1, 2. (a) Twayuka byepi amba twakonsha kuvwala bumuntu bupya? (b) Ñanyi mbaji ya bumuntu bupya yanembwa pa Kolose 3:10-14?

“BUMUNTU bupya.” Abino byambo bitanwa bimye bibiji mu Baibolo wa Binembelo bya Ntanda Ipya. (Efi. 4:24; Kolo. 3:10) Bilumbulula bumuntu “bwalengelwe monka mwayila kyaswa muchima wa Lesa.” Kechi kyakatazha kuvwala bumuntu bupya ne. Mambo ka? Atweba bantu twalengwa mu kipasha kya Yehoba. Onkao mambo, twakonsha kwikala na byubilo byawama bijipo ne Lesa.—Nte. 1:26, 27; Efi. 5:1.

² Bino na mambo a bumbulwa kulumbuluka bo twaswana ku bansemi betu batanshi, bimye bimo twikala na milanguluko yatama. Kabiji nyaunda yo twikalamo yakonsha kwitulengela kwikala na ndangulukilo yabula kufwainwa. Pano bino, na bukwasho bwa Yehoba, twakonsha kushinda milanguluko yatama ne kwikala bwikalo bukeba Lesa. Pa kuba’mba twikele mukebela Lesa, tusakwisamba mbaji yapusana pusana ya bumuntu bupya yanembele mutumwa Paulo na lutangijilo lwa mupashi wazhila. (Tangai Kolose 3:10-14.) Kabiji tusakwisamba ne byo twakonsha kumwesha bino byubilo mu mwingilo wa kusapwila.

3. Ñanyi kiyukilo kimo kimwesha’mba muntu wavwala bumuntu bupya?

³ Paulo byo apwishishe kwamba pa kuvwala bumuntu bupya, walumbulwile’mba kiyukilo kimo kimwesha’mba muntu wavwala bumuntu bupya ke kubula misalululo. Waambile’mba: ‘Kechi muji Mungiliki nangwa Muyudea, wa mukanda nangwa wabula mukanda, mwenyi, mwina Sikitya, muzha nangwa mwana bene ne.’ * Mambo ka mu kipwilo kyo mwafwainwa kubujila misalululo ya bikoba, kyalo nangwa bifulo? Mambo atweba bonse baana ba bwanga bwa kwa Kilishitu twi “umo.”—Kolo. 3:11; Nga. 3:28.

4. (a) Bakalume ba Yehoba bafwainwa kumonanga byepi bakwabo? (b) Ñanyi bintu byakonsha kulengela bena Kilishitu kubula kukwatankana?

⁴ Aba bavwala bumuntu bupya banemeka bakwabo bena Kilishitu ne babula bena Kilishitu, nangwa kya kuba bafuma mu bisho ne nkomeno yapusana pusana. (Loma 2:11) Kino kyakonsha kukatazhako mu byalo bimo. Mu South Africa, Bakamonyi bavula bakikala mu mizhi yo basajile kwesakana na kikoba, bantu bafita bekala mu mataunyi o balengele amba a bantu bafita, nangwa mu mapunzha mwaikalanga bantu ba bikoba byapusana pusana. Onkao mambo, pa kuba’mba batundaike balongo kupwanañananga na balongo ba bikoba byapusana pusana, mu October 2013, Jibumba Jitangijila jaitabizhe lunengezho lwa kukwasha balongo kukwatankana. (2 Ko. 6:13) Kino kyavwangilemo kuba byepi?

5, 6. (a) Pa kuba’mba bakoseshe lukwatankano pakachi ka bantu ba Lesa mu kyalo kimo, ñanyi lunengezho lo babikileko? (Monai kipikichala kitanshi.) (b) Ñanyi bintu byafumamo?

⁵ Banengezhezhe kuba’mba bipwilo bibiji bingijisha milaka yapusana nangwa baji na bikoba byapusana bakapwanañane ku mpelo ya milungu. Balongo ne banyenga ba mu bino bipwilo bibiji baingijile pamo busapwishi, kupwila pamo, kabiji batambwijile bakwabo mu mazubo abo. Bipwilo byavula bingi bivwangilemo mu kuba bino, kabiji ofweshi wa musampi watambwijile masawakya awama bingi pa luno lunengezho kufuma ne ku bantu babula Bakamonyi. Ntangi wa bupopweshi umo waambile’mba: “Amiwa kechi ne Kamonyi ne, bino nemwena byo mwayuka bya kunengezha mwingilo wa kusapwila, kabiji mwakwatankana nangwa kya kuba mwapusana bikoba.” Luno lunengezho lwakwashishe byepi balongo ne banyenga?

⁶ Patanshi, nyenga wa jizhina ja Noma wamba mulaka wa Xhosa (Kikosa) kechi wakebelenga kwitako balongo bazungu bafumine mu kipwilo kya kizungu kwiya mu nzubo yanji icheche ne. Bino byo aingijile mwingilo wa kusapwila na Bakamonyi bazungu ne kumona byo bamutambwijile bulongo mu mazubo abo, waambile’mba: “Nabo bantu byonkatu byo tuji!” Onkao mambo, byo kyafikile kimye kya kipwilo kyabo kutambwila balongo ba mu kipwilo kya Kizungu, uno nyenga wanengezhezhe kajo kabiji waichile bamo ku nzubo yanji. Pa benyi baishile ku nzubo yanji pajinga ne mukulumpe mu kipwilo muzungu. Nyenga Noma waambile’mba: “Nakuminye bingi pa kumona uno muzungu waswa kwikala panshi pa kyo babikamo mabotolo.” Na mambo a luno lunengezho, balongo ne banyenga baikala na balunda bakatataka kabiji bafuukulapo kutwajijila kupwanañana na balongo ba bikoba byapusana.

7. Mambo ka o twafwainwa kutwajijila kumwesha kifyele?

⁷ Tukatwajijila kupita mu meseko kufikatu ne kimye kya mpelo ya ntanda ya kwa Satana. Lelo jino, makito akatazha kutaana, kuji bikola byapusana pusana, kuji bya malwa biponakotu bine, kwitwibila bipe ne makatazhotu akwabo. Pa kuba’mba twikwashenga atweba bene na bene mu makatazho nangwa mu bya  malwa, twafwainwa kwikala ba kifyele. Kifyele kiketulengela kubila bakwetu lusa. (Efi. 4:32) Abino byubilo bya bumuntu bupya biketukwasha kulondela Lesa ne kutekenesha bakwetu. —2 Ko. 1:3, 4.

8. Ñanyi bintu byawama bifumamo inge ke tumweshe kifyele ne lusa ku bonse mu kipwilo? Ambaipo kimo kyamwekele.

⁸ Twakonsha kumwesha byepi kifyele bantu bafuma mu byalo bingi nangwa bayanji baji mu kipwilo kyetu? Twafwainwa kupwanañananga na bano bantu pa kuba’mba bayuke’mba nabo banema mu kipwilo. (1 Ko. 12:22, 25) Akilangulukai pa kyamwekejile ba Dannykarl bavilukile kufuma ku Philippines kuya ku Japan. Pa nkito kechi bebanemekele byonka byo banemekele ba mingilo ba mu kyonkakya kyalo ne. Bino juba jimo bayile na kupwila na Bakamonyi ba kwa Yehoba. Ba Dannykarl baambile’mba: “Bavula bajinga mu luonde bajinga bena Japan, pano bino, bantambwijile bingi bulongo uba nobe balunda nami ba kala.” Batwajijile kwibamwesha kifyele, kabiji kino kibakwashishe kukosesha bulunda bwabo ne Lesa. Babatizhiwe, kabiji lelo jino ke bakulumpe mu kipwilo. Bakulumpe mu kipwilo bakwabo bomvwa bingi bulongo kwikala ne Dannykarl ne benakwabo ba Jennifer, mu kipwilo. Bakulumpe baambile pa bano ba mulume ne mukazhi amba: “Bekala bwikalo bwapeela kabiji bengila bupainiya bwa kimye kyonse kabiji ne basapwishi bavula babena kufunjilako kutangizhako Bufumu patanshi mu bwikalo bwabo.”Luka 12:13

9, 10. Ambaipo bimo byamwekele bimwesha’mba mu kubila bantu lusa mu mwingilo wa kusapwila mufuma byawama bingi.

⁹ Inge ketwingijile pamo na bakwetu mwingilo wa kusapwila Mambo a Bufumu, twikala na kimye kya ‘kubila bonse byawama.’ (Nga. 6:10) Na mambo a kubila lusa bantu bafuma mu byalo bikwabo, Bakamonyi bavula bebikako kufunda milaka ikwabo. (1 Ko. 9:23) Mwafuma bintu byawama bingi. Nyenga umo painiya wa ku Australia aye Tiffany wafunjile Kiswahili pa kuba’mba atundaike kipwilo kya Kiswahili kiji mu muzhi wa Brisbane. Nangwa kya kuba kechi kyapelele kufunda mulaka mukwabo ne, bino ba Tiffany bamwenamo byavula. Baambile’mba: “Inge ukeba kwikala na lusekelo mu mwingilo wa kusapwila, wafwainwa kuya mu kipwilo kya mulaka wa ku kyalo kingi. Kijitu nobe waya na kwingijila mu kyalo kingi. Wimwena byo twakwatankana mu bwanabwankazhi bwa ntanda yonse.”

¹⁰ Akilangulukai ne pa byaubile kisemi kimo mu Japan. Mwanabo wa mukazhi aye Sakiko washimikizhe’mba: “Mu myaka ya ma 1990, kimye kyo twaingilanga mu mwingilo wa kusapwila, twasambakananga bantu bavula bingi bafumine ku Brazil. Inge twibamwesha binembelo mu Baibolo wabo wa Kipotogizi, nabiji Lumwekesho  21:3, 4 nangwa Salamo 37:10, 11, 29, batangako bingi muchima, kabiji bimye bimo bajilanga ne mipolo.” Bino kino kisemi kechi kyapelejiletu mu kuba bino ne. Sakiko waambile’mba: “Byo twamwene kuba’mba babena kukeba kufunda bukine, twatendekele kufunda Kipotogizi mu kisemi.” Mu kuya kwa kimye, kino kisemi kyakwashishe bingi pa kuba’mba kwikale kipwilo kya mulaka wa Kipotogizi. Kino kisemi kyakwasha bantu bavula bingi bafuma mu byalo bikwabo kwikala bakalume ba Yehoba. Sakiko wanungilepo’mba: “Kechi kyapelele kufunda Kipotogizi ne, bino mwafuma byawama bingi. Tumusanchila bingi Yehoba pa kwitukwasha.”—Tangai Byubilo 10:34, 35.

11, 12. (a) Mambo ka o kyanemena kuyuka ene mambo o tuvwajila bumuntu bupya? (b) Ñanyi bintu biketukwasha kutwajijila kwikala bepelula?

¹¹ Ene mambo o tuvwajila bumuntu bupya ke kutumbijika Yehoba, kechi kukeba’mba bantu betutote ne. Vulukainga kuba’mba nangwatu bilengwa bya mupashi byalumbuluka byasatukile na mambo a bwitote. (Esakanyaiko Ezikyo 28:17.) Onkao mambo, kyakatazha bingi bantu bambulwa kulumbuluka kuchinuzhuka bwitote ne kwijantula. Pano bino, twakonsha kuvwala muchima wa kwipelula. Ñanyi bintu biketukwasha kuba bino?

¹² Pa kuba’mba tutwajijile kwikala bepelula, twafwainwa kwikalangapo na kimye kya kulanguluka-languluka pa byo tutanga mu Mambo a Lesa. (Mpitu. 17:18-20) Twafwainwa kulanguluka pa mafunjisho a kwa Yesu ne byubilo byanji bya kwipelula. (Mat. 20:28) Yesu waovwele ne maulu a batumwa banji. (Yoa. 13:12-17) Kabiji twafwainwa ne kulombanga kimye kyonse mupashi wa Lesa kuba’mba etukwashe kushinda muteeto wa kwimona nobe twakila bakwetu.—Nga. 6:3, 4; Fili. 2:3.

13. Ñanyi bintu byawama bifumamo mu kwipelula?

¹³ Tangai Byambo bya Maana 22:4. Bapopweshi ba kine bonse bafwainwa kwipelula, kabiji mufuma byawama bingi. Kwipelula kuketukwasha kwikala mu mutende ne kukwatankana mu kipwilo. Kabiji kwikala bepelula kuketukwasha kutambwila lusa lukatampe lwa Lesa. Mutumwa Petelo waambile’mba: “Anweba bonse vwalai muchima wa kwipelula mu bintu byo mwiubila anwe bene na bene, mambo Lesa ukana bantu belundumika, pakuba ubila lusa lwanji lukatampe bantu bepelula.”—1 Pe. 5:5.

14. Ñanyi mwine wakilamo kumwesha kukooka muchima ne butekanye?

¹⁴ Mu ntanda lelo jino, bantu bakooka muchima ne batekanya bebamona’mba bazenzalala. Bino buno ke bubela bufiita! Abino byubilo byawama bifuma ku Mwine uji na bulume bukatampe. Yehoba Lesa ye mwine umwesha kukooka muchima ne butekanye. (2 Pe. 3:9) Akilangulukai byo aubile kimye kyo atumine bamalaika banji kukumbula mepuzho a kwa Abalahama ne Lota. (Nte. 18:22-33; 19:18-21) Kabiji Yehoba wamwesheshe butekanye pa myaka kukila pa 1, 500 ku kisaka kya bena Isalela kyamusatukijile.—Ezi. 33:11.

15. Yesu wamwesheshe byepi kukooka muchima ne butekanye?

¹⁵ Yesu naye wajinga ‘wakooka muchima.’ (Mat. 11:29) Wamwesheshe butekanye bukatampe ne kulekelako mambo baana banji ba bwanga. Kimye kyo aingijilenga mwingilo wanji pano pa ntanda, Yesu wachinchikile myendeleko ya balwanyi banji. Watwajijile kwikala wakooka muchima ne kutekanya kufikatu ne kimye kyo bamupelemo mambo a bubela ne kumwipaya. Byo amanaminenga na misongo ikatampe pa kichi kya lumanamo, Yesu walombele kwi Bashanji kuba’mba balekeleko mambo bantu bamwipayilenga, mambo waambile’mba, “kechi bayuka kyo babena kuba ne.” (Luka 23:34) Kine, wamwesheshe kukooka  muchima ne butekanye kimye kyo amanaminenga. Ne atweba twafwainwa kufunjilako.—Tangai 1 Petelo 2:21-23.

16. Mu ñanyi jishinda mo tumweshesha kukooka muchima ne butekanye?

¹⁶ Twakonsha kumwesha byepi kukooka muchima ne butekanye? Paulo waambilepo jishinda jimo jo twakonsha kubilamo kino byo anembejile bakwabo ba mu lwitabilo amba: “Itekenyainga anwe bene na bene ne kwilekelako mambo umvwe umo uji na mambo na mukwabo. Byonkatu Yehoba byo emulekejileko mambo, ne anweba byo byo mwafwainwa kubanga.” (Kolo. 3:13) Kya kine, pa kuba’mba tukookele uno mukambizho, twafwainwa kwikala bakooka muchima kabiji batekanya. Bino inge ketwilekeleko mambo, tutwajijila kwikala bakwatankana mu kipwilo.

17. Mambo ka kukooka muchima ne kutekanya kyo kwanemena?

¹⁷ Bena Kilishitu bonsetu bafwainwa kuvwala muchima wakooka ne wa butekanye. Kuba bino ko kuketulengela kupuluka. (Mat. 5:5; Yako. 1:21) Kyakilamo kunema, bino byubilo bitukwasha kunemeka Yehoba ne kukwasha bantu kumvwina lujimuno luji mu Baibolo.—Nga. 6:1; 2 Timo. 2:24, 25.

18. Butemwe ne kubula misalululo byakwatankana byepi?

¹⁸ Byubilo byonse byo twisambapo byafuma ku butemwe. Mutumwa Yakoba wafunjileko balongo banji banemekeleko banonshi ne kulengulula bayanji. Wibalumbulwijile kuba’mba misalululo yamwesheshenga’mba kechi banemekele muzhilo wa bufumu ne, wa kuba’mba: “Wafwainwa kutemwa mukwenu byonka byo witemwa obewa mwine.” Kabiji wanungilepo amba: “Inge mwatwajijila kuba misalululo, mubena kulenga mambo.” (Yako. 2:8, 9) Kupusanako na kino, butemwe bwitutundaika kuchinuzhuka misalululo na mambo a kufunda, bikoba nangwa bifulo. Kubula misalululo kechi kwafwainwa kwikala kwa pa kanwatu ne. Twafwainwa kwikumweshanga kimye kyonse mu byubilo byetu.

19. Mambo ka kuvwala butemwe o kwanemena?

¹⁹ Kikwabo, butemwe “butekanya ne kuba lusa” kabiji “kechi bwilundumika ne.” (Ko. 13:4) Kya kine, kikebewa kwikala batekanya, ba kifyele ne kwipelula pa kuba’mba tutwajijile kusapwila bantu Mambo a Bufumu. (Mat. 28:19) Kabiji bino byonka byubilo bitukwasha kukwatankana na balongo ne banyenga bonse mu kipwilo. Ñanyi bintu byawama bifumamo mu kumwesha butemwe mu ano mashinda? Kilengela kipwilo kwikala kyakwatankana ne kutumbijika Yehoba kabiji kilengela ne bantu kwiya mu jibumba ja Lesa. Onkao mambo, kyayilamo bingi Baibolo byo alumbulula bumuntu bupya na kishinka kya kuba’mba: “Kyakila pa bino byonse, vwalai butemwe, mambo butemwe bukwatankanya bantu bulongo.”—Kolo. 3:14.

20. (a) Ñanyi mepuzho o twafwainwa kwiipuzha atweba bene, kabiji mambo ka? (b) Ñanyi kimye kyo tubena kutengela?

²⁰ Atweba bonse pa muntu pa muntu twafwainwa kwiipuzha’mba, ‘Ñanyi bintu bikwabo byo nakonsha kuba pa kuba’mba mvuule bumuntu bwa kala ne kwibusankilapo?’ Twafwainwa kulombanga na mukoyo kuba’mba Lesa etukwashe ne kwibikako kukana byubilo byakonsha kwitulengela kukankalwa kuswana Bufumu bwa Lesa. (Nga. 5:19-21) Kabiji twafwainwa kwiipuzha’mba, ‘Nanchi natwajijila kulengwa ke mupya mu muchima wami nyi?’ (Efi. 4:23, 24) Kuvwala bumuntu bupya ne kutwajijila kwikala nabo kechi kupwa ne, kufikatu ne byo tukekala balumbuluka. Fwanyikizhai bwikalo byo bukekala kimye bantu bonse kyo bakavwala bumuntu bupya ne kwikala balumbuluka!