1. Bena Kilishitu bafwainwa kuba byepi pa kuba’mba bakapwishe kapela ka ku bumi?

BENA KILISHITU baji mu kapela ka ku bumi. Nangwa kya kuba popo twatendekatu kunyema nangwa twatendekele kala, twafwainwa kutwajijila kunyema kufikatu ne kimye kyo tukatambula kilambu. Lujimuno mutumwa Paulo lo ajimwine bena Kilishitu ba mu Filipai, lwakonsha kwitutundaika kutwajijila kunyema ne kupwisha kano kapela. Bamo ba mu kipwilo kya mu Filipai baingijile Yehoba pa myaka yavula kimye kyo batambwijile nkalata yanembele Paulo. Nangwa kya kuba banyemenenga bulongo, bino Paulo wibavulwilemo kuba’mba bafwainwe kutwajijila kunyema na kuchinchika. Wakebelenga’mba banyemenga byonkatu byo anyemenenga aye pa kuba’mba ‘bakatambule kilambu.’—Fili. 3:14.

2. Mambo ka o twafwainwa kwambila’mba Paulo wajimwineko bena Filipai pa kimye kyafwainwa?

² Paulo wajimwineko bena Filipai pa kimye kyafwainwa. Bantu ba mu Filipai bamanyikilenga balongo ne banyenga kufumatu kimye kipwilo po kyalengelwe. Kuno kumanyikwa kwatendekele mu 50 C.E kimye Paulo ne Silasa kyo bayile ku Filipai na kusapwila mambo awama byo bakookejile lwito lwa Lesa lwa kuba’mba “abukilai kuno ku Makedonya.” (Byu. 16:9) Byo bafikile kokwa bataineko mwanamukazhi wa jizhina ja Lidiya kabiji “watelekelenga, ne Yehoba wamushinkwile muchima” pa kuba’mba omvwishe mambo awama. (Byu. 16:14) Kechi pabanjile ne, uno mwanamukazhi wabatizhiwe pamo na ba mu nzubo yanji. Nangwa byonkabyo, Diabola kechi waikeletu ne. Banabalume ba mu uno muzhi bakwachile Paulo ne Silasa ne kwibatajangizha pa kwibatwala ku banchibamambo kabiji bebapelemo mambo a kuba’mba babena kuleta makatazho mu muzhi. Kyafuminemo Paulo ne Silasa bebapumine ne kwibakasa mu kaleya, kabiji bebakambizhe’mba bafwainwe kufumamo mu  muzhi. (Byu. 16:16-40) Nanchi babwelele panyuma nyi? Ine. Nga balongo ne banyenga bajinga mu kipwilo kyalengelwetu pa kyokya kimye baubile byepi? Baubile kintu kyawama bingi, mambo nabo bachinchikile. Kwa kubula nangwa kuzhinaukatu ne, byaubile Paulo ne Silasa bibalengejile kuchinchika.

3. Paulo wafuukwilepo kuba byepi, kabiji ñanyi mepuzho o tusakukumbula?

³ Paulo wafuukwilepo na muchima wanji yense kubula kubwela panyuma. (2 Ko. 4:16) Wayukile’mba, pa kuba’mba atwajijile kwingijila Yehoba mu bukishinka kufika ne ku lufu lwanji, wafwainwe kuta muchima pa kikonkwanyi kyanji. Twakonsha kufunjilako ka ku byaubile Paulo? Nanchi kujipo bantu ba kishinka mu ano moba bo twakonsha kufunjilako bya kuchinchika pa kushinda meseko nyi? Kabiji luketekelo lwetu lwa kulutwe lwakonsha kwitukwasha byepi kubula kubwela panyuma?

4. Paulo watwajijile byepi kusapwila nangwa kya kuba bamukashile?

⁴ Langulukai pe Paulo byo ebikilengako kimye kyo anembejilenga bena Filipai nkalata. Bamukashijile mu nzubo mu Loma. Kechi wakonsheshe kuya na kusapwila ne. Pano bino, wasapwijilenga ku bantu baiyanga na kumupempula ne kunembela bipwilo bya kwalepa makalata. Ne lelo jino, bena Kilishitu bavula bakankalwa kwenda bamonapo mashinda a kusapwilamo mambo awama ku bonse beya na kwibapempula. Kabiji banembela bantu makalata bo bakankalwa kufwakesha.

5. Kwesakana na byambo byanji biji pa Filipai 3:12-14, ñanyi bintu byakwashishe Paulo kuta muchima pa kikonkwanyi kyanji?

⁵ Paulo kechi waswishishe bintu byawama nangwa byatama byo aubile kala kumulengela kubwela panyuma ne. Waambile’mba, “mvulama bintu bya kunyuma ne kukanamina bintu bya kulutwe,” ko kuba’mba kupwisha bulongo kapela ka ku bumi. (Tangai Filipai 3:12-14.) Ñanyi bintu bimo byakonsheshe kumubwezha panyuma? Kitanshi, Paulo saka akyangye kwikala mwina Kilishitu, waubile bintu byavula bingi mu bwikalo bwanji. Pano bino, byo aikele mwina Kilishitu, watendekele kumona bino bintu byonse amba “binchatu.” (Fili. 3:3-8) Kya bubiji, nangwa kya kuba kala wamanyikanga bena Kilishitu, kechi waswishishe kino kumulengela kubwela pa kunyuma ne. Kya busatu, kechi walangulukilenga’mba waingijila bingi Yehoba, kabiji amba wafwainwa kwikileka ne. Paulo watwajijile kusapwila nangwa kya kuba bamukashile mu kaleya, kumupuma, kumwasa mabwe, maato o ajingamo konaika ne kubula kajo ne bya kuvwala. (2 Ko. 11:23-27) Nangwa kya kuba Paulo waingijile mingilo yavula ne kumanama, wayukile’mba wafwainwe kutwajijila kwingijila Yehoba. Ne atweba, byobyo twafwainwa kubanga.

6. Ñanyi bintu bimo “bya kunyuma” byo twafwainwa kuvulamako?

⁶ Twakonsha ‘kuvulama byepi bintu bya kunyuma’ byonka byaubile Paulo? Atweba bamo twakonsha kukeba kuleka kwizhachisha pa mambo o twalengele kala. Inge byo byo kiji, twafwainwa kwikalanga na lufunjisho lwa pa bunke lwa kufunda kikatakata pa kitapisho kya bukuzhi bwa Kilishitu. Inge ketwikale na lufunjisho lwa pa bunke ne kulanguluka-langulukapo, kabiji ne kulomba pa mutwe witutundaika, twakonsha kuleka kwizhachisha. Twakonsha kuleka kwizhachisha pa mambo Yehoba o etulekejileko kala. Akimonai kintu kikwabo kyo twakonsha kufunjilako ku byaubile Paulo. Bamo baleka nkito yakonsheshe kwibalengela kunonka pa kuba’mba batangizheko Bufumu patanshi. Inge kyaikala bino, nanchi mwakonsha kuvulama bintu bya kunyuma kupichila mu kubula kukeba kwikala na bintu byavula bya ku mubiji nyi? (Bala. 11:4-6; Sapwi. 7:10) “Bintu bya kunyuma” byavwangamo mingilo yo twaingijiile Yehoba nangwa meseko o twachinchikile kala. Pano bino, inge ketulanguluke pe Yehoba  byo etukwashishe kunyuma, twakonsha kufwenya kwipi na Shetu. Nangwa byonkabyo, kechi twafwainwa kulangulukanga’mba twapwisha mwingilo witupele Yehoba ne.—1 Ko. 15:58.

7. Kwesakana na byaamba 1 Kolinda 9:24-27, ñanyi bintu bikebewa pa kuba’mba kuba’mba tukatambule kilambu kya bumi? Lumbululai.

⁷ Paulo waumvwishishe byambo byaambile Yesu bya kuba’mba: “Ibikishaiko.” (Luka 13:23, 24) Paulo wayukile’mba byonka byajinga Kilishitu, naye wafwainwe kwibikishako kufika ne ku mpelo. Onkao mambo, waesakenye mwingilo wa bwina Kilishitu ku kunyema kapela. (Tangai 1 Kolinda 9:24-27.) Muntu unyema kapela utatu muchima pa kunyema kechi ku bintu bikwabo ne. Twambe’mba, babena kunyema kapela babena kunyemena mu mukwakwa muji mu mashitolo ne bintutu bikwabo byakonsha kwibalabika. Nanchi muntu ubena kunyema kapela wakonsha kwimana na kutala bino bintu nyi? Kechi wakonsha kuba bino inge kya kuba ukeba kutambula kilambu ne. Byo biji ne kapela ka ku bumi, twafwainwa kuchinuzhuka bintu byakonsha kwitulabika. Inge twata muchima pa kikonkwanyi kyetu ne kwibikishako byonka byaubile Paulo, tukatambula kilambu.

8. Ñanyi makatazho asatu o tusakwisambapo?

⁸ Pano twayai twisambe pa makatazho asatu akonsha kwitulengela kubwela panyuma. Ano makatazho ke, bintu byo twaketekejilenga inge byabanda kufika, bulume kupwa na mambo a bukote ne meseko abula kupwa. Twakonsha kufunjilako ku byaubile bamo pa kuchinchika ano makatazho.—Fili. 3:17.

9. Ki ka kyakonsha kumweka inge bintu byo twatengejilenga byabanda kufika?

⁹ Bintu byo twaketekejilenga inge byabanda kufika. Tubena kutengela kufika kwa bintu byawama bitulaya Yehoba. Ngauzhi wa Yehoba aye Habakuka wakebeshe kuba’mba Yehoba alete lonaiko pa muzhi wa Yuda na mambo bubi bwaubilenga bantu, bino Yehoba wamubuujile’mba “wikitengelenga.” (Ha. 2:3) Nangwa byonkabyo, inge bintu byo twatengejilenga byabanda kufika, kizaku kya kwingila mwingilo wa Lesa kyakonsha kupwa, kabiji twakonsha ne kulefulwa. (Maana 13:12) Kino kyo kyamwekele ne ku balongo mu mwaka wa 1914. Pa kyo kya kimye, bena Kilishitu bashingwa bavula batengejilenga kutambula kilambu  kyabo kya kuya mwiulu mu 1914. Kino byo kyabujile kubiwa, bantu ba kishinka baubile byepi?

10. Bamulume ne mukazhi bamo baubile byepi kimye bintu byo batengejilenga kyo byabanjile kufika?

¹⁰ Akilangulukai byaubile bena Kilishitu babiji ba kishinka byo batengejilenga bintu byabanjile kufika. Mulongo Royal Spatz wabatizhiwe mu 1908 saka aji na myaka 20. Waketekejile’mba katatakatu akatambule kilambu kyanji kya kuya mwiulu. Kabiji byo aipangwizhe ba Pearl mu 1911, wibepwizhe’mba: “Nanchi mwayuka kikamweka mu 1914 nyi? Inge kya kuba tubena kukeba kutwela mu masongola, twafwainwa kupelawizha kuba bino.” Nanchi bano bamulume ne mukazhi bena Kilishitu babwelele panyuma mu kapela ka ku bumi byo babujile kutambula kilambu kyabo kya kuya mwiulu mu 1914 nyi? Ine, mambo batele muchima pa kuba kyaswa muchima wa Lesa, kechi pa kilambu kyabo ne. Bebikijile kikonkwanyi kya kutwajijila kunyema kapela ka bumi saka bachinchika. Kya kine, ba Royal ne ba Pearl batwajijiletu na kwingila Lesa mu bukishinka pa myaka yavula kufikatu ne byo bapwishishe mwingilo wabo pano pa ntanda. Kwa kubula nangwa kuzhinaukatu ne, ne anweba mukebesha bingi kumona Yehoba byo akazhijika jizhina janji, bumfumu bwanji ne byo akafikizha milaye yanji yonse. Ketekelai kuba’mba bino bintu byonse bikafika pa kimye Yehoba kyo atongola. Onkao mambo, twayai tutwajijile kwingila mwingilo witupa Lesa ne kubula kubwela panyuma nangwatu inge bintu byo twatengejilenga byabanda kufika.

11-12. Mambo ka o twafwainwa kutwajijila kwingijila Yehoba nangwa kya kuba kechi twingila byonka byo twaingilanga kala ne? Ambai kyamwekele.

¹¹ Bulume kupwa na mambo a bukote. Kupusanako na banyema kapela, mwakonsha kutwajijila kwikala na bulunda bwakosa na Lesa nangwa kya kuba bulume bwapwa na mambo a bukote. Bavula batwajijila kwibikako kwingijila Yehoba nangwa kya kuba bakoma. (2 Ko. 4:16) Akilangulukai pa mulongo Arthur Secord * wajinga na myaka 88, bulume bwapwile na mambo a kukoma kabiji waingijile myaka 55 pa Betele. Juba jimo, manase waishile ku mwanya wanji kuba’mba a mukwashe. Wamutajile ne kumwambila na lusa amba: “Mulongo Secord, bulume bwenu bwapwa na mambo a kwenda miseke yalepa mu mwingilo wa Yehoba.” Nangwa byonkabyo, ba Arthur kechi batele muchima pa byo baingijile kala ne. Onkao mambo, ba Arthur bamutajile ne kumwemwesela ne kumwambila’mba: “Ibyo, akyo kishinka, pano bino, byo twaubile kala kechi byanema ne, byanema ke byo tubena kuba luno.”

¹² Kampe mwaingijila Yehoba pa myaka yavula, pano luno na mambo a kukoma kechi mwingila byonka byo mwaingilanga kala ne. Inge byo byo kiji, kange mulefulwe ne. Shiinwai kuba’mba Yehoba usanta pa mwingilo wenu kabiji kechi  ukavulama byo mwamwingijilanga mu bukishinka ne. (Hebe. 6:10) Kabiji pa kino kimye, vulukainga’mba kwingijila Lesa na muchima yense kechi kwaimena pa byo twingila mu mwingilo wa Yehoba ne. Kwaimena pa kutwajijila kwikala ba kishinka ne kwingila kwesakana na papelela bulume bwetu. (Kolo. 3:23) Yehoba wituyuka bulongo byo tuji kabiji kechi witukebela kuba bintu byakila pa bulume bwetu ne.—Mako 12:43, 44.

13. Ñanyi bintu byapichilemo ba Anatoly ne ba Lidiya, kabiji bitutundaika byepi kutwajijila kwingijila Yehoba nangwa kya kuba tupita mu meseko avula?

¹³ Meseko abula kupwa. Bakalume ba Yehoba bamo bachinchika meseko ne lumanamo pa myaka yavula. Akilangulukai pe ba Anatoly Melnik. * Bajingatu na myaka 12 kimye bashabo kyo bebakwachile ne kwibakasa kabiji bebatwajile ku Siberia kwalepa makilomita kukila pa 7,000 kufuma ku Moldova kwashajile kisemi kyabo. Byo papichile mwaka umo, ba Anatoly, bainabo ne bankambo yabo nabo bebatwajile ku Siberia. Mu kuya kwa kimye, batendekele kuya na kupwila mu muzhi mukwabo po baendanga makilomita 30 nangwa kya kuba kwajinga bingi mashika. Mulongo Melnik waikele myaka isatu mu kaleya. Bashile kwalepa bakazhi babo ba Lidiya ne mwanabo wamukazhi wajinga na mwaka umo. Nangwa kya kuba ba Anatoly ne kisemi kyabo bapichilenga mu ano makatazho pa myaka yavula, batwajijile kwingijila Yehoba mu bukishinka. Luno ba Anatoly baji na myaka 82, kabiji baji mu Kavoto ka Musampi mu kyalo kya Central Asia. Byonkatu biji ba Anatoly ne ba Lidiya, ne atweba twayai tutwajijile kwingila papelela bulume bwetu mwingilo wa Yehoba ne kutwajijila kuchinchika byonkatu byo twaubanga kala.—Nga. 6:9.

14. Paulo wayukile’mba wafwainwe kuba byepi pa kuba’mba afikizhe kikonkwanyi kyanji?

¹⁴ Paulo waketekejile’mba ukapwisha kunyema kapela ne kufikizha kikonkwanyi kyanji. Byo ajinga mwina Kilishitu washingwa, watengejilenga “kilambu kya lwito lwa mwiulu lufuma kwi Lesa.” Pano bino, pa kuba’mba atambule kino kilambu, wayukile’mba wafwainwe kutwajijila “kunyema.” (Fili. 3:14) Paulo waingijishe kifwanyikizho kyawama bingi pa kukwasha bena Filipai kuta muchima pa kufikizha kikonkwanyi kyabo.

15. Paulo waingishe byepi kifwanyikizho kya kwikala ngikazhi pa kutundaika bena Kilishitu ba mu Filipai kutwajijila “kunyema”?

¹⁵ Paulo wavulwilemo bena Filipai pa kwikala bangikazhi mwiulu. (Fili. 3:20) Mambo ka kwikala ngikazhi mu jino jishinda o kwanemejile? Mu oa moba, bantu bakebeshanga kwikala bangikazhi  mu Loma mambo bamwenangamo byavula. * Nangwa byonkabyo, bena Kilishitu bashingwa bajinga bangikazhi mu kafulumende wawama, mambo bafwainwe kutambula mapesho avula bingi. Kwikala ngikazhi mu Loma kwapusene bingi na kwikala ngikazhi mwiulu. Na mambo a kino, Paulo watundaikile bena Filipai “kutwajijila kwikala nobe bangikazhi bwikalo bwa mwayila mambo awama aamba pe Kilishitu.” (Fili. 1:27, tubyambo twa munshi.) Ne lelo jino, bena Kilishitu bashingwa batwajijila kunyema pa kuba’mba bakatambule kilambu kya bumi bwa myaka ne myaka mwiulu.

16. Nangwa tuji na luketekelo lwa kuya mwiulu nangwa kwikala pano pa ntanda, twafwainwa kutwajijila kuba byepi kwesakana na byaamba Filipai 4:6, 7?

¹⁶ Inge tuji na luketekelo lwa kwikala mwiulu myaka ne myaka nangwa pano pa ntanda, twafwainwa kutwajijla kunyema pa kuba’mba tukatambule kino kilambu. Nangwa kya kuba tubena kupita mu makatazho, kechi twafwainwa kulangulukanga pa bintu byo twapichilemo kala nangwa kuswisha kintu kiji kyonse kwitulengela kuleka kwingijila Yehoba ne. (Fili. 3:16) Bintu byo twaketekejilenga byakonsha kubanda kufika nangwa kampe bulume bwapwa na mambo a bukote. Kabiji kampe twachinchika meseko ne lumanamo pa myaka yavula. Inge byo byo kiji, “kange mubambishenga michima yenu na mambo a kintu nangwa kimo ne.” Pano bino, mu milombelo ya misashijilo musololenga byonse kwi Lesa kabiji aye ukemupa mutende wakila milanguluko yenu.—Tangai Filipai 4:6, 7.

17. Tukesamba pa ka mu mutwe walondelapo?

¹⁷ Byonkatu muntu unyema kapela byo ebikako inge kwashala pacheche kupwisha kikonkwanyi kyanji, ne atweba twayai tutwajijile kunyema pa kuba’mba tukatambule kilambu kya bumi. Kwesakana na papelela bulume bwetu ne biji bwikalo bwetu, twayai twibikengako kuta muchima pa milaye yawama ya kulutwe byo kwashalatu pacheche kutambula kilambu. Twakonsha kuba byepi pa kuba’mba tutwajijile kunyema mu jishinda jaya ku bumi pa lubilo lo twakonsha kunyemenapo? Mutwe walondelapo uketukwasha kuyuka bintu byo twafwainwa kutangizhako mu bwikalo bwetu ne ‘kuyuka bintu byanemesha.’—Fili. 1:9, 10.