Mepuzho Afuma ku Batanga
Ñanyi ndumbulwilo ya katataka yo balumbulwilamo jizhina ja Yehoba ne Bumfumu bwanji byo baambapo mu Kyamba kya Usopa kya June 2020 mu mutwe wa kuba’mba “Jizhina Jenu Jizhile?”
Mu uno mutwe twaambile pa mambo akunza bamalaika ne atweba lelo jino. Ano mambo ke a bumfumu bwa Lesa ne kuzhijika jizhina janji. Kafwako wakonsha kulama bulongo bantu byonka biji Yehoba ne. O ene mambo o twafwainwa kuzhijikilanga jizhina janji. Ne atweba, inge twatwajijila kwikala bakishinka kwi Yehoba tulengela jizhina janji kuzhijikwa.
Mambo ka o twafwainwa kwambila’mba ano mambo akatampe aimena pa jizhina ja Yehoba ne kwijizhijika? Twayai twisambe pa bishinka bisatu.
Kufumatu kimye kyo asatukile mu Edena, Satana watwajijila kuleta mwenga pa jizhina ja Lesa
Kitanshi, mu bujimi bwa Edena Satana wazhilulwile jizhina ja Yehoba nangwa’mba kwijitamisha. Bwipuzho Satana bo aipwizhe Evwa bwamwesheshenga’mba Yehoba kechi mpanyi ne. Kabiji’mba mizhilo yo ebapele yamwesheshenga’mba Yehoba kechi wibatemwa ne. Kepo Satana aambile byapusana na bya aambile Yehoba ne kulengela Lesa kumweka’mba wa bulela. Onkao mambo wazhilulwile jizhina ja Yehoba. Waikele ke “Diabola” kulumbulula’mba “wa luntepentepe.” (Yoa. 8:44) Evwa kechi wakookejile Lesa ne, mambo waswile bubela bwa kwa Satana. Kino kibena kumwesha’mba wakaine bukalama bwa kwa Yehoba. (Nte. 3:1-6) Satana watwajijila kwamba bubela pa byubilo biji ne Yehoba. Bonse betabila byo amba kechi bakookela Yehoba ne. Onkao mambo, bantu ba Yehoba bomvwa bingi kutama ku muchima pa kumvwa mwenga Satana ye aambile pa jizhina janji jazhila. Kino kintu kyo kyaleta lumanamo ne bubi pano pa ntanda.
Kya bubiji, Yehoba ukeba kutumbijika jizhina janji ne kufumyapo mwenga, pa kuba’mba bilengwa byonse bikamwenemo. Kino kyo kyanemeka Yehoba. Waambile’mba: “Amiwa nkazhijika jizhina jami jazhila.” (Ezi. 36:23) Kabiji Yesu waambile pa kintu kitanshi bantu ba Yehoba ba kishinka kyo bafwainwa kwambapo. Waambile’mba: “Jizhina jenu jizhile.” (Mat. 6:9) Baibolo waambapo bingi pa buneme bwa kutumbijika jizhina ja Yehoba. Akilangulukai pa bino Bishinka bimo byo aambapo: “Mupai Yehoba lukumo lwafwainwa jizhina janji.” (1 Moba 16:29; Sala. 96:8) “Imbai nyimbo ya kutota jizhina janji ja lukumo.” (Sala. 66:2) “Nkatumbijikanga jizhina jenu myaka ne myaka.” (Sala. 86:12) Yehoba mwine naye waambilepo’mba jizhina janji jitumbijikwe. Kimye kimo Yehoba kyo aambile pa kutumbijika jizhina janji mwine, ke kimye Yesu kyo ajinga mu nzubo ya Lesa mu Yelusalema. Yesu waambile’mba: “Tata tumbijikai jizhina jenu.” Kabiji Yehoba wakumbwile’mba: “Amiwa ne jitumbijika kabiji nkejitumbijika jibiji.”—Yoa. 12:28. a
Kya busatu, kuba kyaswa muchima wanji kwakwatankana na jizhina janji nangwa’mba byubilo byanji. Akilangulukai pa buneme bwa jizhina ja Yehoba. Kabiji akilangulukai pa jizhina ja Yehoba byo jikatumbijikwa, inge lweseko lwapelako lwapwa ko kuba’mba ku mpelo ya Bukalama bwa Myaka Kiumbi bwa kwa Kilishitu. Bamalaika bonse ne bantu bakomvwa byepi kimye Yehoba kyo akatumbijika jizhina janji? Pa kyokya kimye kechi kukekala kwesekwa pa kuba’mba tumweshe’mba twi ba kishinka kwi Yehoba ne. Tukekala balumbuluka kabiji bafikilamo. Kabiji pa kyokya kimye saka twatambula kala bumi bwa myaka ne myaka. Nanchi tukatwajijila kwambanga pa bumfumu bwa Yehoba ne kwabenamo mu lwetu nyi? Ine. Bilengwa byonse biji mwiulu ne pano pa ntanda bikakwatankana ne kuswa kuba’mba bukalama bwa Yehoba bo bwawama. Nanchi jizhina ja Yehoba jikatwajijila kutumbijikwa nyi?
Pa kyokya kimye bantu bonse bakayuka bukine pe Yehoba ne kuba’mba jizhina janji jatumbijikwa. Nangwa byonkabyo, bantu banji bonse bakatwajijila kutumbijika jizhina janji mwiulu ne pano pa ntanda. Mambo ka? Mambo bakatwajijila kumona bintu bya kukumya Yehoba byo akobanga. Mambo Yesu ukepelula ne kubwezha bufumu kwi Shanji. ‘Lesa po po akekala bintu byonse ku bantu bonse.’ (1 Ko. 15:28) Kepo bantu pano pa ntanda ponse ‘bakekala na bwana bwa bene bwa lukumo lwa baana ba Lesa.’ (Loma 8:21) Kabiji Yehoba ukafikizha kyaswa muchima wanji, kya kukwatankanya bilengwa byonse biji mwiulu ne pano pa ntanda kwikala ke kisemi kimo.—Efi. 1:10.
Bino byonse inge byamweka bikalengela bilengwa byonse mwiulu ne pano pa ntanda kwikala byepi? Bilengwa byonse bikatwajijila na kutota jizhina janji. Nyimbi wa salamo aye Davida wanembele’mba: “Atotwe Yehoba Lesa. . . Jizhina janji ja lukumo jitotwe myaka ne myaka.” (Sala. 72:18, 19) Tukatwajijila kumona bintu bimo biketulengelanga kutwajijila kumutota.
Jizhina ja Yehoba jilumbulula byo aji. Umvwe saka tulanguluka pa jizhina janji tumutemwa bingi. (1 Yoa. 4:8) Tukavulukanga’mba Yehoba witulengele ne kwitupa bukuzhi mambo witutemwa. Umwesha patoka kuba’mba bukalama bwanji bwawama kabiji uba bino byonse na mambo a butemwe. Tukatwajijila kumona butemwe bwa Yehoba myaka ne myaka. Kabiji tukatwajijila kufwenya kwi Shetu ne kwimba nyimbo ya kutota jizhina janji myaka ne myaka.—Sala. 73:28.
