Bimye bimo twakyambapo byonkabyo. Kino kyamwekele kukwatankana na byo tutanga pa Bahebelu 12:16. Kino kyepelo kyaamba’mba Isao wakankelwe “kunemeka bintu byazhila” kabiji “wapoteshe bubeji bwanji [kwi Yakoba] na kajo.” Kino kimwesha nobe Yakoba byo apotele “bubeji” waikele wa mu ndonda ya bashakulu ba Mesiasa.—Mat. 1:2, 16; Luka 3:23, 34.

Pano bino, mashimikila aji mu Baibolo amwesha’mba muntu kechi wafwainwe kwikala mubeji pa kubatu amba ekale mu ndonda ya bashakulu ba Mesiasa ne. Monai bishinka bimo byalondelapo:

Mubeji wa kwa Yakoba (Isalela) wajinga Lubenyi ye asemejile mwi Liya. Kabiji mwana mubeji Yakoba ye asemejile mwi Lechela wajinga Yosefwa. Bino Lubenyi byo alengele mambo, bubeji bwavilukijile Yosefwa. (Nte. 29:31-35; 30:22-25; 35:22-26; 49:22-26; 1 Moba 5:1, 2) Pano bino, ndonda mwasemekejilwe Mesiasa kechi yapichijile mwi Lubenyi nangwa Yosefwa ne. Mesiasa wasemekejilwe mu kisemi kya kwa Yuda, mwana wamulume wa buna wa kwa Yakoba ye asemejile mwi Liya.—Nte. 49:10.

 Luka 3:32 waamba pa ndonda ya bisemi bitanu mwasemekejilwe Mesiasa. Kyakonsha kumweka nobe banabalume bonse batongolwa bajinga babeji. Boaza wasemene Obeda, Obeda wasemene Yese.—Luta 4:17, 20-22; 1 Moba 2:10-12.

Pano bino, mwana wa kwa Yese aye Davida kechi wajinga mubeji ne. Ye wajinga mukala pa baana batanu na basatu. Nangwa byonkabyo, Mesiasa wasemekejilwe mu kisemi kya kwa Davida. (1 Sam. 16:10, 11; 17:12; Mat. 1:5, 6) Nangwatu Solomone naye kechi wajinga mubeji wa kwa Davida ne, bino wajinga mu ndonda ya kisemi mwasemekejilwe Mesiasa.—2 Sam. 3:2-5.

Kino kechi kibena kulumbulula’mba kwikala mubeji kechi wanemene ne. Mwana mubeji bamunemekele bingi, kabiji javula ye waikalanga mutwe wa kisemi. Kabiji ye mwana watambulanga bibiji bibiji mu bintu byonse.—Nte. 43:33; Mpitu. 21:17; Yosh. 17:1.

Pano bino, bubeji bwatuntulukanga. Abalahama wapangile Ishimela ne kupana bubeji kwi Izaka. (Nte. 21:14-21; 22:2) Kabiji byonka byo twaambapo kala, bubeji bwafumine kwi Lubenyi kuya kwi Yosefwa.

Twayai tubwele jibiji pa kinembelo kya Bahebelu 12:16, paamba’mba: “Jimukai kuba’mba mwi anweba mubule kwikala wa bulalelale nangwa ubula kunemeka bintu byazhila, byonka byajinga Isao wapoteshe bubeji bwanji na kajo.” Kino kinembelo kyatala mwepi?

Mutumwa Paulo kechi waambilenga pa ndonda ya kisemi mwasemekejilwe Mesiasa ne. Watundaikilenga bena Kilishitu ‘kwendanga kwa kubula kusendukamo mu jishinda jaoloka.’ Bafwainwe kujimuka, kuchina’mba ‘bakabula kubilwa lusa lukatampe lwa Lesa’ na mambo a bulalelale. (Hebe. 12:12-16) Kuba bino kwakonsheshe kwibalengela kwikala nobe Isao wabujile “kunemeka bintu byazhila.”

Isao wajingako mu kimye kya bashakulu, kampe naye wapanangako bitapisho bya milambo. (Nte. 8:20, 21; 12:7, 8; Yoba 1:4, 5) Na mambo a kutemwa bintu bya ku mubiji, Isao wapoteshe bubeji bwanji na nkunde. Kampe wachiine bya malwa byaambijilwe jimo amba byo bikapitamo ba mu kisemi kya kwa Abalahama. (Nte. 15:13) Kabiji Isao wamwesheshe’mba kechi wanemekele bintu byazhila ne, byo aletejile bansemi banji bulanda pa kusongola banabakazhi babiji babulanga kupopwela Lesa. (Nte. 26:34, 35) Yakoba kechi wajinga byonka byajinga Isao ne, aye wasongwele mwanamukazhi wapopwelanga Lesa wa kine!—Nte. 28:6, 7; 29:10-12, 18.

Pano twakonsha kwamba’mba ka pa ndonda ya kisemi mwasemekejilwe Yesu, Mesiasa? Bimye bimo ino ndonda yapichijile mu baana babeji, bino bimye bikwabo ne. Bayudea bayukile kino kabiji bekiswishishe, byonka byo baswile’mba Kilishitu wasemekejilwe mu kisemi kya kwa Davida mukala wa kwa Yese.—Mat. 22:42.