KWAJINGA ku mpelo ya ñondo wa November mu 1932, mu Mexico City. Papichiletu mulungu kufuma kimye kitanshi kyo babikile maloboti nangwa’mba malaichi abuulañana byafwainwa kwenda myotoka mu mikwakwa mu uno muzhi mwajinga bantu kukila pa 1 milyonyi. Pano pa kikye kimye bantu balekele kwamba pa maloboti ne kutendeka kwamba pa kintu kikwabo. Bantapatwambo ba mu uno muzhi bayile na makamela abo pa kiteshenyi kya shitima na kupembelela mwenyi ye batengejilenga. Uno mwenyi wajinga Joseph F. Rutherford, watangijilanga kipamo kya Watch Tower Society. Bakamonyi ba mu uno muzhi nabo bapembelejilenga kutambwila Mulongo Rutherford, waishile ku kushonkena kwa moba asatu.

Magazini watelwanga’mba The Golden Age waambile’mba, “bantu kechi bakalubamo kuno kushonkena ne, mambo kwanema bingi kwi atweba mambo kwakwasha kusampanya bukine mu Mexico.” Pano ki ka kyalengejile kuno kushonkena kwataainwetu bantu nobe 150 kuya bingi nkuwa?

Kuno kushonkena saka kukyangye kwikalako, bukine kechi bwasampene mu Mexico ne. Kutendeka mu 1919, banengezhanga kubuñana kwa bantu bacheche, bino bipwilo byayilengatu na kukepelako pa myaka yalondejilepo. Byo bashinkwile ofweshi wa musampi mu Mexico City mu 1929, kyamwekele nobe bintu bisakuwamako. Pano bino, kwajinga mikiika. Jibumba ja Lesa byo jabuujile bakoputala, batelwa luno amba bapainiya kuleka kuba busulu pa kwingila mwingilo wa kusapwila, koputala umo wazhingijile ne kulenga jibumba janji ja bafunda Baibolo. Kabiji watangijilanga ofweshi wa musampi waubilenga bintu byapusana na byaamba Baibolo. Onkao mambo, bamufumishepo ne kupingizhapo mukwabo. Bakamonyi ba kishinka bajinga mu Mexico bakebewenga lutundaiko lwa mu Binembelo.

Kimye Mulongo Rutherford kyo afwakashijile uno muzhi, watundaikile bano balongo ba kishinka, waambile majashi abiji awama pa kushonkena ne akwabo atanu pa waileshi. Kyo kyajinga kimye kitanshi mawaileshi a mu Mexico kyo asampenye mambo awama mu kyalo kyonse. Kushonkena byo kwapwile, mulongo ye batongwele kutangijila ofweshi wa musampi wanengezhezhe mutanchi wawama wa kusapwila, kabiji Bakamonyi bajinga na kizaku batendekele kusapwila na mukoyo kabiji Yehoba wibapesheshe.

Mwaka walondejilepo, banengezhezhe kushonkena kubiji mu kino kyalo, kumo kwaikejile mu muzhi wa Veracruz waikela ku kitulu kya kalunga ka mema, kukwabo kwajinga mu Mexico City. Na mambo a kwingila na ngovu mu mwingilo wa kusapwila, mwatendekele kufuma byawama. Mu 1931 mu kino kyalo mwajinga basapwishi 82. Byo papichile myaka jikumi, basapwishi bavujijileko bingi. Mu 1941, mu Mexico City mwaishile bantu nobe 1,000 ku kubuñana kwatelwanga’mba Theocratic Assembly.

Mu 1943, Bakamonyi baingijishe bipabi panembelwe byambo bya kwita bantu ku kubuñana kwa kuba’mba “Free Nation’s” kwaikeleko mu mizhi ikatampe 12 mu Mexico. * Bipabi bibiji bebikasanga ntambo ibiji yapitanga pa bipuzhi, kipabi kimo pa kyaji, kikwabo munyuma.  Jino jo jishinda jaingijishanga Bakamonyi pa kutaya mbila kutendeka mu 1936.

Pa kwamba pa byaingijile mukwekele wa kwingijisha bipabi mu Mexico City, magazini wa La Nación waambile’mba: “Juba jitanshi [ja kubuñana, Bakamonyi] bebatundaikile kwita bantu bavula. Juba jalondejilepo, bavujile bingi kya kuba pa mpunzha po babuñenenga pakepele.” Mukwekele wa kwingijisha bipabi wazhingijishe bantangi ba Chechi wa Katolika, kabiji batendekele kupitamo na kwamba byatama pa Bakamonyi. Nangwa kya kuba bebakainyenga, bino balongo ne banyenga bachinchikile ne kutwajijila kupitañana mu mikwakwa. Magazini wa La Nación wanembele ne kuba’mba: “Bantu mu muzhi yense bebamwenenga . . . banabalume ne banabakazhi saka baji na bipabi panembelwe byambo.” Mu kino kibaaba mwajinga ne kipikichala kya balongo bajinga mu mikwakwa mu Mexico City. Panshi ya kino kipikichala panembelwe byambo bya kuba’mba: “Balukuka mikwakwa yonse.”

Mu yoya myaka, Bakamonyi bavula bebikangako bingi pa kuba’mba baye na kutanwa ku kushonkena mu Mexico. Bavula bafumanga mu mizhi yajinga kwalepa bingi kwabulanga kufika mashitima kabiji kechi kwajinga mikwakwa ne. Kipwilo kimo kyanembele’mba, “kwapichiletu ntambo ya telegalafu.” Onkao mambo, pa kuya na kushonkena bantu baendanga pa bambongolo nangwa kwendatu panshi moba avula pa kuba’mba bafike kwajinga kiteshenyi kya shitima ye bakanjilangamo pa kuba’mba bakafike mu muzhi mwaikela kushonkena.

Bakamonyi bavula bajinga bingi bayanji kya kuba bakankalwanga mali a kukanjijila shitima kuya na kushonkena. Inge bafika, bavula bafikilanga mu mazubo a Bakamonyi ba konkakwa, kabiji bebatambwilanga bulongo. Bakwabo balaalanga mu Mazubo a Bufumu. Kimye kimo, balongo ne banyenga 90 bayile na kushonkena bafikijile pa musampi, kabiji balaajilenga pa bibokoshi byo batanchikile ne kwibilenga nobe myanya, ko kuba’mba “bibokoshi 20 mwanya umo.” Jishimikila jiji mu Buku wa Mwaka jaambile’mba bano benyi basanchile bingi pa ino myanya kya kuba baambile’mba ino “myanya yawamine ne kutwa kyuya kukila kulaala panshi.”

Bano Bakamonyi baikalanga bingi na lusekelo pa kutaanwa ku kubuñana kwa bwina Kilishitu nangwa kya kuba bintu byakatezhe. Lelo jino, basapwishi mu Mexico bavula bingi babena kunangijila ku 1 milyonyi, kabiji muchima wabo wa kusanta watwajijila. * Mu 1949, sawakya wafumine ku ofweshi wa musampi wa mu Mexico waambile pa balongo amba: “Makatazho o bapitamo kechi ebalengela kubula kuya na kubuñana ne, mambo inge kubuñana kwapwa batwajijilatu na kwamba pa bintu byawama byo bafunjile, kabiji bwipuzho balongo bo batemwa kwipuzha ke bwa kuba’mba, Ñanyi kimye kyo tukekala na kubuñana kukwabo?” Byonka byaambile uno sawakya, byo byo kiji ne lelo jino.—Kufuma mu Butala Bwetu mu Central America.