BYO bayilenga ku Europe manyaki a pa kalunga ka Atlantic epuminenga ku bwato, muntu umo wakanjijile mu buno bwato aye George Young, wavulukile mwingilo wa Bufumu ye aingijile mu Brazil byo aendelenga bulongo. * Nangwa byonkabyo, luno lwendo byo lwatwajijile, Mulongo George Young watendekele kulanguluka pa mwingilo wa katataka ye bamupele wa kwingijila mu manyaunda mwabujile kufika mambo a Bufumu, mu Spain ne Portugal. Walangulukilenga’mba inge wafika, ukanengezhezha Mulongo J. F. Rutherford mpunzha kwa kwambila majashi a Baibolo, ne kusampanya matalakiti 300, 000.

Mulongo George Young byo afikile mu muzhi wa Lisbon mu Portugal mu 1925 kimye kya mwela wa mebele, wataaine muji milukuchi. Mu 1910, kwaikele kupimpula kafulumende mu kyalo kya Portugal, mfumu bamufumishepo ku bashilikale kabiji Chechi wa Katolika bamwangachile bulume. Bantu baikele na luusa lwa kwiubila bintu, bino milukuchi kechi yapwile ne.

Mulongo George Young byo anengezhezhenga Mulongo Rutherford mo akambila jashi ja mvula bantu, kafulumende wapele bashilikale bulume bukatampe na mambo bashilikale bakebelenga kwangata kafulumende. Munembeshi wa kipamo kya British and Foreign Bible Society wajimwineko Mulongo Young amba basakukamunyika bingi. Bino Mulongo Young wayile na kulomba kishimikwa kya pa sukulu mo bakaila makayo a kukosesha mubiji, kabiji bamuswishishe.

Pa 13 May, jo jajinga juba Mulongo Rutherford jo aambile jashi ja mvula bantu. Bantu batengejilenga jino juba. Banembele jashi ja jinga na mutwe wa kuba’mba, “Byo Twakonsha Kwikala mu Ntanda Myaka ne Myaka” (How to Live on the Earth Forever) pa bipabi byo balamikile pa bishimikwa ne mu mapepala a byambo. Bantangi ba bupopweshi bamwimenejile ku ntundwa banembele kibaaba mu pepala wabo wa byambo kujimunako bantangi amba kwajinga “ngauzhi wa bubela” waishilenga. Kabiji bamo baimene pa kibelo kya kishimikwa kya makayo na kupana mabuloshuwa mwajinga byambo byakainyenga bantu kuteleka ku byafunjishenga Mulongo Rutherford.

Nangwa byonkabyo, bantu 2,000 batainweko, bino bakwabo 2,000 babwelelemo na mambo a kukepa kwa kishimikwa. Bantu bamo batelekelenga ku jashi saka bakobama ku madandalashi ajingamo, kabiji bakwabo bakanjijile pa byela byo bengijisha pa kukosesha mubiji.

Pano bino, kupwila kechi kwaendele bulongo ne. Balwanyi baubilenga kyungwe ne kutaya bipona panshi. Bino Mulongo Rutherford watwajijile na kwamba, kabiji wakanjijile ne pa tebulu pa kuba’mba bavula bomvwe byo aambilenga. Byo apwishishe kwamba jashi pakachi ka bufuku, bantu kukila pa 1,200 bashile mazhina abo ne makeyala pa kuba’mba bakebatuminenga mabuku etu alumbulula Baibolo. Juba jalondejilepo, mu pepala wa byambo wa O Século, mwajinga kibaaba kyaambile pa jashi jaambile Mulongo Rutherford.

 Byo kyafikilenga mu September 1925, batendekele kulupula Kyamba kya Usopa mu mulaka wa Kipotogizi mu kyalo kya Portugal. (Saka bakyangye kutendeka kunemba Kyamba kya Usopa mu Kipotogizi mu Portugal, kyalo kya Brazil kyo kyajinga kitanshi.) Pa kyonkakya kimye, bafundanga Baibolo abo ba Virgílio Ferguson baikalanga mu Brazil, balangulukilenga kuvilukila ku Portugal kuya na kwingilako mwingilo wa Bufumu. Ba Virgílio Ferguson baingijileko pamo na Mulongo George Young pa ofweshi wa musampi mucheche wajinga mu Brazil paikalanga Bafunda Baibolo. Kechi pabanjile ne, ba Virgílio Ferguson ne benakwabo ba Lizzie bayile na kwingijila pamo jikwabo na mulongo George Young ku Portugal. Mulongo Virgílio Ferguson wayile pa kimye kyafwainwa, mambo kwashajiletu kimye kicheche mulongo George Young kuya na kwingijila ku kyalo kikwabo kubikakotu ne byalo bya mu Soviet Union.

Bashilikale byo batendekele kulama kyalo kya Portugal, bakainyenga mwingilo wa kusapwila. Mulongo Ferguson wachinchikile kabiji wipaine kuzhikijila jibumba jicheche ja bafundanga Baibolo ne kutundaika mwingilo wa kusapwila. Wayile na kutambula luusa kuba’mba bapwijilenga mu nzubo yanji. Mu October 1927, bamuswishishe.

Mwaka mutanshi walaminenga bashilikale, bantu 450 mu Portugal batambwilanga Kyamba kya Usopa. Kunungapo, kupichila mu matalakiti ne tubuku bukine bwafikile mu byalo mo baambanga mulaka wa Kipotogizi, nabiji kyalo kya Angola, Azores, Cape Verde, East Timor, Goa, Madeira, ne Mozambique.

Mu 1929, njimi wa jizhina ja Manuel da Silva Jordão, wavilukijile mu muzhi wa Lisbon. Byo ajinga mu Brazil, watelekele ku jashi ja mvula bantu jaambile Mulongo George Young. Washiinwe’mba wataine bukine, kabiji wakebeshe bingi kwingijila pamo na Mulongo Virgílio Ferguson ne kwingilako pakatampe mu mwingilo wa kusapwila. Pa kuba’mba bobe bino, ba Manuel batendekele kwingilako mwingilo wa bukoputala, byo batelanga bapainiya pa kyokya kimye. Na mambo a kupulinta mabuku alumbulula Baibolo ne kwiasampanya, kyalengejile kipwilo kyajinga mu muzhi wa Lisbon kutwajijila na kukomenako.

Mu 1934, Mulongo Ferguson ne mwinakwanji babwelele ku Brazil. Nangwa byonkabyo, nkunwa ya bukine ya byajilwe. Nangwa kya kuba mwajinga milukuchi mu Europe na mambo a nkondo yajinga mu Spain ne Nkondo ya Bubiji ya Ntanda Yonse, balongo mu Portugal batwajijile kwikala ba kishinka kwi Yehoba. Pa kyo kya kimye mwingilo wabweleleko panshi, bino byo kyafikile mu 1947, batendekele jikwabo kwingila na mukoyo kimye kyaishile mishonale mutanshi wafumine ku sukulu wa Gileada aye John Cooke. Kufumatu kyo kya kimye, basapwishi ba Bufumu batwajijile na kuvujilako. Nangwatu kimye kafulumende kyo akainye mwingilo wa Bakamonyi ba kwa Yehoba mu 1962, batwajijiletu na kuvujilako. Mu December 1974, Bakamonyi ba kwa Yehoba bebaswishishe ku kafulumende kupwila ne kusapwila, kabiji mu kyalo mwajinga basapwishi kukila pa 13,000.

Lelo jino, basapwishi ba Bufumu kukila pa 50,000 babena kusapwila mambo awama a Bufumu bwa Lesa mu Portugal ne mu makuji mo bamba Kipotogizi, kubikakotu ne jikuji ja Azores ne Madeira. Pa bano basapwishi paji ne baji na bansemi batelekeleko ku jashi jaambile Mulongo Rutherford mu 1925.

Tubena kusanchila Yehoba ne balongo ne banyenga bachinchikile mu kusampanya mambo awama byo ‘baikele bakalume ba Kilishitu Yesu mu kwingijila bisaka bya bantu.’—Loma 15:15, 16.—Kufuma mu butala bwetu mu Portugal.