1-2. Ñanyi bintu byo tusakufunda mu uno mutwe?

MWAKONSHA kumvwa byepi inge kya kuba kipe muji bintu byawama kyo mubena kutengela kechi kyafika pa kimye kyo mubena kwikiketekela ne? Abya mukakamwa nyi? Byambo bya Maana 13:12 byaamba’mba: “Kintu kyo baketekela inge kyabanda kufika, kikozha ku muchima.” Bino mwakonsha kumvwa byepi inge bemubuula’mba kuji bintu byawama byalengela kuba’mba kipe kyenu kibule kufika pa kimye kyo mwaji kwikiketekelanga? Kino kyakonsha kwimulengela kupembelela saka mwatekanya.

² Mu uno mutwe, tusakumona mafunde amo a mu Baibolo akonsha kwitukwasha kwikala na muchima wa ‘kupembelela.’ (Mika 7:7) Kabiji tusakufunda mbaji ibiji ya bwikalo mo twafwainwa kupembelela Yehoba saka twatekanya. Apa bino twisambe ne pa bintu byawama Yehoba byo akobila boba bamupembelela.

3. Jifunde jiji pa Byambo bya Maana 13:11 jitufunjisha ñanyi kishinka?

³ Kinembelo kya Byambo bya Maana 13:11 kitufunjisha ene mambo o twafwainwa kutekanya. Kyaamba’mba: “Bunonshi bwa kunonka bukiji bukiji bukapwa, pakuba bunonshi bwa muntu unonka pachepache bukavula.” Mwamona jifunde jiji mu kino kyepelo nyi? Muntu wa maana uba bintu pachepache saka atekanya kabiji mufuma byawama.

4. Ñanyi kishinka kiji mu jifunde jiji pa Byambo bya Maana 4:18?

⁴ Byambo bya Maana 4:18 bitubuula’mba “jishinda ja baoloka jiji nobe kyeya kya lukelo kiya na kusama ne kusamisha kufikatu ne pa kushinkamana juba.” Abino byambo bimwesha kuba’mba  Yehoba ukwasha bantu banji kuyuka kyaswa muchima wanji pachepache. Nangwa byonkabyo, akino kyepelo kyakonsha kwingila ne ku mwina Kilishitu byo apimpula bwikalo bwanji ne kufwenya kwipi ne Yehoba. Kafwako muntu wakonsha kufikenatu kwikala na bulunda bwakosa na Lesa ne, papita kimye. Inge twateshako muchima kufunda ne kwingijisha lujimuno luji mu Mambo a Lesa ne lujimuno lufuma ku jibumba janji, pachepache tukatendeka kwikala na byubilo bya Kilishitu. Kabiji tukamuyuka bulongo Lesa. Monai Yesu byo alumbulwile kino kishinka.

5. Ñanyi kishimpi kyaingijishe Yesu kimwesha’mba papita kimye pa kuba’mba muntu apimpule bwikalo bwanji?

⁵ Yesu waingijishe kishimpi pa kulumbulula byambo bya Bufumu byo tusapwila biji nobe ka lukunwa kacheche kakoma pachepache mu michima ya bantu batemwa kyawama. Waambile’mba: “Nkunwa imena ne kukoma, bino [njimi] kechi uyuka byo ikoma ne. Mushiji mwine ye umenesha bijimwa pachepache, patanshi lunenge wa ntembela, palondela mutuntu, ne kipelako ke mutwe wa kajo kene.” (Mako 4:27, 28) Ñanyi kishinka kyaambilengapo Yesu? Walumbulwilenga’mba byonka kijimwa byo kikoma pachepache, ne muntu waswa byambo bya Bufumu papita kimye pa kuba’mba apimpule bwikalo bwanji. Bantu bo tufunjisha Baibolo inge batendeka kufwenya kwipi ne Yehoba, tutendeka kumona byo babena kupimpula byubilo byabo. (Efi. 4:22-24) Bino twafwainwa kuvulukanga kuba’mba Yehoba ye ukomesha nkunwa.—1 Ko. 3:7.

6-7. Tufunjilako ka ku jishinda Yehoba jo alengejilemo ntanda?

⁶ Mu bintu byonse byo oba, Yehoba utekanya ne kwingijisha kimye kyafwainwa pa kuba’mba apwishe mwingilo wanji. Uba bino pa kuba’mba alete lukumo pa jizhina janji ne kukwasha bilengwa byanji. Kimye kyo alengelenga ntanda kuba’mba pakekalenga bantu, Yehoba waubilenga bintu mu ndonda kimo kimo.

⁷ Pa kulumbulula Yehoba byo alengelenga ntanda, Baibolo waingijisha byambo bya kuba’mba “wiipimine,” waajile ‘bitendekesho byayo,’ ne kubika “jibwe jayo ja pa jikonka.” (Yoba 38:5, 6) Kabiji waikele ne na kimye kya  kulanguluka pa mingilo yanji. (Nte. 1:10, 12) Langulukai pa bamalaika byo baumvwinenga kimye kyo bamwenenga bintu bipya byalengelenga Yehoba. Bafwainwa basangalele bingi. Na mambo a kino, “babijikilenga saka batakaika.” (Yoba 38:7) Tufunjilako ka? Papichile myaka yavula bingi pa kuba’mba Yehoba apwishishe kulenga ntanda, tubangabanga, ne bilengwa byumi byonse. Bino kimye Yehoba kyo atajile pa bintu byonse byo alengele, waambile’mba “byawamishatu.”—Nte. 1:31.

8. Ñanyi bintu bikwabo byo tusakwisambapo?

⁸ Byonka byo twamona mu bintu byo twaambapo peulupo, twakonsha kutaana mafunde avula bingi mu Mambo a Lesa etufunjisha buneme bwa kutekanya. Pano tusakwisamba pa bintu bibiji mo twafwainwa kumweshesha’mba tupembelela Yehoba.

9. Ñanyi kintu kimo kyo twafwainwa kupembelela Yehoba kuba?

⁹ Twafwainwa kupembelela Yehoba kukumbula milombelo yetu. Inge twalomba bulume bwa kuchinchika lukatazho ne kwitukwasha kuleka kuba kintu kifichisha Yehoba ku muchima, twakonsha kumona nobe Yehoba ubena kubanda kukumbula milombelo yetu. Mambo ka Yehoba o abujila kukumbula milombelo yonse ponkapotu?

10. Mambo ka o twafwainwa kutekenya ne kupembelela Yehoba kukumbula milombelo yetu?

¹⁰ Yehoba umvwa milombelo yetu yonse. (Sala. 65:2) Umona milombelo yetu ya kufuma panshi ya muchima amba kiyukilo kimwesha lwitabilo lwetu mwi aye. (Hebe. 11:6) Umvwe twalomba kwi Yehoba kuba’mba etukwashe kumutokesha ku muchima, ukeba kumona inge tubena kwibikako kuba kyaswa muchima wanji. (1 Yoa. 3:22) Onkao mambo, inge twalomba Yehoba kuba’mba etukwashe kuleka kyubilo kimufichisha ku muchima, twafwainwa kutekanya ne kwingila papelela bulume bwetu kupimpula byubilo byetu. Yesu witukwashishe kuyuka’mba milombelo yetu imo kechi yakonsha kukumbulwa ponkapotu ne. Witutundaikile’mba: “Lombainga, bakemupa; kebainga, mukekitaana; konkonshainga, bakemushinkwilako; mambo yense ulomba, utambula, ukeba, wikitaana ne ukonkonsha naye bamushinkwilako.” (Mat. 7:7, 8) Inge twalondela luno lutundaiko ne ‘kulombanga na mukoyo,’ twakonsha kushiinwa kuba’mba Shetu wa mwiulu umvwa kabiji ukakumbula milombelo yetu.—Kolo. 4:2.

11. Kinembelo kya Bahebelu 4:16 kitukwasha byepi inge ke tumone nobe milombelo yetu kechi yakumbulwa bukiji ne?

¹¹ Nangwa kya kuba mukumbu wa milombelo yetu wakonsha kumweka nobe wabanda, bino Yehoba walaya kuba’mba ukakumbula milombelo yetu “pa kimye kyafwainwa.” (Tangai Bahebelu 4:16.) Onkao mambo, kechi twafwainwa kulangulukanga’mba Yehoba walubankanya inge wabula kukumbula milombelo yetu pa kimye kyo tubena kulanguluka’mba kyo afwainwa kukumbwilapo ne. Bavula balomba pa myaka yavula bingi kuba’mba Bufumu bwa Lesa bulete mpelo ya buno bwikalo. Ne Yesu waambilepo kuba’mba twafwainwa kulomba pa kino. (Mat. 6:10) Bino kyakonsha kwikala bumbulwa maana muntu kukookesha lwitabilo lwanji mwi Lesa na mambotu a kuba’mba mpelo kechi yaishile pa kimye bantu po beitengejilenga ne. (Ha. 2:3; Mat. 24:44) Twafwainwa kupembelelanga Yehoba ne kulomba kwi aye na lwitabilo kuba’mba uketukumbula. Mpelo ikeya pa kimye kyafwainwa, mambo Yehoba watongwela jimo “juba ne kimye” kikafika mpelo. Kabiji kino kikekala kimye kyafwainwa ku bonse.—Mat. 24:36; 2 Pe. 3:15.

12. Ñanyi kimye po kyakonsha kwitukatazha kutekanya?

¹² Twafwainwa kutekanya ne kupembelela kimye kyo bakafumyapo nshiji. Bantu mu ino ntanda javula bayanjisha banabakazhi, bantu baji  na kikoba kyapusanako, ba mutundu mukwabo, ba kisho kikwabo, nangwa bafuma ku byalo bingi. Bakwabo bebayanjisha na mambo bulema nangwa bikola bya ku bongo. Bantu ba Yehoba bavula bingi bebamanyika na mambo a kwitabila mu byaamba Baibolo. Inge babena kwituba nshiji mu ano mashinda, twafwainwa kuvulukanga byaambile Yesu. Waambile’mba: “Awa ukachinchika kufika ne ku mpelo, ye ukapuluka.” (Mat. 24:13) Pano mwakonsha kuba byepi inge kya kuba mwayuka’mba muntu umo mu kipwilo walenga mambo akatampe? Inge kya kuba bakulumpe mu kipwilo beayuka ano mambo, nanchi mukatekanya ne kuketekela’mba bakengijilapo monka mukebela Yehoba nyi? Ñanyi bintu byakonsha kuba bakulumpe mu kipwilo inge umo walenga mambo akatampe?

13. Yehoba ukeba’mba bakulumpe mu kipwilo bobenga byepi inge muntu umo walenga mambo akatampe?

¹³ Inge bakulumpe mu kipwilo bayuka kuba’mba muntu umo walenga mambo akatampe, balombapo ne kwipuzha Yehoba kwibapa “maana afuma mwiulu” pa kuba’mba bayuke Yehoba byo abena kumona o o mambo. (Yako. 3:17) Mwingilo wabo ke wa kukwasha muntu walenga mambo “kufuma mu jishinda jatama.” (Yako. 5:19, 20) Kabiji bengila papelela bulume bwabo kuzhikijila kipwilo ne kutekenesha boba bo bakozhezhe ku muchima na mambo alengele yeo muntu. (2 Ko. 1:3, 4) Inge bakulumpe bayuka’mba muntu umo walenga mambo, patanshi bafwainwa kukeba bishinka byonse, kabiji pakonsha kupita kimye pa kuba’mba bobe bino. Kabiji balombapo ne kwingijisha Binembelo pa kujimunako muntu walenga mambo ne kumololako “monka mo kyafwainwa.” (Yele. 30:11) Nangwa kya kuba kechi boba katende kwingijila pa mambo ne, bino bakulumpe mu kipwilo kechi banyemena kuchiba mambo ne. Bakulumpe mu kipwilo inge balondela mikambizho ifuma kwi Yehoba, kipwilo kikamwenamo bingi. Bino nangwatu inge bakulumpe mu kipwilo balondela lutangijilo lwa Yehoba ne kupana lujimuno lwafwainwa ku muntu walenga mambo, aba bantu bo alengeleko mambo bakonsha kutwajijila na kumvwa bibi ku muchima pa kyo aubile. Inge byo byo kiji kwi anweba, mwakonsha kuba byepi pa kuba’mba mukepesheko kumvwa bibi ku muchima?

14. Ñanyi jishimikila ja mu Baibolo jakonsha kwimukwasha inge kya kuba bemukozha ku muchima ku mulongo nangwa nyenga mu kipwilo?

¹⁴ Nanchi bakimukozhapo kala ku muchima ku muntu umo, kampe mulongo nangwa nyenga  nyi? Mwakonsha kutaana mashimikila awama mu Mambo a Lesa akonsha kwitufunjisha kupembelela Yehoba kwingijilapo pa makatazho. Jishimikila jimo ke ja kwa Yosefwa. Nangwa kya kuba bamubile nshiji ku bakolojanji, bundengamambo bwabo kechi bwamulengejile kuzhingila ne. Pakuba watele muchima pa kwingijila Yehoba, kabiji Yehoba wamufwetele pa butekanye bwanji ne kuchinchika. (Nte. 39:21) Mu kuya kwa kimye, Yosefwa walekejileko mambo bantu bamubile byatama, kabiji wimwenejile Yehoba byo amupesheshe. (Nte. 45:5) Byonkatu byo kyajinga kwi Yosefwa, kitutekenesha bingi inge twafwenya kwipi ne Yehoba ne kupembelela kimye kyafwainwa kyo akengijilapo pa nshiji yo babena kwituba.—Sala. 7:17; 73:28.

15. Ki ka kyakwashishe nyenga umo kuchinchika nshiji saka atekanya ne kwikala mu mutende?

¹⁵ Pano bino, kechi bakonsha kwituba nshiji ikatampe nabiji yo baubile Yosefwa ne, bino atweba bonse kitukola ku muchima inge muntu wituba kintu kyatama. Inge twaikala na lukatazho na muntu umo, nangwatu muntu ubula kupopwela Yehoba, tumwenamo bingi inge twaingijisha mafunde a mu Baibolo. (Fili. 2:3, 4) Langulukai pa kino kyamwekele. Nyenga umo kyamukolele bingi ku muchima kimye kyo ayukile’mba mukwabo mo bengijila nkito waambilenga byatama, bya bubela pe aye ku bakwabo. Uno nyenga kechi wafikenejiletu kuzhingila ne, bino waikele panshi ne kulanguluka pa bintu byapichilemo Yesu. Bantu byo bamutukilenga, aye kechi wibabwezhejilenga mwenga ne. (1 Pe. 2:21, 23) Byo alangulukile pa kino, wafuukwilepo kulubakotu ku byamwekele. Mu kuya kwa kimye, wayukile kuba’mba uno mukwabo mo bengijila nkito wajinga na kikola kabiji wajinga bingi na bijikila. Onkao mambo, nyenga walangulukile’mba uno mukwabo mo bengijila waambile byatama na mambo a makatazho o abena kupitamo. Kabiji uno nyenga wasangalele bingi na mambo a kuba’mba watekenye ne kuchinchika byatama byo bamubile, kabiji waikele na mutende wa mu milanguluko.

16. Ki ka kyakonsha kwimutekenesha inge mubena kuchinchika nshiji? (1 Petelo 3:12)

¹⁶ Inge mubena kuchinchika nshiji nangwa bintu bikwabo byatama bibena kwimuba bantu, vulukainga kuba’mba Yehoba uji kwipi na “boba balajika michima.” (Sala. 34:18) Wimutemwa mambo mwatekanya kabiji mumutwika bisendwa byenu. (Sala. 55:22) Ye Mutonyi wa  pano pa ntanda ponse. Umona byonsetu byubiwa. (Tangai 1 Petelo 3:12.) Onkao mambo, inge mubena kupita mu makatazho akatampe o mwakonsha kukankalwa kupwisha, vulukainga kuba’mba kyanema kupembelela Yehoba kwingijilapo.

17. Kwesakana na byaamba Isaya 30:18, Yehoba walaya kwitubila ka?

¹⁷ Katatakatu Shetu wa mwiulu aketubile byawama kwingijisha Bufumu bwanji. Isaya 30:18 waamba’mba: “Yehoba wimutekenya kuba’mba emubile bibusa, kabiji ukemana kuba’mba emubile lusa. Mambo Yehoba ye Lesa uchiba mambo monka mo aolokela. Bo bene ba lusekelo aba bonse babena kumupembelela.” Aba bapembelela Yehoba bakatambula mapesho avula luno ne mu ntanda ipya ibena kwiya.

18. Ñanyi bintu byawama byo tukeyowanga?

¹⁸ Kimye bantu ba Lesa kyo bakatwela mu ntanda ipya, kechi bakekalanga na bijikila ne kuchinchika makatazho o babena kupitamo ano moba ne. Nshiji ne misongo kechi bikekalako jibiji ne. (Lum. 21:4) Kechi tukekalangapo na bijikila na mambo a kulanguluka pa bintu bya mu bwikalo ne, mambo bonsetu bakekala na bintu byavula. (Sala. 72:16; Isa. 54:13) Byo kikawamapo!

19. Yehoba ubena kwitunengezha ku ñanyi kintu?

¹⁹ Pa kino kimye, Yehoba ubena kwitunengezha byo tukekalanga mu bukalama bwanji kupichila mu kwitukwasha kushinda miteeto yatama ne kwikala na byubilo bimutokesha ku muchima. Kange mukooke ne kuleka kwingijila Yehoba ne. Bwikalo bwawama bubena kwiya kulutwe. Byo tubena kutengela bwikalo bwawama buji kulutwe, twayai tutwajijile kwikala na lusekelo byo tubena kupembelela saka twatekanya kimye Yehoba kyo akapwisha makatazho onse.