1. Ñanyi bintu byalengejile bantu ba Yehoba ba mu myaka kitota kitanshi kwingila bulongo kwesakana na mwayijile mikambizho yanji?

 INGE Yehoba wapa bantu banji mwingilo, ukeba’mba bamwingile bulongo kwesakana na mikambizho yanji. (1 Ko. 14:33) Kabiji kyaswa muchima wa Lesa ke kya kuba’mba mambo awama asapwilwe pano pa ntanda ponse. (Mat. 24:14) Yehoba watongola Yesu kutangijila uno mwingilo. Yesu naye umona kuba’mba uno mwingilo bamwingila bulongo kwesakana na mwayila mikambizho. Mu myaka kitota kitanshi, bipwilo byo byalengelwe mu mapunzha avula, batongwele bakulumpe mu kipwilo ba kupana mikambizho ne kutangijila bino bipwilo. (Byu. 14:23) Mu Yelusalema, balengele jibumba ja bakulumpe mu kipwilo mwajinga batumwa ne banabalume bakulumpe bapainenga mikambizho yafwainwe kulondela bipwilo byonse. (Byu. 15:2; 16:4) Na mambo a kuba’mba bakookejile mikambizho yo batambwijile, “bipwilo byakoselenga mu lwitabilo ne bantu baitabijile bavujijilengako.”​—Byu. 16:5.

2. Kutendeka mu 1919, Yehoba ubena kutangijila byepi bantu banji ne kwibanengezhezha kajo ka ku mupashi?

² Yehoba watwajijila kutangijila bantu banji ne lelo jino. Kutendekatu mu 1919, Yesu wingijisha kajibumba kacheche ka banabalume bashingwa kutangijila mwingilo wa kusapwila ne kunengezhezha baana banji ba bwanga kajo ka ku mupashi. a (Luka 12:42) Kwa kubula nangwa kuzhinaukatu ne, Yehoba ubena kupesha mwingilo wa kano kajibumba.​—Isa. 60:22; 65:13, 14.

3-4. (a) Lumbululai bintu byawama byo tumwenamo inge ketulondele betutangijila. (b) Ñanyi bintu byo tusakwisambapo mu uno mutwe?

 ³ Inge ketubule kulondela lutangijilo, kyakonsha kukatazha kwingila bulongo mwingilo Yesu ye etupa. (Mat. 28:19, 20) Fwanyikizhai kuba’mba kechi betupanga manyaunda mwa kwingijila ne, kino kyakonsha kwitulengela kutendeka kusapwila kisapwile sapwile mu mpunzha mwine muntu mo akeba. Mu manyaunda amo bakonsha kwingijilamo bimye byavula ku basapwishi bapusana pusana, kabiji akwabo nao akonsha kushalatu kwa kubula kwingijilamo. Nanchi kujipo mashinda akwabo o tumwenamo inge ketulondele lutangijilo nyi?

⁴ Bintu byaubile Yesu pano pa ntanda bimwesha byo abena kwitutangijila ne lelo jino. Mu uno mutwe, tusakwisamba pa bintu byaubile Yesu, ne jibumba jetu byo jibena kulondela mu ngayo yanji. Kabiji tusakwisamba pa byo twafwainwa kumwesha’mba twaketekela jibumba ja Yehoba.

JIBUMBA JETU JUBA BINTU BYONKA BYAUBILE YESU

5. Ñanyi jishinda jimo jo tubilamo bintu byonka byaubile Yesu? (Yoano 8:28)

⁵ Yesu wafunjile kwi Shanji wa mwiulu bintu byo aubilenga ne byo aambile. Jibumba ja Yehoba najo jingijisha Mambo a Lesa kwitukwasha kuyuka kyawama ne kyatama ne kwitutangijila mu bwikalo bwetu byonkatu byaubile Yesu. (Tangai Yoano 8:28; 2 Timo. 3:16, 17) Javula betutundaika kutanga ne kwingijisha byo tufunda mu Mambo a Lesa. Ñanyi bintu byo tumwenamo inge ketube bino?

6. Ñanyi jishinda jimo jitukwasha kumwenamo pa kufunda Baibolo?

⁶ Tumwenamo bingi inge ketutange Baibolo kwingijisha mabuku etu. Twesakanya mikambizho ifuma ku jibumba ja Lesa na byaambapo Baibolo. Inge twayuka’mba mikambizho ifuma ku jibumba ja Yehoba yaimena pa Binembelo, kino kitulengela kwijiketekela bingi.​—Loma 12:2.

7. Ñanyi byambo byasapwijilenga Yesu, kabiji jibumba ja Yehoba jilondela byepi byo aubile?

⁷ Yesu wasapwijile “mambo awama a Bufumu bwa Lesa.” (Luka 4:43, 44) Kabiji Yesu wakambizhe baana banji ba bwanga nabo kusapwila pa Bufumu. (Luka 9:1, 2; 10:8, 9) Lelo jino, bonse baji mu jibumba ja Yehoba basapwila mambo a Bufumu, kechi na mambo a ko bekala nangwa mingilo yo bengila mu jibumba ja Yehoba ne.

8. Ñanyi mwingilo wanema ye betupa kwingila?

⁸ Betupa mwingilo wanema bingi wa kusapwila pa Bufumu bwa Lesa ku bantu. Kechi bantu bonse bengilako uno mwingilo wa kusapwila pa Bufumu ne. Yesu byo ajinga pano pa ntanda, kechi waswishishe bapashi batama kushimuna bukine pe aye ne. (Luka 4:41) Lelo jino, muntu saka akyangye kutendeka kusapwila pamo na bantu ba Yehoba, patanshi wafwainwa kufikilamo kwingila uno mwingilo. Pa kuba’mba tumweshe’mba twanemeka mwingilo wa kusapwila, twafwainwa kusapwilanga pa kimye kiji kyonse kabiji konse ko twakonsha kutaana bantu. Byonka byaubile Yesu, mwingilo wetu ke wa kubyala ne kutekezha nkunwa ya bukine bwa Bufumu mu michima ya bantu.​—Mat. 13:3, 23; 1 Ko. 3:6.

9. Jibumba ja Yehoba jasolola byepi jizhina ja Lesa?

⁹ Yesu wasolwele jizhina ja Lesa. Yesu byo alombelenga kwi Shanji wa mwiulu, waambile’mba: “Nejisolola jizhina jenu.” (Yoa. 17:26) Byonka byaubilenga Yesu, jibumba ja Yehoba najo jingila na ngovu kukwasha bantu kuyuka jizhina ja Lesa. Mu Baibolo wa Binembelo bya Ntanda Ipya, babwezhamo jizhina ja Lesa ponse po jafwainwa kwikala. Uno Baibolo bamutuntulula yense nangwa lubaji lumo mu milaka kukila pa 270. mu Bya Kulumbulula A4 ne A5  mu uno Baibolo, mukataana bishinka bikwabo byaamba pa ene mambo o babwezhezhamo jizhina ja Lesa mu Baibolo. Bya kulumbulula C, biji mu Baibolo wa Kufundamo byaamba pa bishinka bikwabo byavula pa ene mambo jizhina ja Lesa o jitanyiwamo bimye 237 mu Binembelo bya Kingiliki bya Bwina Kilishitu.

10. Ñanyi kintu kyo tufunjilako ku byaambile mwanamukazhi umo wikala mu kyalo kya Myanmar?

¹⁰ Byonka byaubile Yesu, ne atweba twafwainwa kukwasha bantu bavula kuyuka jizhina ja Lesa. Mwanamukazhi umo wa myaka 67 wikala mu kyalo kya Myanmar byo ayukile jizhina ja Lesa, walukumwine mipolo ne kwamba’mba: “Kino kyo kimye kitanshi mu bwikalo bwami kumvwapo jizhina ja Lesa ja Yehoba . . . Mwamfunjisha kintu kyanema bingi kyo nabujile kuyuka.” Kwesakana na kino kyamwekele, kuyuka jizhina ja Lesa kukwasha bingi bantu baji na michima ya bukishinka.

TWAJIJILAI KUKETEKELA JIBUMBA JETU

11. Bakulumpe mu kipwilo bakonsha kumwesha byepi’mba baketekela jibumba ja Yehoba? (Monai ne kipikichala.)

¹¹ Ñanyi jishinda jimo bakulumpe mu kipwilo jo bamwesheshamo’mba baketekela jibumba ja Lesa? Inge batambwila mikambizho, bakulumpe mu kipwilo bafwainwa kwiitanga ne kwiyumvwisha mo yatala ne kuba kwesakana na byo bebakambizha. Batambwila mikambizho yapusana pusana. Mikambizho imo ibakwasha kuyuka bya kwamba bulongo majashi mu kipwilo ne bya kulomba kwimenako balongo ne banyenga. Kabiji batambwila mikambizho ikwabo ibakwasha kuyuka mwa kulamina bulongo mikooko ya Kilishitu. Bakulumpe mu kipwilo inge kebalondele mikambizho ifuma ku jibumba jetu, bakwasha balongo ne banyenga kuyuka’mba Yehoba wibatemwa kabiji wibazhikijila.

12. (a) Mambo ka o twafwainwa kukookela ne kunekenena boba betutangijila? (Bahebelu 13:7, 17) (b) Mambo ka o twafwainwa kutatu muchima pa bintu byawama byuba boba betutangijila?

¹² Inge twatambwila mikambizho ku bakulumpe mu kipwilo, twafwainwa kwiilondela na muchima wetu yense. Inge twauba bino, tukalengela boba babena kwitutangijila kwingila bulongo mingilo yabo. Baibolo witutundaika kukookela ne kunekenena boba betutangijila. (Tangai Bahebelu 13:7, 17.) Kimye kimo kyakonsha kwitukatazha bingi kuba bino. Mambo ka? Mambo bano banabalume bambulwakulumbuluka. Nangwa byonkabyo, inge ketutetu muchima pa bintu byo balubankanya, ne kubula kuta muchima pa bintu byawama byo boba, kino kikamwesha’mba tubena kutundaika balwanyi betu. Mu ñanyi jishinda? Tukatendeka kulengulula jibumba ja Lesa ne kuleka kwijiketekela, byonkatu bikeba balwanyi betu amba tubenga. Ñanyi bintu byo twafwainwa kuba pa kuba’mba tuyuke bintu bya bubela byamba balwanyi betu ne kwibikana?

KANGE MUSWISHE BAKWENU KWIMULENGELA KULENGULULA JIBUMBA JA LESA NE

13. Balwanyi ba Lesa boba byepi pa kuba’mba balengele bantu kulengulula jibumba janji?

¹³ Balwanyi ba Lesa bamba bintu byatama pa jibumba jetu pa kuba’mba bantu bejilengulule. Twafunda mu Binembelo kuba’mba Yehoba ukeba bapopweshi banji kwikala ba butooto kabiji baji na byubilo byawama ne bulunda bwakosa ne aye. Wakambizha’mba aba balenga mambo kwa kubula kulapila, bafwainwa kwibapanga mu kipwilo. (1 Ko. 5:11-13; 6:9, 10) Tukookela uno mukambizho ye baambapo mu Baibolo. Pano bino, na mambo a kuba’mba tukookela uno mukambizho, balwanyi betu bamba’mba twashikwa bakwetu kabiji amba twibazhachisha ne kubula kwibamwesha kifyele.

14. Ñanyi utundaika bantu kwamba bya bubela pa jibumba ja Yehoba?

 ¹⁴ Yukai mwine ubena kwimena ku ntundwa jibumba jetu. Satana Diabola ye ubena kutundaika bantu kwamba bya bubela pa jibumba ja Lesa. Aye “ye shanja bubela.” (Yoa. 8:44; Nte. 3:1-5) Onkao mambo, twafwainwa kuyuka’mba Satana wingijisha bantu banji kwamba bintu bya bubela pa jibumba ja Yehoba. Abino byo byo aubilenga ne mu myaka kitota kitanshi.

15. Ñanyi bintu bantangi ba bupopweshi byo baubile kwi Yesu ne ku baana banji ba bwanga?

¹⁵ Mu myaka kitota kitanshi, bantu ba kwa Satana baambilenga bintu bya bubela byavula bingi pa Mwana Lesa. Bantangi ba bupopweshi nabo baambijilenga bantu amba Yesu wapangilenga bandemona na bulume bwa “mukulumpe wa bandemona.” (Mako 3:22) Yesu byo bamutotolweshenga, bantangi ba bupopweshi bamupelemo mambo amba waambilenga mwenga. Kabiji bano bantangi batundaikile mabumba a bantu kuba’mba bamwipaye. (Mat. 27:20) Palutwe kacheche, baana ba bwanga ba kwa Kilishitu byo basapwijilenga mambo awama, aba bebakainyenga “balengejile bantu ba mu bisaka bya bantu kwalukilamo” bena Kilishitu ne kwibamanyika. (Byu. 14:2, 19) Kyamba kya Usopa kya December 1, 1998, kyaambile pa kinembelo kya Byubilo 14:2 amba: “Bantu batundaika Satana bakainenga mambo awama asapwijilenga bena Kilishitu, kabiji baambilenga bintu byatama pe abo. Baubile bino pa kuba’mba bantu baleke kuteleka ku mambo awama o basapwijilenga, kabiji kino kyalengejile bena Kilishitu kwibashikwa.”

16. Ñanyi bintu byo twafwainwa kuvulukanga inge twaumvwa bintu bya bubela byamba bantu?

¹⁶ Satana watwajijila kubepa ne lelo jino. Ubena “kujimbaika bantu ba pano pa ntanda ponse.” (Lum. 12:9) Inge mwaumvwa bintu  bya bubela bibena kwamba bantu pa jibumba ja Yehoba ne pa balongo babena kutangijila, vulukainga kuba’mba balwanyi ba Lesa byo byo baubile kwi Yesu ne ku baana banji ba bwanga ba mu myaka kitota kitanshi. Lelo jino, bantu ba Yehoba babena kwibamanyika ne kwibabepela byonkatu Baibolo byo aambijile jimo. (Mat. 5:11, 12) Inge twayuka mwine ubena kulengela bantu kwamba bya bubela pe atweba ne kupelawizha kubapo kintu kimo pa kuba’mba twizhikijile, kechi tukajimbaikwa na bintu byo bamba ne. Twakonsha kuba byepi pa kuba’mba twizhikijile?

17. Twakonsha kuchinuzhuka byepi kongolwa na mashimikila a bubela? (2 Timoti 1:13) (Monai ne kakitenguluzha ka kuba’mba, “ Bya Kuba Inge Mwaumvwa Mashimikila a Bubela.”)

¹⁷ Kanainga mashimikila a bubela. Mutumwa Paulo waambile byo twafwainwa kuba inge twaumvwa mashimikila a bubela. Waambijile Timoti amba “wibakambizhe bamo baleke . . . kutako muchima ku mashimikila a bubela” ne ‘kukana mashimikila a bubela.’ (1 Timo. 1:3, 4; 4:7) Mwana wakonsha kutola panshi kintu kya biko ne kwikibika mu kanwa. Pakuba mukulumpe kechi wakonsha kuba bino ne, mambo wayuka’mba kiji na biko. Tukana ano mashimikila a bubela mambo twayuka kwine kufuma buno bubela. Bino tuteleka ku “byambo byawama” bya bukine.​—Tangai 2 Timoti 1:13.

18. Mwakonsha kumwesha byepi’mba mwaketekela jibumba ja Yehoba?

¹⁸ Twisambakotu pa mashinda asatu jibumba ja Lesa mo jubila bintu byonka byaubanga Yesu. Inge mubena kutanga Baibolo, yukilaingapo ne mashinda akwabo jibumba ja Yehoba mo jubila bintu byonka byaubanga Yesu. Kwashainga balongo ne banyenga mu kipwilo kyenu kuketekela jibumba ja Yehoba. Kabiji ne anweba twajijilai kuketekela jibumba ja Lesa kupichila mu kwingijila Yehoba mu bukishinka ne kutwajijila kwikala mu jibumba janji jo abena kwingijisha kuba kyaswa muchima wanji. (Sala. 37:28) Twayai tumweshenga’mba twanemeka kwingijila pamo na bantu batemwa Yehoba kabiji ba kishinka.