1. Ñanyi kintu Yehoba kyo apa bakalume banji bonse?

YEHOBA witutemwa kabiji wapa bakalume banji ba kishinka bonse kifulo mu kipwilo kyanji. Nangwa kya kuba atweba bonse twingila mingilo yapusana-pusana, bino twanema bingi kabiji tukebewa bukwasho bwa bakwetu. Mutumwa Paulo wayukile kino kishinka kyanema. Twayuka byepi?

2. Kwesakana na byaamba Efisesa 4:16, mambo ka o twafwainwa kukwatankena ne kwingijila pamo?

² Byonka byaamba kinembelo paimena uno mutwe, Paulo wamwesheshe kuba’mba kafwako nangwa umo mwi atweba wakonsha kwambila mukwabo kalume wa Yehoba amba “Kechi mbena kukukeba ne.” (1 Ko. 12:21) Inge tukeba’mba twikalenga mutende mu kipwilo, twafwainwa kwinemekanga atweba bene na bene ne kwingijila pamo. (Tangai Efisesa 4:16.) Inge ke twingijile pamo saka twakwatankana, bonse mu kipwilo bekala na lusekelo kabiji kipwilo kikosa.

3. Tusakwisamba pa ka mu uno mutwe?

³ Mu ñanyi mashinda amo mo twakonsha kumweshesha’mba twanemeka bakwetu bena Kilishitu? Mu uno mutwe, tusakwisamba pa bakulumpe mu kipwilo byo bakonsha kunemeka bakwabo bakulumpe. Kabiji tusakwisamba ne atweba bonse byo twakonsha kunemeka balongo ne banyenga babula kutwela mu masongola. Apa bino tufunde ne byo twakonsha kumwesha’mba twanemeka boba babula kwamba bulongo mulaka wetu.

4. Ñanyi lujimuno lwapaine Paulo lwanembwa pa Loma 12:10 bakulumpe mu kipwilo lo bafwainwa kulondela?

⁴ Bakulumpe mu kipwilo bonse batongolwa na mupashi wazhila wa Yehoba. Bino baji na bya bupe byapusana-pusana. (1 Ko. 12:17, 18) Bamo kampe bebatongolatu katataka kabiji kechi bakonsha kuyuka byavula ne. Bakwabo kechi bakonsha kwingila mingilo yavula ne, mambo a kukoma nangwa kukolwa. Pano bino, kafwako mukulumpe mu kipwilo wakonsha kutala mukulumpe mu kipwilo mukwabo ne kwamba’mba ‘Kechi mbena kukukeba ne.’ Pakuba mukulumpe mu kipwilo yense wafwainwa kulondela lujimuno lwapaine Paulo lwanembwa pa Loma 12:10.—Tangai.

5. Bakulumpe mu kipwilo bamwesha byepi kuba’mba banemeka bakwabo bakulumpe mu kipwilo, kabiji mambo ka kuba bino o kwanemena?

⁵ Bakulumpe mu kipwilo bamwesha’mba banemeka bakwabo bakulumpe kupichila mu kuteleka ku byo bamba. Kino kyanema bingi kikatakata inge jibumba ja bakulumpe mu kipwilo jaikala na misambo yanema. Mambo ka? Kyamba kya Usopa kya mu Kizungu kya October 1, 1988, kyaambile’mba: “Bakulumpe mu kipwilo bayuka kuba’mba kupichila mu mupashi wazhila, Kilishitu wakonsha kukwasha mukulumpe mu kipwilo umo kubuula bakwabo jifunde ja mu Baibolo jakonsha kwibakwasha kuyuka bya kuba na lukatazho nangwa pa kufuukula kintu kyanema. (Byu. 15:6-15) Mupashi wazhila ukwashatu bakulumpe mu kipwilo bonse, kechi umotu ne.”

6. Ki ka kikwasha bakulumpe mu kipwilo kwingijila pamo saka bakwatankana, kabiji kipwilo kimwenamo byepi?

⁶ Mukulumpe mu kipwilo unemeka bakulumpe bakwabo, kechi ukeba kimye kyonse kwikala mutanshi kwamba inge baji na misambo ya bakulumpe ne. Kabiji kechi ukeba kwamba byavula kukila bakwabo nangwa kulanguluka’mba milanguluko yanji yo yawama kukila ya bakwabo ne. Pakuba wipelula pa kwamba milanguluko yanji. Utako muchima inge bakwabo babena kwamba. Kabiji kyakilamo kunema, wamba mafunde a mu Binembelo ne kulondela lutangijilo lufuma ku “kalume wa kishinka kabiji wa maana.” (Mat. 24:45-47) Inge bakulumpe mu kipwilo ke bamweshe butemwe ne mushingi pa kwisamba, mupashi wazhila wa Lesa ukekalanga ne abo, kabiji  ukebatangijilanga kufuukula bintu bikakosesha kipwilo.—Yako. 3:17, 18.

7. Yesu wamonanga byepi bukatanda ne buzhike?

⁷ Lelo jino, mu bipwilo muji basongola baji na bisemi. Pano bino, muji balongo ne banyenga bavula babula kutwela mu masongola. Twakonsha kumonanga byepi bakatanda ne bazhike? Langulukai pe Yesu byo ebamonanga. Byo aingijilenga mwingilo wanji pano pa ntanda, Yesu kechi wasongwele ne. Wajinga katanda kabiji watele muchima pa mwingilo wa Lesa. Yesu kechi wafunjishepo kuba’mba muntu yense wafwainwe kusongola nangwa kwikala katanda nangwa muzhike ne. Nangwa byonkabyo, waambile’mba bena Kilishitu bamo bafuukulapo kubula kusongola nangwa kusongolwa. (Mat. 19:11, 12) * Yesu wanemekele boba babujile kusongola. Kechi walengulwile bakatanda ne bazhike nangwa kwibamona’mba kuji kintu kyo babula ne.

8. Kwesakana na byaamba 1 Kolinda 7:7-9, Paulo watundaikile bena Kilishitu kulanguluka pa ka?

⁸ Byonka byajinga Yesu, mutumwa Paulo watwajijile kwikala katanda kimye kyo aingijilenga mwingilo wanji. Paulo kechi wafunjishepo amba kyatama mwina Kilishitu kutwela mu masongola ne. Wayukile’mba mwine muntu ye wafwainwa kwifuukwilapo. Pano bino, Paulo watundaikile bena Kilishitu kulangulukapo kwingijila Yehoba kwa kubula kutwela mu masongola. (Tangai 1 Kolinda 7:7-9.) Paulo kechi walengulwile bena Kilishitu babula kutwela mu masongola ne. Wasajile nsongwalume Timoti wabujile kusongola ne kumupa mingilo ikatampe mu kipwilo. * (Fili. 2:19-22) Onkao mambo, kyakonsha kutama bingi kulanguluka’mba mulongo wafikilamo kwingila mingilo nangwa kechi wafikilamo ne, na mambo a kusongola nangwa kubula kusongola.—1 Ko. 7:32-35, 38.

9. Twakonsha kwamba’mba ka pa kusongola nangwa kubula kusongola?

⁹ Yesu ne Paulo kechi bafunjishepo’mba bena Kilishitu bafwainwa kusongola nangwa kubula kusongola ne. Pano nanchi twakonsha kwamba’mba ka pa kusongola ne kubula kusongola? Kyamba kya Usopa kya October 1, 2012, kyalumbulwile bulongo amba: “Byonse bibiji [masongola  ne bukatanda nangwa buzhike] twakonsha kwibilumbulula’mba bya bupe byafuma kwi Lesa. . . . Yehoba kechi umona [bukatanda nangwa buzhike] amba kintu kya kumvwinapo bumvu nangwa kwikala na bulanda ne.” Kuvuluka kino kishinka kwitulengela kunemeka balongo ne banyenga babula kutwela mu masongola baji mu kipwilo.

10. Twakonsha kumwesha byepi amba twanemeka balongo bakatanda ne banyenga bazhike?

¹⁰ Twakonsha kumwesha byepi amba twanemeka milanguluko ne bintu bipitamo balongo ne banyenga babula kutwela mu masongola? Twafwainwa kuvulukanga kuba’mba bena Kilishitu bamo bebikila kikonkwanyi kya kubula kutwela mu masongola. Bakwabo bakeba kusongola nangwa kusongolwa, bino bakyangye kutana muntu wibatokela ku muchima. Pakuba bakwabo bafwisha benakwabo. Nanchi kijitu bulongo ba mu kipwilo kwipuzha bena Kilishitu bakatanda ne bazhike ene mambo o babujila kutwela mu masongola, nangwa kwibambila’mba bebakwasheko kutaana muntu wa kutwela nanji mu masongola nyi? Ibyo kuba’mba bena Kilishitu bamo babula kutwela mu masongola bakonsha kulomba kuba’mba mwibakwasheko mu ino mbaji. Pano bino, inge kya kuba bene kechi balomba buno bukwasho ne, bakonsha kumvwa byepi inge mwibambila’mba mwibakwasheko? (1 Tesa. 4:11; 1 Timo. 5:13) Twayai tumone byaambapo balongo ne banyenga ba kishinka babula kutwela mu masongola.

11-12. Ñanyi bintu byakonsha kulefula bakatanda ne bazhike?

¹¹ Kalama wa mwanzo katanda umo wingila bingi bulongo mwingilo wanji waambile’mba wamwenemo bingi mu kubula kusongola. Bino waambile’mba kilefulañana bingi inge kya kuba balongo ne banyenga bo wanemeka ke bakushikishe’mba: “Mambo ka o wabujila kusongola?” Mulongo wabula kusongola wingijila pa ofweshi wa musampi waambile’mba: “Bimye bimo balongo ne banyenga bandengela kumona nobe bomvwina lusa balongo ne banyenga babula kutwela mu masongola. Kino kyakonsha kulengela balongo ne banyenga kumona nobe bukatanda ne buzhike ke kisendwa kechi kya bupe ne.”

¹² Nyenga wabula kusongolwa wingijila pa Betele waambile’mba: “Balongo ne banyenga bamo balanguluka’mba bazhike ne bakatanda bonse babena kukeba wa kutwela nanji mu masongola. Kabiji balanguluka’mba inge kwaikala bijiilo bya mutentamo, bakatanda ne bazhike ko ko bakebela ba kutwela nabo mu masongola. Kimye kimo byo nayile ku mpunzha imo ko nayile na kwingijila, nafikile juba jonka jo bapwila mabanga. Nyenga ko nafikijile wambuujile’mba mu kipwilo muji balongo babiji ba jifumbi jimo ne amiwa. Wambuujile’mba kechi mbena kukukebela mulongo wa kusongolwako ne. Bino byo twafikiletu mu Nzubo ya Bufumu, wantwajile kwajinga bano balongo babiji kuba’mba nebayuke. Bonse basatu twaumvwine bingi bumvu.”

13. Ñanyi kintu kyatundaikile nyenga umo?

¹³ Nyenga mukwabo muzhike wingijila pa Betele waambile’mba: “Nayuka bapainiya bakoma babula kutwela mu masongola balanguluka bulongo, bata muchima pa kwingijila Lesa, baji na muchima wa kwipana kukwasha bakwabo kabiji baji na lusekelo mu mwingilo wabo. Kabiji bakwasha bingi kipwilo. Baji na milanguluko yawama pa bukatanda ne buzhike. Kechi balanguluka’mba banema kukila bakwabo na mambo a kuba’mba kechi basongola nangwa kusongolwa ne. Kabiji kechi balanguluka’mba konsha baikala na lusekelo na mambo a kubula kutwela masongola ne kubula kusema baana ne.” Kileta bingi lusekelo kwikala mu kipwilo mo banemeka bonse. Uyuka’mba balongo ne banyenga kechi bakumvwina lusa na mambo a kubula kusongola nangwa kusongolwa ne, kabiji kechi balanguluka’mba wanema kwibakila ne. Uyukatu kuba’mba bakutemwa.

14. Twakonsha kumwesha byepi amba twanemeka babula kutwela mu masongola?

 ¹⁴ Balongo bakatanda ne banyenga yetu bazhike bakasanta bingi inge twibanemeka na mambo a byubilo byabo byawama, kechi na mambo a kubula kutwela mu masongola ne. Kechi twafwainwa kwibomvwinanga lusa ne, bino twafwainwa kwibanemeka na mambo a bukishinka bwabo. Inge ke tube bino, balongo bakatanda ne banyenga bazhike kechi bakamonanga nobe tubena kwibambila’mba: “Kechi mbena kukukeba ne.” (1 Ko. 12:21) Pakuba bakayuka’mba twibanemeka kabiji twanemeka kifulo kyabo mu kipwilo.

15. Ñanyi lupimpu lwaubapo bamo pa kuba’mba bengileko pakatampe mwingilo wa kusapwila?

¹⁵ Mu myaka ya kulutwe kuno, basapwishi bavula bingi bebikila kikonkwanyi kya kufunda mulaka mukwabo pa kuba’mba bengileko pakatampe mwingilo wa kusapwila. Pa kuba’mba bobe bino, bafwainwa kupimpulako bwikalo bwabo. Bano balongo ne banyenga bafuma mu bipwilo bingijisha mulaka wabo pa kuba’mba baye na kwingijila ku bipwilo bingijisha mulaka ungi kabiji kukebewa basapwishi ba Bufumu. (Byu. 16:9) Kino ke kintu kya kwifuukwilapo mwine mwina Kilishitu pa kuba’mba engilenga kimye kyabaya mu mwingilo wa Bufumu. Nangwa kya kuba pakonsha kupita myaka yavula pa kuba’mba bayuke mulaka ye babena kufunda, bino bakwasha kipwilo mu mashinda avula. Byubilo byabo byawama ne bintu byo bayuka bikosesha bingi kipwilo. Twibanemeka bingi bano balongo ne banyenga pa kwipana kwabo.

16. Bakulumpe mu kipwilo batala pa ka pa kwisamba pa balongo bafwainwa kwikala bakulumpe ne bankwasho mu kipwilo?

¹⁶ Jibumba ja bakulumpe mu kipwilo kechi jafwainwa kukana kutakaika mulongo kuba’mba ekale nkwasho nangwa mukulumpe mu kipwilo na mambotu a kuba’mba kechi wayukisha mulaka wingijisha kipwilo ne. Bakulumpe mu kipwilo batala pa bikebewa bya mu Binembelo ku bakulumpe ne bankwasho mu kipwilo. Kechi batala pa mulongo byo amba bulongo mulaka wingijisha kipwilo ne.—1 Timo. 3:1-10, 12, 13; Titu. 1:5-9.

17. Ñanyi kintu kyafwainwa kufuukulapo bansemi inge kisemi kyavilukila ku kyalo kingi?

¹⁷ Bisemi bya bena Kilishitu bimo bivilukila ku kyalo kikwabo na mambo a kunyema nkondo mu kyalo kyabo nangwa kuya na kukeba nkito na mambo a buyanji. Na mambo a kino, baana bakonsha kufunda ku sukulu mulaka ye bamba mu kyalo kyo bavilukilamo. Bansemi nabo bakonsha kufunda mulaka ye bengijisha mu kyokyo kyalo pa kuba’mba batwele nkito. Pano bakonsha kuba byepi inge kya kuba’mba ku yoyo mpunzha kuji kipwilo nangwa jibumba jingijisha mulaka wabo? Kino kisemi kyafwainwa kupwilanga mu kipwilo kingijisha ñanyi mulaka? Nanchi bafwainwa kupwilanga mu kipwilo kingijisha mulaka wa mu kyokyo kyalo nyi, inyi kingijisha mulaka wabo?

18. Kwesakana na byaamba Ngalatiya 6:5, twakonsha kumwesha byepi amba twanemeka byafuukulapo mutwe wa kisemi?

¹⁸ Mutwe wa kisemi ye wafwainwa kufuukulapo kipwilo kyafwainwa kupwilangamo kisemi kyanji.  Na mambo a kuba’mba mutwe wa kisemi ye uji luusa lwa kufuukulapo, wafwainwa kuta muchima pa kyafwainwa kukwasha kisemi kyanji. (Tangai Ngalatiya 6:5.) Twafwainwa kunemeka byafuukulapo mutwe wa kisemi. Kyonse kyo afwainwa kufuukulapo, twafwainwa kwikinemeka ne kutambwila kisemi kyavilukila mu kipwilo kyetu.—Loma 15:7.

19. Mutwe wa kisemi wafwainwa kulomba ne kulanguluka pa ka?

¹⁹ Bisemi bimo byakonsha kupwilanga mu kipwilo kingijisha mulaka wabo, bino baana kechi bakonsha kuyukisha yeo mulaka ne. Inge kino kipwilo kiji mu mpunzha mo bamba mulaka wa mu kyokyo kyalo, baana kyakonsha kwibakatazha kumvwisha byo bamba pa kupwila ne kwibalengela kubula kuyilako palutwe. Mambo ka? Mambo baana bakonsha kufundanga pa sukulu mulaka wa kyokyo kyalo kechi mulaka wabo ne. Inge kyaikala bino, mitwe ya bisemi yafwainwa kulombapo ne kulanguluka pa byo bafwainwa kuba pa kuba’mba bakwashe baana babo kutemwa Yehoba ne bantu banji. Bakonsha kufuukulapo kukwasha baana babo kuyuka bulongo mulaka wabo nangwa bakonsha kufuukulapo kuvilukila mu kipwilo kingijisha mulaka baana babo ye bayuka bulongo. Kyonse kyakonsha kufuukulapo mutwe wa kisemi, kipwilo kyo asalapo kupwilangamo kyafwainwa kumukwasha kuyuka’mba aye ne kisemi kyanji banemekwa.

20. Twakonsha kumwesha byepi amba twanemeka balongo ne banyenga babena kufunda mulaka mukwabo?

²⁰ Byonka byo twaambapo mu uno mutwe, mu bipwilo byavula muji balongo ne banyenga babena kufunda mulaka mukwabo. Kyakonsha kwibakatazha kwamba byo balanguluka. Pano bino, inge twabula kuta muchima pa byo bamba mulaka ye babena kufunda, tukamona byo batemwa Yehoba ne kizaku kya kumwingijila. Inge twamona bino byubilo byawama, tukebanemeka bingi bano balongo ne banyenga. Kechi tukebambilanga’mba “Kechi mbena kukukeba ne” na mambo a kuba’mba kechi bamba bulongo mulaka wetu ne.

21-22. Ñanyi kintu kyanema kyo tuji nakyo?

²¹ Tusanchila bingi Yehoba mambo witupa kifulo kyawama mu kipwilo kyanji. Nangwa twi banabalume, twi banabakazhi, twasongola nangwa kusongolwa, twi bakatanda nangwa twi bazhike, twi bakulumpe nangwa banyike, twamba bulongo mulaka nangwa ne, Yehoba witunemeka bingi, ne bakwetu nabo betunemeka.—Loma 12:4, 5; Kolo. 3:10, 11.

²² Twayai tutwajijile kulondela bintu byo twafunjilako ku kimwesho kya mubiji wa muntu kyaingijishe Paulo. Kuba bino kuketukwasha kunemeka kifulo kyetu ne kifulo kya bakwetu mu kipwilo kya Yehoba.