Inge tubena kutanga Baibolo, twafwainwa kukebakeba bishinka byakonsha kwitukwasha kukwatakanya byo tubena kutanga. Kechi kutangangatu bintu byavula biji mu Baibolo ne. Tukeba kuyuka binshinka byakonsha kwitukwasha kukosesha bulunda bwetu ne Yehoba. Pa kuba’mba tube bino, twafwainwa kwiipizha’mba, jino ‘jishimikila ja mu Baibolo jibena kufunjishapo ka pe Yehoba?’

Twafwainwa kukebanga bishinka byakonsha kwitukwasha kuyuka byubilo bya Yehoba nabiji, butemwe, maana, bunchibamambo bwaoloka ne bulume. Nangwa byonkabyo, bino kechi byo byubilo byonka biji ne Yehoba ne. Uji ne na byubilo byo mwafwainwa kufunda. Kwepi ko mwafwainwa kutaana bino byubilo?

Monai byubilo bikwabo kukila 50 byo baambapo mu Watch Tower Publications Index pa mutwe wa kuba’mba “Jehovah” pano monai pa ka mutwe po baamba’mba “Qualities by Name.” Kebaipo bishinka byakwatankana na jishimikila ja mu Baibolo jo mubena kutanga. (Inge mujitu na buku wa kuba’mba Buku wa Kukwasha Bakamonyi ba kwa Yehoba Kukebakeba Bishinka, yai po banemba’mba “Yehoba Lesa” pa ka mutwe ka kuba’mba “Byubilo bya Yehoba.”)