Anweba Banyike—‘Ibikishaingako Kuba’mba Lesa Akemupulushe’
“Byonkatu byo mukookela kimye kyonse, . . . ikalainga na moyo ne kuzakama byo mubena kwibikishako kuba’mba Lesa akemupulushe.”—FILI. 2:12.
NYIMBO: 133, 135
1. Mambo ka lubatizhilo o lwanemena? (Monai kipikichala kitanshi.)
PA MWAKA pa mwaka, bantu bavula bingi bafunda Baibolo babatizhiwa. Bavula pa bano ke banyike, kabiji bamo bakyangye ne kufikizha myaka ya kusemwa 13. Kampe bebakomesha ku bansemi bena Kilishitu. Nanchi byo byo kiji kwi anweba nyi? Inge byo ibyo, tubena kwimusanchila. Mwina Kilishitu wafwainwa kubatizhiwa pa kuba’mba akapuluke ne kwikala myaka ne myaka.—Mat. 28:19, 20; 1 Pe. 3:21.
2. Mambo ka o mwafwainwa kubujila kuchiina kwipana kwi Lesa?
2 Byo mwabatizhiwe, Lesa watendekele kwimupesha mu mashinda apusana pusana. Pano bino, muji na mwingilo mukatampe. Ñanyi mwingilo yenkao? Juba jo mwabatizhiwe, mwakumbwile’mba ee ku bwipuzho bwa kuba’mba: “Na mambo a kitapisho kya kwa Yesu Kilishitu, nanchi mwalapila ku bundengamambo bwenu ne kwipana anweba bene kwi Yehoba kuba kyaswa muchima wanji nyi?” Byo mwabatizhiwe mwamwesheshe’mba mwipana kwi Lesa. Mwalayile Yehoba kuba’mba mukatwajijila kumutemwa ne kutangizhako
kuba kyaswa muchima wanji kukila bintu bikwabo. Uno ke mulaye wanema bingi. Nanchi mwilangulusha pa kulaya uno mulaye nyi? Ine, kechi mwafwainwa kuba byobyo ne. Kufwenya kwipi ne Yehoba ke kintu kyanema bingi. Bino inge muntu wifumya kwi Yehoba wikala wa kwa Satana. Diabola kechi ukeba’mba mukapuluke ne. Aye wakonsha kumvwa bulongo inge mwakana bumfumu bwa Yehoba, mambo ko kuba’mba kechi mukapuluka ne kwikala myaka ne myaka ne.3. Ñanyi bintu byawama bifuma mu kwipana kwi Yehoba?
3 Kupusanako na kutundaika Satana, langulukai pa mapesho o muji nao na mambo a kwipana ne kubatizhiwa. Byo mwapana bumi bwenu kwi Yehoba, mwakonsha kwamba na luketekelo amba: “Yehoba uji ne amiwa; kechi nkachina ne. Muntu angube ka?” (Sala. 118:6) Kwikala ku lubaji lwa Lesa ne kuyuka’mba wimutemwa ke kintu kyanema bingi.
MUNTU YENSE WAFWAINWA KWIFUUKWILA
4, 5. (a) Mambo ka muntu mwine o afwainwa kwifuukwilapo kwipana kwi Lesa? (b) Ñanyi makatazho apitamo bena Kilishitu bonse?
4 Byo muji mwina Kilishitu wabatizhiwa, bulunda bwenu ne Yehoba kechi buji nobe kipe kya bansemi kyo mwakonsha kuswana ne. Mwafwainwa kwingila na ngovu kuba’mba mukapuluke nangwa kya kuba mukikala na bansemi. Mambo ka o kyanemena kuvuluka kino kishinka? Mambo kechi mwakonsha kuyuka makatazho o mukapitamo kulutwe ne. Inge kya kuba mwabatizhiwe saka mukiji kalombwana nangwa kashimbi, muyuke’mba pa kukoma mukapitapo mu makatazho. Mwanyike wamukazhi uji na myaka 18 waambile’mba: “Mwanyike kechi wakonsha kumvwa kutama na mambo a kubula kusekelela moba a kusemwa na mambo a kwikala Kamonyi wa kwa Yehoba ne. Bino inge wakomako kimye nzala ya ku maulu po ibaya, wafwainwa kushiinwa’mba kukookela mizhilo ya Yehoba kwanema.”
5 Mwafwainwa kuyuka’mba banyike kechi bo bonkatu bapita mu makatazho ne. Nangwatu boba babatizhiwe saka bakoma bapita mu meseko eseka lwitabilo lwabo. Ano makatazho akonsha kwikala a mu masongola, kubela nangwa ku nkito. Onkao mambo, bakulumpe ne banyike bonse bapita mu makatazho akebewa kwibikako kwikala ba kishinka kwi Yehoba.—Yako. 1:12-14.
6. (a) Mu ñanyi jishinda kwipana kwenu kwi Yehoba mo kubujila kwimena pa bukishinka bwa muntu mukwabo? (b) Mufunjilako ka ku byambo biji pa Filipai 4:11-13?
6 Pa kuba’mba mutwajijile kwikala ba kishinka kwi Yehoba, mwafwainwa kuvulukanga’mba mulaye wa kwipana kwi Lesa kechi waimena pa bukishinka bwa muntu mukwabo ne. Kino kibena kulumbulula’mba mwalaya Nkambo mfumu wa bilengwa byonse amba mukatwajijila kumwingijila nangwatu inge balunda nenu nangwa bansemi benu baleka kumwingijila. (Sala. 27:10) Inge ke mupite mu makatazho, mwafwainwa kulomba Yehoba kuba’mba emukwashe mutwajijile kulama mulaye wenu wa kwipana.—Tangai Filipai 4:11-13.
7. Kilumbulula ka ‘kwikala na moyo ne kuzakama’ byo mubena kwibikishako kuba’mba Lesa akemupulushe?
7 Yehoba ukeba’mba mwikale balunda nanji. Pano bino, kikebewa kwingila na ngovu pa kuba’mba mutwajijile kwikala balunda na Lesa ne kukapuluka. Pa Filipai 2:12 paamba’mba: “Ikalainga na moyo ne kuzakama byo mubena kwibikishako kuba’mba Lesa akemupulushe.” Bino byambo bibena kumwesha byo mwakonsha kuba pa kuba’mba mutwajijile kwikala balunda na Yehoba ne kutwajijila kwikala ba kishinka kwi aye nangwa kya kuba mubena kupita mu makatazho. Kechi mwafwainwa kwiketekela anweba bene ne. Nangwatu bamo baingijila Lesa pa myaka yavula baleka kumwingijila. Pano mwafwainwa kuba byepi pa kuba’mba mukapuluke?
KUFUNDA BAIBOLO KWANEMA
8. Ñanyi bintu byavwangwa mu lufunjisho lwa pa bunke, kabiji lwanemena ka?
8 Pa kuba’mba twikale balunda na Yehoba, twafwainwa kutelekanga kwi aye ne kwisamba nanji. Kwikala na lufunjisho lwa Baibolo lwa bunke jo jishinda jo tutelekelamo kwi Yehoba. Kino kyavwangamo kutanga Mambo a Lesa ne mabuku etu alumbulula Baibolo, ne kulanguluka langulukapo. Bino mwafwainwa kuyuka’mba kufunda Baibolo kwanema bingi kukila bintu byonse. Kechi kwafwainwa kwikala nobe mubena kulabijila bintu byo mwafunjile ku sukulu pa kuba’mba mube bulongo mu mpeso ne. Bino kwafwainwa kwikalatu nobe muntu ubena kuya na kukeba bya buneme. Umvwe ke mube bino, mukayukilapo byavula pe Yehoba. Kuba bino kukemulengela kufwenya kwipi ne Lesa, ne aye ukafwenya kwipi ne anweba.—Yako. 4:8.
Nanchi mwisamba ne Yehoba kimye kyonse nyi? (Monai mafuka 8-11)
9. Ñanyi bingijisho bimukwasha kufunda bulongo Baibolo?
9 Jibumba ja Yehoba jitunengezhezha bingijisho byavula bingi byafwainwa kwimukwasha kufunda bulongo Baibolo. Pa keyala wetu wa Kizungu wa jw.org pa kipungu kya kuba’mba “Teenagers” paji panembwa’mba “Bible Study Activities.” Kino kipungu kyakonsha kwimukwasha kuyuka bya kwijingisha byo mufunda mu Baibolo. Kabiji paji ne kipungu kya kuba’mba, “Nanchi Baibolo Kine Ufunjisha’mba Ka?” kyakonsha kwimukwasha kushiinwa mu bintu byo mwaitabilamo. Kabiji bino bipungu byakonsha kwimukwasha kuyuka bya kulumbulwila bakwenu bintu byo mwaitabilamo. Bikwabo bya kwimukwasha kufunda bulongo Baibolo mwakonsha kwibitaana mu kibaaba kya “Young People Ask . . . How Can I Make Bible Reading Enjoyable? (Banyike Bepuzha Amba . . . Nakonsha Kuba Byepi pa Kuba’mba Neyowenga Kutanga Baibolo?)” mu Labainga! wa Kizungu wa April 2009. Kufunda Mambo a Lesa ne kulanguluka langulukapo kwanema bingi mambo kukemulengela kupuluka.—Tangai Salamo 119:105.
KULOMBA KWANEMA
10. Mambo ka mwina Kilishitu wabatizhiwa o afwainwa kulombelanga kimye kyonse?
10 Nangwa kya kuba kufunda Baibolo kwitulengela kuteleka kwi Yehoba, bino kulomba jo jishinda jo twisambilamo ne aye. Mwina Kilishitu kechi wafwainwa kumonanga kulomba nobe kisho; nangwa nobe muchi wa mashuko ne. Bino kulomba jo jishinda jo twisambilamo na Mulenga wetu. Yehoba ukeba kumvwa byo mulomba. Filipai 4:6.) Inge mwaikala na bijikila, Baibolo waamba’mba mwafwainwa ‘kutwika Yehoba kisendwa kyenu.’ (Sala. 55:22) Nanchi mwaitabila kino nyi? Kuji balongo ne banyenga bavula bingi bakonsha kwimubuula’mba milombelo ibakwasha bingi. Ne anweba yakonsha kwimukwasha.
(Tangai11. Mambo ka o mwafwainwa kusanchilanga Yehoba kimye kyonse?
11 Pano bino, kechi twafwainwa kulombangatu inge ketukebe bukwasho bwa Yehoba ne. Baibolo waamba’mba: “Saka musanta.” (Kolo. 3:15) Bimye bimo twakonsha kutatu muchima pa makatazho etu kya kuba twalubako ne bintu byawama bitubila Lesa. Mambo ka a kubujila kwikalangapo na kimye pa juba pa juba kya kulanguluka pa bintu bisatu byo mwakonsha kusanchilapo Lesa? Apa bino mwamusanchila Yehoba pa byobyo bintu byawama byo emubila. Nsongwakazhi wa jizhina ja Abigail wabatizhiwe saka aji na myaka 12, waambile’mba: “Mmona kuba’mba Yehoba ye ye twafwainwa kusanchilanga bingi. Twafwainwa kulangulukanga pa bintu byonse bitupa Yehoba ne kumusanchila kimye kyonse. Mvuluka bwipuzho bwawama bo baipwizhepo bamo, amba: Umvwe Yehoba wafuukwilepo kwitupatu bintu byonka byo twamusanchilapo, twakonsha kwikala na bintu binga?”
KYANEMA KUFUNJILAKO KU BINTU BYO MUPITAMO
12, 13. Mambo ka o kyanemena kulanguluka pa buwame bwa Yehoba?
12 Mfumu Davida wapichile mu meseko akatampe, waambile byambo biji mu uno lwimbo amba: “Mutompai Yehoba mumone byo awama; ye mwine wa lusekelo awa muntu ufyama mwi aye.” (Sala. 34:8) Kino kyepelo kyamwesha buneme bwa kulanguluka pa bintu byo twapitamo. Inge mubena kutanga Baibolo ne mabuku etu, kabiji inge mwaya na kupwila, mwakonsha kufunda pe Lesa byo akwashishe bakwenu kutwajijila kwikala ba kishinka kwi aye. Bino umvwe mwaikala na bulunda bwakosa na Lesa, mukatendeka kwimwena Yehoba byo abena kwimukwasha mu bwikalo bwenu. Abya mwatompa buwame bwa Yehoba mu bwikalo bwenu nyi?
13 Kuji jishinda jimo bena Kilishitu bonse mo batompela buwame bwa Yehoba. Ke kufwenya kwipi kwi Lesa ne ku Mwananji. Yesu waambile’mba: “Kafwako muntu wakonsha kwiya kwi amiwa ne, poso Batata bantumine bamukokela ko nji.” (Yoa. 6:44) Nanchi mumvwa’mba bino byambo bingila ne kwi anweba nyi? Mwanyike wakonsha kulanguluka’mba, ‘Yehoba wakokele bansemi bami, amiwa nebalondejiletu.’ Bino kimye kyo mwipaine anweba bene kwi Yehoba ne kubatizhiwa, mwamwesheshe’mba mwaikala balunda nanji. Pano Lesa wimuyuka. Baibolo witulaya’mba: “Umvwe muntu watemwa Lesa, uno muntu wayukanyikwa kwi aye.” (1 Ko. 8:3) Onkao mambo, nemekainga kifulo Yehoba kyo emupa mu jibumba janji.
14, 15. Kusapwila kwakonsha kukosesha byepi lwitabilo lwenu?
14 Jishinda jikwabo jo mwakonsha kutompelamo buwame bwa Yehoba ke kubuulako bakwenu bintu byo mwaitabilamo ne kumona Lesa byo emukwasha. Mwakonsha kuba bino kupichila mu kusapwila ku mvula bantu ne pa sukulu. Bamo kibakatazha bingi kusapwila bakwabo baana ba sukulu. Kyamweka mwayuka ne kilengela. Mambo kechi muyuka byo basakuba inge mwibasapwila ne. Kyakonsha kukilamo kukatazha kikatakata inge mubena kusapwila ku jibumba ja bakwenu baana ba sukulu kukila byo kikala pa kwisamba na muntu umo umo. Ki ka kyakonsha kwimukwasha?
15 Patanshi, langulukai pa kimulengela kushiinwa mu bintu byo mwaitabilamo. Nanchi bya kwingijisha pa kufunda Baibolo biji pa jw.org po biji mu mulaka wenu nyi? Inge kechi mwayuka po kyaikela ne, esekai kukebakeba. Mafunjisho Yele. 20:8, 9.
ajimo akemukwasha kulanguluka pa bintu byo mwaitabilamo, ene mambo o mwaitabila byobyo, ne byo mwakonsha kulumbulwila bakwenu bintu byo mwaitabilamo. Umvwe mwashiinwa mu bintu byo mwaitabilamo kabiji mwinengezha bulongo, mukatundaikwa kushimuna bukamonyi pa jizhina ja Yehoba.—16. Ki ka kyakonsha kwimukwasha kubula kukankazhama kwamba pa byo mwaitabilamo?
16 Bino nangwatu inge mwinengezha, mwakonsha kukankazhama kwamba pa bintu byo mwaitabilamo. Nyenga uji na myaka 18, wabatizhiwe saka aji na myaka 13 waambile’mba, “Nayuka bintu byo naitabilamo, bino bimye bimo kinkatazha kubuulako bakwetu.” Uba byepi pa kuba’mba ashinde uno mukiika? Waambile’mba: “Patanshi ñambatu pa bintu bikwabo. Bakwetu baana ba sukulu bakasuluka kwamba pa bintu byo boba. Ne amiwa nafwainwa kukasuluka kwamba pa bintu byo naitabilamo. Onkao mambo, natemwa kwingijisha ñambilo ya kuba’mba, ‘Kesha nafunjishenga Baibolo, kabiji . . . ’ Apa bino natwajijila kwamba pa byamwekele. Nangwa kya kuba kechi nshinkamika kwamba pa Baibolo ne, bino javula bakwetu bakeba kuyuka byo nguba pa kufunjisha Baibolo. Bimye bimo bepuzha mepuzho. Jino jishinda jinkwasha bingi. Kabiji ñumvwa bingi bulongo.”
17. Kushiinwa mu byo mwaitabilamo kukemukwasha byepi kusapwila?
17 Inge kemunemeke bakwenu ne kwibata muchima, nabo bakemunemeka ne kunemeka byo mwaitabilamo. Olivia, uji na myaka 17 kabiji wabatizhiwe saka akijitu kashimbi, waambile’mba: “Nachinanga namba inge mbena kwisamba na bakwetu natendeka kwamba pa Baibolo, bantu bakammonango nobe nakizhamotu kwamba pa bya bupopweshi.” Bino mu kuya kwa kimye wapimpwile milanguluko yanji. Walekele kuchina bantu mambo watendekele kulanguluka’mba: “Banyike bavula kechi bayuka byavula pa Bakamonyi ba kwa Yehoba ne. Yetu bonka Bakamonyi bo bayuka. Bintu byo tuba byo bikebalengela kutako muchima ku byo twamba. Pano kyakonsha kwikala byepi inge twaikala na moyo, nangwa tukankalwa kwamba pa lwitabilo lwetu, nangwa inge tuzakama pa kwamba? Bakalanguluka’mba kechi twashiinwa mu bintu byo twaitabilamo ne. Bakonsha ne kukana kwisamba nabo na mambo a kumona’mba kechi twashiinwa ne. Nangwa byonkabyo, inge ketwambe saka twakasuluka ne kumwesha’mba twashiinwa mu byo twaitabilamo, ne kwambapo kimye kyonse mu misambo yetu, bantu baketunemeka.”
IBIKISHAINGAKO KUBA’MBA LESA AKEMUPULUSHE
18. Ñanyi bintu byo mwafwainwa kuba pa kuba’mba mukapuluke?
18 Byonka byo twamona, anweba bene mwafwainwa kwibikako pa kuba’mba mukapuluke. Bintu bimo byavwangwamo ke kutanga Mambo a Lesa ne kulanguluka langulukapo, ne kulanguluka pa bintu byawama bimubila Yehoba pa bunke bwenu. Kuba bino kukemukwasha kushiinwa kuba’mba kwikala mulunda na Yehoba ke kintu kyawama bingi. Kabiji kino kikemulengela kwamba pa bintu byo mwaitabilamo saka mwakasuluka.—Tangai Salamo 73:28.
19. Mambo ka o kyawamina kwibikishako kuba’mba tukapuluke?
19 Yesu waambile’mba: “Umvwe muntu ukeba kundondela, ekane mwine ne kusenda kichi kyanji kya lumanamo kabiji andondelenga.” (Mat. 16:24) Kya kine, muntu mwine ye wafwainwa kwifuukwilapo kwipana ne kubatizhiwa ne kwikala mwana wa bwanga wa kwa Yesu. Bino lubatizhilo yo ntendekelotu ya bwikalo bwawama pa kino kimye ne bumi bwa myaka ne myaka mu ntanda ipya ya Lesa. Onkao mambo, muji na bishinka byafwainwa kwimulengela kwibikishako kuba’mba Lesa akemupulushe.