1. Atweba bonse tukebesha balongo betu kuba ka?

NYENGA Pauline * waambile’mba: “Kufumatu kimye kyo nafunjile bukine, nakebeshanga bingi bonse ba mu kisemi kyami kuba’mba nkekale nabo mu Paladisa. Nakebeshanga bingi kikatakata bamwatawami ba Wayne ne mwanetu wamulume kuba’mba twingijilenga pamo Yehoba.” Nanchi mujipo na balongo benu babula kuyuka Yehoba ne kumutemwa nyi? Kampe ne anweba mumvwatu byonka biumvwanga ba Pauline pa kisemi kyabo.

2. Ñanyi mepuzho o tusakukumbula mu uno mutwe?

² Kechi twakonsha kukanjikizha balongo betu kuswa kufunda mambo awama ne. Pano bino, twakonsha kwibatundaika kulangulukapo pa byambo bya mu Baibolo ne kuswa kufunda. (2 Timo. 3:14, 15) Mambo ka o twafwainwa kusapwilanga ku balongo betu? Kabiji mambo ka o twafwainwa kwibamweshesha kifyele? Twakonsha kuba byepi pa kuba’mba tukwashe balongo betu kutemwa Yehoba byonka byo twamutemwa? Kabiji balongo ne banyenga mu kipwilo bakonsha kwitukwasha byepi?

3. Kwesakana na byaamba 2 Petelo 3:9, mambo ka o twafwainwa kusapwilanga ku balongo betu?

³ Katatakatu Yehoba akalete mpelo ya buno bwikalo. Bonkatu baji na “michima ya bukishinka ya kukeba bumi bwa myaka ne myaka” bo bakapuluka. (Byu. 13:48) Twingila kimye kyabaya ne kwingijisha bulume bwetu kusapwila bantu bo twabula kuyuka bekala mu nyaunda yetu, onkao mambo, twafwainwa ne kusapwilanga ku balongo  betu pa kuba’mba nabo bengijilenga Yehoba. Shetu wa butemwe aye Yehoba, “kechi usaka muntu nangwa umo amba akafwe ne, bino ukeba’mba bonse balapile.”—Tangai 2 Petelo 3:9.

4. Ñanyi kintu kimweka javula pa kusapwila balongo betu?

⁴ Twafwainwa kuyuka’mba kuji jishinda jawama ne jatama ja kusapwilamo byambo bya lupulukilo. Nangwa kya kuba twamba na kifyele kimye kyo tusapwila ku bantu bo twabula kuyuka, bino pa kusapwila ku balongo betu kampe twibasanzamotu.

5. Ñanyi bintu byo twafwainwa kuvulukanga saka tukyangye kutendeka kusapwila ku balongo betu?

⁵ Atweba bamo twakonsha kwilangulusha pa jishinda jo twaingijishe patanshi pa kusapwila ku balongo betu ne kwilangulusha’mba kampe inge twaingijishepo jishinda jikwabo. Mutumwa Paulo wajimwineko bena Kilishitu amba: “Byambo byenu kimye kyonse bikale na bibusa kabiji byalungwamo mukele, kuba’mba muyuke byo mwafwainwa kukumbula muntu yense.” (Kolo. 4:5, 6) Kyanema bingi kuvuluka luno lujimuno inge tubena kusapwila ku balongo betu. Mambo inge twabula kujimuka, twakonsha kwibazhingijisha ne kwibalengela kukana kuteleka ku byambo byo tubena kwamba.

6-7. Ambai kyamwekele kimwesha buneme bwa kubila kifyele mwinakwenu wabula kwitabila.

⁶ Bobilainga kifyele. Ba Pauline bo twisambapo kala, baambile’mba: “Kimye kitanshi nakebangatu kwisamba na bamwatawami pa bya kwa Lesa. Kechi twisambangapo bintu bya mu bwikalo ne.” Nangwa byonkabyo, bamwatawabo Pauline abo ba Wayne bayukileko bicheche bya mu Baibolo kabiji kibakatazhanga kumvwa byaambanga ba Pauline. Bamwatawabo bamonanga’mba bakazhi babo ba Pauline balangulukatu pa bya bupopweshi bwabo. Baakaminwe’mba bakazhi babo batwela mu kajibumba kasatuka kafuma mu bupopweshi bukwabo.

⁷ Ba Pauline baswile’mba batanwanga kimye  kyabaya na balongo ne banyenga mabanga ne ku mpelo ya mulungu mu kupwila, mu busapwishi ne ku bijiilo. Ba Pauline baambile’mba: “Bimye bimo ba Wayne inge babwela pa nzubo kechi batanangapo muntu ne, kabiji baumvwanga bingi mukose.” Kwambatu kine, ba Wayne batonganga bingi bakazhi babo ne mwanabo wa mulume. Kechi bayukile bantu batanwanga na bakazhi babo ne, kabiji kino kyamweshanga’mba balunda bakatataka ba ba Pauline banemene bingi kukila bamwatawabo. Ba Wayne bazakamishe ba Pauline kuba’mba masongola asakupwa. Nanchi mwamona ba Pauline byo bafwainwe kumwesha kifyele ku benakwabo nyi?

8. Kwesakana na byaamba 1 Petelo 3:1, 2, ñanyi kintu kyakonsha kulengela wa mu kisemi kuswa kufunda bukine?

⁸ Ikalai na byubilo byawama. Javula, balongo betu bata muchima pa byo tuba kukila byo twamba. (Tangai 1 Petelo 3:1, 2.) Ba Pauline baswile kino kishinka. Baambile’mba: “Nayukile’mba ba Wayne betutemwa kabiji kechi bakebelenga’mba masongola apwe ne.” Banungilepo’mba: “Kunzakamisha’mba masongola asakupwa kwandengejile kuvuluka’mba nafwainwe kutendeka kulondela mikambizho ya Yehoba yaamba pa masongola. Nafwainwe kwikala na byubilo byawama kukila kusapwilangatu bamwatawami.” Ba Pauline balekele kukanjikizha ba Wayne kufunda Baibolo, ne kutendeka kwisamba nabo pa bintu bya pa juba pa juba. Ba Wayne bamwene bakazhi babo byo batendekele kwibapa mushingi ne kwibakookela, kabiji mwanabo naye watendekele kumwesha mushingi ne lukookelo. (Maana 31:18, 27, 28) Ba Wayne byo bamwene Baibolo byo akwashishe kisemi kyabo, baswile kufunda Mambo a Lesa.—1 Ko. 7:12-14, 16.

9. Mambo ka o twafwainwa kutwajijila kukwasha balongo betu?

⁹ Twajijilai kukwasha balongo benu. Twafwainwa  kulondelanga byuba Yehoba. “Kimye kyonse” upa bantu kimye kya kufunda mambo awama pa kuba’mba bakekale na bumi bwa myaka ne myaka. (Yele. 44:4) Kabiji mutumwa Paulo wabuujile Timoti kutwajijila na kukwasha bantu. Mambo ka? Mambo kuba bino kwakonsheshe kumulengela kupuluka aye mwine ne boba bamumvwinenga. (1 Timo. 4:16) Twatemwa bingi balongo betu, onkao mambo, tukeba’mba bayuke bukine buji mu Mambo a Lesa. Byubilo byawama bya ba Pauline byalengejile kisemi kyabo kwikala bulongo. Luno baji bingi na lusekelo pa kwingijila Yehoba pamo na bamwatawabo. Bonse babiji bapainiya ba kimye kyonse, kabiji ba Wayne ke bakulumpe mu kipwilo.

10. Mambo ka o twafwainwa kwikela batekanya?

¹⁰ Ikalai batekanya. Inge twafuukulapo kukookela Lesa, tupimpula byubilo bwetu ne byo twaitabilamo. Kino kyakonsha kukatazha balongo betu kuswa. Javula, kintu kitanshi kyo bakamona ke kya kuba’mba tuleka kusekelela nabo bijiilo bya bupopweshi ne kuleka kwivwanga mu bya bumulwila ntanda. Kimye kitanshi, balongo betu bamo bakonsha kwituzhingijila. (Mat. 10:35, 36) Pano bino, kechi twafwainwa kulanguluka’mba kechi bakapimpula ne. Inge twaleka kwibakwasha kuyuka bintu byo twaitabilamo, ko kuba’mba tubena kwibazhachisha’mba kechi bafikilamo kutambula bumi bwa myaka ne myaka ne. Yehoba kechi witupapo mwingilo wa kuzhachisha bantu ne, bino Yesu ye ye apa uno mwingilo. (Yoa. 5:22) Inge twatekenya balongo betu, bakakonsha kuswa kuteleka ku byambo byetu.—Monai ka kitenguluzha ka kuba’mba, “Ingijishainga Keyala Wetu wa pa Intaneti pa Kufunjisha.”

11-13. Mwakonsha kufunjilako ka ku byaubile ba Alice na bansemi babo?

¹¹ Bobilainga lusa, bino saka mwajimuka. (Maana 15:2) Akimonai byaubile ba Alice. Bafunjile pe Yehoba saka bekala kwalepa na bansemi babo babujile kwitabila mwi Lesa kabiji batemenwe bya bumulwilantanda. Bavulukile’mba bafwainwe kupelawizha kubuula bansemi babo bintu byawama byo bafunjilenga. Ba Alice baambile’mba: “Inge mwabanda kubuula kisemi kyenu bintu byakatataka byo mwaitabilamo ne byo mubena kuba, inge bayuka bakomvwa bingi kutama.” Onkao mambo, ba Alice banembejile bansemi babo makalata ne kwibepuzha byo balangulukanga pa bifunjisha Baibolo, kikatakata pa mitwe yo bakonsha kutemwa, nabiji yaamba pa butemwe. (1 Ko. 13:1-13) Basanchijile bansemi babo pa kwibakomesha ne pa kwibata muchima kabiji bebatuminanga ne bya bupe. Inge bafwakesha bansemi babo, bakwashangako bainabo mingilo ya pa nzubo. Patanshitu, ba Alice byo babuujile bansemi babo pa lwitabilo lwabo lwa katataka, kechi baumvwine bulongo ne.

¹² Ba Alice byo batendekele kwikala pamo na bansemi babo, bebikijile mutanchi wa kutanga Baibolo kimye kyonse. Ba Alice baambile’mba: “Kino kyakwashishe bamama kuyuka ene mambo o nanemekela Baibolo mu bwikalo bwami.” Mu kuya kwa kimye, bashabo ba Alice nabo bafuukwilepo kufunda Baibolo pa kuba’mba bayuke kyalengejile mwanabo kupimpula milanguluko yanji, kabiji bakebelengatu kutaanamo byatama mu Baibolo. Ba Alice baambile’mba: “Mu Baibolo ye nebapele, nabikilemo ne kakalata mo nanembele byambo byawama.” Ki ka kyafuminemo? Bashabo ba Alice kechi bataainemo byatama mu Baibolo ne, bino batemenwe byo batangilenga mu Mambo a Lesa kabiji bibafikile bingi pa muchima.

¹³ Twafwainwa kwikala bakosa bino saka twajimuka, nangwatu inge tubena kuchinchika meseko. (1 Ko. 4:12b) Ba Alice bachinchikile meseko afumanga ku bainabo. Baambile’mba: “Byo nabatizhiwe, bamama bantelele’mba ‘nemwana watama.’” Ba Alice baubile byepi? Baambile’mba: “Kechi nalekele kwamba pa bupopweshi bwami bwa katataka ne, bino nebalumbulwijile mu mushingi kuba’mba amiwa nafuukulapo kwikala Kamonyi wa Yehoba kabiji kechi nkapimpula byo nafuukulapo ne. Nabuujile bamama amba nebatemwa bingi. Bonse babiji twajijile, kabiji nanengezhejile bamama kajo kawama bingi.  Kufumatu kyo kya kimye, bamama bayukile’mba Baibolo ubena kunkwasha kwikala muntu wawama.”

14. Mambo ka o twafwainwa kubujila kuswisha balongo betu kupimpula byo twafuukulapo kwingijila Yehoba?

¹⁴ Pakonsha kupita kimye pa kuba’mba balongo betu bayuke ene mambo o twatela muchima pa kwingijila Yehoba. Ba Alice byo bafuukwilepo kutendeka bupainiya ne kukana kutwela nkito ibasajijile bansemi babo, bainabo bajijile ne jikwabo. Bino ba Alice kechi babwelele panyuma ne. Baambile’mba: “Inge mwaswisha kisemi kyenu kipimpula byo mwafuukulapo, bakapimpulanga ne bintu bikwabo byo mukafuukulanga mu bwikalo bwenu. Inge ke mubile lusa kisemi kyenu bino saka mwachinchika, bamo bakonsha kuteleka ku byo mubena kwamba.” Abino byo byaubile ne ba Alice. Bansemi babo bonse babiji luno ke bapainiya, kabiji bashabo ke bakulumpe mu kipwilo.

15. Kwesakana na byaamba kinembelo kya Mateo 5:14-16 ne 1 Petelo 2:12, ‘mingilo yawama’ ya bakwetu yakonsha kukwasha byepi balongo betu?

¹⁵ Yehoba wingijisha “mingilo . . . yawama” ingila bakalume banji kukokela bantu koaji. (Tangai Mateo 5:14-16; 1 Petelo 2:12.) Inge benakwenu kechi Bakamonyi ba Yehoba ne, nanchi bakimonañanapo kala na bo mupwila nabo nyi? Ba Pauline bo twisambapo kala, baichileko balongo ne banyenga ku nzubo kwabo pa kuba’mba bamwatawabo ba Wayne bebayuke. Ba Wayne bavuluka mulongo umo byo ebakwashishe kuyuka biji Bakamonyi. Baambile’mba: “Uno mulongo watambwile juba ja kukokoloka ku nkito pa kuba’mba eye ku nzubo yami na kutambila pamo mpila. Kino ‘kyankwashishe kuyuka’mba uno mulongo watemwa ne bintu bikwabo kechi bya bupopweshitu bwanji ne.’”

16. Mambo ka o twafwainwa kwichilangako balongo betu ku kupwila?

 ¹⁶ Jishinda jimo jawama ja kukwashishamo balongo betu ke kwibetako kwiya na kupwila pamo ne atweba. (1 Ko. 14:24, 25) Kupwila kutanshi kwatainwe ba Wayne ke ku Kivuluko, mambo kwajingako panyuma ya kukotoka ku nkito kabiji kechi kwasendele kimye kyabaya ne. Baambile’mba: “Kechi naumvwine byaambilengapo jashi ne. Bino kintu kyovulukakotu ke bantu. Bantambwijile na lusekelo ne kuñimuna mu kuboko na ngovu. Naambile mu muchima amba bano bantu bawama bingi.” Ba mulume ne mukazhi bamo bakwashanga bingi ba Pauline ne mwanabo wamulume ku kipwilo ne mu busapwishi. Onkao mambo, ba Wayne byo bafuukwilepo kuba’mba bakeba kuyuka byaitabijile ba Pauline, babuujile balume kwibafunjisha Baibolo.

17. Mambo ka o twafwainwa kubujila kwipamo mambo inge balongo betu bakana kufunda bukine, bino mambo ka o twafwainwa kubujila kuleka kukwasha balongo betu?

¹⁷ Twaketekela’mba balongo betu bonse bakatendeka kwingijila Yehoba byonkatu byo tumwingijila. Twakonsha kweseka papelela bulume bwetu kwibakwasha kwikala bakalume ba Lesa, nangwa byonkabyo, kimye kimo kechi bakonsha kwiya mu bukine ne. Inge kyaikala bino, kechi twafwainwa kwipamo mambo pa byo bafuukulapo ne. Mambo kechi twakonsha kukanjikizha muntu uji yense kuswa byo twaitabilamo ne. Pano bino, inge balongo benu bamona lusekelo lo muji nalo na mambo a kwingijila Yehoba, kyakonsha kwibalenga kukeba kwingijila Lesa. Balombelaingako. Isambainga nabo mu jishinda jawama, kabiji kange muleke kwibakwasha ne. (Byu. 20:20) Shiinwai kuba’mba Yehoba ukapesha kwibikako kwenu. Kabiji inge balongo benu bafuukulapo kuteleka ku byambo byo musapwila, bakapuluka!