Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Bansemi bafuma ku byalo bingi bakonsha kuyuka byepi mulaka ye bafwainwa kwingijisha pa kukwasha baana babo kwikala balunda na Lesa?

Baana benu bafunda mulaka wa ku kyalo ko muji kimye kyo baji ku sukulu ne pa kukaya na bakwabo. Kabiji kufunda kwamba milaka ikwabo kukwasha bingi baana. Bansemi bafwainwa kulangulukapo bulongo pa kuba’mba bayuke kipwilo kwafwainwa kupwilanga baana babo, kana kya mulaka wa ku mpunzha ko bavilukila nangwa kya mulaka wabo wa kisemwa. Bansemi bena Kilishitu batangizhako kukwasha baana babo kwikala na lwitabilo lwakosa, kechi bintu byo batemwa abo bene ne.—w17.05, ma. 9-11.

Yesu byo aipwizhe Petelo amba: “Nanchi wantemwa kukila ano nyi?” waambile pa ka? (Yoa. 21:15)

Kyamweka Yesu waambilenga pa masabi ajinga pepi nangwa pa mwingilo wa kukwata masabi. Yesu byo afwile, Petelo wabwelele ku mwingilo wanji ye aingilanga kala wa kukwata masabi. Bena Kilishitu bafwainwa kwipima ne kumona inge bakizhamo kunemeka nkito ya ku mubiji.—w17.05, ma. 22-23.

Mambo ka Abalahama o aambijile mukazhanji kubuula bantu amba wajinga nyenga yanji? (Nte. 12:10-13)

Kya kine Sala wajinga nyenga yanji wa mu bainanji bakwabo. Inge kya kuba Sala waambile’mba wajinga mukazhanji, Abalahama inge bamwipayile kabiji inge kechi wasemene mwana wamulayile Lesa ne.—wp17.3, ma. 14-15.

Ñanyi jishinda jaingijishe Elias Hutter pa kuba’mba akwashe boba bakebelenga kufunda Kihebelu?

Pa kuba’mba akwashe bantu bo afunjishanga kuyuka byambo bine bya mu Kihebelu ne byo banungileko, wanembanga byambo bine bya Kihebelu mu bisopelo bikatampe bifiita, bino byo banungako wibinembanga mu bisopelo bicheche. Jino jo jishinda jo baingijishe ne pa kunemba tubyambo twa munshi mu Baibolo wa Kizungu wa New World Translation of the Holy Scriptures—With References.—wp17.4, ma. 11-12.

Ñanyi bishinka byafwainwa kulangulukapo mwina Kilishitu ukeba kwikala na buta bwa kwizhikijilako ku balwanyi?

Bishinka bimo ke bino: Lesa wanemeka bingi bumi bwa bantu. Yesu kechi watundaikilepo baana banji ba bwanga kwikala na mapoko a kwizhikijilako ne. (Luka 22:36, 38) Twafwainwa kwalula mapoko etu ke bya kujimako. Bumi bwanema kukila bunonshi. Tunemeka jiwi ja mu muchima ja bakwetu, kabiji tukeba kwikala babula kaneneno. (2 Ko. 4:2)—w17.07, ma. 31-32.

Mambo ka jishimikila ja kusemwa kwa Yesu jiji mu buku wa Mateo o japusena na jiji mu buku wa Luka?

Jishimikila ja kwa Mateo jaamba kikatakata pa bintu byamwekejile Yosefwa, byo aubile kimye kyo ayukile’mba Maliya waimita, ne byambo byamubuujile Lesa kuba’mba anyemene ku Ijipita ne kubwela pa kupitapo kimye. Jishimikila ja kwa Luka jaamba kikatakata pe Maliya; kimye kyo ayile na kumona mulongo wanji aye Elisabeta, ne byo aubile kimye Yesu kyo ashajile mu nzubo ya Lesa mu Yelusalema.—w17.08, ji. 32.

Ñanyi bizumba bimo byapitamo Baibolo?

Kupimpulwa kwa milaka pa kupitapo kimye kwalengela ndumbulwilo ya byambo bimo bya mu Baibolo kupimpulwa. Kupimpulwa kwa makafulumende a bantu kulengela kwaluka kwa milaka yamba bantu bavula pa kyokyo kimye. Kwajinga bantu bamo bakainyenga kutuntulula Baibolo mu milaka yamba bantu bavula.—w17.09, ma. 19-21.

Nanchi tuji na malaika wituzhikijila nyi?

Ine. Yesu waambile pa bamalaika ba baana banji ba bwanga amba kimye kyonse bamona kilungi kya Lesa. (Mat. 18:10) Yesu watazhizhe mu kuba’mba bamalaika batako bingi muchima ku bingila baana banji ba bwanga, kechi amba mwana wa bwanga yense uji na malaika umuzhikijila mu jishinda ja kukumya ne.—wp17.5, ji. 5.

Ñanyi butemwe bwakila butemwe bonse?

Butemwe bwaimena pa mafunde a mu Baibolo (butelwa’mba a·ga’pe), bo butemwe bwakila butemwe bonse. Buno butemwe kechi bumwekelatu mu bintu byawama byo tulangulukapo pa bakwetu ne, bino bumwekela kikatakata mu bintu byo twibobila.—w17.10, ji. 7.