelula kabiji kechi mukeba kutoboka na bantu ne. Kabiji kafwako muntu ukeba kumupanga ne, kikatakata inge ubena kukeba kubila bakwabo byawama. Shenu wa mwiulu wayuka byo mumvwa ku muchima kabiji ukeba kwimukwasha. (Isa. 41:13) Mu uno mutwe, tusakwisamba pa bintu bitanu byakonsha kwitukwasha kuyuka mwa kubila na byo tumvwa ku muchima ne byo twakonsha kwikala na lusekelo mu mwingilo.

 YUKAI’MBA MAMBO A LESA AKEMUKWASHA

3. Ñanyi kintu kyakwashishe Yelemiya kusapwila bantu?

³ Kufumatu ne kala, Mambo a Lesa akosesha bakalume banji kwingila mwingilo wakatazha. Akilangulukai pa byamwekejile ngauzhi Yelemiya. Wakankazhaminenga kimye Yehoba kyo amupeele mwingilo wa kusapwila. Yelemiya waambile’mba: “Amiwa kechi nayuka kwamba ne, mambo nkijitu kalombwana.” (Yele. 1:6) Ñanyi kintu kyamukwashishe kuleka kwilengulula? Mambo a Lesa amukoseshe. Waambile’mba: “Mu muchima mwami byambo byanji byaumvwanyikilenga nobe mujilo ubena kuteemena mu bikupa byami.” (Yele. 20:8, 9) Nangwa kya kuba bantu bajinga mu nyaunda mwasapwijilenga Yelemiya bakatezhe, abino byambo byo asapwijilenga byamukoseshe kwingila uno mwingilo.

4. Ñanyi bintu byawama bifumamo inge ketutange Mambo a Lesa ne kulanguluka langulukapo? (Kolose 1:9, 10)

⁴ Kutanga Mambo a Lesa kukwasha bingi bena Kilishitu. Byo anembejilenga kipwilo kya mu Kolose, mutumwa Paulo waambile’mba kufunda Mambo a Lesa kukakwasha balongo banji kutwajijila “kupanga bipangwa mu mingilo yonse yawama” ne kwibalengela ‘kwendanga monka mukebela Yehoba.’ (Tangai Kolose 1:9, 10.) Ino mingilo yavwangilemo kusapwila mambo awama. Onkao mambo, inge ketutange Mambo a Lesa ne kulanguluka langulukapo, tukosesha lwitabilo lwetu mwi Yehoba ne kuyuka ene mambo o kyanemena kusapwila pa Bufuma bwanji.

5. Ñanyi bintu byo twafwainwa kuba pa kuba’mba tumwenengamo mu kutanga ne kufunda Baibolo?

⁵ Pa kuba’mba tumwenengamo mu kutanga Mambo a Lesa, kechi twafwainwa kupitangamotu kapambala pa kutanga Mambo a Lesa, pa kufunda ne pa kulanguluka langulukapo ne. Inge mwatanga kinembelo kyo mwabula kumvwisha, kechi mwafwainwa kwikishatu ne. Pakuba mwafwainwa kwingijisha buku wa Watch Tower Publications Index nangwa Buku wa kukwasha Bakamonyi ba kwa Yehoba Kukebakeba Bishinka. Inge kemufunde Mambo a Lesa kwa kubula kupitamotu kapambala, mukashiinwa kuba’mba byaamba Baibolo bya kine. (1 Tesa. 5:21) Inge mwashiinwa na bintu byo mufunda mu Baibolo, mukakebeshanga kubuulako bakwenu bintu byo mufunda.

NENGEZHAI BULONGO SAKA MUKYANGYE KUYA MU MWINGILO

6. Mambo ka o twafwainwa kunengezha bulongo saka tukyangye kuya mu mwingilo?

⁶ Inge mwanengezha bulongo saka mukyangye kuya mu mwingilo, mukakasulukanga  kwisamba na bantu. Yesu saka akyangye kutuma baana banji ba bwanga mu mwingilo, wibakwashishe kwinengezhezha jimo. (Luka 10:1-11) Na mambo a kuba’mba balondejile bintu Yesu byo ebafunjishe, baana ba bwanga baingijile bingi bulongo kabiji kino kibaletejile bingi lusekelo.​—Luka 10:17.

7. Twakonsha kwinengezha byepi saka tukyangye kuya mu mwingilo? (Monai ne kipikichala.)

⁷ Twakonsha kwinengezha byepi saka tukyangye kuya mu mwingilo? Twafwainwa kulangulukila jimo pa byambo byo tusakuya na kwamba. Kabiji twafwainwa kulumbulula bukine mu byambo byetu. Kabiji kyanema bingi kulanguluka pa byakonsha kuba bantu ba mu nyaunda inge twaya na kwibasapwila. Inge twasolomoka bantu ne kutendeka kwisamba nabo, twafwainwa kutekanya, kumwemwesela ne kwibakasulukila.

8. Mu ñanyi jishinda bena Kilishitu mo baikela bipe bya buneme byaambilepo mutumwa Paulo?

⁸ Mutumwa Paulo walumbulwijile balongo ne banyenga mwingilo wetu wa kusapwila byo aji. Waambile’mba: “Tuji na kino kya buneme mu bipe bya buchimba.” (2 Ko. 4:7) Nga kino kya buneme kyo ki ka? Ke mwingilo upulusha bantu wa kusapwila pa Bufumu. (2 Ko. 4:1) Kabiji bipe bya buchimba byo bi ka? Bimenako bantu ba Lesa basapwila bakwabo mambo awama. Mu moba ajingako Paulo, baingijishanga milondo ya buchimba kusendelamo bintu bya buneme nabiji kajo, binyu ne mali. Po pamotu, Yehoba witupa mwingilo wanema wa kusapwila mambo awama. Yehoba witukwasha ne kwitupa bulume bwa kusapwila mambo awama mu bukishinka.

LOMBAI YEHOBA KUBA’MBA EMUKWASHE KUCHINCHIKA

9. Twakonsha kuba byepi pa kuba’mba tubulenga kuchiina bantu nangwa kuchiina’mba basakukana kwibasapwila? (Monai ne kipikichala.)

⁹ Pa bimye bimo, twakonsha kuchiina bantu kabiji twakonsha kuchiina’mba kampe basakukana kwibasapwila. Pano twakonsha kuba byepi pa kuba’mba tuleke kuchiina? Akilangulukai pa lulombelo lwalombele batumwa byo bebakambizhe kuleka kusapwila. Abo kechi baumvwine moyo ne kuleka kusapwila ne, pakuba balombele Yehoba kwibakwasha “kwambanga mambo [anji] na kuchinchika.” Yehoba wakumbwile lulombelo lwabo ponkapotu. (Byu. 4:18, 29, 31) Umvwe ne atweba kimye kimo tuchiina bantu, twafwainwa kulomba kwi Yehoba kwitukwasha. Lombai kuba’mba Yehoba emukwashe kutemwa bantu ne kwibasapwila mambo awama kwa kubula kumvwa moyo.

10. Byo tuji Bakamonyi banji, Yehoba witukwasha byepi kwingila mwingilo wa kusapwila? (Isaya 43:10-12)

 ¹⁰ Yehoba witutongola kwikala Bakamonyi banji, kabiji witulaya kwitukwasha kuchinchika. (Tangai Isaya 43:10-12.) Akilangulukai pa mashinda ana o obilamo bino. Jishinda jitanshi, Yesu witukwasha inge tubena kusapwila mambo awama. (Mat. 28:18-20) Ja bubiji, Yehoba watongola bamalaika kwitukwasha. (Lum. 14:6) Ja busatu, Yehoba witupa mupashi wanji wazhila witukwasha kuvuluka byo tufunda. (Yoa. 14:25, 26) Ja buna, Yehoba witupa balongo ne banyenga ba kwingila nabo. Yehoba ne balongo betu mwaya ntanda yonse betukwasha kuchinchika ne kutwajijila kusapwila.

PIMPULAINGAKO MASHINDA A KUSAPWILAMO BANTU NE KUTWAJIJILA KWIKALA NA KIZAKU

11. Mwakonsha kuba byepi pa kuba’mba mutaanenga bantu bavula mu mwingilo? (Monai ne kipikichala.)

¹¹ Nanchi mulefulwa inge kechi mutaana bantu pa mazubo abo nenyi? Mwafwainwa kwiipuzha’mba: ‘Mambo ka o nabujila kutaana bantu pa mazubo abo?’ (Byu. 16:13) ‘Abya baya ku nkito nangwa na kupota bya kupotapota nyi?’ Umvwe byo byo kiji, nanchi mwakonsha kwingilako busapwishi bwa mu mukwakwa pa kuba’mba musapwilenga bantu bavula nyi? Mulongo Joshua waambile’mba: “Javula nsapwila bantu bataanwa pa bisankanyi ne pa mapunzha akwabo pataanwa bantu bavula.” Kabiji aye ne mukazhanji Bridget, bataana bantu bavula pa mazubo abo inge baya na kusapwila kimye kya mabanga ne pa Mulungu mute.​—Efi. 5:15, 16.

12. Twakonsha kuyuka byepi bintu byaitabilamo bantu nangwa bintu byo balangulukapo?

¹² Inge bantu babula kuta muchima ku mambo o twibasapwila, yukai bintu byo baitabilamo nangwa bintu byo balangulukapo. Mulongo Joshua ne mukazhanji Bridget, bepuzha bwipuzho buji pa jipa 1 pa talakiti pa kutendeka kwisamba na bantu. Pa kwingijisha talakiti wa kuba’mba Nanchi Mulangulukapo’mba ka pa Baibolo? bamba’mba: “Bantu bamo bamba’mba Baibolo buku wa Lesa, bakwabo nabo bazhinauka. Nga anweba mulangulukapo’mba ka?” Kino kikwasha bingi kutendeka kwisamba na bantu.

13. Mambo ka o twafwainwa kwambila’mba atweba twaingila mwingilo wetu inge bantu bakana kwibasapwila? (Byambo bya Maana 27:11)

¹³ Inge twasapwila bantu mambo awama, pano abo bakana, twafwainwa kuyuka’mba atweba  twaingila mwingilo wetu. Mambo ka? Mambo twauba kintu Yehoba ne Mwananji kyo bakeba’mba tube, ko kuba’mba kushimuna bukine. (Byu. 10:42) Inge twabula kutaana bantu ba kusapwila nangwa umvwe bakana kwibasapwila, twafwainwa kwikala na lusekelo mambo twayuka’mba tubena kutookesha ku muchima Shetu wa mwiulu.​—Tangai Byambo bya Maana 27:11.

14. Mambo ka o twafwainwa kwikela na lusekelo inge kya kuba musapwishi mukwetu wataana muntu ukeba kufunda bukine mu nyaunda yetu?

¹⁴ Kabiji twakonsha kwikala na lusekelo inge kya kuba musapwishi mukwetu wataana muntu ukeba kufunda bukine mu nyaunda yetu. Kyamba kya Usopa kyaesakenye mwingilo wetu ku byo kikala pa kukeba mwana waeleka. Bantu bavula bakonsha kuya na kufumpila uno mwana waeleka mu mapuzha apusana pusana. Inge mwana bamutaana, bonse basekela bingi, kechi muntu yenka wamutaana ne. Kyo kimotu, basapwishi bonse mu kipwilo bengijila pamo pa kufunjisha muntu kwikala mwana wa bwanga. Basapwishi bonse bebatundaika kusapwila ku bantu bonse mu nyaunda kabiji bonse bekala bingi na lusekelo inge umo watendeka kutaanwa ku kupwila.

TWAJIJILAI KUTEMWA YEHOBA NE BANTU

15. Kulondela byaamba Mateo 22:37-39, kwakonsha kwitulengela byepi kwikala na kizaku mu mwingilo? (Monai ne kipikichala kya pa.)

¹⁵ Kutwajijila kutemwa Yehoba ne bantu kuketulengela kwikala na kizaku kya kusapwila. (Tangai Mateo 22:37-39.) Yehoba umvwa bingi bulongo inge witumona na kusapwila. Kabiji bantu nabo bomvwa bingi bulongo inge batendeka kufunda Baibolo. Kabiji vulukainga’mba bantu bateleka ku mambo awama bakekala myaka ne myaka.​—Yoa. 6:40; 1 Timo. 4:16.

16. Twakonsha kwikala byepi na lusekelo mu mwingilo inge twikalatu pa nzubo? Ambaipo byamwekejile bamo.

¹⁶ Nanchi mwikalatu pa nzubo na mambo a kukolwa nangwa bintutu bikwabo nyi? Inge ibyo, ubaingapo bintu bimo byakonsha kumwesha’mba mwatemwa Yehoba ne bantu. Kimye kya mwalo wa COVID-19, mulongo Samuel ne mukazhanji Dania baikelengatu pa nzubo. Mu kino kimye kya mwalo, basapwilanga bantu kwingijisha foni, kunemba makalata ne kufunjisha bantu Baibolo kwingijisha Zoom. Samuel wasapwilanga bantu bo ataananga ku kipatela kimye kyo ayanga na kutambula muchi wa kikola kya kansa. Waambile’mba: “Makatazho  o tubena kupitamo abena kwitulengela kwikala na bijikila, kwitukokesha ne kweseka lwitabilo lwetu.” Twafwainwa kubapo bintu bimo pa kuba’mba twingijilenga Yehoba na lusekelo. Byo bapichilenga mu ano makatazho, Dania waponene kabiji walaalangatu mu nzubo pa mwanya pa bañondo basatu. Kufuma popo, watendekele kwendela mu kakinga ka balemana pa bañondo batanu na umo. Waambile’mba: “Naubilenga bintu kwesakana na papelela bulume bwami. Nasapwijile manase waishile na kumpempula kabiji nesambanga na bantu bandetelanga bintu ku nzubo. Kabiji nesambanga pa foni na mwanamukazhi waingilanga pa kampanyi ulenga michi.” Bintu byapichilemo mulongo Samuel ne mukazhanji Dania bibalengejile kubula kwingila bulongo mwingilo wa kusapwila. Pano bino, baingilanga papelela bulume bwabo kabiji kino kibalengejile kwikala bingi na lusekelo.

17. Ñanyi bintu byawama byo tukamwenamo inge twaingijisha mashinda o twisambapo mu uno mutwe?

¹⁷ Mashinda o twisambapo mu uno mutwe, akonsha kwimukwasha bulongo inge mwiengijisha onse. Ano mashinda aji nobe tubintu tulengela kajo kumvwanyika bulongo. Tuno tubintu tonse inge mwitubika mu kajo, kajo komvwanyika bingi bulongo. Umvwe twaingijisha ano mashinda onse, tukayuka mwa kubila na bintu byakonsha kwitulefula kabiji tukatwajijila kwikala na lusekelo mu mwingilo.