1. Mu ñanyi mashinda mo twakonsha kwingijila pamo ne Yehoba?

MULENGA wetu wamwenejile jimo kuba’mba bantu balumbuluka bakakonsha kwingijila pamo ne aye kufikizha kyaswa muchima wanji. Nangwa kya kuba twibambulwa kulumbuluka, pano bino bantu ba kishinka bakonsha kwingijila pamo ne Yehoba moba onse. Twikala “ba mwingilo umo ne Lesa” byo tusapwila mambo awama a Bufumu bwanji ne kufunjisha bantu kwikala baana ba bwanga. (1 Ko. 3:5-9) Ke munema mukatampe wakwingijila pamo na Mulenga wa bulume bonse mu mwingilo ye anemeka bingi. Pano bino, mwingilo wa kusapwila ne kufunjisha bantu kwikala baana ba bwanga kechi ye yenka mwingilo ye twakonsha kwingijila pamo ne Yehoba ne. Mu uno mutwe tusakufunda pa byo twakonsha kwingijila pamo ne Lesa mu kukwasha kisemi kyetu ne bakwetu ba mu lwitabilo, kutambwila benyi, kwipana kwingilako mingilo mu jibumba ja Lesa ibena kwingijiwa mwaya ntanda yonse ne kwingilako pakatampe mingilo wa kusapwila.—Kolo. 3:23.

2. Mambo ka o twafwainwa kubujila kwesakanya byo twingijila Yehoba na bingila bakwetu?

² Byo tubena kufunda uno mutwe, kechi mwafwainwa kwesakanyanga byo mwingijila Yehoba na bingila bakwenu ne. Vulukai kuba’mba twapusana mu myaka, butuntulu bwa mubiji, bwikalo ne bulume. Mutumwa Paulo wanembele’mba: “Muntu yense apime byubilo  byanji, ne kwitotela mu bintu byanji mwine, kechi kwiesakanya ku muntu mukwabo ne.”—Nga. 6:4.

3. Mambo ka o twafwainwa kwambila’mba bonse balama bisemi byabo babena kwingijila pamo ne Lesa?

³ Yehoba ukeba bakalume banji kulamanga bulongo bisemi byabo. Ko kuba’mba mwafwainwa kwingila pa kuba’mba mwikale na mali a kulaminamo kisemi kyenu. Bansemi babakazhi bavula bekala pa nzubo na kulama baana babo babacheche. Kabiji baana bakoma balama bansemi babula bulume bwa kwiubila bintu. Ino ke mingilo yanema. Mambo a Lesa aamba’mba: “Umvwe muntu kechi wibakebela bintu aba bo alama kikatakata ba mu nzubo yanji mwine ne, wilukana lwitabilo kabiji watama kukila yewa wabula kwitabila.” (1 Timo. 5:8) Inge muji na kisemi mwakonsha kulanguluka’mba kechi mwakonsha kwingijila Yehoba pakatampe ne. Pano bino, kwakamwa ne. Yehoba umvwa bingi bulongo inge kemukebele ba mu kisemi kyenu bintu bikebewa mu bwikalo.—1 Ko. 10:31.

4. Bansemi bakonsha kutangizhako byepi Bufumu patanshi, kabiji ñanyi bintu byawama bifumamo?

⁴ Bansemi bena Kilishitu bengijila pamo ne Yehoba kupichila mu kutundaika baana babo kwibikila bikonkwanyi mu mwingilo wa Yehoba. Bansemi bavula bauba bino bemwena baana babo byo befuukwilapo abo bene kutendeka mwingilo wa kimye kyonse ne kuya na kwingijila kwalepa. Bamo bamishonale, bakwabo bapainiya bengijila kwakepa basapwishi ba Bufumu, kabiji bakwabo nabo bengijila pa Betele. Na mambo a kwingijila kwalepa bansemi ne baana kechi bamonañana javula ne. Nangwa byonkabyo, bansemi baji na muchima wa kwipana batundaika baana babo kutwajijila kwingila mwingilo wa kimye kyonse. Mambo ka? Bekala bingi na lusekelo na mambo a kuba’mba baana babo batangizhako Bufumu patanshi. (3 Yoa. 4) Kampe bansemi bavula bomvwatu byonka byaumvwinenga Hana, waambile’mba “namwashimisha” Samwela kwi Yehoba. Bansemi bavula banemeka bingi kwingijila pamo ne Lesa.—1 Sam. 1:28.

5. Mu ñanyi mashinda amo mo twakonsha kukwashisha bakwetu mu kipwilo? (Monai kipikichala kitanshi.)

⁵ Inge kechi muji na kisemi kyo mubena kulama ne, nanchi mwakonsha kukwashako bakwenu ba mu lwitabilo babena kulama bansemi babo babula bulume bwa kwiubila bintu, bakoma nangwatu bakajilwa mu bintu bikwabo nyi? Mwakonsha kumonapo bakajilwa mu kipwilo ne kwibakwasha. Kampe mwakonsha kukwashako kulama bansemi bakoma ba nyenga mwina Kilishitu bino aye saka engilako mingilo ikwabo. Nangwa kampe mwakonsha kwibatwalako na kupwila, kuya na kupota bintu, kwibakwashako mingilo ya pa nzubo, nangwa kuya nabo na kupempula wakolwa mu kipatela. Inge mwaba bino ko kuba’mba mubena kwingijila pamo ne Yehoba kukumbula milombelo yabo.—Tangai 1 Kolinda 10:24.

6. Ñanyi bintu byavwangwamo mu kutambwila benyi?

⁶ Aba bengijila pamo ne Lesa batambwila benyi. Mu Binembelo bya bwina Kilishitu bya Kingiliki, kyambo kyatuntululwa’mba “kutambwila benyi” kilumbulula “kubila lusa benyi.” (Hebe. 13:2, tubyambo twa munshi.) Mu Mambo a Lesa muji mashimikila etufunjisha bya kutambwila benyi. (Nte. 18:1-5) Umvwe twashukilwapo kimye, twafwainwa kukwashanga bantu, “bakwetu ba mu lwitabilo” nangwa bantutu.—Nga. 6:10.

7. Ñanyi bintu byawama bifuma mu kutambwila balongo baji mu mwingilo wa kimye kyonse?

⁷ Nanchi mwakonsha kwingijila pamo ne Lesa kupichila mu kutambwila bakalume banji baji mu mwingilo wa kimye kyonse nyi? (Tangai 3 Yoano 5, 8.) Inge twauba bino, twikala na kimye kya kwikosesha “atwe bene na bene.” (Loma 1:11, 12) Akilangulukai pa kyamwekejile  ba Olaf. Bavuluka’mba myaka ya kunyuma, kafwako nangwa umo mu kipwilo watambwilanga kalama wa mwanzo wabujile bakazhi ne. Ba Olaf saka bakijitu banyike balombele bansemi babo babujile Bakamonyi kuba’mba bakeba kutambwila kalama wa mwanzo ku nzubo. Bansemi baswile, pano bino baambile’mba ba Olaf bafwainwe kulaalanga mu kipona. Ne kya kine ba Olaf balajilenga mu kipona, kabiji kechi belangulwishepo ne. Baambile’mba: “Awa mulungu wawamine bingi. Amiwa ne kalama wa mwanzo twabukanga lukelokelo pa juba pa juba ne kwisamba pa bintu byapusana-pusana kimye kya kwiaula. Lutundaiko lwabo lwandengejile kutendeka mwingilo wa kimye kyonse.” Ba Olaf baingila bumishonale pa myaka kukila pa 40 mu byalo byapusana-pusana.

8. Mambo ka o twafwainwa kubilanga bantu byawama nangwa kya kuba bamo kechi basanta ne? Shimikizhai kyamwekele.

⁸ Mwakonsha kubila lusa benyi mu mashinda apusana-pusana nangwa kya kuba kimye kitanshi bamwesha nobe kechi basanta ne. Akilangulukai pa kino kyamwekele. Musapwishi umo mu Spain byo afunjishenga muntu Baibolo, wamwene kuba’mba muntu ye afunjishenga aye Yesica wafumine ku kyalo kya Ecuador wajijilenga. Uno musapwishi waipwizhe kyalengejile Yesica kujila. Waambile’mba saka akyangye kuvilukila ku Spain, wayanjile bingi kya kuba juba jimo kechi wajingapo na kajo ne. Wapelengatu mwananji wa mukazhi mema. Yesica waesekele kuleelezha mwananji kuba’mba alaale kimye kyo alombelenga kuba’mba Lesa amukwashe. Byo papichiletu kakimye kacheche, Bakamonyi babiji bamufwakashijile, bino Yesica wazhingijile bingi kya kuba watabawile ne magazini o bamupele banyenga. Waipwizhe’mba: “Ko kajo ko nsakujiisha mwanami ke?” Banyenga baesekele kumutekenesha, bino bapulwijilemotu mabula. Juba jikwabo bamuletejile ntumbe mwajinga kajo ne kwiisha pa kibelo kya nzubo yanji. Yesica waumvwine bingi bulongo pa lusa lo bamubijile kabiji kyamukolele ku muchima pa kuvuluka kuba’mba kechi wateleko muchima ku mukumbu wa lulombelo lwanji kwi Lesa ne. Bino pa kikye kimye wafuukwilepo kwingijila Yehoba. Bumpanyi bwa bano banyenga mwafumine bintu byawama bingi.—Sapwi. 11:1, 6.

9, 10. (a) Ñanyi bimye bimo byo batongola mu Baibolo po kwakebewenga bantu ba Lesa kwipana? (b) Ñanyi mingilo imo balongo mu kipwilo yo bepana kwingila lelo jino?

⁹ Pa bimye byavula, mu bwikalo bwa bena Isalela, kwakebewanga bantu ba kwipana kwingilako mingilo imo. (Lupu. 36:2; 1 Moba 29:5; Ne. 11:2) Ne lelo jino, kuji mingilo yavula bingi yo mwakonsha kwipana kwingijisha kimye kyenu, bintu byenu, nangwa busendwe bwenu mu kukwasha balongo ne banyenga. Mukekala bingi na lusekelo kabiji Lesa ukemupesha inge mwipana.

¹⁰ Mambo a Lesa atundaika balongo mu kipwilo kwingijila pamo ne Yehoba kupichila mu kukanamina mingilo ya bukulumpe ne bunkwasho mu kipwilo. (1 Timo. 3:1, 8, 9; 1 Pe. 5:2, 3) Aba boba bino, bakeba kukwasha bakwabo mu bintu byo bakajilwa ne kukosesha bulunda bwabo ne Lesa. (Byu. 6:1-4) Nanchi bakulumpe mu kipwilo bakimwipuzhapo inge mwakonsha kwipana kwingilako bu asha, kwingijila ku mabuku, mapepala a nyaunda ya kusapwilamo, kuwamisha nzubo ya Bufumu, nangwa mingilo ikwabo nyi? Aba bengila ino mingilo bakemubuula’mba bomvwa bingi bulongo kukwasha bakwabo.

11. Nyenga umo wamwenamo byepi pa kwikala na balunda bo alengele kimye kyo aingijilenga mwingilo wa buntungi?

¹¹ Aba bepana kwingilako mwingilo wa buntungi bekala na balunda bavula bingi. Akilangulukai kyamwekejile nyenga Margie, waingila mwingilo wa kushimika Mazubo a Bufumu pa myaka 18. Pa myaka yavula, uno nyenga  waingijilanga pamo na banyenga bavula bakitwala ne kwibafunjisha mingilo. Wataana kuba’mba kwingilako uno mwingilo jo jishinda jimo ja kwitundaikilamo atweba bene na bene. (Loma 1:12) Kabiji inge ke apite mu makatazho mu bwikalo bwanji, balunda nanji bo alengele kimye kyo aingijilenga mwingilo wa buntungi bamutundaika bingi. Nanchi mwakipanapo kala kwingilako mwingilo wa buntungi nyi? Inge mwayukapo mingilo imo nangwa ne, nanchi mwakonsha kwipana kwingilako nyi?

12. Mwakonsha kukwasha byepi baponenwa na bya malwa?

¹² Inge kwamweka bya malwa, bantu ba Lesa bengijila pamo ne aye kukwasha balongo mu mashinda apusana-pusana. Bimye bimo bapana bukwasho bwa mali ku boba baponenwa na bya malwa. (Yoa. 13:34, 35; Byu. 11:27-30) Jishinda jikwabo jo twakonsha kukwashishamo baponenwa na bya malwa ke kuwamisha mazubo aonaika nangwa kwiashimukulula. Nyenga wa ku Poland aye Gabriela wajinga na nzubo yaonaikile kimye kya muyulo, waumvwine bingi bulongo pa kumona balongo bafumine mu kipwilo kikwabo byo baishile na kumukwasha. Washimikizhe’mba: “Kechi nkeba kwamba pa bintu byami byaonaikile ne, mambo ke bipetu. Pakuba mbena kukeba kwimubuula bintu byawama byo natambula. Kino kyamwekele kyankwashishe kushiinwa kuba’mba kwikala mu kipwilo kya bena Kilishitu ke kintu kyanema bingi kabiji kindetela lusekelo lukatampe.” Bavula baponenwa na bya malwa inge batambwila bukwasho, bamona kuba’mba bekala na byavula kukila pa byo bajinga nabyo kala. Kabiji aba bengijila pamo ne Yehoba mu kukwasha bakwabo, bekala bingi na lusekelo.—Tangai Byubilo 20:35; 2 Kolinda 9:6, 7.

13. Kwipana kwakonsha kukosesha byepi bulunda bwetu ne Yehoba? Lumbululai.

¹³ Nyenga Stephanie ne basapwishi bakwabo bajinga bingi na lusekelo byo baingijile pamo ne Lesa kukwasha Bakamonyi bajinga babipuluka banyemejile ku United States. Baingijileko mwingilo wa kukebela bisemi byanyemene nkondo mu byalo byabo mazubo mwa kufikila ne kwiamisha bulongo. Ba Stephanie baambile’mba: “Twatundaikilwe bingi pa kumona lusekelo lo bajinga nalo ne byo basanchilenga pa butemwe bwibamwesheshe balongo mwaya ntanda yonse. Abino bisemi bilanguluka’mba twibakwashishe, pano bino, kishinka ke kya kuba’mba  abo bo betukwashishe bingi.” Banungilepo’mba: “Butemwe, kukwatankana, lwitabilo ne kuketekela mwi Yehoba ko twimwena mu bano balongo ne banyenga kwalengela bulunda bwetu ne Yehoba kukoselako, kabiji kino kitulengela kunemeka byonse byo tufunda mu jibumba ja Lesa.”

14, 15. (a) Ngauzhi Isaya wamwesheshe muchima wa mutundu ka? (b) Basapwishi ba Bufumu bamwesha byepi muchima wajingapo ne Isaya?

¹⁴ Nanchi mwakonsha kutemwa kwingilako pakatampe pamo ne Yehoba nyi? Nanchi mwakonsha kwipana kuya na kwingijila ku mpunzha kubena kukebewa bamwingilo mu jibumba ja Lesa nyi? Pano bino kechi kilumbulula’mba bakalume ba Lesa bafwainwa kuya kwalepa pa kuba’mba bamweshe kuba’mba bepana kwingijila Yehoba ne. Bwikalo bwa balongo ne banyenga bo bwibalengela kufuukulapo kuya na kwingijila ku mapunzha a kwalepa. Byo bafuukulapo bipasha na byaambile ngauzhi Isaya. Byo akumbwile bwipuzho bwaipwizhe Yehoba amba, “Ñanyi ye nsakutuma, kabiji ñanyi uketwambilako?” Wakumbwile amba: “Amiwa bano! Ntumai!” (Isa. 6:8) Nanchi bwikalo bwenu bwakonsha kwimuswisha ne anweba kwingilako pakatampe mu mwingilo wa Lesa nyi? Mu ñanyi mashinda mo twakonsha kukwashañena?

¹⁵ Yesu waambile pa mwingilo wa kusapwila ne kufunjisha bantu kwikala baana ba bwanga amba: “Mwingilo wa kunowa wabaya, pakuba ba mingilo bakepa. Onkao mambo, lombai Mwine mwina mwingilo wa kunowa atume ba mingilo mu mwingilo wanji wa kunowa.” (Mat. 9:37, 38) Nanchi mwakonsha kuya na kwingijila ku mpunzha kwakepa basapwishi ba Bufumu kampe ne kwingilako bupainiya nyi? Abya mwakonsha kutundaika bakwenu kwingila uno mwingilo nyi? Balongo ne banyenga bavula pa kuba’mba bamweshe’mba batemwa Lesa ne bantu bafuukulapo kuya na kwingijila ku mapunzha kubena kukebewa ba kunowa bavula. Nanchi mwakonsha kulangulukapo mashinda akwabo a kwingijilamo pakatampe mu mwingilo wa Lesa nyi? Inge mwauba bino, mukekala na lusekelo lukatampe.

16, 17. Ñanyi bintu bikwabo byo mwakonsha kuba inge kya kuba mukeba kwingilako pakatampe mu mwingilo wa Yehoba?

¹⁶ Nanchi mwakonsha kwipana kwingijilako pa Betele nangwa kukwashako mwingilo wa buntungi pa kimye kicheche nangwa pa kimye kyabaya nyi? Kubena kukebewa bantu ba kwipana kwingijila Yehoba konse ko bakonsha kwibatuma kuya na kwingila mingilo yapusana pusana. Kino kibena kulumbulula’mba bakonsha kwibatuma kuya na kwingila mwingilo ye babula kuyuka nangwa yapusana na yo bayuka. Bino Yehoba usanta bingi pa kwipana kwa bantu banji kuya na kwingijila kubena kukebewa ba mwingilo.—Sala. 110:3.

¹⁷ Nanchi mukeba kufunjilapo bikwabo pa kuba’mba mwingijile Yehoba bulongo nyi? Umvwe ibyo, mwakonsha kutanwa ku Sukulu wa Basapwishi ba Bufumu. Uno sukulu ufunjisha balongo ne banyenga baji mu mwingilo wa kimye kyonse pa kuba’mba bengileko pakatampe mwingilo wa Lesa. Bonse batanwa ku uno sukulu bafwainwa kwipana kwingila mwingilo yense ye bakonsha kwibapa inge bapwisha sukulu. Nanchi mwakonsha kunembesha ku uno sukulu pa kuba’mba mwingileko pakatampe mu mwingilo wa Lesa nyi?—1 Ko. 9:23.

18. Ñanyi bintu byawama byo mukamwenamo inge mwatwajijila kwingijila pamo ne Yehoba moba onse?

¹⁸ Byo tuji bantu ba Yehoba twikala bampanyi, tumwesha lusa, buwame ne butemwe kabiji tukwasha bakwetu pa juba pa juba. Kuba bino kwitulengela kwikala na lusekelo ne mutende. (Nga. 5:22, 23) Nangwa mubena kupita mu bintu bya mutundu ka mwakonsha kwikala na lusekelo inge mwaikala bampanyi byonka biji Yehoba ne kutwajijila kwingijila pamo ne aye.—Maana 3:9, 10.