MUTWE WA KUFUNDA 32
Endainga na Lesa Wenu Saka Mwipelula ne Kuyuka byo Mukankalwa Kuba
“Kwenda na Lesa wobe saka wipelula!”—MIKA 6:8.
LWIMBO 31 Endainga na Lesa!
BIJI MU UNO MUTWE *
1. Davida waambilepo’mba ka pe Yehoba byo epelula?
ABYA kine twakonsha kwamba’mba Yehoba wipelula nyi? Ee, twakonsha. Davida waambile’mba: “Mwanzhikijila na jikebo jenu, kabiji kwipelula kwenu kundengela kutumbalala.” (2 Sam. 22:36; Sala. 18:35) Kimye Davida kyo anembele bino byambo kyamweka wavulukilenga kimye ngauzhi Samwela kyo aishile ku nzubo ya bashanji na kumushinga manyi kuba’mba ye ukekala mfumu wa bena Isalela kulutwe. Davida ye wajinga mwanyike pa baana ba balume batanu na basatu. Pano bino, Yehoba ye ye asajile kuba’mba ye ukaswana Mfumu Saulo.—1 Sam. 16:1, 10-13.
2. Tusakwisamba pa ka mu uno mutwe?
2 Davida wafwainwa waitabizhe byambo byaambile nyimbi wa masalamo mukwabo pe Yehoba amba: “Aye ukunama ne kutala jiulu ne ntanda, wimanya wakajilwa kufuma mu lukungu. Ushikula muyanji . . . kuba’mba amwikazhe pamo na babinemanga.” (Sala. 113:6-8) Mu uno mutwe, patanshi tusakufunda mafunjisho anema pa kwipelula kupichila mu kwisamba pe Yehoba byo amwesha kino kyubilo. Apa bino tumone byo twakonsha kufunjilako bya kwipelula kwi Mfumu Saulo, ngauzhi Danyela, ne Yesu.
TWAKONSHA KUFUNJILAKO KA KWI YEHOBA?
3. Yehoba uba byepi na bantu bambulwa kulumbuluka, kabiji kino kimwesha ka?
3 Yehoba umwesha’mba wipelula kupichila mu byo oba na bantu bambulwa kulumbuluka bamupopwela. Lesa utambwila mpopwelo yetu kabiji witumona’mba twi balunda nanji. (Sala. 25:14) Pa kuba’mba etukwashe kwikala balunda nanji, Yehoba wapaine Mwananji kwikala kitapisho kya bundengamambo bwetu. Kino kyo aubile kimweshatu patoka kuba’mba witubijile lusa ne kifyele kikatampe.
4. Ñanyi kintu kitupa Yehoba, kabiji mambo ka?
4 Langulukai pa jishinda jikwabo Yehoba jo amwesheshamo’mba wipelula. Byo aji Mulenga wetu, Yehoba inge wakebelenga inge witulengele kwa kubula maana a kwifuukwila bintu. Bino kino kechi kyo kyo aubile ne. Witulengele mu kipasha kyanji ne kwitupa luusa lwa kwifuukwila byo tukeba kuba. Bintu byo tufuukulapo byanema bingi kwi Yehoba, nangwa kya kuba twakepa bingi ne kubula kukosa inge twiesakanya kwi aye. Ukeba’mba twifuukwilenga kumwingijila na muchima wetu yense na mambo a kumutemwa ne kuyuka byawama bifuma mu kumukookela. (Mpitu. 10:12; Isa. 48:17, 18) Tusanta bingi pa kuyuka’mba Yehoba wipelula.
Yesu uji mwiulu. Bakwabo mo bakalaminanga baimana kwipi ne aye. Bonse babena kutala biumbi ne biumbi bya bamalaika. Bamalaika bamo babena kuya pa ntanda na kwingila mingilo yo bebapa. Yehoba wapa luusa bonse bo bamwesha mu kino kipikichala. (Monai jifuka 5)
5. Yehoba witufunjisha byepi kwikala bepelula? (Monai kipikichala kya pa nkupiko.)
5 Yehoba witufunjisha kwikala bepelula kupichila mu byo oba ne atweba. Yehoba ye mwine uji na maana akila. Nangwa byonkabyo, uswa inge bilengwa byanji byamubuulako bya kuba. Langulukai pa kino: Yehoba waswishishe Mwananji kumukwasha pa kulenga bintu byonse. (Maana 8:27-30; Kolo. 1:15, 16) Kabiji nangwa kya kuba Yehoba uji na bulume bukatampe, bino wapako bilengwa byanji luusa lwa kuba bintu bimo. Watongwele Yesu kwikala Mfumu wa Bufumu bwanji, kabiji bantu 144,000 bakalamanga pamo ne Yesu nabo wibapako luusa lwa kuba bintu bimo. (Luka 12:32) Yehoba wafunjishe Yesu kwikala Mfumu kabiji Ñanga Mwine Mukatampe. (Hebe. 5:8, 9) Kabiji wafunjishe ne bantu bakalamanga pamo ne Yesu bya kwingila mwingilo wabo, bino kechi wibafuukwilako bya kuba pa kwingila mwingilo wabo ne. Pakuba waketekela’mba bakobanga kyaswa muchima wanji.—Lum. 5:10.
Tulondela Yehoba umvwe twafunjisha bakwetu mingilo ne kwibaleka na kwiingila (Monai mafuka 6-7) *
6-7. Twakonsha kufunjilako ka ku Shetu wa mwiulu pa kupako bakwetu mingilo?
6 Inge kya kuba’mba Shetu wa mwiulu ubula kukebewa muntu wa kumukwashako upako bantu luusa lwa kuba bintu bimo, nanchi ne atweba kechi twafwainwa kubanga byonka bino nenyi? Nanchi mwi mutwe wa kisemi nangwa mwi bakulumpe mu kipwilo nyi? Londelainga byuba Yehoba kupichila mu kupako bakwenu mingilo imo ne kuchinuzhuka muteeto wa kutwela mu mingilo ya bakwenu. Inge mwalondela Yehoba, mingilo ikendanga bulongo kabiji mukafunjishanga bakwenu bya kwingila ne kwibakwasha kwingila na ngovu. (Isa. 41:10) Aba baji na luusa lwa kutangijila bakwabo bakonsha kufunjilako ñanyi kintu kikwabo kwi Yehoba?
7 Baibolo umwesha kuba’mba Yehoba umvwa milanguluko ya bamalaika banji. (1 Mfu. 22:19-22) Bansemi, mwakonsha kulondela byepi byuba Yehoba? Pa bimye bimo mwafwainwa kwipuzha baana benu milanguluko yabo pa byo mwakonsha kwingila mwingilo umo. Kabiji mwafwainwa kulondela byo baamba.
8. Yehoba wamwesheshe byepi butekanye mu byo aubile ne Abalahama ne Sala?
8 Jishinda jikwabo Yehoba jo amwesheshamo kwipelula ke kutekanya. Yehoba utekanya inge bantu bamwingijila bazhinauka bintu byo afuukula. Watelekele kwi Abalahama kimye kyo aambile’mba kechi kyayijilemo Yehoba konauna Sodoma ne Gomola ne. (Nte. 18:22-33) Kabiji vulukai Yehoba byo aubile na muka Abalahama aye Sala. Kechi kyamufichishe ku muchima nangwa kuzhingila kimye Sala kyo asekele pa kumvwa mulaye wa kuba’mba ukemita ne kusema mwana mu bukote ne. (Nte. 18:10-14) Pakuba wamunemekele Sala.
9. Bansemi ne bakulumpe mu kipwilo bakonsha kufunjilako ka kwi Yehoba?
9 Bansemi ne bakulumpe mu kipwilo, mwakonsha kufunjilako ka kwi Yehoba? Muba byepi inge baana benu nangwa bamo mu kipwilo babula kulondela byo mwafuukulapo? Nanchi abya mufikenatu kwibabuula’mba batamisha nyi? Nangwa mwesekesha kukeba kuyuka milanguluko yabo nyi? Bisemi ne bipwilo bimwenamo bingi inge aba baji na luusa lwa kutangijila bakwabo ke balondele byuba Yehoba. Kufika pa kino kimye, twisamba pa byo twakonsha kufunjilako kwipelula kwi Yehoba. Pano twayai tumone byo twakonsha kufunjilako kwipelula ku bantu banembwa mu Mambo a Lesa.
TWAKONSHA KUFUNJILAKO KA KU BAKWETU?
10. Yehoba wingijisha byepi byapichilemo bantu banembwa mu Baibolo kwitufunjisha?
10 “Mufunjishi [wetu] Wakila” aye Yehoba witupa mashimikila a bantu banembwa mu Baibolo kuba’mba tufunjilengako. (Isa. 30:20, 21) Tufunjilako byavula kupichila mu kulanguluka pa mashimikila a bantu banembwa mu Baibolo bamwesheshe byubilo bya Lesa, kubikapotu ne kwipelula. Kabiji tufunjilako ku byamwekejile boba bakankelwe kumwesha byubilo byawama.—Sala. 37:37; 1 Ko. 10:11.
11. Twakonsha kufunjilako ka ku byatama byaubile Saulo?
11 Langulukai pa byamwekejile Mfumu Saulo. Wipelwile byo ajinga mwanyike. Wayukile bintu byo akankalwanga kuba kabiji wakaine kumunungilapo mingilo ikwabo. (1 Sam. 9:21; 10:20-22) Pano bino, mu kuya kwa kimye Saulo watendekele kwijantula. Bino byubilo byasolokele kimye kyo aikele mfumu. Pa kimye kimo, wakankelwe kutekanya ngauzhi Samwela byo abujile kufika bukiji. Saulo kechi wipelwile ne kuketekela mwi Yehoba ne, wapaine mulambo wa kusoka ye babujile kumuswisha. Kyafuminemo, Yehoba walekele kumupesha kabiji mu kuya kwa kimye wamufumishe pa bufumu. (1 Sam. 13:8-14) Kwi Saulo tubena kufunjilako kuba’mba twafwainwa kwipelula ne kuchinuzhuka kuba bintu byo babula kwitupa luusa.
12. Danyela wamwesheshe byepi amba wipelwile?
12 Kupusanako na byatama byaubile Saulo, twayai twisambe pa byawama byaubile ngauzhi Danyela. Mu bwikalo bwanji bonse, Danyela wipelwile kabiji kimye kyonse walombanga kwi Yehoba. Kimye kyo bamwingijishe kwi Yehoba kulumbulwila Nebukaneza mwatajile biloto, Danyela kechi witumbijikile aye mwine ne. Pakuba wipelwile ne kupana lukumo kwi Yehoba. (Da. 2:26-28) Tubena kufunjilako ka? Inge balongo bomvwa bulongo kuteleka ku majashi etu nangwa twingila bulongo mwingilo wa kusapwila, twafwainwa kupananga lukumo kwi Yehoba. Twafwainwa kuyuka kuba’mba kwa kubula bukwasho bwa Yehoba kechi twakonsha kwingila ino mingilo ne. (Fili. 4:13) Inge twauba bino, ko kuba’mba tubena kulondela mu ngayo ya kwa Yesu. Mu ñanyi jishinda?
13. Tufunjilako ka kwi Yesu ku byambo byanembwa pa Yoano 5:19, 30?
13 Nangwa kya kuba Yesu wajinga Mwana Lesa walumbuluka, bino waketekejile mwi Yehoba. (Tangai Yoano 5:19, 30.) Kechi waesekelepo kwangata bulume bwa Shanji wa mwiulu ne. Filipai 2:6 witubuula’mba Yesu “kechi walangulukile’mba kwesakana ne Lesa kyo kintu kyo afwainwe kukebesha ne.” Byo ajinga Mwana wa lukookelo, Yesu wayukile bintu byo akankalwanga kuba kabiji wanemekele buntangi bwa Shanji.
Yesu wayukile bintu byo abujilepo luusa lwa kwibyuba (Monai jifuka 14)
14. Kimye Yesu kyo bamwambijile’mba obe kintu kyo babujile kumupa luusa lwa kwikyuba, waubile byepi?
14 Langulukai pa byaubile Yesu kimye baana banji ba bwanga abo ba Yakoba ne Yoano ne inabo byo baishile kwi aye ne kumulomba kuba’mba ebobile kintu kyo abujile luusa lwa kwikyuba. Kwa kubula ne kutaya kimye ne, Yesu waambile’mba Shanji wa mwiulu ye uji na luusa lwa kusala ukekala ku kilujo ne ku kipiko kyanji mu Bufumu. (Mat. 20:20-23) Yesu wamwesheshe’mba wayukile bintu byo akonsheshe kubula kuba. Kino kimwesha’mba wipelwile. Kechi waubilepo kintu Yehoba kyo abujile kumubuula’mba obe ne. (Yoa. 12:49) Twakonsha kulondela byepi byaubile Yesu?
Twakonsha kuba byepi pa kuba’mba twikale byonka byajinga Yesu wayukile bintu byo abujile luusa lwa kwibyuba? (Monai mafuka 15-16) *
15-16. Twakonsha kwingijisha byepi lujimuno luji pa 1 Kolinda 4:6?
15 Twakonsha kulondela mu ngayo ya kwa Yesu inge twaumvwina lujimuno lwa mu Baibolo luji pa 1 Kolinda 4:6. Pa kino kyepelo betubuula’mba: “Kange mupitailenga pa bintu byanembwa ne.” Onkao mambo, inge muntu witwipuzha’mba tumubuuleko bya kuba, kechi twafwainwa kumukanjikizha kulondela milanguluko yetu, nangwa kwamba kwa kubula kulangulukapo bulongo pa kyokyo kintu ne. Pakuba twafwainwa kumutundaika kulondela lujimuno luji mu Baibolo ne mu mabuku etu. Inge twauba bino, tumwesha’mba kechi twayuka bishinka byonse ne. Kabiji kimwesha’mba twipelula mambo twamwesha’mba twayuka kuba’mba ‘mizhilo yaoloka’ ya Yehoba yawama kukila milanguluko yetu.—Lum. 15:3, 4.
16 Kununga pa kunemeka Yehoba, kuji bishinka bikwabo bitulengela kwipelula. Pano twayai twisambe pa kwipelula ne kuyuka bintu byo tukankalwa kuba byo kwakonsha kwituletela lusekelo ne kwitukwasha kukwatankana na bakwetu.
KWIPELULA KWAWAMINA KA?
17. Mambo ka bantu bepelula kabiji bayuka’mba kuji bintu byo bakankalwa kuba o bekela na lusekelo?
17 Inge twipelula ne kuyuka’mba kechi twayuka bintu byonse ne, tukekala na lusekelo. Mambo ka? Inge twayuka kuba’mba kuji bintu byo twakonsha kukankalwa kuba, tukasantanga ne kwikala na lusekelo inge bakwetu betukwasha. Akilangulukai kyamwekele kimye Yesu kyo abukile bantu ba mbumba jikumi. Umotu ye wabwelele na kusanchila Yesu pa kumubuka kino kikola kyatama. Mambo wayukile kuba’mba kafwako muntu wakonsheshe kuba bino na bulume bwanji mwine ne. Uno muntu wipelwile wasanchile pa kumukwasha mambo wayukile’mba kechi wakonsheshe kwibuka aye mwine ne. Kabiji watumbijikile Lesa.—Luka 17:11-19.
18. Kwipelula ne kuyuka’mba kuji byo tukankalwa kuba kwitukwasha byepi kukwatankana na bakwetu? (Loma 12:10)
18 Bantu bepelula kabiji bayuka’mba kuji bintu byo bakankalwa kuba bapwanañana na bakwabo bulongo kabiji bekala na balunda bavula. Mambo ka? Mambo bayuka kuba’mba bakwabo baji na byubilo byawama ne kwibaketekela. Kabiji basekela inge bakwabo ke bengile bulongo mingilo yo bebapa kabiji bebatakaika ne kwibanemeka.—Tangai Loma 12:10.
19. Mambo ka o twafwainwe kuchinuzhukila bwitote?
19 Pakuba bantu betota kibakatazha bingi kutakaika bakwabo, bakebatu kuba’mba abo bebatakaikenga. Batemwa kwiesakanya ku bakwabo ne kutundaika muchima wa kwikyombesha. Kechi bafunjisha bakwabo bya kwingila mingilo ne kwibapa luusa lwa kuba bintu bimo ne. Javula balanguluka’mba bafwainwa kuba bintu byonse bunke bwabo, mambo mu michima yabo bamona’mba bakwabo kechi bakonsha kwingila bulongo ne. Muntu witota javula ukeba kumunemeka kukila bakwabo, kabiji ubila bakwabo kichima inge baingila bulongo kukila aye. (Nga. 5:26) Bantu ba uno mutundu kechi batwajijila kwikala na balunda ne. Inge twamona’mba twatatula kwitota, twafwainwa kulombeshapo kwi Yehoba kuba’mba etukwashe ‘kupimpula milanguluko yetu’ pa kuba’mba uno muteeto watama abule kujimba mizhazhi mu muchima wetu.—Loma 12:2.
20. Mambo ka o twafwainwa kwikala bepelula ne kuyuka’mba kuji byo tukankalwa kuba?
20 Tusanchila bingi Yehoba mambo tufunjilako kwipelula. Twamona byo amwesha kwipelula mu bintu byo oba na bakalume banji, kabiji tubena kukeba kulondelanga byubilo byanji. Kikwabo, tubena kukeba kwikala bepelula byonka byajinga bantu baendanga ne Lesa banembwa mu Baibolo. Twayai tutwajijile kupana munema ne lukumo kwi Yehoba. (Lum. 4:11) Umvwe twauba bino byonse, tukekala balunda na Shetu wa mwiulu myaka ne myaka. Mambo watemwa bantu bepelula kabiji bayuka’mba kuji bintu byo bakankalwa kuba.
LWIMBO 123 Tukookelenga Lesa mu Bukishinka
^ jifu. 5 Muntu wipelula ubila bakwabo lusa ne kifyele. Twayuka’mba Yehoba wipelula mambo ubila bantu kifyele. Mu uno mutwe, tusakufunda byo twafwainwa kwipelula byonka biji Yehoba. Kabiji tusakufunjilako bya kwipelula kwi Mfumu Saulo, ngauzhi Danyela ne Yesu.
^ jifu. 58 KULUMBULULA BIPIKICHALA: Mukulumpe mu kipwilo ubena kufunjisha mulongo mwanyike bya kunengezha manyaunda a kipwilo. Mu kuya kwa kimye, uno mukulumpe mu kipwilo waleka uno mwanyike kwingila uno mwingilo kwa kubula kumwikela na kumubuula bya kuba.
^ jifu. 62 KULUMBULULA BIPIKICHALA: Nyenga waipuzha mukulumpe mu kipwilo inge kijitu bulongo kuswa lwito lwa masongola akekela mu chechi. Mukulumpe mu kipwilo kechi waamba milanguluko yanji ne, bino wisamba nanji pa mafunde a mu Baibolo.
